प्रदेस म लोकसभा चुनई के तीसरइया चरण के तहत रईपुर, दुरूग, बिलासपुर, जांजगीर-चांपा, रायगढ़, कोरबा अउ सरगुजा संसदीय क्षेत्र मन म काली बारा अप्रैल के अधिसूचना जारी होही। एखरे संग ए सात ठिन सीट उपर नामांकन पत्र जमा करे के प्रक्रिया घलो सुरू हो जही। मुख्य निर्वाचन पदाधिकारी कार्यालय ले मिले जानकारी के अनुसार नामांकन जमा करे के आखिरी तारीख उन्नीस अप्रैल हरय। बीस अप्रैल के नामांकन पत्र मनके जांच करे जाही। उम्मीदवार बाईस अप्रैल तक अपन नांव वापस ले सकही। तीसरइया चरण के तहत सात मई के वोट डाले जाही।
बतादन कि प्रदेस के चार लोकसभा क्षेत्र म पहिली अउ दूसरइया चरण के तहत नामांकन के प्रक्रिया पूरा होगे हे। पहिली चरण म बस्तर संसदीय क्षेत्र म उन्नीस अप्रेल के अउ दूसरइया चरण म कांकेर, राजनांदगांव अउ महासमुंद लोकसभा क्षेत्र म छब्बीस अप्रैल के मतदान होही। वोट मन के गिनती चार जून के होही।
एसीबी-इओडब्ल्यू/कार्रवाई
एन्टी करप्शन ब्यूरो एसीबी के टीम ह आज प्रदेस म होय करीबन दू हजार करोड़ रूपिया के कथित सराब घोटाला के सिलसिला म दुरूग जिला के तीन सराब कारोबारी मन के ठिकाना उपर छापामार कार्रवाई करिस। एसीबी के अतिरिक्त पुलिस अधीक्षक के अगुवई म करीब पचीस अधिकारी मनके टीम आज बिहनिया सराब कारोबारी पप्पू ढिल्लन अउ विजय भाटिया के नेहरू नगर स्थित घर पहुंचिस अउ छापा के कार्रवाई सुरू करीन। ए दौरान दस्तावेज मनके जांच करे गीस।
उहें, आर्थिक अपराध अन्वेषण ब्यूरो- ईओडब्ल्यू अउ एन्टी करप्शन ब्यूरो के टीम ह न्यू खुर्सीपार स्थित लक्ष्मीनारायण बेजल उर्फ पप्पू बंसल के निवास ल सील कर देहे। मिले जानकारी के अनुसार टीम जब पप्पू बंसल के घर पहुंचिन तब ओ फरार हो चुके रिहीस अउ उंखर निवास म ताला लगे रिहीस। एखर बाद टीम ह नोटिस चस्पा करके घर ल सील करे के कार्रवाई करिस।
इही बीच, सराब घोटाला मामला म ही आर्थिक अपराध अन्वेषण ब्यूरो-ईओडब्ल्यू अउ एंटीकरप्शन ब्यूरो-ईसीबी के टीम ह सराब कंपनी के पूर्व एमडी अरूणपति त्रिपाठी ल बिहार के गोपाल गंज इलाका ले हिरासत म लेहे। ओमन ल रईपुर लाय जात हे।
बतादन कि टेलीकाम सेवा के अधिकारी रहे श्री त्रिपाठी प्रतिनियुक्ति म छत्तीसगढ़ आय रिहीन। ओमन आबकारी विभाग म बिसेस सचिव समेत आने-आने पद उपर काम करीन। ओमन के कार्यकाल म होय कथित सराब घोटाला मामला के जांच ईओडब्ल्यू अउ एसीबी करत हे। ए मामला म अरविंद सिंह अउ अनवर ढेबर ल पहिली गिरफ्तार करे जा चुके हे।
केंद्र-दाल
केंद्र सरकार ह जम्मों राज्य अउ केंद्र शासित प्रदेस मन ल ए सुनिश्चित करे बर केहे कि जम्मों भंडारण संस्था दाल मन के सप्ताहिक स्टॉक के जानकारी देवय अउ एखर सत्यापन घलो करे जाय। उपभोक्ता मामला के मंत्रालय ह केहे हे कि प्रमुख बंदरगाह अउ दाल उद्योग केंद्र मन म स्थित गोदाम म घलो स्टॉक के समय-समय म सत्यापन करे जाना चाही। मंत्रालय ह पोर्टल म स्टॉक के बारे म गलत जानकारी देवइया संस्था मन उपर कड़ा कार्रवाई करे के निरदेस दीन हे।
केंद्रीय उपभोक्ता मामला विभाग के सचिव निधि खरे ह काली नई दिल्ली म राज्य उपभोक्ता मामला, खाद्य अउ नागरिक आपूर्ति विभाग के प्रधान सचिव अउ सचिन मन संग बइठका करीन। बइठका म राज्य अउ केंद्रशासित प्रदेस मन ल जमाखोरी अउ बाजार म हेरा-फेरी ल रोके बर दाल मन के स्टॉक के स्थिति कीमत के रूझान उपर कड़ा नजर रखे बर केहे गीस। राज्य अउ केंद्रशासित प्रदेस मन ल पांच प्रमुख दाल अरहर, उरद,चना, मसूर अउ मुंग के अलावा आयात होवइया पीला मटर के स्टॉक के स्थिति उपर नजर रखे बर केहे गे हे।
हाईकोर्ट-जिला अस्पताल
