लोकसभा चुनाव के पहिली अउ दूसर चरण बर प्रत्याशी मनके अउ राजनीतिक दल मनके प्रचार अभियान जोर-शोर ले चलत हे। राजनांदगांव संसदीय क्षेत्र के भाजपा प्रत्याशी संतोष पांडेय अउ कांग्रेस उम्मीदवार भूपेश बघेल ह काली मोहला-मानपुर-अंबागढ़ चौकी जिला के आने-आने क्षेत्र म जाके अपन समर्थन बर जनसभा लीन। श्री पांडेय ह मानपुर ब्लॉक के ग्राम खड़गांव अउ औंधी इलाका म प्रचार करीन। उहें, श्री बघेल ह अंबागढ़ चौकी ब्लॉक के गांव मन म जनसंपर्क करीन।
इही बीच, सक्ती म कांग्रेस डहार ले विधानसभा स्तर के कार्यकर्ता सम्मेलन के आयोजन करे गीस, जेमा नेता प्रतिपक्ष डॉक्टर चरणदास महंत संघरा पार्टी के दूसर पदाधिकारी अउ कार्यकर्ता मन सामिल होइन।
उहें, जांजगीर म कांग्रेस के विधानसभा स्तर के बइठका कराय गीस, जेमा पार्टी के पदाधिकारी अउ कार्यकर्ता मन मौजूद रिहीन।
मतदाता जागरूकता
लोकसभा चुनाव म मतदाता मन ल जागरूक करे बर प्रदेसभर म कतकोन कार्यक्रम कराय जावत हे। इही कड़ी म राजनांदगांव, मोहला-मानपुर-अंबागढ़ चौकी अउ खैरागढ़-छुईखदान-गंडई जिला के ग्राम पंचायत म एक लाख छह हजार ले जादा मनरेगा मजदूर मन ल मतदान के सपथ देवाय गीस।
उहें, कोंडागांव जिला म फरसगांव विकासखंड के जुगनीकलार, आलोर, तोरंड, छिंदलीबेड़ा, बड़े ओडागांव, कोरई, पतोड़ा अउ गोडमा गांव म घलो मनरेगा म काम करइया श्रमिक मन ल मतदान बर जागरूक करे के सेती अभियान चलाय गीस। ए दउरान सबो श्रमिक मन ल बिना डर के मतदान करे के संकल्प देवाय गीस।
इही बीच, कोंडागांव जिला मुख्यालय म प्रशासन डहार ले मतदाता जागरूकता बर डीएनके मैदान ले कलेक्ट्रेट तक मैराथन दउड़ के आयोजन करे गीस।
उहें, जांजगीर-चांपा जिला म ‘‘कोसा कांसा कंचन, वोट करेगा जन-जन‘‘ के थीम म मतदाता जागरूकता ले जुड़े कतकोन कार्यक्रम कराय जावत हे। पामगढ़ विकासखंड के ग्राम ससहा के कस्तुरबा गांधी बालिका विद्यालय के नोनी मन ह पोस्ट कार्ड के माध्यम ले अपन माता-पिता अउ अभिभावक मन ल मतदान करे बर प्रेरित करीन।
उहें, गौरेला-पेण्ड्रा-मरवाही जिला म काली दस अप्रैल के स्वीप कार्यक्रम के तहत मैराथन दउड़ के आयोजन करे जाही।
भाजपा नेता-हमला
जांजगीर-चांपा जिला के सिटी कोतवाली थाना क्षेत्र म भाजपा नेता संतोष साहू अउ उंखर भाई उपर दू झिन आरोपी मन ह चाकू ले हमला कर दीन। ए हमला म दूनों झन गंभीर रूप ले घायल होगे हे, जउन मन ल इलाज बर अस्पताल म भर्ती कराय गे हवय। ए मामला म पुलिस ह दू झन आरोपी मन ल गिरफ्तार करे हे।
