इही बीच, अधिसूचना जारी होय के बाद कोरबा, दुरूग अउ जांजगीर-चांपा ले एक-एक उम्मीदवार मन नामांकन पत्र जमा करिन हे।
बतादन कि प्रदेस के चार लोकसभा क्षेत्र म पहिली अउ दूसरइया चरण के तहत नामांकन के प्रक्रिया पूरा होगे हे। पहिली चरण म बस्तर संसदीय क्षेत्र म उन्नीस अप्रेल के अउ दूसरइया चरण म कांकेर, राजनांदगांव अउ महासमुंद लोकसभा क्षेत्र म छब्बीस अप्रैल के मतदान होही। वोट मन के गिनती चार जून के होही।लोकसभा चुनाव प्रचार
लोकसभा चुनाव के तहत प्रदेस म प्रचार अभियान तेज होगे हे। इही कड़ी म भाजपा के वरिष्ठ नेता अउ मुख्यमंत्री विष्णुदेव साय आज बीजापुर जिला के नेलसनार म भाजपा के विजय संकल्प शंखनाद रैली म सामिल होइन। ओमन सभा ल संबोधित करत भाजपा प्रत्यासी महेश कश्यप के समर्थन म चुनाव प्रचार करीन।
चुनाव प्रचार के सिलसिला म भाजपा के वरिष्ठ नेता अउ केंद्रीय रक्षामंत्री राजनाथ सिंह काली तेरह अप्रेल के दंतेवाड़ा जिला के प्रवास म आही। ए दौरान ओमन गीदम के जावंगा एजुकेशन सिटी मैदान म राखेगे भाजपा के चुनावी सभा अउ विजय संकल्प शंखनाद महारैली ल संबोधित करही।
ओति, कांग्रेस के पूर्व अध्यक्ष अउ वरिष्ठ नेता राहुल गांधी काली तेरह अप्रैल के प्रदेस दउरा म रइही। ए दौरान ओमन बस्तर म कांग्रेस प्रत्यासी कवासी लखमा के पक्ष म चुनाव प्रचार करही।
अठावले-पत्रकारवार्ता
रिपब्लिकन पार्टी ऑफ इंडिया अठावले के राष्ट्रीय अध्यक्ष अउ केंद्रीय राज्यमंत्री रामदास अठावले ह किहीन कि ओखर पार्टी छत्तीसगढ़ के जम्मों ग्यारा लोकसभा सीट बर भाजपा ल पूरा समर्थन देत हे। आज रईपुर के भाजपा जिला कार्यालय म पत्रकारवार्ता ल संबोधित करत श्री अठावले ह किहीन कि कांग्रेस अउ इंडी गठबंधन प्रधानमंत्री नरेंद्र मोदी के अगुवई वाला केंद्र सरकार के विरूध्द संविधान बदले के झूठा प्रचार करके देस ल गुमराह करत हे। ओमन किहीन कि केंद्र म भाजपा के अगुवई वाला एनडीए सरकार संविधान ल मजबूत बनाय के काम करत हे।
ईओडब्ल्यू/एसीबी-छापा
प्रदेस म दू हजार करोड़ रूपिया के कथित सराब घोटाला मामला म आर्थिक अन्वेसन ब्यूरो-ईओडब्ल्यू अउ एंटीकरप्सन ब्यूरो-एसीबी के टीम ह रईपुर, दुरूग, भिलाई, राजनांदगांव अउ बिलासपुर के इक्कीस जघा म छापा मारिस। मिले जानकारी के अनुसार ए जघा मन म छापा के दौरान तलासी म उन्नीस लाख रूपिया नगद के संघरा करोड़ो रूपिया के आभूषण बरामद करे गेहे। एखरे संघरा संपत्ति के दस्तावेज, लैपटॉप, पेनड्राइव जैइसे इलेक्ट्रानिक उपकरण मन ल घलो जब्ती करके ओखर परीक्षण करे जात हे।
ओति, गुरूवार के एसीबी डहार ले भिलाई के सराब कारोबारी त्रिलोक सिंह ढिल्लन उर्फ पप्पू ढिल्लन के घर म मारे गे छापा के दौरान अट्ठाईस लीटर विलायती सराब जब्त करे गीस। जांच के दौरान एक कमरा म बड़का संख्या म सराब मिले के सेति पप्पू ढिल्लन के बेटा जसजीत िंसंह ढिल्लन के खिलाफ अपराध दरज कर ले हे।
अइसने, गुरूवार के ईओडब्ल्यू के टीम ह तत्कालीन आबकारी अधिकारी नरेंद्र, प्रताप सिंह तोमर ओ घर म दबिस दीन, जिहां वर्तमान म ओखर पत्नी डिप्टी कलेक्टर इंदिरा देवहरी तोमर रहथे, ओ अभी एडीएम के प्रभार म हे। ईओडब्ल्यू के टीम ह देररात तक छानबीन करीन।
