अवइया लोकसभा चुनई बर नामांकन भरे के प्रक्रिया जारी हे। इही बीच प्रदेस के बस्तर लोकसभा सीट बर आज दू झिन प्रत्यासी मन अपन नांव निर्देसन पत्र दाखिल करीन। एमा भारतीय कम्यूनिस्ट पार्टी के फूलसिंग कचलाम अउ बहुजन समाज पार्टी के आयतुराम मंडावी सामिल हे।
बतादन कि प्रदेस के बस्तर लोकसभा सीट बर पहिली चरण के तहत अवईया उन्नीस अप्रैल के मतदान होही। एखर बर शासकीय अवकाश के दिन ल छोड़के अवइया सत्ताईस मार्च तक नामांकन दाखिल करे जा सकत हे।
निर्वाचन-तैयारी
ओति, जांजगीर-चांपा म लोकसभा चुनाव के तहत मतदान दल के गठन बर आज पहिली रेंडमाइजेशन करे गीस। कलेक्टर अउ जिला निर्वाचन अधिकारी आकाश छिकारा के उपस्थिति म कलेक्टोरेट म निर्वाचन विभाग के सॉफ्टवेयर के माध्यम ले प्रथम चरण के रेंडमाइजेशन करे गीस।
इही बीच, निर्वाचन आयोग ह कोरबा संसदीय सीट के कोरबा विधानसभा क्षेत्र के दू सौ उनचास बूथ म महिला कर्मी मनके ड्यूटी लगाय के निर्णय लेहे। जिला निर्वाचन अधिकारी अजीत बसंत ह बतइन कि अवइया लोकसभा चुनाव बर कोरबा विधानसभा क्षेत्र के बूथ मन म महिला मन के ही ड्यूटी लगाय जाही। एखर बर एक हजार ले जादा महिला कर्मी मनके तैनाती करे जाही।
ऐति, गौरेला-पेण्ड्रा-मरवाही म पुलिस अधीक्षक भावना गुप्ता ह निष्पक्ष अउ पारदर्सी चुनाव कराय बर पुलिस अधिकारी कर्मचारी मन ल प्रसिक्षण दीन। प्रसिक्षण के दौरान निर्वाचन आयोग के नियम के कड़ाई ले पालन करे के निरदेस दीन।
भाजपा/कांग्रेस
मुख्यमंत्री अउ वरिष्ठ भाजपा नेता विष्णुदेव साय आज राजनांदगांव म राखेगे भाजपा के विधानसभा स्तरीय कार्यकर्ता सम्मेलन म सामिल होइन। सम्मेलन ल संबोधित करत श्री साय ह तीन महिना के उपलब्धि गिनावत किहीन कि हमर सरकार ह मोदी के गारंटी ल पूरा करे के काम करिस। ओमन कार्यकर्ता मन ले पार्टी उम्मीदवार के जीत बर अभी ले तियार रेहे के आह्वान करीन। कारीकरम ल संबोधित करत सांसद अउ भाजपा प्रत्यासी संतोष पांडेय अउ पूर्व सांसद मधुसूदन यादव ह कांग्रेस उपर निसाना साधिस।
छत्तीसगढ़ कांग्रेस प्रभारी सचिन पायलट ह आज राजधानी रईपुर स्थित पार्टी के प्रदेस कार्यालय राजीव भवन म प्रदेस कांग्रेस समिति के जम्मों मोर्चा, प्रकोष्ठ अउ विभाग मनके प्रमुख के बइठका लीन। बइठका म लोकसभा समन्वयक अउ रईपुर लोकसभा के नौ विधानसभा क्षेत्र के कांग्रेस पदाधिकारी घलो बिसेस रूप ले सामिल होइन बइठका म श्री पायलट ह राजीव भवन रईपुर म लोकसभा चुनई के तियारी के समीक्षा करीन।
निर्वाचन आयोग-जब्त
राज्य म लोकसभा आम चुनाव बर आदर्स आचार संहिता के प्रभावी होय के बाद ले अब तक दू करोड़ चौरासी लाख रूपिया के अवैध धनरासि अउ समान जब्त करे गेहे। मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी मन डहार ले निगरानी के दौरान काली इक्कीस मार्च तक पंचानवे लाख रूपिया के नगद धन रासि जब्त करे गेहे। उहें, इही अवधि म सोला लाख रूपिया के सात हजार लीटर ले जादा अवैध सराब घलो जब्ती करे गेहे। एखर अलावा बियानवे लाख रूपिया के तीन सौ छियालिस किलो ग्राम मादक पदार्थ अउ बावन लाख रूपिया के आठ सौ चालीस ग्राम आभूषण घलो जब्ती करे गेहे।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत लोकसभा निर्वाचन के आने-आने पहलू उपर छत्तीसगढ़ के मुख्य निर्वाचन पदाधिकारी रीना बाबा साहेब कंगाले ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली तेइस मार्च के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
