मिले खबर के मुताबिक आखिरी समाचार मिले तक राजनांदगांव लोकसभा क्षेत्र बर तेइस अभ्यर्थी ले बत्तीस नामांकन मिले हे। उहें, महासमुंद क्षेत्र बर उन्नीस अभ्यर्थी ले तिरालीस नामांकन अउ कांकेर लोकसभा क्षेत्र बर दस अभ्यर्थी ले बीस नामांकन मिले हे।
प्रेक्षक नियुक्त
निर्वाचन आयोग ह कांकेर, महासमुंद अउ राजनांदगांव लोकसभा क्षेत्र म होवइया चुनाव बर सामान्य प्रेक्षक, पुलिस प्रेक्षक अउ व्यय प्रेक्षक के नियुक्ति कर देहे। आयोग ह कांकेर लोकसभा क्षेत्र बर भारतीय प्रशासनिक सेवा के अधिकारी डॉक्टर एम.टी. रेजु ल सामान्य प्रेक्षक, भारतीय पुलिस सेवा के अधिकारी एम. राकेशचंद्र कलासागर ल पुलिस प्रेक्षक अउ भारतीय राजस्व सेवा के अधिकारी संदीप मंडल ल व्यय प्रेक्षक नियुक्त करीन हे।
उहें, राजनांदगांव लोकसभा क्षेत्र बर आईएएस अधिकारी शशि रंजन ल सामान्य प्रेक्षक, आईपीएस अधिकारी योगेन्द्र कुमार ल पुलिस प्रेक्षक अउ भारतीय प्रतिरक्षा लेखा सेवा के अधिकारी प्रवीण रंजन ल व्यय प्रेक्षक नियुक्त करे हे। अइसनेहे, महासमुंद लोकसभा क्षेत्र बर डॉक्टर समित शर्मा ल सामान्य प्रेक्षक अउ एम. राकेशचंद्र कलासागर ल पुलिस प्रेक्षक नियुक्त करे गेहे। ए लोकसभा क्षेत्र के अंतर्गत आईआरएस अधिकारी मनीष कुमार डबास ल महासमुंद जिला बर अउ आईआरएस अधिकारी राम प्रभु उदय आर. ल धमतरी अउ गरियाबंद जिला बर व्यय प्रेक्षक बनाय गेहे।
लोकसभा चुनाव-प्रचार
लोकसभा चुनाव ल लेके प्रदेस म राजनीतिक गतिविधि सरलग बाढ़त हे। आने-आने दल मनके प्रत्यासी अपन-अपन क्षेत्र मनके प्रचार म जुट गे हे। उहें, राजनीतिक दल मनके राष्ट्रीय नेता घलो सरलग प्रदेस के दौरा करत हे। इही कड़ी म भाजपा के वरिष्ठ नेता अउ प्रधानमंत्री नरेंद्र मोदी अउ पार्टी के पूर्व राष्ट्रीय अध्यक्ष अउ केंद्रीय गृह मंत्री अमित शाह जल्दीच प्रदेस के आने-आने क्षेत्र मनके चुनाव प्रचार के संगे जनसभाएं लिही। वरिष्ठ भाजपा नेता अमित शाह छै अप्रैल के कवर्धा म पार्टी प्रत्यासी संतोष पांडेय के पक्ष म चुनाव प्रचार करही। उहें, प्रधानमंत्री नरेंद्र मोदी आठ अप्रैल के बस्तर म जनसभा ल संबोधित करही।
इही बीच, प्रदेस कांग्रेस अध्यक्ष दीपक बैज ह आज बालोद जिला के डौंडी म स्थानीय पार्टी कार्यकर्ता मनके बइठका लीन। ओमन कार्यकर्ता मन ल बूथ स्तर म मतदाता मन ल पार्टी के नीति के बारे म विस्तार म जानकारी देबर किहीन । ए बइठका म प्रदेस के पूर्व मंत्री अनिला भेड़िया, कांकेर लोकसभा क्षेत्र ले पार्टी के प्रत्यासी बीरेश ठाकुर अउ युवा कांग्रेस के राष्ट्रीय महासचिव पूर्णचंद पाढ़ी समेत आने-आने पदाधिकारी मौजूद रिहीन।
भाजपा-प्रवेश
प्रदेस कांग्रेस के उपाध्यक्ष बृजेश साहू ह आज बिलासपुर जिला के बेलतरा म आयोजित कारीकरम सम्मेलन म मुख्यमंत्री विष्णुदेव साय के मौजूदगी म भारतीय जनता पार्टी म प्रवेस कर लीन। ओमन अपन कतकोन समर्थक मन के संग भाजपा म सामिल होइन। ए मउका म मुख्यमंत्री ह ओमन ल पार्टी के गमछा पहिराके उंखर सुवागत करीन।
मतदाता जागरूकता
प्रदेस म लोकसभा चुनाव के तहत मतदाता मन ल जागरूक करे बर ए दिन आने-आने कारीकरम आयोजित करे जावत हे। इही कड़ी म आज धमतरी के कलेक्टोरेट परिसर ले साइकिल रैली निकाले गीस। जिला के एसडीएम डॉक्टर विभोर अग्रवाल अउ नगर निगम आयुक्त विनय पोयाम ह ए रैली ल झंडा दिखाके रवाना करीन। ए मउका म जिला निर्वाचन अधिकारी नम्रता गांधी ह किहीन कि ए सायकल रैली के उद्देस्य मतदाता मन ल लोकतंत्र के महत्व ले परिचित कराना हे।
साइकिल रैली म जिला के अधिकारी-कर्मचारी मनके अलावा कॉलेज के विद्यार्थी अउ गणमान्य नागरिक सामिल होइन। एमा जम्मों युवा मतदाता मन ल अपन मताधिकार के परयोग करे बर प्रेरित करे गीस।
स्कूल समय-परिवर्तन
