आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री जगदलपुर

भाजपा के बड़का नेता अउ प्रधानमंत्री नरेंद्र मोदी काली छत्तीसगढ़ के दउरा म आवत हे, जिहां ओमन काली बस्तर जिला के छोटेआमाबाल गांव म एक ठिन चुनावी जनसभा ल संबोधित करही। भाजपा के मुताबिक एक कारीकरम के जम्मों तैयारी पुरा कर ले गेहे। ए सिलसिला म आगूच ले भाजपा के छत्तीसगढ़ चुनाव प्रभारी नितिन नबीन अउ भाजपा प्रदेस अध्यक्ष किरण सिंह देव समेत आने नेता भानपुरी क्षेत्र के आमाबाल गवई जघा पहुंच के सभा स्थल के निरीक्षण कर ले हवय। उहें, आज छोटे आमाबाल म बने सभा स्थल म पत्रकार मनले गोठबात करत भाजपा नेता केदार कश्यप ह किहीन हे कि श्री मोदी के रैली म बस्तर अउ कांकेर लोकसभा क्षेत्र ले बड़भारी संख्या म भाजपा नेता अउ कार्यकर्ता सामिल होही।
इहां ए बतादन कि लोकसभा चुनाव के पहिली चरण म उन्नीस अप्रैल के बस्तर म मतदान होही। उहें, दूसर चरण म कांकेर लोकसभा सीट म छब्बीस अप्रैल के वोट डारे जाही।

लोकसभा चुनाव-प्रचार

भाजपा के बड़का नेता अउ मुख्यमंत्री विष्णुदेव साय ह राज्य के पहिली के सरकार उपर आम जनता संग छलावा करे के आरोप लगाय हे। जशपुर जिला के कुनकुरी म होय विधानसभा स्तरीय कार्यकर्ता सम्मेलन म बोलत मुख्यमंत्री ह किहीन कि भाजपा म साधारण कार्यकर्ता मन ल ही चुनाव लड़े मउका दे जाथे। ओमन पार्टी कार्यकर्ता मन ले लोकसभा चुनाव म संघरा मिलके काम करे आह्वान करीन। ओमन प्रधानमंत्री के खिलाफ कांग्रेस नेता डॉक्टर चरणदास महंत के बयान ल कांग्रेस के हतासा ए परिणाम बतइन।
उहें, कुनकुरी म मीडिया ले गोठबात करत श्री साय ह दावा करीन कि प्रदेस म भारतीय जनता पार्टी के सरकार बने के बाद माओवाद के खिलाफ लड़ाई म तेजी आय हे। ओमन किहीन कि हाले म सुरक्षा बल मन कई झिन माओवादी मन ल मार गिराय म सफलता हासिल करे हे। उहें, अब्बड़ अकन आधुनिक हथियार घलो बरामद करे गेहे।

नामांकन-नाम वापसी

प्रदेस म लोकसभा चुनाव के दूसर चरण के तहत राजनांदगांव, महासमुंद अउ कांकेर लोकसभा क्षेत्र म काली आठ अप्रैल के नांव वापसी के आखिरी दिन हरय। ए दूसर चरण बर छब्बीस अप्रैल के वोटिंग होही।
नामांकन पत्र के जांच के बाद राजनांदगांव संसदीय क्षेत्र म उन्नीस झिन उम्मीदवार चुनाव मैदान म हे। उहें, महासमुंद क्षेत्र बर अट्ठारह झिन अउ कांकेर लोकसभा क्षेत्र ले नौ झिन उम्मीदवार चुनाव लड़ही।

राज्यपाल-छात्रावास उद्घाटन

राज्यपाल विश्वभूषण हरिचंदन ह आज राजकुमार कॉलेज रईपुर के नवा छात्रावास भवन के उद्घाटन करीन। श्री हरिचंदन ह कॉलेज म घूमे के बाद  विजिटर बुक म अपन भाव लिखिन। जेमा, ओमन लिखे हे कि राजकुमार कॉलेज म महात्मा गांधी से लेके कई झिन बड़का मनखे पधारे रिहीन। इहां के वातावरण ह रचनात्मकता काम बर प्रेरित करथे अउ उछाह घलो बढ़ाथे।
ए मउका म राजकुमार कॉलेज सोसाइटी के सामान्य परिसद के अध्यक्ष टी.एस. सिंहदेव अउ प्रबंध समिति के चेयरमेन टी.सी.देव के संगे फेकेल्टी मेमबर अउ पढ़इया लइका मौजूद रिहीन।

मतदाता जागरूकता कार्यक्रम

लोकसभा चुनाव के तहत मतदाता मन ल जागरूक करे खातिर प्रदेस म ए बेरा स्वीप कारीकरम के चलत कई ठिन गतिविधि होवत हे। इही कड़ी म जांजगीर के जिला प्रशासन अउ यूनिसेफ के सहयोग ले हसदेव के हीरो युवोदय वॉलिंटियर्स ह ‘फ्लैश मॉब डांस‘ के माध्यम ले मतदाता मन ल जागरूक करीस। कचहरी चौक म होय ए कारीकरम म हीरो युवोदय वॉलिंटियर्स मन वोटिंग देबर प्रेरित करइया गाना उपर फ्लैश मॉब डांस करीन।