एम्स-एआई
अखिल भारतीय आयुर्विज्ञान संस्थान-एम्स रायपुर म आर्टिफिशियल इंटेलीजेंस-एआई के मदद ले अब गंभीर मरीज मनके इलाज तुरते हो सकही। एखर बर आईआईटी भिलाई डहार ले एम्स बर हाइब्रिड डिजिटल हेल्थ केयर टेक्नोलॉजी प्लेटफॉर्म ‘‘स्मार्ट-ईआर‘‘ बनाय जावत हे। पहिली चरण ट्रामा अउ इमरजेंसी म सफल होय के बाद एला एम्स म लागू करे जाही।
आईआईटी भिलाई के निदेशक प्रोफेसर राजीव प्रकाश अउ डीन रिसर्च प्रोफेसर संतोष विश्वास ह एम्स के डॉक्टर मनके आगू ए प्लेटफॉर्म के प्रमुख बिन्दु मन ल प्रस्तुत करीन। ए प्लेटफॉर्म तुरते मरीज मनके डायग्नोसिस करके उपचार ्रप्रोटोकॉल अउ इलाज के आने-आने माध्यम के सुझाव दीही।
चैत्र नवरात्र
मां दुर्गा के उपासना के परब चैत्र नवरात्र आज ले सुरू होगे हे। बिहनियाच ले देवी मंदिर मन म दर्सन बर श्रद्धालु मनके भीड़ देखे जावत हे। मंदिर म मनोकामना ज्योति कलश जलाय गे हवय। संगेसंग मंदिर मन ल आकर्षक ढंग ले सजाय गे हवय। ए मउका म डोंगरगढ़ के मां बम्लेश्वरी मंदिर, रतनपुर के मां महामाया, चन्द्रपुर के मां चन्द्रहासिनी अउ दंतेवाड़ा के दाई दंतेश्वरी मंदिर जवइया पैदल यात्री मन बर बिसेस व्यवस्था करे गे हवय।
जांजगीर-चांपा जिला के ग्राम खोखरा के मनका दाई मंदिर म नवरात्र के पहिली दिन आज कलश यात्रा निकाले गीस, जेमा बड़ संख्या म माईलोगिन अउ नोनी मन सामिल होइन। अइसने, सक्ती जिला के चन्द्रपुर के मां चन्द्रहासिनी मंदिर म घलो घट स्थापना के पहिली कलश यात्रा निकाले गीस।
इही बीच, आज ले भारतीय नवा बछर घलो सुरू होगे हवय। एला विक्रम संवत या नव संवत्सर कहिथे, जउन ह चैत्र शुक्ल प्रतिपदा ले सुरू होथे।
राज्यपाल विश्वभूषण हरिचंदन ह प्रदेसवासी मन ल चैत्र नवरात्र, हिन्दू नवा बछर अउ चेट्रीचंड के बधाई दीन हे।
सुकमा-राम मंदिर
सुकमा जिला म चिंतलनार थाना क्षेत्र के केरलापेंदा के श्रीराम मंदिर के पट ल केन्द्रीय रिजर्व पुलिस बल-सीआरपीएफ के जवान मनके मदद ले फेर खोले गे हवय। इक्कीस बछर पहिली बछर दू हजार तीन म माओवादी मनके फरमान ले ए मंदिर के पट ल बंद कर दे गे रिहीस। पाछु दिन म लखापाल म सुरक्षा बल के कैम्प बने के बाद सीआरपीएफ के चौहत्तरवां बटालियन के जवान मन ह मंदिर के पट ल खोलीन। ए दउरान जवान मन ह ग्रामीण मन संग मंदिर म पूजा-पाठ करीन। ए मउका म मंदिर परिसर म सिविर लगाके ग्रामीण मनके इलाज करे गीस अउ ओमन ल निःसुल्क दवाई बांटे गीस।
परीक्षार्थी ऑनलाइन ठगी-एडवायजरी