पीएससी-परिणाम
छत्तीसगढ़ लोकसेवा आयोग ह राज्य सेवा प्रारंभिक परीक्षा दू हजार तेइस के परिणाम जारी कर देहे। ए दरी संघ लोकसेवा आयोग के जइसे मुख्य परीक्षा बर अर्हता मिलइया अभ्यर्थी मनके अनुक्रमांक अउ नांव के संघरा वर्गवार अउ उप वर्गवार कटऑफ नंबर घलो घोसित करे गेहे। आयोग डहार ले जारी परिणाम म मुख्य परीक्षा बर कुल तीन हजार पांच सौ संतानबे अभ्यर्थी मन अर्हता पाय हे।
बतादन कि राज्य लोकसेवा आयोग डहार ले दू सौ बियासी पद उपर भर्ती बर ग्यारा फरवरी दू हजार चौबीस के प्रारंभिक परीक्षा ले गे रिहीस। एखर बर एक लाख अंठावन हजार ले जादा अभ्यर्थी मन ऑनलाइन आवेदन करे रिहीन।
शांति समिति-बैठक
रंग के तिहार होली अवईया पच्चीस मार्च के मनाय जाही। तिहार के दौरान सांति व्यवस्था बनाय राखे बर पुलिस प्रसासन मुस्तैद होगे हे। इही कड़ी म रईपुर कलेक्टर डॉक्टर गौरव सिंह के मार्गदर्सन म जिला अउ पुलिस प्रसासन ह कलेक्टोरेट म सांति समिति के बइठका लीन। बइठका म जम्मों समाज के प्रमुख नगारिक सामिल होइन। उहें, होली अउ दूसर तिहार मन ल सांतिपूर्ण तरीका ले मनाय के निरदेस दे गीस। ए दौरान समाज, प्रमुख मन घलो अपन सुझाव रखिन। बइठका के दौरान होलिका दहन मुहूर्त के अनुसार रतिहा साढ़े बारा बजे तक करे के निरदेस दे गीस। एखरे संग बताय गीस कि होली के दौरान हथियार अउ प्रदर्सन के संघरा डीजे अउ मुखौटा उपर प्रतिबंध रिही। उहें, तेज रफ्तार अउ सराब पीके गाड़ी चलाय वाला मन उपर घलो कड़ा कार्रवाई करे जाही।
अइसने सक्ति अउ बेमेतरा समेत आने-आने जिला मन म घलो सांति-समिति के बइठका लेके होली परब सांति अउ सद्भाव के संग मनाय जाय के समझाइस दे गीस।
कलेक्टर-वेतन कटौती
रईपुर कलेक्टर डॉक्टर गौरव िंसंह ह काली कलेक्टोरेट अउ संबंधित कार्यालय मनके औचक निरीक्षण करीन। ए दौरान कुछ अधिकारी-कर्मचारी कार्यालयीन बेरा म अनुपस्थित पाय गीन। कलेक्टर ह अनुपस्थित अधिकारी अउ कर्मचारी मनके एक दिन के असाधारण अवकाश घोसित करत वेतन काटे के निरदेस दीन। संघरा कलेक्टर ह जिला शिक्षा अधिकारी अउ जिला मुख्य स्वास्थ्य अधिकारी ल कारण बताओ नोटिस जारी करीन।
बैडमिंटन चैंपियनशिप
हैदराबाद म राखे गे सोलहवां ऑल इंडिया बैडमिंटन चैंपियनशिप म डीएसपी अंजली अउ डीएसपी रमेश येरेवार के जोड़ी ह बैडमिंटन मिक्सड डबल म कांस्य पदक पाय हे। एखर पहिली इंस्पेक्टर प्रमिला मंडावी ह महिला सिंगल्स म रजत पदक प्राप्त करीन हे। ए प्रतियोगिता म देस के जम्मों राज्य के एनएसजी, सीआरपीएफ, आईटीबीपी, बीएसएफ, एसएसबी अउ रेलवे के टीम ह भाग लेहे।
कोंडागांव-मेला मड़ई
कोंडागांव जिला म पारंपरिक मेला-मड़ई के तीसरइयां दिन काली रतिहा एनसीसी मैदान म पारंपरिक आदिवासी नृत्य के आयोजन करे गीस। ए दौरान कोंडागांव के संघरा नारायणपुर जिला के लगभग पच्चीस आदिवासी लोकनृत्य दल ह पारंपरिक नृत्य के प्रदर्सन करीन। कारीकरम के निर्णायक जयमती कश्यप ह बतइन कि आदिवासी मन ह लोकनृत्य के माध्यम ले अपन परंपरा अउ जीवन के मुख्य पहलू के प्रदर्सन करीन। ओमन बतइन कि खरीफ के फसल कट जाय के बाद क्षेत्र के ग्रामीण देवी-देवता के आगू नृत्य करथे। ए दौरान लोकनर्तक दल मन ल घलो पुरस्कृत करे गीस, जेमा पहिली पुरस्कार फरसगांव के कोटपाड, दूसरा पुरस्कार नुगांली अउ तीसरा पुरस्कार रेंगागोंदी के लोक नर्तक दल ल दे गीस।