प्रदेस म पड़त तेज गर्मी ल देखत राज्य के जम्मों सरकारी, गैर सरकारी स्कूल अउ आने शैक्षणिक संस्था मन के संचालन के बेरा म बदलाव करे गेहे। लोक शिक्षक संचालनालय ले जारी आदेस के मुताबिक एक पारी म चलइया जम्मों प्राथमिक, पूर्व माध्यमिक अउ उच्चतर माध्यमिक स्कूल मन के बेरा म सोमवार ले शनिच्चर तक बिहनिया सात बजे ले ग्यारा बजे तक रइही। उहें, दू पारी म चलइया स्कूल मन म प्राथमिक अउ पूर्व माध्यमिक के कक्षा बिहनिया सात ले ग्यारा बजे तक संचालित होही। उहें, उच्चतर माध्यमिक कक्षा बिहनिया ग्यारा बजे ले मंझनिया तीन बजे तक लगही। ए आदेस आज ले मान्य होगे हे।
जग्गी-हत्याकांड
छत्तीसगढ़ उच्च न्यायालय ह राष्ट्रवादी कांग्रेस पार्टी के नेता राम अवतार जग्गी के हत्या के मामला म अभय गोयल, याह्या ढेबर, आर.के. त्रिवेदी अउ तत्तकालीन सीएसपी ए.एस. गिल अउ चिमन सिंह समेत अट्ठाईस अभियुक्त मन के उमर कैद के सजा ल जस के तस राखे हे। ए मामला म जिला अदालत ह ए अट्ठाईस अभियुक्त मन ल आजीवन कारावास सजा सुनाय रिहीस। जिला अदालत के ए फैसला के खिलाफ जम्मों अभियुक्त मन ह उच्च न्यायालय म याचिका दायर करे रिहीस। एखर पहिली सीबीआई ह ए घटना के जांच करत पूर्व विधायक अमित जोगी ल मुख्य आरोपी बनाय रिहीस, जउन ल बाद म बरी कर दे रिहीस। उहें, दू झिन आने आरोपी बुल्ठू पाठक अउ सुरेन्द्र सिंह सरकारी गवाह बन गे रिहीस। हाईकोर्ट के फैसला म अपन बिचार म राम अवतार के बेटा सतीश जग्गी ह किहीन कि अदालत के फैसला ले उंखर परिवार ह संतुष्ट हे। इही बीच, स्वर्गीय जग्गी के पत्नी ह पाछू दिन मुख्यमंत्री विष्णुदेव साय ल चिट्ठी लिखके अपन अउ अपन परिवार के सुरक्षा के मांग करत ओमन ल ज्ञापन सौंपे रिहीस।
खबर के मुताबिक चार जून दू हजार तीन के विधानसभा चुनाव ले ठीक पहिली राजधानी रईपुर के मौदहापारा इलाका म राष्ट्रवादी कांग्रेस पार्टी के प्रदेस कोषाध्यक्ष राम अवतार जग्गी के गोली मारके हत्या कर देगे रिहीस।
विषाक्त भोजन-बीमार
सारंगढ़-बिलाईगढ़ जिला के बिलाईगढ़ क्षेत्र म अस्सी झिन लोगन मन ह जहरीला खाना खाय ले बीमार होगे हे। ए जम्मों ल इलाज बर अस्पताल म भर्ती कराय गेहे। एमा ले दू झिन लइका ले सुघ्घर इलाज बर बलौदाबाजार के अस्पताल म दाखिल कराय गेहे। बताय गेहे कि काली बिलाईगढ़ क्षेत्र के रानीगढ़-छुइहा गांव म एक परिवार के दशगात्र कारीकरम ले खाना खाय के बाद ए लोगन ल उल्टी-दस्त अउ बुखार के सिकइत होय बर लगिस। ए जम्मों ल तुरतेच धनसीर अउ बिलाईगढ़ के स्वास्थ्य केंद्र मन म भर्ती कराय गीस। घटना के खबर मिलतेच स्वास्थ्य विभाग के अधिकारी मन डहार ले गांव म सिविर लगाके जम्मों मरीज मनके जांच करे जावत हे। एखर संगेसंग ए अधिकारी मन घरो-घर म जाके घलो उंखर जांच करत हे, जउन ह दशगात्र म सामिल होय रिहीन। ए अधिकारी मन ह संबंधित परिवार डहार बनाय गे खाना के नमूना के घलो जांच करे हे। खबर मिले हे जम्मों पीड़ित मन के हालत खतरा ले बाहिर बताय गेहे।
मुठभेड़-शिनाख्त
बीजापुर जिला के गंगालूर क्षेत्र म पाछू दू अप्रैल के होय मुठभेड़ म मारे गे पांच झिन माओवादी मनके शव के पहिचान कर ले गेहे। खबर के मुताबिक बीजापुर जिला के अंतर्गत कोरचोली अउ लेण्ड्रा के जंगल मन म सुरक्षा बल के संग होय मुठभेड़ म तेरह माओवादी मारे गे रिहीन। आठ आने माओवादी मन के शव के पहिचान घलो करे जावत हे।
अउ अब पेस हे मौसम के हाल..
प्रदेस म पाछू कुछेक दिन ले पड़त तेज गर्मी के बाद काली ले मौसम म बदलाव होय के संभावना हे। मौसम विभाग के मुताबिक ए बेरा तमिलनाडु ले मध्यप्रदेस तक एक द्रोणिका बने हे। एखर परभाव के सेति छै अप्रैल ले प्रदेस म कुछेक जघा म हल्का ले मध्यम बरसा हो सकत हे। एखरे संग प्रदेस म आमतौर म मौसम सुष्क रइही।