भाजपा के बड़का नेता अउ प्रधानमंत्री नरेंद्र मोदी पार्टी अध्यक्ष जगत प्रकाश नड्डा, राजनाथ सिंह, अमित शाह अउ निर्मला सीतारमण के मौजूदगी म ए संकल्प पत्र जारी करे गीस। ए संकल्प पत्र म भाजपा ह प्रधानमंत्री गरीब कल्याण अन्न योजना के तहत मुफ्त रासन के सहूलियत ल अवइया पांच बछर तक ले जारी राखे के बात केहे हे। संगे आयुष्मान भारत योजना म देस के सबो सियान मनखे मन ल सामिल करे के वादा करे गेहे।
संकल्प पत्र म तीन करोड़ लखपति दीदी बनाय उपर जोर दे गेहे अउ पीएम सूर्य घर योजना के संगे बिजली बिल सून्य करे के वादा करे गेहे। भाजपा ह देस ल दुनिया के तीसर सबले बड़का अर्थव्यवस्था के संगेसंग वैश्विक वी निर्माण केंद्र बनाय के वादा करे हे।
ए मउका म प्रधानमंत्री श्री मोदी ह किहीन कि संकल्प पत्र ह विकसित राष्ट्र के चार ठिन मजबूत पिल्लहर- जवान लइका, माईलोगिन, किसान अउ गरीब मनखे ल मजबूत बनाही। ओमन किहीन कि संकल्प पत्र ह जीवन के गरिमा अउ गुणवत्ता उपर केंद्रित हे। श्री मोदी ह किहीन कि भाजपा ह नवा सैटेलाइट सहर बनाही।
ऐति छत्तीसगढ़ के मुख्यमंत्री अउ भाजपा के बड़का नेता विष्णुदेव साय ह रईपुर म होय पत्रकारवार्ता म भाजपा के संकल्प पत्र ल जारी करीन। ए मउका म श्री साय ह किहीन कि केंद्र म भाजपा के सरकार बनही, त देसभर म तीन करोड़ पक्का मकान बनाय जाही। ए मउका म रईपुर लोकसभा ले भाजपा प्रत्यासी बृजमोहन अग्रवाल समेत आने बड़का नेता घलो मौजूद रिहीन।
संकल्प पत्र-कांग्रेस प्रतिक्रिया
दूसर डहार भाजपा के संकल्प पत्र उपर अपन प्रतिक्रिया देवत प्रदेस कांग्रेस अध्यक्ष दीपक बैज ह किहीन कि भाजपा ल जनता ले नवा वायदा करे के कोनो नैतिक अधिकार नइ हे। ओमन किहीन कि भाजपा ह जनता ले करे गे वायदा ल पूरा नइ करे हे। एखर सेति, ओहा संकल्प पत्र नइ भलूक माफीनामा जारी करय। श्री बैज ह यहू किहीन कि भाजपा के घोसना पत्र म सक्षम अउ स्वालंबी भारत बनाय सोझ कुछू भी नइ हे।
अमित शाह-खैरागढ़
बड़का भाजपा नेता अउ केंद्रीय गृहमंत्री अमित शाह राजनांदगांव लोकसभा क्षेत्र अंतर्गत खैरागढ़ नगर म आमसभा ल संबोधित करत किहीन कि प्रधानमंत्री नरेंद्र मोदी के अगुवई म कहू केंद्र म तीसर बेर भाजपा के सरकार बनही, त छत्तीसगढ़ ल नक्सलवाद के समस्या ले पूरा तरह ले मुक्त कर दे जाही। श्री शाह ह किहीन कि केंद्र म पाछू दस बछर म मोदी सरकार के कार्यकाल दौरान देस के बांकी हिस्सा मन म नक्सलवाद सिरागे हे। सिरिफ छत्तीसगढ़ म बांचे हे। ओमन किहीन कि तीसर कार्यकाल म छत्तीसगढ़ ले घलो एला खतम कर दे जाही।
गृहमंत्री ह किहीन कि छत्तीसगढ़ म कांग्रेस सरकार के कार्यकाल दौरान नक्सलवाद के खिलाफ अभियान धीमा पड़गे रिहीस, फेर राज्य म भाजपा के सरकार बनते साठ एमा तेजी आय हे। अउ बीतें चार महिना म छप्पन ले जादा माओवादी मारे गेहे। उहें, करीबन डेढ़ सौ माओवादी मन ल गिरफ्तार करे गेहे।
श्री शाह ह किहीन कि कांग्रेस ह झूठ-लबारी के व्यापार करथे। ओहा कहिथे कि भाजपा संविधान बदल दिही अउ मोदी जी तीसर बेर सत्ता म आही त, आरक्षण ल सिरो दीहि। श्री शाह किहिन कि चाहे कुछ भी हो जाय भारतीय जनता पार्टी ह न तो आरक्षण ल खतम करही, अउ न ही कोनो ल करन दीहि।
उहें, भाजपा के बड़का नेता अउ मुख्यमंत्री विष्णुदेव साय ह किहीन कि छत्तीसगढ़ के जनता ल धोखा देके संगे भ्रष्टाचार ल बढ़ावा देके काम कांग्रेस के सरकार ह करे हवय।
मतदाता जागरूकता
