राजधानी रईपुर के रामनगर के बिजली सब स्टेसन म काली होय भीषण आगजनी के घटना के जांच बर आज छत्तीसगढ़ स्टेट पॉवर डिस्ट्रब्यूसन कंपनी ह छै झन सदस्य वाले समिति बनाय हे। ए समिति आग लगे के कारण के अलावा ए दुर्घटना बर जिम्मेदार लोगन के बारे म घलो जांच करही। जांच समिति के अध्यक्ष डिस्ट्रब्यूसन कंपनी के कार्यपालक निदेसक भीमसिंह कंवर ल बनाय गे हवय।
इही बीच, मुख्यमंत्री के सचिव पी. दयानंद, राज्य के पुलिस महानिदेसक अशोक जुनेजा, रईपुर कलेक्टर डॉक्टर गौरव सिंह, जिला के वरिष्ठ पुलिस अधीक्षक संतोष सिंह अउ पुलिस- प्रशासन के दूसर अधिकारी मन ह आज घलो मउका के जायजा लीन अउ निरदेस दीन। कलेक्टर के निरदेस म आगजनी स्थल के तीर रहइया चालीस ठन प्रभावित परिवार ल तुरते राहत रासि के रूप म नौ-नौ हजार रूपिया दे गीस।
मुख्यमंत्री विष्णुदेव साय ह घलो काली संझा मउका के जायजा ले रिहीन।
कवर्धा-भाजपा सभा
भाजपा के वरिष्ठ नेता अउ मुख्यमंत्री विष्णुदेव साय ह आज कवर्धा म राजनांदगांव ले पार्टी प्रत्यासी संतोष पांडेय के पक्ष म सभा लीन। ए मउका म श्री साय ह आरोप लगाइन कि कांग्रेस ह अपन कार्यकाल के दउरान कवर्धा ल असांत कर दे गे रिहीस। ओमन किहीन कि कांग्रेस सरकार म छत्तीसगढ़ ह अपराध अउ भ्रष्टाचार के गढ़ बनगे रिहीस। ओमन किहीन कि भाजपा सरकार ह कमतीच बेरा म मोदी के गारंटी ल पूरा करे के काम करे हे।
ए मउका म मध्यप्रदेस के मुख्यमंत्री मोहन यादव घलो मौजूद रिहीन। कारीकरम के दउरान प्रदेस कांग्रेस कमेटी के महामंत्री रहय चंद्रशेखर शुक्ला अउ जनता कांग्रेस छत्तीसगढ़ के नेता अश्विनी यदु संघरा दू सौ पचास लोगन भाजपा म प्रवेस लीन।
उहें, जांजगीर-चांपा जिला के अकलतरा म भारतीय जनता पार्टी डहार ले राखेगे एक ठन कारीकरम म सौ ले जादा लोगन मन सामिल होइन। ए मउका म आरंग विधायक खुशवंत साहेब, जांजगीर लोकसभा सीट ले भाजपा प्रत्यासी कमलेश जांगड़े अउ पार्टी के जिलाध्यक्ष गुलाब सिंह चंदेल घलो मौजूद रिहीन।
उहें, इही जिला के बलौदा म राखे गे भाजपा के विधानसभा स्तरीय सम्मेलन म दू सौ ले जादा लोगन मन पार्टी म सामिल होइन।
भाजपा-स्थापना दिवस
भारतीय जनता पार्टी के स्थापना दिवस के मउका म आज रईपुर के एकात्मक परिसर के भाजपा जिला कार्यालय म राखेगे कारीकरम म भाजपा के राष्ट्रीय सह-संगठन महामंत्री शिवप्रकाश, प्रदेस अध्यक्ष किरण सिंह देव, प्रदेस संगठन महामंत्री पवन साय, प्रदेस महामंत्री संजय श्रीवास्तव, विधायक पुरंदर मिश्रा, जिलाध्यक्ष जयंती पटेल संघरा बड़े कार्यकर्ता मन सामिल होइन। ए मउका म प्रदेस अध्यक्ष श्री सिंद देव ह ध्वजारोहण करीन। कारीकरम म पार्टी के राष्ट्रीय सह-संगठन महामंत्री शिवप्रकाश ह किहीन कि आज ले चौवालिस बछर पहिली भारत म राष्ट्रवाद के भावना ले भरे एक ठन नवा राजनीतिक दल के उदय होय रिहीस। ओमन किहीन कि भाजपा ह भारत ल समृध्द अउ सक्तिसाली राष्ट्र के रूप म दुनिया म लायबर संकल्पित हे।
कांग्रेस चुनाव आयोग शिकायत
प्रदेस कांग्रेस कमेटी ह राज्य के गृहमंत्री विजय शर्मा के खिलाफ आदर्स आचार संहिता उल्लंघन के सिकायत मुख्य निर्वाचन पदाधिकारी करे हे। प्रदेस कांग्रेस अध्यक्ष दीपक बैज के अगुवई म कांग्रेस के एक ठन प्रतिनिधि मंडल ह आज मुख्य निर्वाचन पदाधिकारी कार्यालय पहुंच के एक ठन ज्ञापन सौंपिन। एमा केहे गे हवय कि गृहमंत्री श्री शर्मा के अगुवई म कार्यकर्ता मन ह नेता प्रतिपक्ष डॉक्टर चरणदास महंत के बंगला के आगू प्रदर्सन करीन, जउन ह आदर्स आचार संहिता के उल्लंघन हवय।
कांग्रेस ह एक ठन दूसर सिकायत म भारतीय जनता पार्टी के छत्तीसगढ़ इकाई डहार ले अपन चुनाव प्रचार म सोसल मीडिया म धार्मिक प्रतीक के उपयोग करे के घलो आरोप लगाइन हे।
