चुनई आयोग अवइया लोकसभा अउ विधानसभा चुनई के चलत पर्यावरण के दृष्टि ले अनुकूल चुनई प्रक्रिया ल बढ़ावा देवत हवय। आयोग ह चुनई मसीनरी अउ राजनीतिक दल मन ल मतदाता सूची अउ चुनावी सामग्री बर कागज के उपयोग जतका हो सके कम करे के निरदेस जारी करीस हवय। चुनई निकाय ह ई-बुक्स अउ ई-डाक्यूमेंट्स के उपयोग म जोर दीन हवय संगेसंग डबल साइड प्रिंटिंग अउ ले-आउट सुनिश्चित करे बर किहीन हे।
उहें, आयोग ह लोकसभा चुनई म इलेक्ट्रानिक जरिया ले जादा ले जादा कम्युनिकेसन करे बर किहीन हे। पर्यावरण अनुकूल चुनई खातिर चुनई काम-बूता म लगे कर्मी मनके संगेसंग राजनीतिक दल ल घलो एकल उपयोग वाला प्लास्टिक ले पूरा तरह बांचे के निरदेस दीन हवय। संगेसंग ए बात के घलो आदेस दे गे हवय कि चुनई के चलत कचरा ल संघराय के पूरा बेवस्था करे जाय। सबो तरह के कचरा के निपटारा के सुविधा घलो सुनिश्चित करे बर केहे गीस हवय। सार्वजनिक परिवहन के जादा ले जादा उपयोग के अलावा चुनई आयोग ह पर्यावरण अनुकूल गाड़ी मन ल बढ़ावा दे बर अउ कारपूलिंग ल प्रोत्साहित करे के आदेस घलो जारी करीन हवय। एखर अलावा चुनई के दौरान काम करइया अउ मतदाता मन डहार ले तय किये जाने वाला दूरी ल कम करे उपर जोर दीन हवय। राजनीतिक दल मन ले यहू घलो केहे गीस हवय कि चुनई प्रचार के कारीकरम म नवीकरणीय ऊर्जा ल प्रोत्साहित करे जाय।
जवान-घायल
बीजापुर जिला म बीती रतिहा माओवादी मन डहार ले करे गे फायरिंग म डिस्ट्रिक्ट रिजर्व गार्ड-डी.आर.जी. के एक झिन जवान दीपक दुर्गम घायल हो गीस हवय।
मिले जानबा के मुताबिक माओवादी के स्मॉल एक्सन टीम ह बीजापुर-गंगालूर रद्दा म गोरना-मैनकेली के जंगल ले लगे अटल आवास परिसर म फायरिंग करीन। ए घटना म एक झिन जवान घायल हो गीस, जेला इलाज खातिर बीजापुर अस्पताल ले जाय गीस, जिहां उंखर स्थिति खतरा ले बाहिर बताय गीस हवय।
मतदाता जागरूकता कार्यक्रम-01
लोकसभा चुनई के दौरान मतदाता मन ल सत-प्रतिसत मतदान करे खातिर जागरूक करे बर प्रदेस भर म ए बेरा आने-आने जागरूकता कारीकरम चलाय जावत हे। इही कड़ी म राजनांदगांव जिला के छुरिया विकासखंड म स्वीप मेहंदी कारीकरम के आयोजन करे गीस। छुरिया जनपद पंचायत के सीईओ नारायण प्रसाद बंजारा ह बतइन कि ए कारीकरम म महिला अउ बाल विकास अउ स्कूल शिक्षा विभाग के अधिकारी-कर्मचारी, बिहान के माईलोगिन मन, पढ़इया नोनी अउ सिक्षिका मन ह बड़ उछाह के संग हिस्सा लीन। ए प्रतियोगिता ह मेहंदी के आने-आने आकृति के जरिया ले लोगन मन ल मतदान खातिर प्रोत्साहित करीस। प्रतियोगिता म आने-आने संदेस ‘‘हम सबका यह नारा है, मतदान करने जाना हे, मतदान मेरा अधिकार है, छोड़ो अपने सारे काम, पहले करो मतदान‘‘ जइसन संदेस मेंहदी के जरिया ले दे गीस।
एखर संगेसंग जिला म मतदान के प्रतिसत बढ़ाय खातिर हरेक गांव अउ हर वार्ड म मतदाता जागरूकता समूह बनाय जावत हे। एमा वार्ड पार्षद अउ सरपंच के संग पंचायत सचिव, रोजगार सहायक, मितानिन, पटवारी, राजस्व निरीक्षक अउ मोहर्रिर जइसन मैदानी अमला मन ल सामिल करे जावत हे। ए समूह मतदाता जागरूकता ले जुड़े आने-आने गतिविधि के संचालन करही। संगेसंग संगोष्ठी जइसन आयोजन के जरिया ले घलो लोगन मन ल मतदान करे खातिर जागरूक करही।
मतदाता जागरूकता कार्यक्रम-02
