तीसरइया चरण बर बाईस अप्रैल तक उम्मीदवार अपन नाम वापस ले सकही। तीसरइया चरण बर सात मई के वोट डाले जाही।
पहला चरण मतदान- प्रतिशत
लोकसभा चुनाव के पहलइया चरण के तहत काली बस्तर संसदीय क्षेत्र म अड़सठ फीसदी ले जादा मतदान होय हे। निर्वाचन आयोग ह मतदान के अंतिम आंकड़ा जारी कर देहे। एखर मुताबिक बस्तर जिला म सबले जादा तिरासी फीसदी अउ बीजापुर जिला म सबले कम तिरालीस फीसदी वोट डारे गेहे। उहें, जगदलपुर म पचहत्तर, चित्रकोट म छिहत्तर, दंतेवाड़ा म सड़सठ, कोंडागांव म पचहत्तर अउ कांटा म चउवन अउ नारायणपुर विधानसभा क्षेत्र म अड़सठ प्रतिसत मतदान होय हे।
लोकसभा चुनाव-प्रचार
लोकसभा चुनाव के दूसरइया अउ तीसरइया चरण के तहत चुनाव प्रचार अभियान जोर पकड़ लेहे। प्रदेस म भाजपा अउ कांग्रेस के अलावा दूसर राजनीतिक दल के स्टार प्रचारक मनके आय के सिलसिला काली ले सुरू होगे हे। वरिष्ठ भाजपा नेता अउ उत्तर प्रदेस के मुख्यमंत्री योगी आदित्य नाथ ह काली राजनांदगांव संसदीय क्षेत्र के कुमरदा गांव म सभा लिही। एखर बाद काली ही कोरबा अउ बिलासपुर संसदीय क्षेत्र के बेलतरा म घलो जनसभा ल संबोधित करही।
बेलतरा म श्री योगी आदित्यनाथ के जनसभा के तइयारी के सिलसिला म आज भाजपा पदाधिकारी मनके बइठका होइस। ए कारीकरम के व्यवस्थापक अउ बेलतरा विधायक सुशांत शुक्ला ह बतइन कि बइठका म पार्टी कार्यकर्ता मनके जिम्मेदारी तय करे गेहे।
उहें, कांग्रेस के राष्ट्रीय महासचिव प्रियंका गांधी ह घलो काली छत्तीसगढ़ के दौरा म पहुंचही। श्रीमती गांधी काली राजनांदगांव लोकसभा क्षेत्र म बालोद के हथोद अउ मोहड़ म चुनावी सभा लिही।
एखर अलावा प्रधानमंत्री नरेंद्र मोदी तेईस अप्रैल के जांजगीर-चांपा लोकसभा क्षेत्र के सक्ति अउ महासमुंद लोकसभा क्षेत्र के धमतरी म जनसभा लिही। एखर बाद ओमन चौबीस अप्रैल के अंबिकापुर म चुनावी सभा ल संबोधित करही। उहें, केंद्रीय गृहमंत्री श्री शाह बाईस अप्रैल के कांकेर म अउ भाजपा के राष्ट्रीय अध्यक्ष जे.पी. नड्डा घलो बाईस अप्रैल के लोरमी, आरंग अउ भिलाई म चुनावी सभा ल संबोधित करही।
भाजपा/कांग्रेस-प्रचार
जांजगीर म काली भाजपा उम्मीदवार कमलेश जांगड़े के नामांकन रैली म मुख्यमंत्री विष्णुदेव साय सामिल होइन। ए मउका म आम सभा ल संबोधित करत हुए श्री साय ह कांग्रेस उपर जमके प्रहार करीन। श्री साय ह किहीन कि पांच साल तक छत्तीसगढ़ ल लुटइया कांग्रेस अब प्रदेस के जनता ल गुमराह करत हुए लोकसभा चुनाव म फेर वोट मांगत हे। ओमन किहीन कि ए पइत के लोकसभा चुनाव कोई साधारण चुनाव नोहय। ए तो नरेंद्र मोदी के तीसरइया बखत देस के प्रधानमंत्री बने के चुनाव आय। ए चुनाव सभा ल उप मुख्यमंत्री अरूण साव ह घलो संबोधित करीन।
दूसरइया डहार चुनावी प्रचार अभियान के तहत जांजगीर पहुंचे कांग्रेस के राष्ट्रीय प्रवक्ता राधिका खेरा ह भाजपा के नीति मन उपर सवाल उठाइन। जांजगीर म प्रेस-कान्फ्रेंस ल संबोधित करत हुए सुश्री खेरा ह किहीन कि केंद्र के भाजपा सरकार के दस साल म न तो महंगाई कम होइस, अउ न ही रोजगार मिलिस। ओमन किहीन कि भाजपा ह देस के जनता ले जउन वादा करे रिहीन, उहू पूरा नइ होय हे।
नाव हादसा-मौत