समाचार-समय बदलाव
आकाशवाणी रईपुर ले प्रसारित होवइया हिंदी प्रादेसिक समाचार बुलेटिन बेरा म काली सात अप्रैल ले परिवर्तन करे जावत हे। काली ले ए प्रादेसिक समाचार बुलेटिन ल संझा सात बजके पांच मिनट के जघा म संझा छै बजके पैंतालीस मिनट ले सुने जा सकही।
माओवादी मुठभेड़
बीजापुर जिला म आज सुरक्षा बल संग होय मुठभेड़ म तीन झन माओवादी मन मारे गीन। एमा ले एक झन माओवादी उपर पचीस लाख रूपिया के ईनाम रिहीस। सागर नाव के ए माओवादी ल प्लाटून नंबर -दू के कमांडर बताय गे हवय।
ए मुठभेड़ तेलांगना-छत्तीसगढ़ सीमा म डोलीगुट्टा के जंगल म होइस, मउका ले माओवादी मनके शव के अलावा एक लाईट मसीन गन, एक ठन ए.के. फोर्टी सेवन संघरा कतकोन हथियार बरामद करे गेहे।
चरणदास महंत-एफआईआर
राजनांदगांव म प्रधानमंत्री नरेंद्र मोदी के खिलाफ विवादित बयान दे म छत्तीसगढ़ विधानसभा नेता प्रतिपक्ष डॉक्टर चरणदास महंत के खिलाफ पुलिस ह एफआईआर दर्ज कर ले हे, उंखर मन उपर भारतीय दंड विधान के धारा-पांच सौ छै म अपराध दर्ज करे हवय। चुनाव आयोग के निरदेस के बाद तहसील दार मनीष वर्मा के सिकायत म ए कार्रवाई करे गेहे।
खबर के मुताबिक पाछू दू अप्रैल के कांग्रेस प्रत्यासी अउ पूर्व मुख्यमंत्री भूपेश बघेल के राजनांदगांव के स्टेट हाईस्कूल मैदान म नामांकन सभा रिहीस । ए सभा के दउरान डॉक्टर महंत ह अपन भाषण म ‘‘प्रधानमंत्री मोदी का सिर फोड़ने भूपेश बघेल को चुनकर दिल्ली भेजों‘‘ जइसन विवादित बयान दे रिहीन। भाजपा ह ए बयान के कड़ा निंदा करीस अउ चुनाव आयोग म सिकायत घलो दर्ज कराइस।
दुर्घटना
राजनांदगांव, कोरबा, बालोद अउ धमतरी जिला म पाछू चौबीस घंटा के दउरान होय सड़क दुर्घटना म एक झन लइका संघरा छै झन लोगन के मउत होगे।
मिले जानकारी के अनुसार परिवारिक काम म सामिल होय बर अमरावती ले कार म बइठ के भिलाई आवत परिवार ह राजनांदगांव तीर गांव चिरचारी म हादसा के सिकार होगिस। ए घटना म ड्राइवर अउ एक झन माईलोगिन के मउत होगे, फेर तीन झन घायल होगे। एमन ल इलाज बर राजनांदगांव के अस्पताल म भर्ती कराय गे हवय। पुलिस के अनुसार ए हादसा कार चालक ल निंद आय के सेति होइस।
ओति, कोरबा जिला के पाली थाना क्षेत्र म रंगोली चौक तीर यात्री बस ले टकराय के सेति फटफटी म बइठे दू झन मनखे के मउकाच म मउत होगे। एमन ह रिस्ता म ममा, भांचा बताय जात हवय।
उहें, बालोद जिला म पाररास-पड़कीभांट बायपास तीर ट्रक के चपेट म आय ले फटफटी म बइठे एक झन युवक के मउत होगे, अउ एक झन दूसर युवक घायल होगे।
उहें, धमतरी- रईपुर नेसनल हाईवे म संबलपुर तीर स्कूली लइका मन ले भरे जीप ल एक ठन हाइवा ह टक्कर मार दीस। ए दुर्घटना म एक झन लइका के मउत होगे अउ आठ झन लइका मन घायल होहे जउन मन ल जिला अस्पताल धमतरी म भर्ती कराय गे हवय।
प्रदेस म काली अउ परन दिन कुछेक जघा म हल्का ले मध्यम बरसा होय के अउ गरज-चमक के संग छींटा पड़े के संभावना हे। एखर अलावा एक-दू जघा म अंधड़ चले के आकाशीय बिजली गिरे के अउ ओलावृष्टि होय के घलो आसार हे।
मउसम विभाग के अनुसार एक ठन द्रोणिका दक्षिण छत्तीसगढ़ ले कोमोरीन क्षेत्र तक विस्तारित हे। उहें, बंगाल के खाड़ी ले नमी आवत हे। जेखर असर ले बिलासपुर, दुरूग अउ रईपुर संभाग के कुछेक जिला म बरसा होय के संभावना हे। मउसम विभाग के अनुसार अवइया दू-तीन दिन म प्रदेस के अधिकतम तापमान म चार ले पांच डिग्री के सेल्सियस के गिरावट हो सकत हे।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र मन ह एके संघरा रिले करही। ए बखत के अंक म ‘‘बिलासपुर‘‘ जिला के काम-काज के बारे म जानकारी दे जाही।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे ले प्रसारित करे जाही।