माओवादी मुठभेड़/आईईडी विस्फोट
सुकमा, बीजापुर अउ दंतेवाड़ा जिला के सीमा म सुरक्षा बल के संग होय मुठभेड़ म दू झन माओवादी मन मारे गेहे, जिखर सव ल बरामर कर ले गेहे। उहें, आईईडी विस्फोट के चपेट म आय ले बस्तर फाइटर्स के दू जवान घलो घायल होगे हे, जउन मन ल इलाज बर रईपुर लाय गे हवय।
मिले जानकारी के अनुसार बीजापुर जिला के गंगालूर अउ मुतवेंडी ले डीआरजी, बस्तर फाइटर्स, सीआरपीएफ, कोबरा बटालियन, एसटीएफ अउ सुकमा जिला के जगरगुंडा थाना क्षेत्र के सिलगेर ले डीआरजी, बस्तर फाइटर्स, सीआरपीएफ के संयुक्त टीम ह सर्चिंग म निकले रिहीस। इही दउरान पिड़िया के जंगल म सुरक्षा बल अउ माओवादी मनके बीच मुठभेड़ होइस। जवान मन ल हावी होवत देख माओवादी मन ह जंगल के फायदा उठा के भाग गीन। बाद म मउका के तलाशी के दउरान दू झन माओवादी के सव के अलावा हथियार, बरामद करे गीस।
एखर पहिली, सुकमा जिला के जगरगुंडा थाना क्षेत्र म डोडी-तुमनार के जंगल म माओवादी मन डहार ले लगाय गे आईईडी विस्फोट के चपेट म आय ले बस्तर फाइटर्स के दू झन जवान मन ह घायल होगीन। घायल जवान मन ल इलाज बर रईपुर लाय गे हवय, जिखर स्थिति सामान्य अउ खतरा ले बाहिर बताय गे हवय।
निर्वाचन आयोग-अनिवार्य सेवा
भारत निर्वाचन आयोग ह लोकसभा चुनाव म छत्तीसगढ़ बर दस ठन सेवा ल अनिवार्य सेवा के रूप म अधिसूचित करे हे। एमा स्वास्थ्य, बिजली, रेल परिवहन, डाक, टेलीग्राम विभाग, बीएसएनएल, आकाशवाणी, दूरदर्शन, छत्तीसगढ़ राज्य सहकारी दुग्ध संघ मर्यादित, आयोग के अनुमति ले प्राधिकार पत्र प्राप्त मीडियाकर्मी अउ भारतीय खाद्य निगम सामिल हे।
मुख्य निर्वाचन पदाधिकारी रीना बाबा साहेब कंगाले ह लोकसभा चुनाव म अधिसूचित ‘‘अनिवार्य सेवा‘‘ के राज्य स्तरीय विभागीय नोडल अधिकारी मनके आयोजित बइठका म ए जानकारी दीन। ओमन बतईन कि ए सेवा मनके अइसन कर्मचारी जउन मन ह मतदान केन्द्र म जाके अपन वोट नइ दे सकय, सिरिफ ओखरे मन बर डाक मतपत्र के माध्यम ले मतदान के सुविधा दे जाही। अइसन सबो कर्मी मन ल प्रारूप बारह-घ म निर्वाचन के अधिसूचना जारी होय के पांच दिन के अंदर संबंधित सहायक रिटर्निंग अधिकारी के आगू अपन आवेदन करना होही। कर्मचारी ल आवेदन म अपन मोबाइल नंबर, वोट आईडी नंबर अउ मतदाता सूची म भाग संख्या अउ सरल क्रमांक सही-सही दर्ज करना होही। ओमन ल वोटर आईडी कार्ड के फोटोकॉपी घलो संग म लगाना होही।
बइठका म बताय गेहे कि दे गे बेरा तक मिले सबो पात्र अनिवार्य श्रेणी के मतदाता मन ल जिला म पोस्टल वोटिंग सेंटर बनाके डाक मतपत्र के माध्यम ले मतदान कराय जाही। ए पूरा प्रक्रिया के वीडियोग्राफी घलो कराय जाही।
