प्रधानमंत्री नरेंद्र मोदी ह किहीन हे कि देस के हर आदिवासी परिवार के जिनगी ल बढ़िया बनाना मोदी के गारंटी हरय। आज छत्तीसगढ़ के बस्तर संभाग के छोटे आमाबाल गांव म राखेगे एक ठिन जनसभा ल संबोधित करत प्रधानमंत्री ह किहीन कि लोगन मनके सपना ही मोदी के गारंटी हरय। ओमन किहीन कि देस ल विकसित बनाना अउ देस के हर परिवार ल खुसहाल बनाना उंखर लक्ष्य हरय।
श्री मोदी ह किहीन कि पाछू दस साल म केंद्र के भाजपा सरकार ह गरीब मनके कल्याण बर कतकोन योजना बनाय हे। ओमन किहीन कि देस म पाछू दस साल म पच्चीस करोड़ लोगन मन ह गरीबी ले बाहिर आय हे। मुक्त रासन अउ आयुष्मान जइसन योजना के सेति, लोगन मनके खर्चा कम होय हे। प्रधानमंत्री ह किहीन कि कांग्रेस के सरकार के बेरा भ्रष्टाचार ह देस के पहिचान बन गे रिहीस। सभा म मुख्यमंत्री विष्णुदेव साय, प्रदेस भाजपा अध्यक्ष किरण सिंह देव, बस्तर अउ कांकेर लोकसभा क्षेत्र के पार्टी प्रत्यासी के संगेसंग, पार्टी पदाधिकारी मंत्री, विधायक के अउ कतकोन बड़का कार्यकर्ता मन सामिल होइन।
नामांकन- नाम वापसी
प्रदेस म लोकसभा चुनई के दूसर चरण के तहत राजनांदगांव, महासमुंद अउ कांकेर लोकसभा क्षेत्र म आज नाम वापसी के आखिरी दिन पांच झिन प्रत्यासी मन ह अपन नांव वापिस लीन। राजनांदगांव ले चार अउ महासमुंद लोकसभा क्षेत्र ले एक झिन प्रत्यासी ह अपन नांव निरदेसन पत्र ल वापिस लीन। त उहें, कांकेर लोकसभा क्षेत्र ले कोनो प्रत्यासी मन अपन नामांकन पत्र वापिस नइ लीन।
नाम वापसी के आखिरी दिन के बाद अब राजनांदगांव संसदीय क्षेत्र म पंद्रह झिन उम्मीदवार मन चुनावी मैदान म हवय। त उहें, महासुमंद क्षेत्र ले सत्रह अउ कांकेर लोकसभा क्षेत्र ले नौ प्रत्यासी मन चुनाव मैदान म हे।
जानबा के मुताबिक लोकसभा चुनई के दूसर चरण म ए तीनों संसदीय क्षेत्र मन म छब्बीस अप्रैल के वोट डारे जाही।
निर्वाचन पदाधिकारी-समीक्षा बैठक
लोकसभा चुनई के पहिली चरण म बस्तर संसदीय क्षेत्र म होवइया चुनई ल लेके मुख्य निर्वाचन पदाधिकारी रीना बाबा साहेब कंगाले ह बस्तर जिला मुख्यालय जगदलपुर म समीक्षा बइठका लीन। बइठका म सरल तरीका ले चुनई कराय बर सुरक्षा व्यवस्था, मतदान दल मन ल भेजे अउ वापसी के कार्ययोजना, संगवारी मतदान केंद्र, मतदान दल मनके प्रसिक्षण, पोस्टल बैलेट, ईवीएम अउ वीवीपैट मसीन के संगेसंग आने जरूरी बिसय उपर गोठबात करे गीस अउ संगेसंग ओमन जगदलपुर म राखेगे स्ट्रांग रूम के निरीक्षण करके चुनई ले जुड़े तियारी के जायजा लीन।
