केन्द्रीय स्वास्थ्य मंत्रालय ह जम्मों राज्य अउ केंद्र सासित प्रदेस ल पत्र लिखके गर्मी के महिना के दौरान अस्पताल मन म आगी लगे के घटना ले बचाव खातिर तुरते एहतियाती उपाय बरते बर केहे हवय। जम्मों राज्य अउ केंद्रसासित प्रदेस के मुख्य सचिव मन ल लिखे पत्र म स्वास्थ्य सचिव अपूर्व चंद्रा ह किहीन कि गर्मी के महिना म तापमान बढ़य के सेति अस्पताल म आगी बड़ खतरा बन जथे। स्वास्थ्य मंत्रालय ह राज्य अउ केंद्रसासित प्रदेस मन ले अनुरोध करे हे कि ओमन राज्य स्वास्थ्य विभाग अउ राज्य आपदा प्रबंधन प्राधिकरण ल एके संघरा मिलजुल के काम करे के निरदेस देवय, जेखर ले ए सुनिश्चित करे जा सके कि े उंखर अधिकार क्षेत्र के सबो मान्यता प्राप्त अस्पताल मन म आगी लगे के घटना ल रोके खातिर तुरतेच कार्रवाई करे गीस हवय। एमा केहे गे हे कि अस्पताल मन ल अग्निसामक यंत्र, हाइड्रेट अउ अलार्म जइसन अग्निसमन उपकरण के नियमित रूप ले निरीक्षण करना चाही।
मतदाता जागरूकता कार्यक्रम
लोकसभा चुनई म सत-प्रतिसत मतदान अउ मतदाता मन ल जागरूक करे खातिर प्रदेसभर म आने-आने जागरूकता कारीकरम आयोजित करे जावत हे। इही कड़ी म जांजगीर के स्वामी आत्मानंद विद्यालय म स्वीप कारीकरम के चलत युवा संवाद कारीकरम के आयोजन करे गीस। कारीकरम म एनसीसी कैडैट्स मन सामिल होइन। युवा संवाद कारीकरम म एनसीसी कैडैट्स ह मतदाता जागरूकता के संदेस दीन अउ जम्मों मनखे मन ल मतदान करे के सपथ दिलाइन।
उहें, सक्ती जिला म स्वीप कारीकरम के चलत जिला के आने-आने क्षेत्र मन म कविता, भाषण, वाद-विवाद, साफ-सफाई, रंगोली जइसन प्रतियोगिता के जरिया मताधिकार बर मतदाता मन ल जागरूक करे जावत हे। संगेसंग स्वतंत्र, निष्पक्ष अउ सांतिपूर्ण मताधिकार के प्रयोग करय के संगेसंग जादा ल जादा मतदान करे खातिर प्रेरित करे जावत हे।
ऐति, राजनांदगांव जिला के जनपद पंचायत डोंगरगांव म स्वीप मतदाता जागरूकता अउ सम्मान समारोह के आयोजन करे गीस। जिला पंचायत सीईओ अउ स्वीप के नोडल अधिकारी सुरूचि सिंह के मौजूदगी म ‘‘होली के रंग, मतदान के संग‘‘ नारा के संग चुनावी फाग कारीकरम के सुभारंभ करे गीस। सीईओ ह 3 ले 9 अप्रैल तक जम्मों ग्राम पंचायत मन म आयोजित स्वीप संगोष्ठी के संबंध म जानकारी दीन। ओमन अधिकारी अउ कर्मचारी मन ल संगोष्ठी के जरिया ग्रामीण मन ल मतदान खातिर जागरूक करय, लोकतंत्र म मतदान के महत्व बताय अउ ग्रामीण मन ल मतदान सपथ दिलाय के निरदेस दीन।
ओति, कांंडागांव जिला के कोंडानार कपड़ा फैक्ट्री म वीडियो फिलीम के जरिया मतदान करे खातिर फैक्ट्री म कामबुता करइया नोनी अउ माईलोगिन मन ल जागरूक करे गीस।
साक्षरता मूल्यांकन परीक्षा
राष्ट्रीय वित्तीय साक्षरता मूल्यांकन परीक्षा खातिर पंजीयन 27 मई तक करे जा सकत हे। पंजीकरण के बाद स्कूल मन ल यूजर आईडी अउ पासवर्ड प्राप्त होही। दूसर चरण म यूजर आईडी अउ पासवर्ड के उपयोग कर स्कूल मन ल परीक्षा म भाग लेवय के इच्छुक छात्र के विवरण अपलोड करना होही। पंजीकरण प्रक्रिया पूरा होय के बाद स्कूल मन ल पृष्ठ म उपलब्ध सूची ले अपन पसंद के तारीख अउ समय के चयन करके छात्र मन के नामांकन करना होही। हरेक नामांकित छात्र मन ल एक विशिष्ट यूजर आईडी अउ पासवर्ड प्राप्त होही, जेखर आधार म छात्र परीक्षा म उपस्थित होही। ए परीक्षा इंटरनेट कनेक्शन के संगेसंग कम्प्यूटर लैब वाला स्कूल मन म ही आयोजित करे जाही। संगेसंग स्कूल के अइसन छात्र मन ल जेखर पास खुद के लैपटॉप अउ कम्प्यूटर होही, ओमन ल अपन घर ले परीक्षा म भाग ले खातिर अनुमति दे सकत हवय। ए परीक्षा म कक्षा छठवीं ले बारहवीं तक के पढ़इया लइका मन सामिल हो सकही। परीक्षा 31 मई तक आयोजित होही।