बस्तर लोकसभा चुनाव-मतदान समय
भारत निर्वाचन आयोग डहार ले लोकसभा चुनाव म बस्तर सीट बर पहिली चरण म उन्नीस अप्रैल के होवइया मतदान के बेरा निर्धारित कर दे गेहे। बस्तर लोकसभा क्षेत्र म सामिल आने-आने विधानसभा क्षेत्र बर आने-आने बेरा तय करे गेहे। बस्तर संसदीय क्षेत्र म अवइया विधानसभा क्षेत्र कोंडागांव, नारायपुर, चित्रकोट, दंतेवाड़ा, बीजापुर अउ कोंटा म बिहनिया सात बजे ले तीन बजे तक मतदान होही। उहें, बस्तर विधानसभा क्षेत्र म बिहनिया सात बजे ले संझा पांच बजे तक वोट डारे जाही। अइसने, जगदलपुर विधानसभा क्षेत्र के एक सौ पचहत्तर मतदान केन्द्र म बिहनिया सात बजे ले मंझनिया तीन बजे तक मतदान होही।
इही बीच, निर्वाचन आयोग ह बस्तर लोकसभा क्षेत्र म भारतीय प्रशासनिक सेवा के अधिकारी डॉक्टर जे. गणेशन ल सामान्य प्रेक्षक अउ भारतीय पुलिस सेवा के अधिकारी रामकिशुन ल पुलिस प्रेक्षक नियुक्त करे हे।
मतदाता जागरूकता कार्यक्रम
लोकसभा चुनाव म शत-प्रतिशत मतदान अउ मतदाता मन ल जागरूक करे बर प्रदेशभर कतकोन जागरूकता कार्यक्रम कराय जावत हे। इही कड़ी म रईपुर जिला प्रसासन डहार ले रईपुर कला केन्द्र म ‘‘स्वीप रसरंग‘‘ कार्यक्रम के आयोजन करे गीस। एमा मुख्य निर्वाचन पदाधिकारी रीना बाबा साहेब कंगाले घलो सामिल होइन। ए मउका म ओमन ह ‘‘वोट दे बर जाबो, चुनई तिहार मनाबो‘‘ के नारा के संग लोगन ले लोकसभा चुनाव म मतदान करे के अपील करीन। उहें, रईपुर के जिला निर्वाचन अधिकारी डॉक्टर गौरव सिंह ह सहरी क्षेत्र म मतदान के प्रतिशत बढ़ाय म जोर दीन। ओमन बतईन कि स्वीप म क्रिकेट प्रतियोगिता के आयोजन कराय जावत हे। ए दउरान स्वीप खिचड़ी के आयोजन घलो करे गीस। कार्यक्रम म लइका अउ युवा मन ह गाना, संगीत, नाटक, संघरा कतकोन प्रस्तुति के माध्यम ले मतदाता मन ल जागरूक करीन।
ओति, कोंडागांव जिला म स्व-सहायता समूह के माईलोगिन मन ह आने-आने जघा म मेंहदी अउ रंगोली सजाके मतदाता जागरूकता के संदेस दीन। संगेसंग बड़ेडोंगर म मतदाता जागरूकता नारा के साथ रैली घलो निकाले गीस।
उहें, सक्ती जिला के कतकोन क्षेत्र म होली मिलन उत्सव मनाय गीस। ए मउका म लोगन ल अपन मताधिकार के प्रयोग करे के सपथ देवाय गीस। संगेसंग माईलोगिन मन डहार ले आकर्षक रंगोली बनाके मतदाता जागरूकता के संदेस दे गीस।
अइसने, बेमेतरा जिला प्रशासन डहार ले साइकिल रैली कराके लोगन ल मतदान बर प्रेरित करे गीस।
सीबीएसई-स्कूल मान्यता