मुख्य निर्वाचन पदाधिकारी ह बस्तर के संगेसंग दंतेवाड़ा जिला म करे जात बस्तर लोकसभा चुनई के तियारी के घलो निरीक्षण करीन। ओमन किहीन कि मतदान दल मन ल गंभीरता के संग प्रसिक्षण लेना चाही अउ वोट डारे के दिन कोनो प्रकार के परेसानी नइ होना चाही।
भाजपा कार्यकर्ता सम्मेलन
जांजगीर-चांपा जिला के गांव राहौद म आज भाजपा के पामगढ़ विधानसभा स्तरीय कार्यकर्ता सम्मेलन होइस। कारीकरम म राजस्व मंत्री टंकराम वर्मा, विधायक अनूज शर्मा, खुशवंत साहेब अउ पूर्व विधानसभा अध्यक्ष गौरीशंकर अग्रवाल के संगेसंग जांजगीर-चांपा जिला के प्रत्यासी कमलेश जांगड़े घलो सामिल होइन। सम्मेलन म आय वक्ता मन ह कार्यकर्ता मन ल लोकसभा चुनई म एकजुटता के संग काम करे के बात किहीन।
एनसीईआरटी-चेतावनी
राष्ट्रीय सैक्षिक अनुसंधान अउ प्रसिक्षण परिसद-एनसीईआरटी ह अपन शैक्षणिक जिनिस के कापीराइट उल्लंघन मामला म चेतावनी जारी करे हे। ओमन केहे हे, कि यदि कोनो भी मनखे या संस्था ह कापीराइट मंजूरी के बिना एनसीईआरटी, पाठ्यपुस्तक मनके जिनिस के व्यावसायिक उपयोग बर प्रकासन करथे, त उंखर मनके खिलाफ कानूनी कार्रवाई करे जाही। एनसीईआरटी ह लोगन मन ले अइसन पुस्तक मनके कार्यपुस्तिका मनके परयोग नइ करे के बिनती करे हे अउ संगेसंग सलाह घलो दे हे कि कोनो भी मनखे ल अइसन पायरेटेड पुस्तक मनके कार्यपुस्तिका मिलथे त ओमन एनसीईआरटी ल ईमेल के माध्यम ले तुरते सूचित करय।
मतदाता जागरूकता कार्यक्रम
लोकसभा चुनई के दौरान मतदाता मन ल जागरूक करे बर प्रदेस म कतकोन कारीकरम चलाय जात हे। इही कड़ी म आज भिलाई स्थित शासकीय इंदिरागांधी वैशाली नगर महाविद्यालय म एनएसएस के स्वयं सेवक मन ह मतदाता जागरूकता रैली निकालीन। संगेसंग नुक्कड़ नाटक के माध्यम ले वोट डारे बर लोगन मन ल आगू आय के बात किहीन।
त ओति, मुंगेली म ‘‘सत-प्रतिसत मतदान मुंगेली जिला का अभियान‘‘ कारीकरम के तहत स्कूली छात्र-छात्रा मन ह मतदाता मन ल जागरूक करे बर बैनर, पोस्टर अउ सुघ्घर नारा के संग रैली निकालिन। रैली के बाद श्यामाप्रसाद मुखर्जी स्टेडियम म पहुंचे लोगन मन ल मतदान के महत्ता बतावत सपथ देवाइन अउ संगेसंग स्कूली लइका मन के बीच प्रश्नोत्तरी प्रतियोगिता घलो होइस। ए मउका म मुंगेली, लोरमी अउ पथरिया के स्वीप कार्यकर्ता मन आय रिहीन।
उहें, महासमुंद जिला म घलो स्वीप कारीकरम के तहत आने-आने कारीकरम करे गीस। जिला के ग्राम पंचायत अमरकोट, बलौदा अउ तोषगांव के मनरेगा काम म लगे मजूर मन ल मतदाता जागरूकता के सपथ देवाय गीस।
