कांकेर जिला म आज सुरक्षा बल अउ माओवादी मन संग होय मुठभेड़ म 29 माओवादी मारे गेहे। जेमा ले 18 माओवादी के सव बरामद कर ले गेहे। ए मुठभेड़ म सीमा सुरक्षा बल-बीएसएफ के एक इंस्पेक्टर समेत तीन झिन जवान घायल होगे हे।
बस्तर संभाग म कांकेर जिला के छोटेबेठिया थाना क्षेत्र के कलपर के जंगल म मंझनिया ए मुठभेड़ होइस। सीमा सुरक्षा बल अउ डिस्ट्रिक्ट रिजर्व गार्ड के संयुक्त टीम के माओवादी मन संग करीबन आधा घंटा गोलीबारी होइस। जिला के पुलिस अधीक्षक इंद्रा कल्याण एलेसेला ह मुठभेड़ के पुष्टि करे हे। घटना जघा ले एक एके-फोर्टि सेवन समेत दू ठिन राइफल बरामद करे गेहे। घटनास्थल बर अतिरिक्त बल भेजे गेहे। उहें, ए क्षेत्र म तलाशी अभियान चलत हे।
नामांकन जमा
छत्तीसगढ़ म लोकसभा चुनाव के तीसर चरण के तहत जउन सात संसदीय क्षेत्र म सात मई के मतदान होना हे, उहां नामांकन जमा करे के काम चलत हे। आज ये लोकसभा सीट बर उनचालीस उम्मीदवार मन नामांकन दाखिल करीन। सरगुजा अउ रायगढ़ म तीन-तीन, कोरबा म चार, जांजगीर अउ दुरूग म पांच-पांच, बिलासपुर म छह अउ रईपुर म तेरह नामांकन जमा होय हे। तीसर चरण म अभी तक संतावन उम्मीदवार मन ह नामांकन पत्र दाखिल करे हे। ये लोकसभा सीट म नामांकन जमा करे के आखिरी तारीख उन्नीस अप्रैल हवय।
इही बीच, छत्तीसगढ़ म लोकसभा चुनाव के पहिली अउ दूसर चरण म अब तक चार हजार पांच सौ बैसठ डाक मतपत्र मिले हे। सबले जादा दू हजार दू सौ चौरासी डाक मतपत्र बस्तर म, एक हजार अड़सठ महासमुंद म, एक हजार बैसठ कांकेर म अउ राजनांदगांव सीट बर एक सौ अड़तालीस डाक मतपत्र मिले हे।
आज कोरबा लोकसभा क्षेत्र ले भाजपा प्रत्याशी सरोज पांडेय ह अपन नामांकन पत्र दाखिल करीन। ए दउरान उंखर संग कैबिनेट मंत्री लखनलाल देवांगन मौजूद रिहीन।
उहें, कांग्रेस प्रत्याशी ज्योत्सना महंत ह घलो कोरबा लोकसभा सीट ले नामांकन पत्र जमा करीन। ए बेरा म प्रदेस कांग्रेस अध्यक्ष दीपक बैज, पूर्व मुख्यमंत्री भूपेश बघेल अउ नेता प्रतिपक्ष डॉक्टर चरणदास महंत मौजूद रिहीन।
अइसने, जांजगीर-चांपा क्षेत्र ले भाजपा प्रत्याशी कमलेश जांगड़े के नामांकन दाखिल करे के दउरान मुख्यमंत्री विष्णुदेव साय, प्रदेस भाजपा अध्यक्ष किरण सिंह देव समेत कतकोन मंत्री मौजूद रिहीन। इही लोकसभा क्षेत्र ले कांग्रेस प्रत्याशी डॉक्टर शिवकुमार डहरिया ह घलो कलेक्ट्रेट पहुंच के अपन नामांकन भरीन।
ओति, रायगढ़ लोकसभा क्षेत्र ले भाजपा प्रत्याशी राधेश्याम राठिया ह अपन नामांकन दाखिल करीन।
मतदान दल-रवाना
लोकसभा चुनई के पहिली चरण म बस्तर संसदीय क्षेत्र म उन्नीस अप्रैल के मतदान होही। निष्पक्ष अउ सांति पूर्ण ढंग ले चुनाव कराय बर मतदान दल भेजे जात हे। एमा आज सुकमा, बीजापुर अउ नारायणपुर जिला के करीबन एक सौ पैंतीस मतदान दल ल हेलीकॉप्टर ले भेजे जात हे। बस्तर क्षेत्र म सुरक्षा ल देखत करीबन तीन सौ पचास अतिरिक्त कंपनी के तैनाती करे गेहे।
हमर संवाददाता ह बतईन कि बस्तर लोकसभा क्षेत्र म एक हजार नौ सौ संतावन मतदान केन्द्र मन म पांच सौ नब्बे केन्द्र अति-संवेदनशील हे। उहें, दू सौ चौंतीस मतदान केन्द्र ल माओवादी गतिविधि के सेती दिगर जघा म भेजे गेहे। उहें, एक सौ अट्ठारह नवा बूथ माओवाद प्रभावित क्षेत्र म बनाय गेहे। एखर ले ए बखत के लोकसभा चुनई म गांव के लोगन अपने गांव म वोट डार सकही।