केन्द्रीय माध्यमिक शिक्षा बोर्ड-सी.बी.एस.ई. ह बीस ठन स्कूल के मान्यता रद्द कर देहे। बोर्ड ह एक ठन अधिसूचना म केहे हे कि औचक निरीक्षण के दउरान संबंद्धता अउ परीक्षा नियम के पालन म गड़बड़ी पाय के बाद ए स्कूल मन उपर कड़ा कार्रवाई करे गेहे। सीबीएसई ह केहे हे कि ए स्कूल मन ह डमी छात्र, आयोग्य उम्मीदवार ल पेस करे जइसन काम करत रिहीन अउ रिकॉर्ड ल घलो ठीक से नइ राखत रिहीन।
होलिका दहन
काली चौबीस मार्च के होलिका दहन होही अउ पच्चीस मार्च के रंगउत्सव मनाय जाही। होली तिहार ल लेके लोगन म उछाह देखे जावत हे। बाजार मन म पिचकारी, रंग-गुलाल, पूजा सामान अउ मिठई के दुकान सज गे हवय। उहें, होलिका दहन बर गली-मोहल्ला अउ चउक-चउराहा म तैयारी चलत हे।
राज्यपाल विश्वभूषण हरिचंदन ह होली तिहार के मउका म प्रदेस के लोगन ल बधाई अउ सुभकामना दीन हे। अपन संदेस म राज्यपाल ह किहीन कि रंग के तिहार होली एक ठन सांस्कृतिक अउ पारंपरिक तिहार हे।
विश्व टीबी दिवस
काली विश्व टीबी दिवस हे। आज ए उपलक्ष्य म राजधानी रईपुर के घड़ी चउक के मुख्य चिकित्सा अउ स्वास्थ्य अधिकारी कार्यालय म विश्व टीबी दिवस कार्यशाला अउ मतदाता जागरूकता कार्यक्रम के आयोजन करे गीस। ए मउका म डॉक्टर मिथिलेश चौधरी ह बतईन कि टीबी रोग ल लेके लोगन के बीच जागरूकता फैलाय बर हर बछर चौबीस मार्च के विश्व टीबी दिवस मनाय जाथे। ए बछर विश्व टीबी दिवस के थीम हे – ‘‘हां हम टीबी खत्म कर सकते हैं‘‘। कार्यक्रम म सौ ले जादा स्वास्थ्य कार्यकर्ता अउ अधिकारी-कर्मचारी मन सामिल होइन। ए दउरान सपथ अउ हस्ताक्षर अभियान के घलो आयोजन करे गीस।
संक्षिप्त समाचार
– आज शहीद-ए-आजम भगत सिंह, राजगुरू अउ सुखदेव के शहीदी दिवस हे। आज के दिन बछर उन्नीस सौ इकतीस म लाहौर षड़यंत्र मामला म ए तीनों महान सहीद मन ह देस के आजादी बर हांसते-हांसत फांसी के फंदा म झूल गे रिहीन।
– बीजापुर जिला म आदर्श आचार संहिता के दउरान चेकपोस्ट म ड्यूटी म तैनात सहायक उप निरीक्षक सोमनाथ ठाकुर ल राहगीर मन ले दुर्व्यवहार करे के मामला म निलंबित कर दे गेहे।
– रायगढ़ जिला म मुनुन्द-कुडेकेला तीर चारपहिया गाड़ी के टक्कर ले मोटर साइकिल म बइठे एक झन मनखे के मउत होगे। फेर, एक झन दूसर मनखे ह गंभीर रूप ले घायल होगे हवय।
– जांजगीर-चांपा जिला के शिवरीनारायण पुलिस ह वन अउ पुलिस विभाग म नौकरी लगाय के नाम म तीन झिन लोगन ले करीबन ग्यारह लाख रूपिया के ठगी के मामला म एकेच परिवार के तीन झन लोगन के खिलाफ अपराध पंजीबद्ध करे हे।
अउ
– बिलासपुर जिला के कछार, निरतु अउ घुटकू म रेत के अवैध उत्खनन अउ परिवहन के मामला म राजस्व, पुलिस अउ खनिज विभाग के टीम ह एक ठन जेसीबी संघरा छह ठन ट्रेक्टर ल जब्त करे हे।