प्रदेस म लोकसभा चुनई के पहलइया चरण के तहत बस्तर संसदीय क्षेत्र म काली उन्नीस अप्रैल के मतदान होही। प्रदेस के मुख्य निर्वाचन पदाधिकारी रीना बाबा साहेब कंगाले ह आज रायपुर म एक पत्रकारवार्ता म बतईन कि मतदान बर निर्वाचन आयोग ह सबो तैयारी कर लेहे। एखरे संग सबो संवेदनशील क्षेत्र मन म सुरक्षा के पुख्ता इंतजाम करे गेहे। ए सीट बर ग्यारह उम्मीदवार चुनाव मैदान म हे। एमा कांग्रेस ले कवासी लखमा अउ भाजपा ले महेश कश्यप प्रमुख हे। एखर अलावा आने राजनीतिक दल के उम्मीदवार अउ निर्दलीय प्रत्याशी घलो चुनाव मैदान म हे।
ओमन ह बतईन कि बस्तर संसदीय क्षेत्र बर मतदान के समय घलो निर्धारित कर दे गेहे। एखर तहत कोंडागांव, नारायणपुर, चित्रकोट, दंतेवाड़ा, बीजापुर अउ कोंटा विधानसभा क्षेत्र म बिहनिया सात बजे ले मंझनिया तीन बजे तक मतदान होही। उहें, बस्तर विधानसभा क्षेत्र म बिहनिया सात बजे ले संझा पांच बजे तक वोट डाले जाही। एखरे तहत जगदलपुर विधानसभा क्षेत्र के एक सौ पचहत्तर मतदान केन्द्र म घलो बिहनिया सात बजे ले संझा पांच बजे तक अउ बहत्तर मतदान केन्द्र मन म बिहनिया सात बजे ले मंझनिया तीन बजे तक मतदान होही। ओमन ह बतईन कि मतदान बर काली कोंडागांव, नारायणपुर, बस्तर, दंतेवाड़ा, बीजापुर अउ सुकमा जिला म सार्वजनिक अउ सामान्य छुट्टी घोसित करे गेहे। उहें, श्रम विभाग ह श्रमिक मन बर घलो सवैतनिक छुट्टी घोसित करे हे।
पहला चरण मतदान-02
मुख्य निर्वाचन पदाधिकारी ह बतईन कि बस्तर संसदीय सीट म ए बार एक हजार नौ सौ इकसठ मतदान केन्द्र बनाय गेहे। एखर बर सात हजार आठ सौ चवालीस मतदानकर्मी मन ल तैनात करे गेहे।
ए संसदीय क्षेत्र म एक सौ इंक्यानवे संगवारी मतदान केन्द्र बनाय गेहे। उहें, आठ मतदान केन्द्र दिव्यांगजन मन डहार ले अउ छत्तीस मतदान केन्द्र युवा मन डहार ले संचालित करे जाही। एखर अलावा बयालीस मतदान केन्द्र ल आदर्श मतदान केन्द्र बनाय गेहे।
बस्तर लोकसभा सीट के सबो आठ विधानसभा क्षेत्र म निष्पक्ष अउ सांतिपूर्ण चुनाव बर वीडियोग्राफी अउ वेबकास्टिंग के व्यवस्था घलो करे गेहे। ए क्षेत्र के आठ सौ ग्यारह मतदान केन्द्र मन म वेबकास्टिंग के सुविधा उपलब्ध कराय गेहे, जेखर माध्यम ले निर्वाचन आयोग ए केन्द्र मन उपर नजर राखही। ए सबो केन्द्र मन म मतदान दल मन ल हेलीकॉप्टर ले पहिली ही भेजे जा चुके हे। ओमन ह बतईन कि बस्तर संसदीय क्षेत्र म एक सौ छियानवे मतदान केन्द्र मन ल अति संवेदनशील घोसित करे गेहे।
सबो मतदान केन्द्र म मतदाता सहायक बूथ स्थापित करे जाही, जेमा बीएलओ मतदाता मन ल उंखर नाम अउ सरल क्रमांक ढूंढे म मदद करही।
तीसरा चरण-नामांकन
एखर बाद श्री साय कोरबा पहुंच के पार्टी उम्मीदवार सरोज पांडेय के समर्थन म आयोजित रैली म सामिल होइन। श्री साय के अलावा प्रदेस भाजपा के आने नेता मनके संग कलेक्टोरेट पहुंच के सरोज पांडेय ह अपन नामांकन पत्र दाखिल करीन।
ओति, जांजगीर-चांपा लोकसभा सीट ले कांग्रेस प्रत्याशी डॉक्टर शिव कुमार डहरिया ह पार्टी कार्यकर्ता अउ पदाधिकारी मनके संग आज अपन नामांकन जमा करीन।
उहें, रायगढ़ लोकसभा सीट ले कांग्रेस उम्मीदवार डॉक्टर मेनका देवी सिंह ह घलो पार्टी के क्षेत्रीय विधायक अउ आने नेता मनके संग कलेक्टोरेट पहुंच के अपन नामांकन दाखिल करीन। ए मउका म क्षेत्रीय विधायक लालजीत सिंह राठिया, उमेश पटेल, विद्यावती सिदार, उत्तरी जांगड़े के संग स्थानीय कार्यकर्ता घलो मौजूद रिहीन।
तीसरइया चरण के तहत बीस अप्रैल के नामांकन पत्र मनके जांच करे जाही। बाईस अप्रैल तक उम्मीदवार अपन नाम वापस ले सकही। तीसरइया चरण म सात मई के वोट डाले जाही।
भाजपा/कांग्रेस-सभा
