लोकसभा चुनाव के पहिली चरण म बस्तर लोकसभा सीट बर नाव वापसी के आखिरी दिन आज कोनो भी अभ्यर्थी ह अपन नाव ल वापिस नइ लीस। ए सीट म ग्यारा झन उम्मीदवार मन ह चुनाव मैदान म हवय। एमा कांग्रेस ले कवासी लखमा, भाजपा ले महेश कश्यप, हमरराज पार्टी ले नरेंद्र बुरका, राष्ट्रीय जनसभा पार्टी ले कंवल सिंह बघेल, बहुजन समाज पार्टी ले आयतुराम मंडावी, सीपीआई ले फुलसिंग कचलाम, सर्वआदि दल ले शिवराम नाग, गोंडवाना गणतंत्र पार्टी ले टीकम नागवंशी, आजाद जनता पार्टी ले जगदीश प्रसाद नाग अउ दू झन निर्दलीय प्रत्यासी प्रकाश कुमार गोटा अउ सुंदर बघेल सामिल हे। नामांकन पत्र जांच के दौरान भारतीय साक्षर पार्टी प्रत्यासी राजाराम नाग के नामांकन पत्र ल निरस्त कर दे गे रिहीस। ए सीट बर उन्नीस अप्रैल के वोट डारे जाही।
उहें, महासमुंद, कांकेर अउ राजनांदगांव लोकसभा क्षेत्र म दूसर चरण म नामांकन दाखिल करे के प्रक्रिया चलत हे, जेखर आखिरी तारिख चार अप्रैल हे। पांच अप्रैल के नामांकन पत्र के जांच करे जाही। उम्मीदवार मन ह आठ अप्रैल तक अपन नाव वापस ले सकही। दूसर चरण म छब्बीस अप्रैल के मतदान होही।
इही बीच, निर्वाचन आयोग ह राजनांदगांव, महासमुंद अउ कांकेर लोकसभा क्षेत्र म मतदान बर समय निर्धारित करे हे, एखर अनुसार राजनांदगांव सीट के अंतर्गत पंडरिया, कवर्धा, खैरागढ़,डोंगरगढ़, राजनांदगांव, डोंगरगांव अउ खुज्जी विधानसभा क्षेत्र म बिहनिया सात बजे ले संझा छै बजे तक मतदान होही। उहें, मोहला-मानपुर म बिहनिया सात बजे ले मंझनिया तीन बजे तक वोट डारे जाही।
एग्जिट पोल-प्रसारण प्रतिबंध
भारत निर्वाचन आयोग ह लोकसभा चुनाव के सेति उन्नीस अप्रैल ले एक जून तक कोनो भी प्रकार के एग्जिट पोल के आयोजन अउ प्रसारण उपर रोक लगा देहे। आयोग डहार ले जारी अधिसूचना म केहे गेहे कि उन्नीस अप्रैल के बिहनिया सात बजे ले एक जून के संझा साढ़े छै बजे तक के अवधि म कोनो भी प्रकार के एग्जिट पोल के आयोजन करे के अउ प्रिंट या इलेक्ट्रानिक मीडिया डहार ले एखर परिणाम के प्रकासन या प्रचार या कोनो भी तरीका के अइसन प्रचार-प्रसार उपर रोक रइही। अधिसूचना म यहू घलो केहे गेहे कि संबंधित लोकसभा क्षेत्र म मतदान समाप्ति के पहिली अड़तालीस घंटा के दौरान इलेक्ट्रानिक मीडिया म ओपेनियन पोल के प्रसारण उपर घलो रोक लगाय गे हवय।
भाजपा-बूथ विजय संकल्प अभियान
भारतीय जनता पार्टी के प्रदेस अध्यक्ष किरण सिंह देव ह आज रईपुर म ‘‘बूथ विजय संकल्प अभियान‘‘ के सुरूआत करीन। ए मउका म भाजपा जिला अध्यक्ष जयंती पटेल, पूर्व विधायक देवजी भाई पटेल, भाजपा प्रवक्ता अमित साहू संघरा भाजपा के बड़े नेता अउ कार्यकर्ता मन मौजूद रिहीन।
ए अभियान के पहिली दिन आज मुख्यमंत्री विष्णुदेव साय रईपुर जिला के कांदुल, उप मुख्यमंत्री अरूण साव माना अउ प्रदेस अध्यक्ष किरण सिंह देव फाफाडीह म राखेगे कारीकरम म सामिल होइन। पार्टी के प्रदेस महामंत्री संजय श्रीवास्तव ह बतइन कि ए अभियान म भाजपा पदाधिकारी अउ कार्यकर्ता मन हरेक बूथ म जाके विजय के स्वरूप झंडा लगाही।
कांग्रेस/भाजपा
कांग्रेस ह लोकसभा चुनाव के पहिली चरण म छत्तीसगढ़ बर चालीस झन स्टार प्रचारक के सूची जारी कर देहे। एमा पार्टी के राष्ट्रीय अध्यक्ष मल्लिकार्जुन खड़गे, पूर्व राष्ट्रीय अध्यक्ष सोनिया गांधी अउ राहुल गांधी, वरिष्ठ कांग्रेस नेता प्रियंका गांधी वाड्रा, प्रदेस प्रभारी सचिन पायलट, छत्तीसगढ़ के पूर्व मुख्यमंत्री भूपेश बघेल, पूर्व उप मुख्यमंत्री टी.एस. सिंहदेव, प्रदेस कांग्रेस अध्यक्ष दीपक बैज, नेता प्रतिपक्ष डॉक्टर चरण दास महंत, हिमाचल प्रदेस के मुख्यमंत्री सुखविंदर सिंह सुक्खू अउ कुमारी शैलजा संघरा दूसर नेता मनके नाव सामिल हे।