ऐति, बिलासपुर जिला म मतदाता जागरूकता कारीकरम के तहत स्काउट गाइड रोवर रेंजर्स डहार ले आने-आने कारीकरम करीन, जेमा जिला के आने-आने क्षेत्र म रैली, रंगोली, पेंटिंग, निबंध, भाषण प्रतियोगिता अउ सांस्कृतिक कारीकरम के माध्यम ले वोट डारे बर लोगन मन ल जागरूक करे जात हे। जिला संगठन आयुक्त विजय यादव ह बतइन कि जिला के जम्मों ब्लाक के स्काउट गाइड के रोवर रेंजर्स डहार ले मतदाता जागरूकता अभियान चलाय जात हे।
चैत्र नवरात्र
काली ले चैत्र नवरात्रि के परब सुरू हो जही। नौ दिन तक मां सक्ति के नौ रूप के पूजा-पाठ करे जाही। देवी मंदिर मन म घट-स्थापना के संगेसंग ज्योति कलस घलो जलाय जाही। नवरात्रि परब ल लेके डोंगरगढ़ म मां बम्लेश्वरी के मंदिर ह घलो सजधज के तियार हे। माता के दर्सन बर अवइया पदयात्री मन बर पंडाल मन म अलग व्यवस्था करे गेहे, जिहां स्वास्थ्य कर्मी मन ह चौबीसो घंटा अपन सेवा दिही। पदयात्री मनके सुरक्षा बर काली ले राजनांदगांव सहर म भारी गाड़ी मनके प्रवेस उपर रोक लगा दे गेहे।
ऐति, रईपुर अउ रतनपुर के प्रसिध्द महामाया मंदिर, जांजगीर-चांपा जिला के चंद्रहासिनी मंदिर अउ महासमुंद जिला के खल्लारी अउ चंडी देवी मंदिर के संगेसंग प्रदेस के आने देवी मंदिर मन म चैत्र नवरात्रि ल लेके तियारी पूरा होगे हे।
ओति, दंतेवाड़ा जिला के दंतेश्वरी मंदिर म बड़ मात्रा म ज्योति कलस जलाय जात हे, जेखर बर ऑनलाइन बुकिंग के सुविधा घलो दे गेहे। राज्यपाल विश्व भूषण हरिचंदन के संगेसंग मुख्यमंत्री विष्णुदेव साय ह प्रदेस के लोगन मन ल चैत्र नवरात्रि, हिंदु नववर्ष अउ गुड़ी पड़वा के बधई अउ सुभकामना देहे।
अउ अब पेस हे मउसम के हाल..
मउसम विभाग ह अवइया चौबीस घंटा के दौरान प्रदेस के एक-दू जघा म गरज-चमक के संग हवा गरेर अउ गॉज गिरे के चेतावनी दे हे।
मउसम विभाग के मुताबिक एक ठिन चक्रीय-चक्रवाती घेरा मराठवाड़ा अउ ओखर तीर-तखार के उपरी हवा म बने हे। उहें, उत्तर तटीय आंध्र प्रदेस ले दक्षिण तमिलनाडु तक एक ठिन द्रोणिका बने हे, जेखर असर ले प्रदेस म बदली बरसा जइसन स्थिति बने हे।
अउ अब थोरकुन समाचार सार म –
– छत्तीसगढ़ माध्यमिक शिक्षा मंडल ह डी.एल.एड. के प्रथम अउ दूसर साल के मुख्य अउ अवसर परीक्षा के समय सारिणी घोसित कर देहे।
– बस्तर के जिला निर्वाचन अधिकारी अउ कलेक्टर विजय दयाराम के ह चुनाव प्रसिक्षण कारीकरम के दौरान सराब पिके अवइया दू झिन सहायक शिक्षक मन ल निलंबित कर देहे। उहें, प्रसिक्षण म लापरवाही बरतइया एक झिन पीठासीन अधिकारी अउ एक झिन मतदान कर्मी ल कारण बताओ नोटिस जारी करे हे।
अउ
– रईपुर के शुभा मिश्रा ह जूट फ्रेब्रिक के परयोग ले चौदा हजार आठ सौ पचास गहना बनाके ‘‘गोल्डन बुक ऑफ वर्ल्ड रिकॉर्ड‘‘ म अपन नांव दरज कराय हे।