खबर के मुताबिक बस्तर लोकसभा क्षेत्र म आठ विधानसभा क्षेत्र आथे। एमा कोंडागांव, नारायणपुर, बस्तर, जगदलपुर, चित्रकोट, दंतेवाड़ा, बीजापुर अउ कोंटा विधानसभा सामिल हे। ए सीट म ग्यारह उम्मीदवार चुनई मैदान म हवय।
मतदाता-जागरूकता-01
उहें, स्वीप कार्यक्रम म महामाया मंदिर परिसर म मौजूद श्रद्धालु मन ह लोकतंत्र के महापर्व म बढ़-चढ़के अपन भागीदारी निभाय के सपथ लीन। जिला म ‘‘शत-प्रतिशत मतदान-बिलासपुर का अभियान‘‘ म लोगन ल मतदान करे के संदेस दे जावत हे।
ओति, कोंडागांव जिला के फरसगांव म साप्ताहिक बाजार म युवोदय कोंडानार चैम्पस के स्वयंसेवक मन ह मतदाता जागरूकता अभियान चलईन। ए दउरान स्वयंसेवक मन ह कतकोन जघा म दीवार लेखन करके लोगन ल मतदान के संदेस दीन। संगेसंग नुक्कड़ नाटक अउ रैली ले मतदान के महत्व बतावत वोट डारे के अपील करीन।
अइसने, गौरेला-पेण्ड्रा-मरवाही जिला के दुर्गा मंदिर म श्रद्धालु मन ह दीया जलाके ‘‘हर घर दीप-हर घर स्वीप‘‘ के आकार बनाके जागरूकता के संदेस दीन। ए बेरा म जिला निर्वाचन अधिकारी लीना कमलेश मंडावी ह लोगन ल मतदान के सपथ देवईन।
मतदाता-जागरूकता-02
मतदाता जागरूकता म मुंगेली पुलिस कोति ले मैराथन दउड़ राखे गीस। एमा कतकोन सामाजिक संगठन, वरिष्ठ नागरिक, स्कूल-कॉलेज के पढ़ईया लइका संघरीन। एमा ‘‘वोट जैसा कुछ नहीं, वोट जरूर डालेंगे हम‘‘ स्लोगन ले लोगन ल वोट के महत्ता बताय गीस अउ छत्तीसगढ़ी म मतदान के सपथ देवाय गीस।
इही जिला के लोरमी म ‘‘रखबो मुंगेली के मान, करबो सबो झन मतदान‘‘ स्लोगन ले मतदाता मन ल साइकिल रैली निकाल के जागरूक करे गीस। ए रैली म सिक्षक अउ छात्र-छात्रा सामिल होइन।
जांजगीर-प्रेरणा कार्यक्रम
जांजगीर-चांपा के पीएमश्री केन्द्रीय विद्यालय म प्रेरणा कार्यक्रम राखे गीस। ए कार्यक्रम म जिला के आने-आने स्कूल के करीबन एक सौ छिहत्तर पढ़ईया लइका संघरीन। केन्द्रीय सिक्षा मंत्रालय कोति ले राखे गे ए कारीकरम म सैक्षिक विषय ले जुड़े पेंटिंग, कविता अउ निबंध प्रतियोगिता होइस। एमा चुने गे एक छात्र अउ छात्रा ल गुजरात के वड़नगर म आयोजित प्रशिक्षण सिविर म भेजे जाही।
अष्टमी/रामनवमीं
आज चइत नवरात्र के महाअष्टमी हे। आज के दिन आदिशक्ति मां दुर्गा के आठवां स्वरूप महागौरी के पूजापाठ करे जाथे। राजधानी रईपुर समेत राज्य के सबो शक्तिपीठ अउ देवी मंदिर मन म नवरात्रि के बेरा पूजा अउ अनुष्ठान के कार्यक्रम होवत हे। आज बिहनिया ले सबो शक्तिपीठ अउ देवी मंदिर मन म भक्ति संग लोगन पूजा बर अपन बारी के अगोरा करत रिहीन। जगह-जगह हवन अउ भंडारा के संग कन्याभोज के आयोजन करे गीस। जगदलपुर म मां दंतेश्वरी मंदिर अउ मां छिंदावली समेत आने देवी मंदिर मन म हवन पूजन होइस।
काली रामनवमीं हे। बिहनियाच ले जोत-ज्वारा के विसर्जन होही अउ राम मंदिर मन म बिसेस पूजा संग प्रसाद के भोग लगही।
यूपीएससी-परिणाम
संघ लोक सेवा आयोग-यूपीएससी ह सिविल सेवा परीक्षा दू हजार तेईस के अंतिम परिणाम घोषित कर देहे। ए परीक्षा म आदित्य श्रीवास्तव पहिली स्थान म हवय। उहें, अनिमेष प्रधान ह दूसर अउ दोनुरू अनन्या रेड्डी ह तीसर स्थान पाय हे। आयोग ह नियुक्ति बर कुल एक हजार सोलह उम्मीदवार के नाव के अनुसंसा करे हे। ए परीक्षा म छह लाख ले जादा छात्र-छात्रा मन ह भाग ले रिहीन।
ए परीक्षा म रईपुर के अनुषा पिल्ले ह दू सौ दू रैंक हासिल करे हे। ओमन ह पूर्व आईपीएस अधिकारी संजय पिल्ले अउ अतिरिक्त मुख्य सचिव रेणुजी पिल्ले के बेटी हवय।