प्रदेस म लोकसभा चुनाव के दूसर चरण के तहत राजनांदगांव, कांकेर अउ महासमुंद लोकसभा क्षेत्र म नामांकन के प्रक्रिया जारी हे। अभ्यर्थी अपन नामांकन पत्र सार्वजनिक अवकाश दिवस ल छोड़के कार्यालयीन दिवस म बिहनिया ग्यारह बजे ले मंझनिया तीन बजे तक जमा कर सकत हे। नामांकन दाखिल करे के आखिरी तारीख चार अप्रैल हे। पांच अप्रैल के नामांकन पत्र के जांच करे जाही। उम्मीदवार आठ अप्रैल तक अपन नाम वापस ले सकही। दूसर चरण म छब्बीस अप्रैल के मतदान होही।
भाजपा-बैठक
भारतीय जनता पार्टी के प्रदेस प्रभारी नितिन नबीन ह कहिन कि विकसित भारत बर देस म मोदी जी के सरकार जरूरी हे। श्री नबीन आज महासमुंद लोकसभा प्रबंधन समिति के पदाधिकारी अउ सदस्य मनके बइठका ल संबोधित करत रिहीन। ओमन किहीन कि प्रधानमंत्री नरेन्द्र मोदी के दस साल के कार्यकाल के उपलब्धि ले ही आज देस सुशासन अउ विकसित राष्ट्र के श्रेणी म खड़े हे। ओमन किहीन कि छत्तीसगढ़ के जनता ह विधानसभा चुनाव म मोदी जी के गारंटी म विश्वास जतावत भाजपा के समर्थन म जनादेस देहे। अब लोकसभा चुनाव म घलो मोदी जी के गारंटी म जनता फेर विश्वास जताही।
भाजपा-महिला मोर्चा बैठक
भारतीय जनता पार्टी महिला मोर्चा के पदाधिकारी अउ कार्यकर्ता मनके आज रईपुर म बइठका होइस। बइठका म रईपुर लोकसभा क्षेत्र के तहत तीन विधानसभा क्षेत्र के पदाधिकारी अउ कार्यकर्ता मन सामिल होइन।
बइठका ल संबोधित करत रईपुर लोकसभा क्षेत्र के सांसद सुनील सोनी ह किहीन कि प्रधानमंत्री नरेन्द्र मोदी के नेतृत्व म आज देस तेजी ले विकसित राष्ट्र बने कोति अग्रसर हवय। अवइया चुनाव म रईपुर समेत छत्तीसगढ़ के जम्मों लोकसभा सीट म जीत हासिल करके केन्द्र म तीसर घांव भाजपा के सरकार बनाना हे। बइठका ल रईपुर लोकसभा प्रभारी संदीप शर्मा, रायपुर लोकसभा चुनाव समिति के महिला संपर्क प्रमुख मीनल चौबे ह घलो संबोधित करीन।
कांग्रेस-प्रेसवार्ता
प्रदेस कांग्रेस अध्यक्ष दीपक बैज ह कहिन कि लोकसभा चुनाव बर कांग्रेस ह देसवासी मन ल पांच न्याय के गारंटी देहे। एमा नारी न्याय, किसान न्याय, युवा न्याय, श्रमिक न्याय अउ हिस्सेदारी न्याय के गारंटी सामिल हे। आज रईपुर म आयोजित एक ठिन पत्रकारवार्ता म श्री बैज ह कहिन कि नारी न्याय के तहत केन्द्र म कांग्रेस के सरकार बने म हर माईलोगिन ल सलाना एक लाख रूपिया दे जाही। उहें, सरकारी नौकरी मन म पचास प्रतिशत के आरक्षण दे जाही। किसान न्याय के तहत न्यूनतम समर्थन मूल्य ल कानूनी दर्जा दे जाही। युवा न्याय के तहत तीस लाख नवा नौकरी, श्रमिक न्याय के तहत मनरेगा के न्यूनतम मजदूरी ल दू सौ रूपिया ले बढ़ाके चार सौ रूपिया के गारंटी अउ स्वास्थ्य अधिकार सामिल हे। अइसने, पार्टी ह हिस्सेदारी न्याय के तहत सामाजिक, आर्थिक अउ जाति जनगणना कराय अउ एसटी, एससी, ओबीस आरक्षण म पचास प्रतिसत के सीमा ल हटाय के गारंटी घलो देहे।
बच्चे-बरामद
दुरूग जिला म रेलवे पुलिस ह बारा झिन लइका मन ल बरामद करे हे। एमा, छत्तीसगढ़ समेत आने राज्य के लइका सामिल हवय। सबो लइका के उमर आठ ले चौदा बछर के बीच बताय गे हे। ए लइका मन ल चाईल्ड हेल्प लाईन ल सौंप दे गेहे। रेलवे पुलिस ह बतईन कि आरपीएफ के टीम ह दुरूग स्टेसन म तलासी अभिसान के दउरान प्लेटफाम नम्बर चार म ए लइका मन ल देखीन। अउ उंखर ले पुछताछ करीन।
ए दउरान ओ लइका मन ह बतईन कि हैदराबाद के बालाजी गुरूकुल क पढ़हया लइका हरय। अउ सिकंदराबाद रईपुर एक्सप्रेस ले दुरूग पहुंचे हे। ओमन बतईन कि अम्बिकापुर म होवइया योग करीकरम म सामिल होय बर जात रिहीन।