इही बीच, भारतीय जनता पार्टी के प्रदेस अध्यक्ष किरण सिंह देव ह लोकसभा चुनाव बर समन्वयक अउ सह-समन्वयक मनके नियुक्ति करे हे। सांसद सुनील सोनी ल रईपुर लोकसभा के समन्वयक बनाय गे हवय। उहें, पुन्नू लाल मोहले ल बिलासपुर, अशोक शर्मा ल राजनांदगांव, रमशीला साहू ल दुरूग, चंद्रशेखर साहू अउ चुन्नीलाल साहू ल महासमुंद, दिनेश कश्यप ल बस्तर, रेणुका सिंह अउ ननकी राम कंवर ल कोरबा, गुहाराज अजगले ल जांजगीर-चांपा अउ राजा रणविजय सिंह ल रायगढ़ लोकसभा क्षेत्र के समन्वयक बनाय गे हवय।
भोजराज नाग-कांग्रेस ज्ञापन
कांकेर लोकसभा क्षेत्र के भाजपा प्रत्यासी भोजराज नाग के खिलाफ आचार संहिता के उल्लंघन करे के सिकायत कांग्रेस के विधि विभाग ह मुख्य चुनाव आयुक्त ले करे हे। एमा केहे गेहे कि श्री नाग ह बालोद जिला के डौंडीलोहारा क्षेत्र म चुनावी सभा के दौरान मतदाता मन ले किहीन कि ओमन ह कथित रूप ले जनसमस्या के निवारण तंत्र-मंत्र के माध्यम ले कर सकत हे। अइसने कहि के ओमन ह मतदाता मन ल लालच देके प्रभावित करे के प्रयास करीन हे।
सीआरपीएफ जवान-घायल
बस्तर जिला के रतेंगा गांव तीर केंद्रीय रिजर्व पुलिस बल सीआरपीएफ के वाहन दुर्घटनाग्रस्त होगे हे। ए हादसा म ग्यारा झन जवान मन के घायल होय के खबर हे। एमा ले चार झन जवान ल लोहंडीगुड़ा के सामुदायिक स्वास्थ्य केंद्र म भर्ती कराय गे हवय। उहें, सात झन जवान मन ल डिमरापाल मेडिकल कॉलेज रिफर करे गेहे, जिहां सबो जवान मनके हालत खतरा ले बाहिर बताय गे हवय।
खबर के मुताबिक ए सबो झन जवान मन ड्यूटी करे बर कोंडागांव जावत रिहीन।
बीजापुर-बंद
बीजापुर जिला म आज माओवादी मन डहार ले बंद के आह्वान करे गे रिहीस, जेखर मिले-जुले असर देखे बर मिलिस। ए दौरान व्यापारिक प्रतिष्ठान बंद रिहीस। उहें, बस चालक मन ह कोनो खराब स्थिति ले बांचे बर बस के अवई-जवई ल खुदेच बंद राखिन। पुलिस अधीक्षक जितेंद्र यादव ह बतइन कि जिला के सबो रद्दा म अवई-जवई चलत हे। बंद के दौरान स्कूल-कॉलेज के परीक्षा घलोक होइस।
आईटीबीपी-जवान मौत
मोहला-मानपुर-अंबागढ़ चौकी जिला के मोहला कैंप म पदस्थ भारत-तिब्बत सीमा पुलिस बल आईटीबीपी के जवान नितिन रमेश के मौत होगे हवय। बताय जात हवय कि ए जवान पाछू कुछेक दिन ले बीमार रिहीस अउ उंखर इलाज मोहला के सामुदायिक स्वास्थ्य केंद्र चलत रिहीस। मृतक जवान महाराष्ट्र के अकोला जिला के रहइया हे। मिले जानकारी के अनुसार पोस्टमार्टम के बाद ओखर शव ल अकोला के ओखर गृहग्राम भेजे जाही।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे प्रसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र मन ह एके संघरा रिले करही। ए बखत के अंक म ‘‘कोरबा‘‘ जिला के काम-काज के बारे म जानकारी दे जाही।
मउसम विभाग ह अवइया चौबीस घंटा के दौरान प्रदेस म एक-दू जघा म हल्का बरसा होय के अउ गरज-चमक के संग छींटा पड़े के संभावना जताय हे। मउसम विभाग के अनुसार एक ठन चक्रीय-चक्रवाती घेरा उत्तर छत्तीसगढ़ अउ ओखर आस-पास बने हे। संगेसंग एक ठन द्रोणिका तमिलनाडु ले उत्तर छत्तीसगढ़ तक विस्तारित हे। एखर असर ले प्रदेस म एक-दू जघा म आज अउ काली गरज-चमक के संग अंधड़ चले के अउ आकाशीय बिजली गिरे के संभावना हे।