रायपुर आगजनी-जांच

रईपुर म रामनगर गुढ़ियारी के बिजली विभाग सब डिवीजन म बीते पांच अप्रैल के आगी लगे मामला के जांच सुरू कर दे गेहे। छत्तीसगढ़ स्टेट पॉवर डिस्ट्रीब्यूसन कंपनी के एग्जीक्यूटीव डायरेक्टर भीम सिंह कंवर के पगरइती म बनाय गे छै सदस्य वाले समिति ह ए मामला के जांच करत हे।
आकाशवाणी समाचार ले गोठबात करत श्री कंवर ह बतइन कि ए जांच समिति ह आगी लगे के कारण दुर्घटना बर जिम्मेदार लोगन अउ ए दुर्घटना ले कंपनी ल होय वित्तीय अउ भौतिक नकसान के जांच करही। संगे स्टोर ल चलाय के अल्टरनेट व्यवस्था अउ भविष्य म ए तरह के आने दुर्घटना मनके रोकथाम बर सुझाव के बिंदु मन म जांच करत हे। ए जांच समिति ह हफ्ता भीतर अपन रिपोर्ट कार्यालय, कार्यपालक निदेसक के आगू म पेस करही।
इही बीच, सब डिवीजन म लगे आगी बुझाय के काम पूरा होगे हे।

गांजा तस्कर-गिरफ्तार

प्रदेस म गांजा तस्करी करइया दू ठिन अंतर्राज्यीय गिरोह के आज पर्दाफाश होहे। उहें, ए मामला म कुल तीन झिन मनखे ल गिरफ्तार करे गेहे। पहिली घटना बलौदाबाजा भाटापारा के हे, जिहां आरोपी ह पुलिस ल झासा देबर एम्बुलेंस म गांजा तस्करी करत रिहीस। सूचना मुताबिक बलौदाबाजार, भाठापारा सड़क मार्ग के पटपर चौक म नाकाबंदी करके पुलिस ह एक सौ आठ एम्बुलेंस गाड़ी ल रोकिस अउ जब गाड़ी के जांच करे गीस त एमा ले दू करोड़ एकचालीस लाख रूपिया ले जादा के करीबन साढ़े सात किलो गांजा बरामद करे गीस।
उहें, दुरूग के रेलवे पुलिस ह गांजा तस्करी के आरोप म एक झिन मनखे ल गिरफ्तार करे हे। एखर तीर ले अड़सठ किलो ले जादा गांजा बरामद करे गेहे। जेखर अनुमानित कीमत करीबन तेरह लाख पैंसठ हजार बताय गेहे। पुलिस के  मुताबिक मुखबिरी ले मिले सूचना आधार म मंडल टास्क टीम अउ आरपीएफ ह पूरी अहमदाबाद एक्सप्रेस ट्रेन ले ए मनखे ल घेराबंदी करके पकड़े गीस। ए मनखे ह अंतर्राज्यीय गांजा तस्करी गिरोह बर काम करथे जउन गांजा बेचे बर उत्तर प्रदेस जात रिहीस।

बिहान महिला समूह

जांजगीर-चांपा जिला के बहेराडीह के बिहान की गंगे मैया स्व-सहायता समूह के माईलोगिन मन बड़ी बनात बेरा एक ठिन नवा परयोग कर अपन कारोबार ल आगू बढ़ाय हे। एमन बीते कई बछर ले नीम फूल के बड़ी बनाय के काम करत हे, जेखर कीमत किलो पाछू एक हजार रूपिया तक हे। फेर बाजार म एखर अब्बड़ डिमांड घलो हे। समूह के पगरइत लक्ष्मीन यादव अउ सचिव पुष्पा यादव ह बतइन कि बछर म एके घांव गर्मी के मउसम म ओमन ल भरपूर मात्रा म नीम के फूल मिलथे, जेखर ओमन बड़ी बनाथे।
उहें, समूह के माईलोगिन मन मुनगा, फुटू अउ अरम पपई याने पपीता के संगे आने जिनिस के बड़ी बनाय के बढ़िया प्राफिट लेवत हे। संगे पापड़ अउ आचार घलो ए समूह मन बनावत हे। ए सब बनाय गे जिनिस ल बेचे बर जांजगीर म सीमार्ट बनाय गेहे। संगे बहेराडीह गांव म चलत किसान स्कूल म घलो ए सबके बिक्री होवत हे।

भोरमदेव महोत्सव

कबीरधाम जिला म स्थित ऐतिहासिक भोरमदेव मंदिर म आज ले भोरमदेव महोत्सव सुरू होगे हे। दू दिन वाले ए महोत्सव के सुभारंभ काली बिसेस पिछड़ी जनजाति के बैगा नृत्य संग होइस। एखर बाद स्कूली लइका अउ कलाकार मन कई ठिन लोकपारंपरिक कारीकरम पेस करीन।
जिला कलेक्टर श्री जनमेजय महोबे ह बतइन कि ऐतिहासिक, पुरातात्विक पर्यटन अउ जनआस्था के रूप म ए जघा के भारी महत्तम हे। इहां साल भर देस के संगे विदेस म रहवइया अउ घरेलू पर्यटक घूमे बर आथे।
भोरमदेव मंदिर के पुजारी ह बतइन कि मान्यता मुताबिक भोरमदेव मंदिर म हरेक बछर होली के बाद तेरस अउ चौदस तिथि के भोरमदेव महोत्सव मनाय जाथे।