उहें, बिलासपुर जिला के तिफरा स्थित शासकीय दृष्टि अउ श्रवण बाधितार्थ विद्यालय म दिव्यांग छात्र-छात्रा मन ह आकर्षक रंगोली अउ पेंटिंग बनाके मतदाता जागरूकता के संदेस दीन। अइसनेच, बिल्हा विकासखंड के ग्राम पंचायत पेंड्रीडीह म घलो स्वीप कारीकरम के आयोजन करे गीस, जिहां स्व-सहायता समूह के दीदी मन ह सत-प्रतिसत मतदान करे के सपथ लीन। एखरे संग दीदी मन ह सुवा नृत्य अउ मानव श्रृंखला बनाके लोगन मन ल मतदान करे खातिर प्रेरित करीन। ए मउका म नवा मतदाता मन के संगेसंग सियान मतदाता मन के सम्मान करीन।
होली-01
रंग, प्रेम अउ खुसी के तिहार होरी आज प्रदेस के जम्मों जघा म पारंपरिक तरीका ले बड़ उछाह के संग मनाय जावत हे। जम्मों प्रदेस बड़ उछाह अउ उल्लास के रंग म डूबे हवय। दिनभर लोगन मन ह रंग के मस्ती म डूबे रिहीन। जगह-जगह नगाड़ा के थाप अउ फाग गीत सुनाई देवत हे। सहर हो या गांव, जम्मों जगह बिहनिया ले होरी के टोली मन घूम-घूम के एक-दूसर ल रंग अउ गुलाल लगाके बधाई देवत हवय। आज बिहनिया लइका अउ युवा मन जम्मों चउक-चउराहा म अवइया-जवइया मनखे मन उपर पिचकारी अउ रंग गुलाल छिछके होरी के आनंद लेवत रिहीन।
उहें, आने-आने सामाजिक संस्था मन ह पर्यावरण जागरूकता के चलत मनखे मन ल सूखा होरी खेले बर प्रेरित करीन। ए संस्था के कार्यकर्ता अउ पदाधिकारी मन गुलाल लगाके एक-दूसर ल होरी के बधाई दीन।
छत्तीसगढ़ म बस्तर ले सरगुजा तक होरी के आने-आने तरीका के रंग नजर आवत हे। बस्तर म ए दारी हमेसा के जइसन होली म जनजातीय संस्कृति अउ परंपरा मनके आने-आने झलक देखे ल मिलीस। बस्तर म होरी के सुरूवात दंतेवाड़ा के फागुन मेला ले होथे। ए परंपरा के अनुसार सुद्ध माटी अउ पलास के फूल ले बने रंग ल दंतेश्वरी देवी अउ, मेला म प्रतीकात्मक रूप ले आय बड़ अकन देवी-देवता ल चढ़ाय जाथे। ए मउका म सांकेतिक होरी बारे जाथे। उहें, फागुन मेला के दूसर दिन बस्तर के पहला होरी माड़पाल म बारे जाथे। प्रदेस म पुलिस प्रसासन डहार ले चउक-चउराहा मन म कड़ा निगरानी राखे गे रिहीस।
होली-02
होरी के मउका म राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह देसवासी मन ल अपन बधाई दीन। राष्ट्रपति ह किहीन हे कि होरी तिहार बड़ खुसी के तिहार हे, जउन लोगन मन म आसा अउ उछाह के भावना जगाथे। उहें, उप राष्ट्रपति ह किहीन हे कि रंग के ए तिहार हरेक मनखे मन ल प्यार के बंधना म बंधे के अउ बसंत के सुवागत के संदेस देथे। प्रधानमंत्री ह आसा व्यक्त करीन कि होरी के ए तिहार जिनगी म नवा ऊर्जा अउ उत्साह के संचार करही।
छत्तीसगढ़ के राज्यपाल विश्वभूषण हरिचंदन अउ मुख्यमंत्री विष्णुदेव साय ह घलो प्रदेसवासी मन ल रंग के तिहार होरी के हार्दिक बधाई अउ अपन सुभकामना दीन हवय।
होरी के मउका म आज राजभवन म होरी मिलन कारीकरम के आयोजन करे गीस। ए मउका म राज्यपाल विश्वभूषण हरिचंदन अउ राज्य के प्रथम महिला सुप्रभा हरिचंदन ल अधिकारी अउ कर्मचारी मन ह गुलाल लगाके होरी के सुभकामना दीन।
अउ अब थोरकुन समाचार सार म –
– कोंडागांव पुलिस ह गाड़ी के जांच के दौरान जोन्गरापदर चौक के तीर ले करीबन छियालीस किलोग्राम गांजा बरामद करीन हे, जेखर कीमत 4 लाख 60 हजार रूपिया बताय गे हवय। ए मामला म पुलिस ह एक झिन नाबालिग समेत दू झिन आरोपी मन ल गिरफ्तार करीन हवय।
अउ
– जांजगीर-चांपा जिला के हीरागढ़ गांव के तीर दू ठिन मोटरसाइकिल के बीच होय टक्कर म पांच झिन मनखे मन घायल होगिन हवय। जम्मों घायल मन के इलाज नवागढ़ के अस्पताल म चलत हवय।