छत्तीसगढ़ उच्च न्यायालय ह बिलासपुर जिला अस्पताल म पाछू तीन महिना ले थाइराइड के जांच बंद होय संबंधी खबर ल संज्ञान म लेहे। ए मामला म मुख्य न्यायाधीश रमेश सिन्हा अउ न्यायमूर्ति रजनी दुबे के खंडपीठ ह स्वास्थ्य विभाग अउ छत्तीसगढ़ मेडिकल सर्विसेस कार्पोरेसन लिमिटेड के अतिरिक्त मुख्य सचिव ल जिला अस्पताल म पाछू तीन महिना ले थाइराइड के जांच बंद होय के संबंध म हलफनामा दायर करे के निरदेस दीन हे। मामला के अगला सुनवाई बाईस अप्रैल के होही।
ईद-उल-फितर
ईद-उल-फितर के तिहार आज छत्तीसगढ़ समेत देसभर म आस्था अउ उछाह के संग मनाय जात हे। रमजान के पवित्र महिना के समापन म मनाय जाने वाला ए तिहार म लोगन मन ईदगाह अउ मस्जिद म नमाज पढ़े के बाद एक-दूसर ल ईद के मुबारकबाद दीन। एखर अलावा घर मन म घलो नमाज पढ़के मुस्लिम समुदाय के लोगन मन सेवई अउ शीर-खुरमा खाके ईद के खुसी बांटिन।
ईद-उल-फितर के मउका म आज राजधानी रईपुर, दुरूग अउ धमतरी समेत दूसर सहर के आने-आने मस्जिद अउ ईदगाह मन म घलो बिसेस नमाज पढ़े गीस। ए दौरान पुलिस प्रशासन डहार ले सुरक्षा के कड़ा प्रबंध करे गे रिहीस।
राष्ट्रपति द्रौपदी मुर्मू, उप राष्ट्रपति जगदीप धनखड़, प्रधानमंत्री नरेंद्र मोदी, छत्तीसगढ़ के राज्यपाल विश्वभूषण हरिचंदन अउ मुख्यमंत्री विष्णुदेव साय ह ईद-उल-फितर बर सुभकामना दीन हे।
ट्रेन परिचालन
रईपुर रेलमंडल के सिलयारी अउ मांढर रेलवे स्टेसन मनके बीच गर्डर लॉन्चिंग के काम चौदा अप्रैल के रतिहा ग्यारा बजे ले पंद्रह अप्रैल के बिहनिया तीन बजे तक करे जाही। एखर सेति, चौदा ले सत्रह अप्रैल तक ए रद्दा ले होके गुजरने वाला कुछेक ट्रेन मनके परिचालन प्रभावित रइही। एमा बिलासपुर-रईपुर मेमू पैसेंजर स्पेसल, रईपुर-दुर्ग मेमू पैसेंजर, रईपुर-बिलासपुर मेमू पैसेंजर, रईपुर-जूनागढ़ साईडिंग पैसेंजर, रईपुर-कोरबा पैसेंजर स्पेसल, रईपुर-नेताजी सुभाषचंद्र बोस इतवारी मेमू पैसेंजर स्पेसल रद्द रहइी। उहें, टाटानगर-नेताजी सुभाषचंद्र बोस इतवारी एक्सप्रेस, कोरबा-नेताजी सुभाषचंद्र बोस इतवारी एक्सप्रेस, नेताजी सुभाषचंद्र बोस इतवारी-बिलासपुर एक्सप्रेस अउ हावड़ा-मुंबई गीतांजलि एक्सप्रेस घलो रद्द रइही।
एखर अलावा गोदिंया-झारसुगुड़ा-गोंदिया मेमू पैसेंजर स्पेसल बिलासपुर अउ गोंदिया के बीच रद्द रइही। उहें, बरौनी-गोंदिया एक्सप्रेस परिवर्तित मार्ग कटनी-जबलपुर-नैनपुर-गोंदिया होके चलही, जबकि ए गाड़ी कटनी अउ गोंदिया के बीच रद्द रइही।
पावर लिफ्टिंग प्रतियोगिता
हैदराबाद म राखेगे सीनियर राष्ट्रीय क्लासिक पावर लिफ्टिंग प्रतियोगिता म छत्तीसगढ़ के खिलाड़ी मन दू ठिन स्वर्ण पदक अपन नांव करे हे। ए प्रतियोगिता के तहत संतावन किलो ग्राम महिला वर्ग म नमीराय पारिख ह स्वर्ण पदक जीतिस। एखरे संग ओमन कुल तीन सौ बयानवे दशमलव पांच किलो वजन उठाके नवा राष्ट्रीय रिकॉर्ड बनाइन। उहें, पुरूष मनके उनसठ किलोग्राम वजन वर्ग म धनंजय यादव ह कुल चार सौ पचासी किलो वजन उठाके स्वर्ण पदक अपन नांव करीन।
अउ अब पेस हे मौसम के हाल…
मौसम विभाग ह अवइया चौबीस घंटा के दौरान प्रदेस म एक-दू जघा म हल्का बरसा होय या गरज-चमक के संग छींटा पड़े के संभावना जताय हे।
उहें, एक-दू जघा म अंधड़े चले अउ गाज गिरे के चेतावनी घलो दे गेहे। मौसम विभाग के अनुसार एक उपरीय हवा के चक्रीय-चक्रवाती घेरा पश्चिम राजस्थान अउ एक द्रोणिका कर्नाटक तक स्थित हे। एखर अलावा एक-दूसर चक्रीय-चक्रवाती घेरा बिहार के उपर बने हे। जेखर असर ले छत्तीसगढ़ म घलो जादा नमी आवत हे। एखर असर ले प्रदेस के मौसम म बदलाव देखे जात हे।
इही बीच, पाछू चौबीस घंटा के दौरान राजधानी रईपुर समेत प्रदेस के कई ठिन जिला मन म गरज-चमक के संग हल्का बरसा होय के समाचार मिले हे।