ओड़िसा के झारसुगुड़ा जिला म महानदी म नाव पलटे ले आठ झन के मौत होगे। उहें, एक झन महिला लापता हे। ए हादसा म पचास झन ल बचा ले गेहे। सबो मृतक रायगढ़ जिला के खरसिया ब्लॉक स्थित अंजोरी पाली गांव के रहइया आय। ए हादसा म मारे गे सबो आठ झन गा्रमीण मनके सव बरामद कर ले गेहे।
पुलिस के मुताबिक पाछू रतिहा करीबन सत्तर झन ले भरे एक ठन नाव महानदी म पलट गे। ए सबो झन रायगढ़ जिला के अंजोरी पाली अउ कोतलिया गांव ले ओड़िसा के पथरसेनी मंदिर म दर्सन बर गे रिहीन। वापसी म उंखर नाव महानदी म पलट गे अउ हादसा के बाद आठ झन लापता होगे। घटना के जानकारी मिलते ही झारसुगुड़ा अउ रायगढ़ जिला के पुलिस प्रशासन के वरिष्ठ अधिकारी मउका म पहुंचिन। एखर बाद लापता लोगन मनके तलासी सुरू होगे अउ आज मंझनिया तक आठ झन के सव बरामद कर ले गेहे। मृतक म पांच झन महिला अउ तीन झन लइका सामिल हे।
मुख्यमंत्री विष्णुदेव साय अउ वित्त मंत्री ओ.पी. चौधरी ह ए घटना बर दुख जताय हे। ओमन बतइन कि ए हादसा म मारेगे ग्रामीण मनके परिजन ल चार-चार लाख सहायता रासि दे जाही। संगेसंग ओमन घायल मनके समुचित इलाज बर जरूरी दिसा-निरदेस देहे।
निर्वाचन आयोग-अनुग्रह राशि
बस्तर लोकसभा क्षेत्र म काली निर्वाचन ड्यूटी के दौरान माओवादी वारदात म सहीद होय जवान के परिजन मन ल तीस लाख रूपिया अउ घायल जवान ल पंद्रह लाख रूपिया के अनुग्रह रासि दे जाही।
मुख्य निर्वाचन पदाधिकारी रीना बाबा साहेब कंगाले ह बतइन कि ए भारत निर्वाचन आयोग के दिसा निरदेस के अनुसार निर्वाचन कार्य म नियोजित सीआरपीएफ के सहीद आरक्षक अउ घायल असिस्टेंट कमांडेंट बर अनुग्रह रासि के मंजूरी दे जात हे।
जइसन कि खबर दे चुके हन कि काली बस्तर लोकसभा क्षेत्र म मतदान के दौरान बीजापुर जिला के उसूर थाना क्षेत्र के गलगम मतदान केंद्र करा आईईडी ब्लास्ट म सीआरपीएफ के आरक्षक देवेंद्र कुमार गंभीर रूप ले घायल होगे रिहीन अउ इलाज बर एयर एंबुलेंस ले रायपुर लावत बेरा ओखर निधन होगे रिहीस। उहें, एरिया डोमेनेसन के दौरान भैरमगढ़ क्षेत्र के चिहका क्षेत्र म आईईडी ब्लास्ट के चपेट म आय ले सीआरपीएफ के असिस्टेंट कमांडेंट मनु एचसी घायल होगे हे, ओखर इलाज रायपुर म चलत हे।
ट्रेन परिचालन
दक्षिण पूर्व मध्य रेलवे के सरोना-कुम्हारी रेलवे स्टेसन के बीच तीसरा लाइन म ऑटोमेटिक सिग्नलिंग प्रणाली के काम होय के सेति यात्री ट्रेन मनके आज अउ काली परिचालन प्रभावित होही। ए दौरान रायपुर-दुर्ग अउ रायपुर-डोंगरगढ़ मेमू स्पेसल पैसेंजर ट्रेन रद्द रइही। अइसने गोंदिया-रायपुर अउ इतवारी स्पेसल पैसेंजर ट्रेन घलो नइ चलय। उहें, आज अउ काली अंतागढ़-रायपुर अउ ताड़ोकी-रायपुर ट्रेन दुरूग अउ रायपुर के बीच रद्द रइही। एखर अलावा बिसाखापट्टनम-दुर्ग एक्सप्रेस बेलसोंडा अउ दुर्ग के बीच नइ चलय।
इही बीच, बिलासपुर मंडल ले गुजरना वाले सबो गाड़ी मन म अग्नि सुरक्षा उपर चलाय गे बिसेस अभियान के अंतिम दीन आय। ए अभियान पाछू पंद्रह अप्रैल ले चलाय जात हे। एखर मुख्य उद्देस्य यात्री मन ल जागरूक कर ट्रेन म आगजनी घटना के जोखिम ल कम करना आय। ए दौरान वाणिज्य विभाग अउ रेल सुरक्षा बल के अधिकारी ट्रेन मन म बिसेस कर पेंट्रीकार, स्टेसन अउ रेलवे परिसर मनके निरीक्षण करत हे।