इही बीच, दुर्ग आबकारी विभाग ह एक कार ले बत्तीस पेटी अंग्रेजी सराब बरामद करे हे। दुरूग आबकारी विभाग टीम जितेन्दर पाल ल गिरफ्तार करे के संघरा सराब परिवहन म बउरे जावत कार ल घलो जब्ती कर लेहे। जब्ती सराब अउ कार के कुल कीमत लगभग चौदह लाख पचास हजार रूपिया बताय जात हे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत गर्मी के मौसम म लू लगे के कारण अउ बचाव उपर एम्स रईपुर के विशेषज्ञ डॉक्टर वरूण आनंद ले लेगे भेंटवार्ता प्रसारित करे जाही। एखर प्रसारण आकाशवाणी केन्द्र रायपुर डहार ले काली तेरह अप्रैल के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
मतदाता जागरूकता-01
लोकसभा चुनई म मतदाता मन ल जागरूक करे बर प्रदेस भर म आने-आने कारीकरम के आयोजन करे जात हे। इही कड़ी म रईपुर म व्यय प्रेक्षक आस्थानंद पाठक ह कलेक्टोरेट परिसर स्थित मल्टीलेवल पार्किंग के टेरिस ले जिला के जम्मों अधिकारी अउ कर्मचारी मन ल मतदान करे के सपथ दिलाइन। ए मउका म दिव्यांग, तृतीय लिंग समुदाय अउ मूक-बधिर मन ल मतदान करे बर संदेस दीन। संघरा सबले जादा उमर के मतदाता कन्हैया राम बंछोर ह घलो मतदाता जागरूकता के संदेस दीन। संगेसंग नुक्कड़ नाटक के आयोजन करे गीस।
ए मउका म व्यय प्रेक्षक श्रीपाठक ह सत-प्रतिसत मतदान करे के अपील करत किहीन कि आपमन अनिवार्य रूप ले अपन मताधिकार के उपयोग करय अउ दूसर मन ल घलो मतदान करे बर प्रेरित करय। उहें, जिला निर्वाचन अधिकारी डॉक्टर गौरव सिंह ह किहीन कि आज मतदाता जागरूकता बर सपथ लेके नवा कीर्तिमान बनाय जात हे। अधिकारी कर्मचारी के अलावा गांव-गांव म नरेगा मजदूर, स्कूल कॉलेज के शिक्षक समेत स्वयंसेवी संस्था के कर्मचारी मन डहार ले मतदाता जागरूकता के सपथ दिलाय गीस।
उहें, जांजगीर-चांपा जिला म मतदाता जागरूकता रैली के आयोजन करे गीस। एमा बड़का संख्या म विद्यार्थी अउ अधिकारी कर्मचारी सामिल होइन। बीटीआई ले सुरू ए रैली सहर के आने-आने रद्दा ले होवत हाई स्कूल मैदान पहुंचित, जिहां मतदाता जागरूकता बर मानव श्रृंखला बनाय गीस। उहें, मतदाता जागरूकता हस्ताक्षर अभियान चलाय के संगेसंग मतदाता मन ल मतदान करे बर सपथ घलो दिलाय गीस। ए दौरान एनसीसी कैडेट्स ह नुक्कड़ नाटक के माध्यम ले लोगन मन ल मतदान करे बर प्रेरित करीन।
मतदाता जागरूकता-02
ऐति, राजनांदगांव जिला के ग्राम देवरी म शिवनाथ नदी के तट म स्थित मोक्षधाम सांकरदहरा म दीप दान कारीकरम के आयोजन करके लोगन मन ल मतदान बर जागरूक करे गीस। कारीकरम के दौरान लोगन मन दिया जलाके मतदान करे के सपथ लीन।
ओति, कांकेर जिला के ग्राम पंचायत बोगर अउ कुआपानी म स्व-सहायता समूह के महिला मन स्वीप-सहेली टीम के माध्यम ले मतदाता जागरूकता रैली निकालीन। ए दौरान महिला मन ल अवइया छब्बीस अप्रैल के अनिवार्य रूप ले मतदान करे बर सपथ दिलाय गीस। एखरे संग महिला मन दिवाल मन म नारा लिखके लोगन मन ल अनिवार्य रूप ले मतदान करे के संदेस दीन।
अउ अब पेस हे मौसम के हाल…
प्रदेस म काली एक-दू जघा म हल्का बरसा होय या गरज-चमक के संग छींटा पड़े के संभावना हे। उहें, कुछेक जघा म गरज-चमक के संग गाज गिरे के घलो आसंका जताय गेहे। बरसा के क्षेत्र प्रमुख रूप ले दक्षिण छत्तीसगढ़ रहय के संभावना हरय।
मौसम विभाग के अनुसार एक ठिन द्रोणिका सौराष्ट्र अउ कच्छ ले दक्षिण कर्नाटक तक फैले हे। उहें, उपरी हवा के चक्रीय-चक्रवाती घेरा दक्षिण-पश्चिम उत्तर प्रदेस अउ उत्तर उड़िसा के उपर बने हुए हे। एखर सेति, प्रदेस म सरलग नमी आवत हे, जेखर सेति प्रदेस के मौसम म बदली बारिस के स्थिति बनत हे।