प्रदेस म लोकसभा चुनाव के दूसर चरण म राजनांदगांव, महासमुंद अउ कांकेर लोकसभा क्षेत्र म नामांकन पत्र दाखिल करे के काली आखिरी दिन हे। ए निर्वाचन क्षेत्र म पैंतीस अभ्यर्थी मन ह नामांकन दाखिल करे हे। एमा राजनांदगांव लोकसभा क्षेत्र ले उन्नीस, महासमुंद ले छब्बीस अउ कांकेर निर्वाचन क्षेत्र ले अट्ठारा नामांकन सामिल हे। पांच अप्रैल के नामांकन पत्र के जांच करे जाही। अभ्यर्थी आठ अप्रैल तक अपन नांव वापिस ले सकही। दूसर चरण म छब्बीस अप्रैल के मतदान होही।
बुजुर्ग/दिव्यांग मतदाता-सुविधा
प्रदेस म लोकसभा चुनई के बेरा दिव्यांग, बुजुर्ग अउ निसक्त मतदाता मन बर हरेक मतदान केंद्र म सुविधा देवाय जाही। मुख्य निर्वाचन पदाधिकारी रीना बाबा साहेब कंगाले ह बतइन कि हरेक मतदान केंद्र म अइसन मतदाता मन बर व्हीलचेयर के व्यवस्था करे जाही। मतदान केंद्र मन म पिये के पानी, अगोरा करे खातिर सेड, दिव्यांग मतदाता मन बर अनुकूल सौचालय, बिजली के बने व्यवस्था, ढाल वाले स्थाई रैंप अउ तय करे गे मानक के मुताबिक मतदान कक्ष होना चाही। श्रीमती कंगाले ह किहीन कि वोट डारे के दिन दिव्यांग अउ वरिष्ठ मतदाता मनके मदद खातिर एनएसएस, एनसीसी स्काउड गाइड अउ स्वयं सेवक के नियुक्ति करे के निरदेस जिला निर्वाचन अधिकारी मन ल दे गेहे। संगेसंग दिव्यांग अउ सियान मतदाता मन ल उंखर घर ले लाय अउ वोट डारे के बाद घर तक अमराय बर मुफत म अवई-जवई के सुविधा देवाय जाही। अइसने दृष्टिबाधित मनखे मन ल अपन संग सहयोगी के रूप म एक संगी ले जाय के मंजूरी दे गेहे। ओमन बतइन कि दिव्यांग अउ पच्यासी बछर ले जादा आयु वरग के मतदाता मन बर विकल्प दे म पोस्टल बैलेट घर ले ही वोट डारे के सुविधा दे जात हे।
‘मिथ वर्सेस रियलिटी‘
निर्वाचन आयोग ह चुनाव म भरम फलइया सूचना ले निपटे खातिर ‘मिथ वर्सेस रियलिटी‘ के नाव ले एक प्लेटफार्म के सुरूआत करे हे। एला निर्वाचन आयोग के अधिकारिक वेबसाइट म देखे जा सकथे। एखर ले सूचना के पुष्टि भरम फलइया सूचना अउ गलत खबर के प्रसार म रोक लगाय के संगेसंग चुनाव के बेरा परमुख मुद्दा के बेरा म जानकारी ले जा सकथे। एखर ले चुनाव ले जुड़े गलत जानकारी सोसल मीडिया प्लेटफार्म म चलत गलत खबर महत्वपूर्ण बिसय के संबंध म पूछइया सवाल अउ सबो संबंधित पक्ष बर आने-आने वरग म संबंधित सामग्री देवाय गेहे। ए प्लेटफार्म म सूचना ल रोजे अपडेट करे जाही।
सेवा मतदाता-डाक मतपत्र
प्रदेस के अतिरिक्त मुख्य निर्वाचन पदाधिकारी नीलेश कुमार महादेव क्षीरसागर ह डाक विभाग के अधिकारी मन ले सेवा मतदाता ले मिले डाक मतपत्र बांटे बर नोडल अधिकारी अउ डाकिया नियुक्त करे बर केहे हे। ए बात श्री क्षीरसागर ह लोकसभा चुनाव ल देखत सेवा मतदाता ले डाक मतपत्र के वापसी के संबंध म राखेगे बइठका म किहीन। बइठका म अतिरिक्त मुख्य निर्वाचन पदाधिकारी ह किहीन कि नियुक्त डाकिया संबंधित रिटर्निंग अधिकारी के कार्यालय म हरेक दिन मंझनिया तीन बजे डाक मतपत्र बांटही। ओमन मतगणना के दिन तय बेरा म डाक मतपत्र वितरण बर बिसेस सावधानी राखे बर किहीन।
चरणदास महंत शिकायत
भारतीय जनता पार्टी के नेता मन ह अभद्र अउ विवादित टिपण्णी करे जाय ल लेके कांग्रेस नेता अउ विधानसभा म नेता प्रतिपक्ष डॉक्टर चरण दास महंत के खिलाफ चुनाव आयोग म सिकइत कर कार्रवाई के मांग करीन हे। सिकइत म भाजपा प्रदेस महामंत्री संजय श्रीवास्तव ह किहीन कि डॉक्टर महंत नेता प्रतिपक्ष के पद म पदासीन हे। एखर बावजूद ओमन प्रधानमंत्री नरेंद्र मोदी के खिलाफ अमर्यादित बयान दीन।
नितिन नबीन-बैठक
भारतीय जनता पार्टी के प्रदेस प्रभारी नितिन नबीन ह काली राजनांदगांव लोकसभा क्षेत्र के डोंगरगढ़, डोंगरगांव, खुज्जी अउ मानपुर-मोहला विधानसभा क्षेत्र के पार्टी पदाधिकारी मनके बइठका लीन। बइठका म नामांकन अउ आगू के गतिविधि के संबंध म रणनीति बनाय गीस। संगेसंग अवइया दिन म राजनांदगांव लोकसभा क्षेत्र म केंद्रीय नेता मनके कारीकरम अउ सभा ल लेके गोठबात करे गीस।