प्रदेस म लोकसभा चुनई के दूसरइया चरण बर राजनीतिक दल मनके प्रचार अभियान अब अपन चरम म पहुंचत हे। आने-आने राजनीतिक दल के प्रमुख नेता अउ स्टार प्रचारक लगातार जनसभा लेके मतदाता मनके समर्थन हासिल करे के परयास करत हे। इही कड़ी म भाजपा के वरिष्ठ नेता अउ मुख्यमंत्री विष्णुदेव साय ह महासमुंद लोकसभा क्षेत्र के बागबाहरा म पार्टी प्रत्याशी रूपकुमार चौधरी के समर्थन म एक जनसभा ल संबोधित करीन।
इही बीच, जांजगीर-चांपा लोकसभा क्षेत्र ले कांग्रेस प्रत्याशी डॉक्टर शिव डहरिया के समर्थन म पार्टी डहार ले एक चुनावी सभा के आयोजन करे गीस। एमा नेता प्रतिपक्ष डॉक्टर चरणदास महंत, प्रदेस के पूर्व मंत्री जयसिंह अग्रवाल, विधायक बालेश्वर साहू के संग आने-आने कार्यकर्ता मौजूद रिहीन। सभा ल संबोधित करत हुए डॉक्टर महंत ह उम्मीद जतईन कि ए दरी लोकसभा चुनाव म कांग्रेस के स्थिति पिछलइया चुनाव के अपेक्षा ज्यादा अच्छा होही।
इही बीच, कांग्रेस के स्टार प्रचारक प्रियंका गांधी वाड्रा इक्कीस अप्रैल के कांकेर लोकसभा क्षेत्र म अवइया बालोद जिला के हथौद म जनसभा ल संबोधित करही।
मुख्यमंत्री-बयान
मुख्यमंत्री विष्णुदेव साय ह कांकेर जिला के छोटेबेठिया थाना क्षेत्र म पाछु होय मुठभेड़ के संबंध म कांग्रेस उपर माओवादी मन ल संरक्षण देके आरोप लगाय हे। श्री साय ह कहिन कि कांकेर के मुठभेड़ ल फर्जी बतइया कांग्रेस नेता के बयान ले स्पष्ट हे कि ओ ह माओवादी ल संरक्षण देके काम करत रेहे हे। ओमन ह कहिन कि बस्तर के जनता कांग्रेस के ए रवैया ल बर्दाश्त नइ करही। श्री साय ह कहिन कि प्रधानमंत्री अउ केन्द्रीय गृहमंत्री के नेतृत्व अउ मार्गदर्शन म राज्य सरकार माओवादी मनके खिलाफ निर्णायक लड़ाई लड़ के जल्दी ही प्रदेस ल ए समस्या ले मुक्त कराही। ओमन ह कहिन कि माओवादी मनके सबले सुरक्षित जघा कहे जाना वाला छोटेबेठिया म सुरक्षा बल के जवान मन ह उनतीस माओवादी मन ल मार गिराय हे, जेन माओवादी मनके उपर करे गे अब तक के सबले बड़े सर्जिकल स्ट्राइक हे।
सेना भर्ती परीक्षा
भारतीय सेना म भर्ती बर ऑनलाइन संयुक्त प्रवेश परीक्षा के तारीख घोषित कर दे गेहे। ए परीक्षा बाईस, तेईस, चौबीस, पच्चीस, उनतीस अउ तीस अप्रैल के होही। एखर अलावा दू अउ तीन मई के घलो प्रवेश परीक्षा ले जाही। ए परीक्षा म भारतीय सेना के वेबसाइट म पंजीयन करइया उम्मीदवार सामिल हो सकही। ए परीक्षा तीन पाली म आयोजित करे जाही। सेना भर्ती कार्यालय के अनुसार ए बार अग्निवीर कार्यालय सहायक के पद बर आवेदन करइया उम्मीदवार मनके टायपिंग टेस्ट घलो ऑनलाइन परीक्षा केन्द्र मन म ही ले जाही। ए परीक्षा बर प्रवेश पत्र भारतीय सेना के वेबसाइट ले डाउनलोड करे जा सकत हे। छत्तीसगढ़ म रायपुर के अलावा, भिलाई, दुर्ग, बिलासपुर अउ जगदलपुर ल परीक्षा केन्द्र बनाय गेहे।
सारंगढ़-बंद
सारंगढ़ म पाछु एक महीना के अंदर दू युवक मनके हत्या के विरोध म आज सारंगढ़ बंद के आह्वान करे गेहे। चैम्बर ऑफ कॉमर्स के स्थानीय इकाई के आह्वान म करे गे बंद सांतिपूर्ण रिहीस। एखर समर्थन म आज ज्यादातर व्यापारी मन ह अपन दुकान बंद रखीन। व्यापारी मन ह जिला प्रसासन ले कानून व्यवस्था के संबंध म ज्ञापन सौंपीन अउ आपराधिक घटना ल रोके बर कड़ा कदम उठाय के अपील करीन।
ग्रीष्मकालीन स्पेशल ट्रेन
रेलवे ह गर्मी के मौसम म यात्री मनके ज्यादा संख्या ल देखत हुए पुरी-निजामुद्दीन समर स्पेशल ट्रेन सुरू करे हे। ए ट्रेन बिलासपुर ले होके चलही। एमा कुल दस फेरा होही। ए ट्रेन म सबो यात्री ल कन्फर्म सीट के सुविधा दे जाही। अपन पहिली फेरा के तहत ए ट्रेन उन्नीस अप्रैल के पुरी ले रवाना होही।