खबर के मुताबिक स्कूली लइका मन ल वित्तीय रूप ले सक्षम बनाय खातिर राष्ट्रीय वित्तीय शिक्षा केंद्र कक्षा छठवीं ले बारहवीं के स्कूली लइका मन खातिर वित्तीय साक्षरता मूल्यांकन परीक्षा आयोजित करथे, जेखर ले छात्र मन ल बुनियादी वित्तीय साक्षरता कौशल के बारे म जागरूक करे जा सकय। भाग लेवइया छात्र मन ल उंखर प्रदर्सन के आधार म एक ठिन ई-प्रमाण पत्र ले सम्मानित करे जाही। एखरे संग अइसन छात्र जउन 50 प्रतिसत अंक प्राप्त करथे, ओमन ल मेरिट अउ 85 प्रतिसत ले जादा अंक प्राप्त करइया मन छात्र मन ल उत्कृष्ट प्रमाण पत्र दे जाही। राष्ट्रीय अउ क्षेत्रीय दू स्तर म विजेता मन ल ई-गिफ्ट कार्ड दे जाही।
कांग्रेस-उम्मीदवार
कांग्रेस ह छत्तीसगढ़ ले बस्तर लोकसभा सीट ले विधायक अउ राज्य के पूर्व मंत्री कवासी लखमा ल चुनाव मैदान म उतारे हे। ओखर मुकाबला भाजपा के महेश कश्यप ले होही जानबा के मुताबिक पार्टी ह मौजूदा सांसद दीपक बैज ल टिकिट न देके कवासी लखमा उपर भरोसा जतइन हवय। कांग्रेस ह राज्य के 11 ठिन लोकसभा सीट मन ले 7 सीट मन खातिर अपन उम्मीदवार मन के घोसना कर दीन हवय। उहें, सरगुजा, रायगढ़, बिलासपुर अउ कांकेर सीट खातिर प्रत्यासी के घोसना होना बांचे हे।
विषाक्त भोजन-मौत
कोरबा जिला के उरगा थाना क्षेत्र म विषाक्त भोजन करे ले दू झिन लइका मन के मौत के मामला आगू आय हवय। उहें, पांच आने लोगन मनके इलाज जारी हवय। एमा दू झिन मृतक समेत तीन झिन आने-आने लोगन मन एकेच परिवार के हवय। खबर के मुताबिक गिदौरी गांव के पति-पत्नी अउ पांच झिन लइका मन बिहनिया नास्ता करे रिहीन, जेखर बाद तबियत बिगड़े ले ओमन ल अस्पताल ले जाय गीस, जिहां दू लइका मन के मौत होगिस अउ आने पांच झिन के उपचार जारी हवय।
होलिका दहन
प्रेम, भाईचारा अउ रंग के तिहार होली काली मनाय जाही। एखर पहिली आज रतिहा बुराई म अच्छाई के जीत के प्रतीक होलिका दहन करे जाही। राजधानी रायपुर समेत प्रदेस के आने-आने जिला मन म होलिका दहन खातिर पूरा तियारी कर ले गे हवय। ए दारी घलो जागरूकता के वजह ले कतकोन जघा मन म लकड़ी के जघा कंडा के होली जलाय के तियारी करे गे हवय। प्रशासन ह होलिका दहन मुहुर्त के मुताबिक आज रतिहा साढ़े 12 बजे तक करे के निरदेस दीन हवय। पुलिस प्रशासन ह होली के दौरान अस्त्र-शस्त्र के उपयोग अउ प्रदर्सन के संगेसंग डीजे अउ मुखौटा मन म घलो रोक लगाय हवय।
उहें, तेज रफ्तार अउ सराब पिके गाड़ी चलइया मनखे मन उपर कड़ा कार्रवाई करे जाही।
ओति, बस्तर के रियासत कालीन होलिका दहन परंपरागत तरीका बीते रतिहा सबले पहिली माड़पाल गांव म मनाय गीस। एखर बाद जगदलपुर के मावली माता मंदिर के आगू परंपरागत तरीका ले जोड़ा होलिका दहन करे गीस।
इही बीच, विशेषज्ञ चिकित्सक मन ह रंग के ए तिहार होली ल सावधानी अउ सुरक्षा के संग मनाय के अपील करीन हवय। ओमन किहीन कि आने-आने पकवान के ए तिहार के दौरान खान-पान म बिसेस सावधानी बरते के जरूरत पढ़थे।
उहें, आयुर्वेदिक डॉक्टर मन ह बतइन कि ए बेरा वातावरण म कतकोन परागकण मौजूद रहिथे, जउन एलर्जीक रोग पैदा करथे। एखरे सेति, होलिका दहन म अगरू, आम, साल, नीम के सूखा डारा अउ गूगुल, कपूर जइसन आयुर्वेदिक जड़ी-बूटी के उपयोग हवन करे म करना चाही, जेखर ले वातावरण संक्रमित होय ले बांच सकय।
होली-शुभकामना
मुख्यमंत्री अउ भाजपा के बड़का नेता विष्णुदेव साय, उप मुख्यमंत्री अरूण साव, विजय शर्मा, भाजपा अध्यक्ष किरण सिंह देव अउ विधानसभा म नेता प्रतिपक्ष डॉक्टर चरणदास महंत ह होली के मउका म जम्मों प्रदेसवासी मन ल अपन बधाई संदेस अउ सुभकामना दीन हवय। मुख्यमंत्री ह अपन संदेस म किहीन कि होली के तिहार अधर्म, असत्य अउ अन्याय ले लड़े के प्रेरणा देथे। श्री साय ह कामना करीन कि होलिका दहन के संगेसंग प्रदेस के जम्मों समस्या मन भस्म हो जाय अउ छत्तीसगढ़ ह विकास, सामाजिक न्याय अउ समरसता के इंद्रधनुषीय रंग ले रंग जाय।