माओवादी-मुठभेड़ शव बरामद
बीजापुर जिला के कोरचोली अउ लेण्ड्रा के जंगल म काली सुरक्षा बल संग होय मुठभेड़ म मारे गे तीन अउ माओवादी के सव बरामद कर ले गेहे। ए मुठभेड़ म मारेगे माओवादी के संख्या बाढ़ के तेरह होगे हे, जेमा तीन महिला माओवादी सामिल हे। घटनास्थल के तलासी के बेरा सुरक्षा बल ह एलएमजी थ्री नॉट थी्र रायफल बारा बोर के बदुंक तीन नग बैरेल ग्रेनेड लॉन्चर समेत आठ हथियार, विस्फोटक जिनिस समेत आने जिनिस बरामद करे हे।
इही जिला के गंगालूर थाना क्षेत्र म प्रेसर बम के चपेट म आय ले कोबरा बटालियन के एक जवान घायल होगे। जिला के पुलिस अधीक्षक जितेन्द्र यादव ह बतइन कि कोबरा बटालियन के जवान मुदवेंडी कैंप ले अभियान म निकले रिहीन। उहां ले लहुटत बेरा माओवादी मन कोति ले लगाय बम के चपेट म आय ले ए जवान घायल होगे, जउन ल इलाज बर रईपुर लाय गेहे।
उहें, ए दौरान जाने-माने कवि अभय निर्भीक ह अपन कविता लोकतंत्र के महापर्व के मान जरूरी हे, सौ प्रतिसत मतदाता के मतदान जरूरी हे। के माध्यम ले लोगन ल मतदान करे बर जागरूक करीन। ए बेरा म तेलीबांधा तरिया तीर जुम्बा अउ नुक्कड़ नाटक ले मतदान के महत्ता बताय गीस। गौरेला-पेण्ड्रा-मरवाही जिला म मनरेगा श्रमिक महुवा बिनइया गांव के लोगन अउ स्व-सहायता समूह के माईलोगन ल उंखर काम करे जघा म ही वोट डारे बर जागरूक करे गीस। संगेसंग निष्पक्ष मतदान खातिर सपथ देवाय गीस। मतदाता जागरूकता कारीकरम म जिला म बैगा जनजाती, दिव्यांग, युवा अउ नवा बिहाव होय मतदाता मन ल वोट डारे बर बिसेस रूप ले प्रेरित करे जात हे। अइसने बालोद जिला म प्रशासन कोति ले मानव श्रृंखला, रैली समेत कतकोन कारीकरम ले लोगन ल वोट डारे खातिर प्रेरित करे जात हे। उहें, जाने-माने लोगन ल ब्राण्ड एम्बेस्डर के रूप म राखे गेहे। एमा दल्लीराजहरा म ग्रीन कमांडो विरेन्द्र सिंह अलग तरीका ले जागरूकता कारीकरम चलाय जात हे। श्री सिंह ह अपन संगी मन संग बर-बिहाव वाले घर म मतदान जागरूकता बर स्लोगन लिखे तख्ती ले पहुंचत हे अउ बिहाव के मंडप म जघा-जघा पोस्टर पाम्पलेट लगावत हे। संगेसंग बिहाव म सकलाय सगा संबंधी मन ल वोट डारे के महत्ता वतावत हे।
मतदाता जागरूकता-02
स्वीप कारीकरम म मुंगेली जिला म यात्री गाड़ी मन म स्टीकर चटका के सत-प्रतिसत मतदान के संदेस दे जावत हे। जिला परिवहन अधिकारी ह बतइन कि यात्री गाड़ी मन म मेरा वोट-मेरा भविष्य अउ ससक्त लोकतंत्र जइसन नारा लिखके मतदाता मन ल सात मई के होवइया चुनाव म वोट डार के अपन सहभागिता देबर केहे जात हे। इही जिला के लोरमी म रैली निकाल के लोगन ल मतदान बर जागरूग करे गीस। रैली पुराना बस स्टेण्ड ले सुरू होके नगर पालिका परिसद कार्यालय म सिराइस। ए दौरान लोगन ल बिन डर्राय बिन लालच के वोट डारे बर सपथ देवाय गीस।
मोहला-मानपुर म जिला प्रसासन जनपद पंचायत अउ पुलिस प्रसासन कोति ले गोटाटोला हाट बाजार म मतदाता जागरूकता अभियान चलाय गीस। ओति, बस्तर जिला के तोकापाल म कॉलेज के प्रध्यापक अउ विद्यार्थी मन ह रैली निकाल के लोगन मन ल मतदान बर जागरूक करीन। ए मउका म तोकापाल कॉलेज के प्राचार्य डॉक्टर टी.आर. रात्रे ह लोगन ल चुनाव म अपन मताधिकार के परयोग के सपथ देवाइन।
अउ अब जानन मउसम के हाल…
प्रदेस म छै अप्रैल ले बरसा होय के संभावना हवय। जेखर ले लेगन ल गर्मी ले थोरबहुत राहत मिलही। मउसम विभाग ले मिले जानकारी के मुताबिक पश्चिमी हवा के परभाव के सेति प्रदेस म काली चार अप्रैल के मउसम सुख्खा रइही। प्रदेस म अधिकतम तापमान म अवइया दू दिन म कोनो बिसेस फेरबदल होय के संभावना नइ हे।