गौरेला-पेण्ड्रा-मरवाही जिला के ग्राम नेवरी-नवापारा म दसवीं के छात्रा ल बोर्ड परीक्षा म पास कराय बर फोन के माध्यम ले ऑनलाइन ठगी करे के परयास करे गीस, जेला पुलिस ह नकाम कर दीस। पुलिस अधीक्षक भावना गुप्ता ह सिकायत म साइबर सेल ल सक्रिय करके फोन करइया नंबर ल चिन ले हवय। ओमन ह ए नंबर ल ब्लॉक करे बर किहीन हे।
उहें, बोर्ड के लइका मन ल ठगी ले बचाय बर एडवायजरी जारी करे गेहे। छत्तीसगढ़ माध्यमिक सिक्षा मंडल ह विद्यार्थी अउ उंखर पालक मन ल सावधान करीन हे कि परीक्षा म पास कराय के नाव म अवइया फोन कॉल के झांसा म झन आवय अउ सावधानी बरतय।
एनटीपीसी-स्वर्ण पदक
लखनऊ म राखे गे बत्तीसवां कार्पोरेट कम्युनिकेशन मीट म एनटीपीसी नवा रईपुर ल सर्वश्रेष्ठ ब्रांडिंग पहल बर स्वर्ण पदक मिले हे। निदेशक मानव संसाधन दिलीप कुमार पटेल ह एनटीपीसी नवा रईपुर के वरिष्ठ प्रबंधक सचदेव सेठी ल ए पुरस्कार दीन।
अब अब पेस हे मौसम के हाल…
अवइया चौबीस घंटा म प्रदेस के कुछेक जघा म गरज-चमक के संग हल्का ले मध्यम बरसा होय के संभावना हे। उहें, एक-दू जघा म अंधड़ चले के अउ आकाशीय बिजली गिरे के घलो चेतावनी दे गे हवय।
इही बीच, पाछु चौबीस घंटा के दउरान राजधानी रईपुर संघरा प्रदेस के कतकोन जघा म गरज-चमक के संग हल्का ले मध्यम बरसा होय के अउ ओला गिरे के समाचार मिले हे। एखर ले अधिकतम तापमान म मामूली गिरावट आय हे अउ लोगन ल गर्मी ले थोरबहुत राहत मिले हे।
मौसम विभाग के अनुसार एक ठन उपरी हवा के चक्रीय चक्रवाती घेरा मराठवाड़ा अउ ओखर तीरतखार म बने हे। उहें, एक ठन द्रोणिका गुजरात ले दक्षिण तमिलनाडु तक चलत हे। एखर असर छत्तीसगढ़ म घलो देखे बर मिलत हे।
अउ अब थोरकुन समाचार सार म –
– दुरूग जिला के बोरी थाना क्षेत्र म ग्राम सेवती तीर तेज रफ्तार वाले कार ह तीन ठन साइकिल सवार मन ल टक्कर मार दीस। ए हादसा म साइकिल म बइठे एक झन मनखे के मउत होगीस अउ दू झन मन गंभीर रूप ले घायल होगे हे।
– जशपुर जिला के फरसाबहार थाना क्षेत्र के अंबाकछार जंगल म लकड़ी बिने बर गे एक झन मनखे उपर हाथी ह हमला कर दीस, जेखर ले मउकाच म ओखर मउत होगीस।
– राजनांदगांव के एक झन व्यापारी के तीस लाख रूपिया लेके एक बछर पहिली भागे दू झन आरोपी मन ल पुलिस ह हैदराबाद ले गिरफ्तार कर ले हवय।
अउ
– सक्ती जिला के पुलिस ह गांजा तस्करी के मामला म दू झिन आरोपी मन ल गिरफ्तार करके उंखर मन तीर ले करीबन पंचानवे किलो गांजा बरामद करे हे, जेखर कीमत करीबन पांच लाख रूपिया बताय गे हवय।