लोकसभा चुनई के पहिली चरण म बस्तर लोकसभा सीट खातिर नामांकन दाखिल करे के बाद अपन नांव वापस लेवय के काली आखिरी दिन हवय। ए सीट खातिर 19 अप्रैल के मतदान होही। मुख्य निर्वाचन पदाधिकारी रीना बाबासाहेब कंगाले ह बतइन कि बस्तर लोकसभा क्षेत्र म कुल 12 झिन अभ्यर्थी मन ह नामांकन पत्र जमा करे रिहीन। नामांकन पत्र मनके जांच के दौरान एक ठिन नामांकन पत्र रद्द होइस, जेखर बाद अब ए सीट खातिर 11 झिन अभ्यर्थी मन बांचे हवय।
ओति लोकसभा चुनई के दूसरइया चरण खातिर काली अधिसूचना जारी होय के संगेसंग नामांकन के प्रक्रिया सुरू होगे हवय। दूसरइया चरण म महासमुंद , कांकेर अउ राजनांदगांव लोकसभा क्षेत्र बर अब तक ले कोनो भी अभ्यर्थी ह अपन नामांकन पत्र दाखिल नइ करे हवय। नामांकन पत्र दाखिल करे के आखिरी तारिख 4 अप्रैल हवय अउ 5 अप्रैल के नामांकन पत्र के जांच करे जाही। उम्मीदवार मन 8 अप्रैल तक अपन-अपन नांव वापस ले सकही। दूसरइया चरण म मतदान 26 अप्रैल के होही।
लोकसभा- चिकित्सा सुविधा
छत्तीसगढ़ म लोकसभा चुनई ल देखत मतदाता मन ल जागरूक करे खातिर आने-आने कारीकरम के आयोजन करे जावत हे। इही कड़ी म जांजगीर -चांपा जिला के चांपा म थर्ड जेंडर मनके सम्मेलन के आयोजन करे गीस। इही दौरान कलेक्टर आकाश छिकारा ह कारीकरम म सामिल तृतीय लिंग समुदाय के सदस्य मन समेत आने-आने नागरिक मन ल अपन मताधिकार के उपयोग करे सपथ दिलाइन।
उहें, इही जिला म काली 30 मार्च के मतदाता जागरूकता करे खातिर एक ठिन साइकल रैली के आयोजन करे जाही। ए रैली बिहनिया साढ़े सात बजे ध्यानचंद हॉकी मैदान केरा रोड ले सुरू होही, जउन हाई स्कूल ग्राउंड जांजगीर म जाके सिराही।
अइसनेच, सक्ति जिला के आने-आने गांव मन म स्व-सहायता समूह के माईलोगिन मन के जरिया जागरूकता गतिविधि, स्वच्छता अभियान के आयोजन करे जावत हे, जेमा मैराथन दौड़ प्रतियोगिता, होली मिलन उत्सव, दिव्यांग जन अउ तृतीय लिंग सम्मेलन के संगेसंग दीवार मन म नारा लिखे के जरिया लोगन मन ल सत-प्रतिसत मतदान खातिर प्रेरित करे जावत हे। जिला के जम्मों विकासखंड मन म काली 30 मार्च के स्कूटी अउ साइकल रैली के आयोजन करे जाही।
ओति, राजनांदगांव जिला के ग्रामीण इलाका मन म दीवार म लिखई बूता के जरिया लोगन मन ल मतदान करे खातिर जागरूक करे जावत हे। ‘‘ नांदगांव के अब एके पहिचान, सत-प्रतिसत होही मतदान‘‘ जइसन नारा ल लिखके मतदाता मन ल मतदान करे खातिर जागरूक करे जावत हे, जउन ह आकर्षण के केंद्र बने हुए हे।
इही जिला के छुरिया म महिला मतदाता मन ल सत-प्रतिसत मतदान बर जागरूक करे खातिर क्रिकेट प्रतियोगिता के आयोजन करे गीस। प्रतियोगिता म विभागीय अधिकारी-कर्मचारी अउ स्व सहायता समूह के माईलोगिन मन बड़ उछाह के संग हिस्सा लीन।
