ए दुर्घटना उपर राष्ट्रपति द्रैपदी मुर्मू , प्रधानमंत्री नरेंद्र मोदी, छत्तीसगढ़ के राज्यपाल विश्वभूषण हरिचंदन, मुख्यमंत्री विष्णुदेव साय, उप मुख्यमंत्री विजय शर्मा अउ पूर्व मुख्यमंत्री भूपेश बघेल ह दुःख प्रकट करे हे।
मुख्यमंत्री विष्णुदेव साय ह आज रईपुर एम्स पहुंचिन अउ ए बस दुर्घटना म घायल मनसे भेंट करके उंखर हालचाल जानिन। ओमन ह डॉक्टर मन के टीम ल घायल कर्मचारी मनके ईलाज बर सुघ्घर प्रबंध करे के निरदेस दीन। उहें, उप मुख्यमंत्री विजय शर्मा ह घलो रईपुर एम्स पहुंच के घायल मनखे मन ले भेंट करीन अउ ईलाज करइया डॉक्टर ले सबके तबियत के जानकारी लीन। ओमन किहीन कि सरकार ह पीड़ित मन के संग खड़े हे, अउ सबके हर संभव मदद करे जाही।
इही बीच, निजी कंपनी ह ए हादसा म गुजर गे कर्मचारी के परिजन मन ल दस-दस लाख रूपिया के सहायता रासि अउ परिवार के एक सदस्य ल कंपनी म नौकरी देके घोसना करे हे। उहें, प्रसासन कोति ले मृतक के घर वाला मन ल तुरते पचीस-पचीस हजार रूपिया के सहायता रासि दे गेहे। दुरूग कलेक्टर ऋचा प्रकाश चौधरी ह घटना के दण्डाधिकारी जांच के आदेस देहे।
मतदाता जागरूकता-01
एखरे जइसन रईपुर रेलवे स्टेसन म मतदाता जागरूकता अभियान म स्वीप टीम ह कुली, बैटरी कार चालक, जूता-चप्पल बनइया अउ यात्री मन ले गोठबात करके चुनई म खुद मतदान करे के संगेसंग अपन तीर के मनखे मन ल घलो प्रेरित करे के आग्रह करीन।
ऐति, जांजगीर-चांपा जिला के खोखरा हाईस्कूल ले माईलोगिन मन ह मतदाता जागरूकता बर कलश यात्रा निकालिन, जउन ह गांव के चारों कोति घूमत हुए मां मनका दाई मंदिर परिसर म पूरा होइस। कलस यात्रा के बाद महिला मन ह ‘‘कोसा, कांसा, कंचन, वोट करेगा जनजन‘‘ के नारा के संग दिया बार के लोगन मन ल वोट देबर प्रेरित करीन।
उहें, गौरेला-पेण्ड्रा-मरवाही जिला प्रशासन कोति ले मतदाता जागरूकता, मैराथन दउड़ के आयोजन करे गीस। एमा बड़ संख्या म पढ़इया लइका, अधिकारी कर्मचारी अउ आम लोगन सामिल होइन। ए मउका म कलेक्टर लीना, कमलेश मंडावी अउ पुलिस अधीक्षक भावना गुप्ता ह खिलाड़ी मन संग जुंबा नाच करके प्रतिभागी मनके उत्साह बढ़ाइन अउ जादा ले जादा मतदान करे के अपील करीन।
मतदाता जागरूकता -02
मुंगेली जिला म ‘‘सत प्रतिसत मतदान मुंगेली जिले का अभियान‘‘ के तहत जमकोर के लाइवलीहुड कॉलेज म मतदाता जागरूकता कारीकरम राखे गीस। एमा मानव श्रृंखला बनाके लोगन मन ल मतदान बर प्रेरित करे गीस। संगेसंग रंगोली, मेहंदी अउ चित्रकला प्रतियोगिता घलो कराय गीस।
उहें, कोरिया जिला म जनपद पंचायत सोनहत के गांव सलगंवा कला अउ रजौली म मनरेगा मजूदर मन ह काम के जघा म ही मतदान करे के सपथ लीन।
भाजपा-शिकायत