लोकसभा चुनाव के तहत मतदान करे बर लोगन मन ल जागरूक करे बर प्रदेसभर म अब्बड़ अकन कार्यक्रम राखे जावत हे। इही कड़ी म आज मुंगेली जिला के पुराना बस स्टैंड म डॉक्टर भीमराव अंबेडकर के जयंती के मउका म स्वास्थ्य सिविर लगाय गीस, जिहां लोगन मनके स्वास्थ्य के जांच करे गीस अउ ओमन ल मुफ्त म दवा बांटे गीस। ए दौरान सिविर म पहुंचे लोगन मन ल मतदाता जागरूकता के सपथ घलो देवाय गीस। उहें, दाऊपारा ले मतदाता जागरूकता रैली निकाले गीस, जेमा सामिल मनखे मन सत-प्रतिसत मतदान के आरो दीन।
ओति, धमतरी जिला म नवरात परब बेरा मोहेरा स्थित निरई माता मंदिर म आयोजित मेला म गंवई के मनखे समेत तीर-तखार जघा ले पहुंचे दर्सनार्थी मन स्वीप रैली निकाल के मतदान करे सपथ लीन।
अइसनहे, कबीरधाम कलेक्टर अउ जिला निर्वाचन अधिकारी जनमेजय महोबे अउ स्वीप कारीकरम के जिला नोडल अधिकारी, जिला पंचायत सीईओ संदीप कुमार अग्रवाल ह आज मतदाता जागरूकता कारीकरम के तहत बियाबान वनांचल क्षेत्र चिल्फी अउ लुप के दौरा करीन।
राष्ट्र आज संविधान निर्माता डॉक्टर भीमराव अंबेडकर ल उंखर एक सौ चौतीसवां जयंती मउका म श्रध्दांजलि अर्पित करत हे। राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेंद्र मोदी ह संसद परिसर म डॉक्टर अंबेडकर के मूर्ति उपर फूलमाला अर्पित करीन।
ऐति छत्तीसगढ़ म घलो अंबेडकर जयंती के मउका म कई ठिन कारीकरम होवत हे। रईपुर के अंबेडकर चौक म राखेगे कारीकरम म भाजपा सहर मंडल के सदस्य मन उंखर मूर्ति उपर हारफूल अर्पित करीन।
उहें, बौध्द समाज के मनखे मन अंबेडकर चौक ले बाईक रैली निकालीन जउन ह सहर के मुख्य मार्ग मन ले होवत अंबेडकर चौक पहुंचिस।
इही तरह जांजगीर-चांपा के कचहरी चौक स्थित डॉक्टर अंबेडकर के प्रतिमा उपर डॉक्टर चरणदास महंत ह हारफूल पहिनाके अपन श्रध्दांजलि करीन।
ऐति, जगदलपुर के लालबाग मैदान म राखेगे कारीकरम म सर्वसमाज के लोगन सामिल होइन अउ डॉक्टर अंबेडकर के मूर्ति उपर माला अर्पित करीन।
सरगुजा आगजनी-बच्चे मौत
सरगुजा जिला के मैनपॉट थाना जघा म बीते रतिहा एक ठिन झोपड़ी म आगी लगे ले तीन झिन सग भाई-बहिनी के जल के मौत होगे।
हमर संवाददाता ह बतइन कि ए घटना ह जिला के बरिमा गांव के पकरीखार मोहल्ला म होय हे, जिहां एक झिन मांझी परिवार के दू झिन नोनी अउ एक झिन बाबू एक ठिन कुरिया म सोय रिहीन। उहें, ओखर महतारी ह एक झिन आने नान्हे लइका ल लेके दूसर कुरिया म सोय रिहीस, इही दौरान झोपड़ी म आगी लगत देख तीर-तखार के मनखे मन पुलिस ल सूचना दीस। नींद म सोवत लइका मन ल बाहिर निकले के मउका नइ मिलिस अउ ओमन बुरी तरह ले झुलस गे। ए पाय के मउकच म तीनों लइका के मौत होगे। एखर मनके उमर छै ले नौ बछर के बीच रिहीस। आगी लगे के कोनो कारण पता नइ चले हे, फेर पुलिस ह मामला के जांच करत हे।
अग्नि सुरक्षा सप्ताह
बिलासपुर जिला म आज ले अग्नि सुरक्षा सप्ताह राखे जावत हे, जउन ह बीस अप्रैल तक चलही। एखर चलत पहिली दिन आज सहर म अग्नि सुरक्षा जागरूकता रैली निकाले गीस।
बेमौसम बारिश-फसल नुकसान
खैरागढ़-छुईखदान-गंडई जिला म पाछू दिन होय बेमौसम बरसात ले उद्यानिकी फसल मन ल काफी नकसान पहुंचे हे। एखर जायजा ले खातिर, कलेक्टर चंद्रकांत वर्मा गांव चिखलदाह पहुंचिन ए दौरान ओमन किसान मनले गोठबात करीन। कलेक्टर ल किसान मन बतइन कि ए क्षेत्र म अरमपपई अउ पताल याने पपीता अउ टमाटर के फसल ल भारी नकसान पहुंचे हे।