फेर ए लइका मनके संग स्कूल प्रबंधक कोति, ले कोनों सिक्षक या अभिभावक नई होय के सेति ओमन ल चाइल्ड हेल्प लाइन के मदद ले आश्रय गृह भेज दे गेहे। आरपीएफ के प्रभारी एस.के. सिन्हा ह बतईन कि ए लइका मन ह देस के अलग-अलग जघा ले आय हे। एमा, छै लइका छत्तीसगढ़ ले हे, उंहे, तीन लइका झारखंड, दू नागालैंड अउ एक असम ले हे। श्री सिन्हा ह किहीन कि लइका मनके कुछेक परिजन दुरूग पहुंचत हे, जरूरी दस्तावेज के जांच के बाद लइका मन ल उंखर अभिभावक ल सौंप दे जाही।
माओवादी-मुठभेड़
सुकमा जिला म आज सुरक्षा बल मनके संग होय मुठभेड़ म एक माओवादी मारे गेहे। जिला के पुलिस अधीक्षक किरण चव्हान ह ए घटना के पुष्टि करत बतईन कि आज बिहनिया डिस्ट्रिक्ट रिजर्व गार्ड-डीआरजी अउ कोबरा बटालियन के संयुक्त टीम ह तलासी अभियान म निकले रिहीन, इही दउरान टेटमड़गु के जंगल म पहिली ले घात लगाय बइठे माओवादी मन ह जवान उपर फायरिंग सुरू कर दीन। जवान मन डहार ले करे गे जवाबी कार्रवाई के पाछु माओवादी जंगल के फायदा उठा के भाग गे। बाद म घटनास्थल के तलासी के दउरान सुरक्षा बल मन ह एक झिन माओवादी के शव बरामद करे हे।
उंहे, दंतेवाड़ा जिला म लोन वर्राटू अभियान के तहत एक माओवादी ह पुलिस अधीक्षक गौरव राय के समक्ष आत्मसमर्पण कर लीन। ए माओवादी भैरमगढ़ इलाका कमेटी के कुर्रेपाल पंचायत मिलिशिया प्लाटून सेक्सन-बी कमांडर के पद म काम करत रिहीन। आत्मसमर्पित माओवादी ल राज्य सरकार के पुर्नवास नीति के तहत पच्चीस हजार रूपिया के प्रोत्साहन रासि दे गीस। लोन वर्राटू अभियान के तहत अब तक जिला म एक सौ चौहत्तर इनामी समेत छै सौ छियासी माओवादी आत्मसमर्पण कर चुके हे।
ओति, मोहला-मानपुर-अंबागढ़ चौकी जिला के सीमा ले लगे महाराष्ट्र के चुटीनटोला म माओवादी मनके इकट्ठा होय के सूचना म गढ़चिरौली पुलिस मनल ह रवाना होय रिहीन। फेर पुलिस के पहुंचे ले पहिली माओवादी मन ह उंहा ले भाग गे। मउका ले पुलिस मन ह बड़का मात्रा म माओवादी समान बरामद करे हे।
स्कूल समय-परिवर्तन
प्रदेस म तेज गरमी अउ तापमान म बढ़होतरी के सेती सबो स्कूल के बेरा म बदलाव करे गेहे। ए संबंध म स्कूल शिक्षा विभाग डहार ले आदेस जारी कर दे गेहे। अब प्रदेस के जम्मों सरकारी स्कूल बिहनिया साढ़े सात बजे ले मंझनिया साढ़े ग्यारह बजे तक लगही। जारी आदेस म जम्मों विकासखंड के शिक्षा अधिकारी, हाईस्कूल अउ हायर सेकेंडरी स्कूल के प्राचार्य अउ प्राथमिक शाला अउ पूर्व माध्यमिक शाला के प्रधान पाठक मन ल निरदेस के पालन करे बर केहे गेहे।
अउ अब थोरकुन समाचार सार म –
– तेल विपणन कंपनी मन ह देसभर म उन्नीस किलोग्राम वाले वाणिज्यिक एलपीजी सिलेंडर के दाम कम कर देहे। एमा, अलग-अलग शहर मन म तीस ले बत्तीस रूपिया तक के कटौती करे गेहे।
– प्रदेस के सरकारी अउ निजी कॉलेज म अवइया सैक्षणिक सत्र म स्नातक नर्सिंग पाठ्यक्रम म प्रवेस बर आवेदन करे आखिरी तारीख सात अप्रैल हे।
– गौरेला-पेण्ड्रा-मरवाही के जनपद उपाध्यक्ष जीवन सिंह राठौर ह कांग्रेस ले इस्तीफा दे देहे। ओमन ह पार्टी के जिलाध्यक्ष ल अपन इस्तीफा सौंपीन।
– जशपुर जिला म लवाकेरा ओड़िसा स्टेट हाइवे म आज ट्रक के टक्कर ले मोटरसाइकिल सवार एक झिन युवक के मउत होगे। उंहे, दू आने युवक गंभीर रूप ले घायल हो गेहे। जेमन ल अस्पताल म भर्ती कराय गेहे।
अउ
– बलरामपुर पुलिस ह लूट के मामला म देशी रिवॉल्वर के संग दू झिन आरोपी ल गिरफ्तार करे हे।