भारतीय जनता पार्टी के एक प्रतिनिधिमंडल ह बस्तर लोकसभा क्षेत्र के कांग्रेस प्रत्यासी कवासी लखमा के आपत्तिजनक बयान उपर निर्वाचन आयोग म सिकाइत करके उंखर नामांकन रद्द करे के मांग करे हे। संगेसंग उंखर खिलाफ एफआईआर दर्ज करके चुनई प्रचार करे ले रोक लगाय के घलो आग्रह करे हे। भाजपा प्रतिनिधिमंडल ह किहीन हे कि श्री लखमा कोति ले बीजापुर जिला के कुटरू म प्रचार के दौरान गोण्डी बोली म प्रधानमंत्री नरेंद्र मोदी बर अनुचित भाषा के उपयोग करे गेहे। अइसने श्री लखमा डहार ले सरलग भड़काऊ अउ विवादित बयान देके चुनाव आचार संहिता के उल्लंघन करे जावत हे।
कांग्रेस/भाजपा-बयान
कांग्रेस नेता अउ पूर्व मंत्री धनेन्द्र साहू ह आरोप लगइन हे कि भारती जनता पार्टी कोति ले कांग्रेसिया मन ल जबरन दल-बदल कराय जावत हे, जउन प्रजातांत्रिक मूल्य के उल्टा अउ निनासे लायक हे। श्री साहू ह एक बयान म किहीन कि देस अउ प्रदेस म ईडी, सीबीआई अउ आईटी जइसन संवैधानिक संस्था मन के माध्यम ले विपक्षी दल के नेता मन उपर झूठा आरोप लगाके उंखर दल-बदल कराय जावत हे।
उहें, दूसर कोति, भाजपा के प्रदेस महामंत्री संजय श्रीवास्तव ह किहीन हे कि केंद्रीय जांच एजेंसी मन ह जब-जब भ्रष्टाचार म बुड़े लोगन मनके खिलाफ कार्रवाई करे हे, तब-तब कांग्रेसी नेता मन ह एखर विरोध करे हे। एखर ले साफ हे कि भ्रष्टाचार के मामला म कांग्रेस के कहू न कहू मिली भगत हे। श्री श्रीवास्तव ह रईपुर म पत्रकारवार्ता म आरोप लगइन कि राज्य के पिछला कांग्रेस सरकार ह राज्य के संपत्ति ल लूटइया अउ भ्रष्टाचार के आरोपी मन ल बचाय के परयास करे हे।
आईईडी विस्फोट-जवान घायल
बीजापुर जिला म माओवादी मन कोति ले करे गे एक आईईडी बिस्फोट म दू झिन जवान घायल होगे। उप पुलिस महानिदेसक कमलोचन कश्यप ह घटना के पुष्टि करत हुए बतइन कि सुरक्षा बल के जवान मन पीडिया क्षेत्र म सर्चिंग बर निकले रिहीन। इही बीच माओवादी मन ह आईईडी बिस्फोट कर दीन, जेखर चपेट म आय ले दू झिन जवान घायल होगे। फेर दूनों झन के इलाज चलत हे अउ हालत खतरा ले बाहर हे।
उहें, दंतेवाड़ा जिला के जगरगुंडा थाना क्षेत्र म प्रेसर आईईडी के चपेट म आय ले एक गाड़ी चालक ह घायल होगे। अतिरिक्त पुलिस अधीक्षक आर.के. बर्मन ह बतइन कि गाड़ी चलइया ह निर्माण कार्य के कुछू सामान छोड़े बर कमारगुड़ा जात रिहीस, तभे ओह प्रेसर आईईडी के चपेट म आ गे।
ईडी-शराब घोटाला
प्रवर्तन निदेशालय याने ईडी ह छत्तीसगढ़ म सराब घोटाला मामला के नवा ढंग ले जांच करे बर एक ठिन नवा सिकइत दर्ज करे हे। मिले जानकारी अनुसार वित्तीय अपराध के जांच बर ईडी ह काली एक ई.सी.आई.आर. दायर करे हे, जउन ह एफआईआर के जइसन होथे। ए ह छत्तीसगढ़ पुलिस कोति ले सतरा जनवरी के दर्ज एफआईआर उपर आधारित हे।
महासमुंद-बाघ
महासमुंद जिला के तीर बारनवापारा के जंगल म बघवा दिखे के बाद बलौदाबाजार-भाटापारा जिला कलेक्टर के.एल.चौहान ह बारनवापारा अभ्यारण्य के तीर-तखार के सात गांव म धारा एक सौ चवालीस लागू कर देहे। ए गांव मन हे रवान, मोहदा, कौआबाहरा, मुरूमडीह, छताल डबरा, गजराडीह अउ दलदली। ए सातों गांव म ध्वनि विस्तारक यंत्र बजाय म घलो मनाही हे। अभी फिलहाल गंवई के मनखे मन ह जंगल घलो नइ जा सकही। बघवा के सुरक्षा बर जिला प्रशासन कोति ले अलर्ट जारी करे गेहे।