ओति, कबीरधाम जिला के कलेक्टर जनमेजय महोबे ह लोकसभा चुनई के चलत वृध्दआश्रम म निवासरत वरिष्ठ नागरिक मन ल तिलक लगाके अउ फूल माला पहिराके सम्मानित करीन। इही दौरान कलेक्टर ह जम्मों वरिष्ठ नागरिक मन ल लोकतंत्र म मताधिकार प्रयोग करे सपथ घलो दिलाइन।
बातों-बातों में
पंजीयन कार्यालय
प्रदेस म जमीन अउ आने अचल संपत्ति मनके पंजीयन के कामबूता काली अउ परनदीन 30 अउ 31 मार्च के सासकीय छुट्टी होय के बाद घलो चलही। जानबा के मुताबिक ए बेरा राज्य के जम्मों पंजीयन कार्यालय मन म कम्प्यूटर आधारित एन.जी.डी.आर.एस. प्रणाली के जरिया पंजीयन के काम बूता करे जावत हे। चालू वित्त बछर के चलत ए महिना के आखिरी तीन दिन 29, 30 अउ 31 मार्च के शासकीय अवकास पड़त हवय, फेर अचल संपत्ति के खरीदी बिक्री करे खातिर पंजीयन बर सासन ह राज्य के सबो पंजीयन कार्यालय मन ल छुट्टी के ए तीन दिन खुला राखे के आदेस घलो दीन हवय। एखरे संग ई-स्टाम्प काउंटर ल ए दौरान खुला राखेके निरदेस दीन हवय।
माओवादी-मुठभेड़
छत्तीसगढ़ अउ महाराष्ट्र सीमा म गढ़चिरौली अउ कांकेर के बीच, भूमकन गांव के तीर सुरक्षा बल अउ माओवादी मनके बीच मुठभेड़ होय के खबर हवय। मिले जानबा के मुताबिक भूमकन गांव तीर बड़ संख्या म माओवादी मनके मौजूदगी के सूचना म सुरक्षा बल के टीम तलासी अभियान म निकले रिहीन। ए दौरान माओवादी मन ह उंखर उपर गोलीबारी सुरू कर दीन। जवान मन ह घलो जवाबी कार्रवाई करीन। एखर बाद माओवादी मन जंगल कोति भगा गीन। घटनास्थल के तलासी के दौरान बड़ मात्रा म नक्सली सामान, साहित्य, तार, जिलेटिन के छड़, बैटरी अउ सोलर पैनल बरामद करे गे हवय।
उहें, छत्तीसगढ़ के सीमा ले लगे महाराष्ट्र के गढ़चिरौली म माओवादी मन ह मुखबिरी के सक म एक झिन मनखे के हत्या कर दीन हवय। युवक के सव राष्ट्रीय मार्ग म ताडगांव के तीर बरामद होइस हे।
गुड फ्राइडे
आज गुड फ्राइडे हवय। प्रभु ईसा मसीह ल सूली म चढ़ाय जाय के याद म ए दिन मनाय जाथे। इही दिन प्रभू यीशु ह मनखे मन ल पाप ले मुक्ति देवाय खातिर अपन जिनगी ल न्योछावर कर दे रिहीन। प्रधानमंत्री नरेंद्र मोदी ह यीशु मसीह के ए बलिदान ल सुरता करीन हवय।
प्रभु ईसा मसीह के बलिदान दिवस म राजधानी रईपुर समेत छत्तीसगढ़ के जम्मों आने-आने गिरिजा घर मन म बिसेस प्रार्थना सभा आयोजित करे गीस हवय। एखरे संगेसंग ईसाई समुदाय के लोगन मन ह रैली घलो निकालीन, जेखर माध्यम ले ईसाई समुदाय ह लोगन मन ल सांति अउ प्रेम के संदेस दीन।
प्रदेस म काली अउ परनदीन एक-दू जघा म हल्का बरसा होय अउ गरज-चमक के संग छींटे पडे़ के संभावना हवय। उहें, कुछेक जघा मन म अंधड़ चले अउ गाज गिरे के आसंका घलो हे।