छत्तीसगढ़ म लोकसभा चुनाव के पहिली चरण बर आज अधिसूचना जारी होगे हे। पहिली चरण म सिरिफ बस्तर लोकसभा क्षेत्र बर उन्नीस अप्रैल के मतदान होही। एखरे संगेसंग ए सीट बर नामांकन पत्र भरे के काम सुरू होगे हे। पहिली चरण म सत्ताईस मार्च तक नामांकन भरे जा सकही। अट्ठाईस मार्च के नामांकन पत्र मनके जांच होही। उम्मीदवार तीस मार्च तक नाम वापस ले सकही। बस्तर लोकसभा सीट अनुसूचित जनजाति वर्ग बर आरक्षित हे।
बस्तर लोकसभा क्षेत्र म निष्पक्ष अउ सांतिपूर्ण चुनाव कराय बर सबो जरूरी तैयारी करे जात हे। ए बार मतदान बर इहां चार सहायक मतदान केन्द्र संग कुल एक हजार नौ सौ इकसठ मतदान केन्द्र बनाय गेहे। कलेक्टर विजय दयाराम के.ह बतईन कि पहिली चरण बर प्रत्याशी अपन नामांकन पत्र सरकारी छुट्टी के दिन ल छोड़के कार्यालयीन दिन म बिहनिया ग्यारह बजे ले मंझनिया तीन बजे तक दाखिल कर सकत हे।
कंप्लेंट मॉनिटरिंग सिस्टम
लोकसभा चुनाव के दउरान आने-आने माध्यम ले मिले निर्वाचन संबंधी सिकायत के तुरते निराकरण बर मुख्य निर्वाचन पदाधिकारी कार्यालय डहार ले कंप्लेंट मॉनिटरिंग सिस्टम-सी.एम.एस. सॉफ्टवेयर बनाय गेहे। एला लेके रायपुर म नोडल अधिकारी मनके प्रसिक्षण कार्यक्रम आयोजित करे गीस। प्रसिक्षण के दउरान अतिरिक्त मुख्य निर्वाचन पदाधिकारी नीलेश कुमार महादेव क्षीरसागर अउ संयुक्त निर्वाचन पदाधिकारी पी.एस. ध्रुव ह सॉफ्टवेयर के बारे म विस्तार ले जानकारी दीन। ओमन बतईन कि चुनाव के दउरान सी-विजिल, सोशल मीडिया संग आने-आने माध्यम ले मिले सिकायत ल डिजिटाइज्ड करके ओला निराकरण बर नोडल अधिकारी मन तीर भेजे जाही। नोडल अधिकारी सिकायत मनके निराकरण करही अउ एखर जानकारी तत्काल मुख्य निर्वाचन पदाधिकारी कार्यालय ल दीही।
निर्वाचन आयोग-डाक मतपत्र
लोकसभा चुनाव अउ चार राज्य मन म विधानसभा चुनाव बर निर्वाचन आयोग ह जरूरी सेवा मन म काम करत अनुपस्थित मतदाता मन बर डाक मतपत्र के माध्यम ले मतदान के सुविधा बर बिसेस श्रेणी अधिसूचित करे हे। सूची म मेट्रो, रेलवे, भारतीय संचार निगम लिमिटेड, बिजली अउ स्वास्थ्य विभाग, अग्निशमन सेवा, डाक सेवा, विमानन, आपदा प्रबंधन विभाग अउ मीडिया के कर्मचारी सामिल हे। आयोग ह कहिन कि लोक प्रतिनिधित्व अधिनियम के प्रावधान के अनुसार सही विचार करे के बाद जरूरी सेवा म काम करत मनखे ल डाक मतपत्र ले वोट डाले बर अधिसूचित करे गेहे।
आदर्श आचार संहिता
राज्य म लोकसभा चुनाव ल लेके आदर्श आचार संहिता प्रभावी होय के बाद निगरानी दल डहार ले अब तक दू करोड़ रूपिया ले जादा नगद रकम अउ आने वस्तुत जब्त करे गेहे। मुख्य निर्वाचन पदाधिकारी कार्यालय ले मिले जानकारी के अनुसार प्रवर्तन एजेंसी डहार ले निगरानी के दउरान साढ़े सैंतालीस लाख रूपिया नगद जब्त करे गेहे। उहें, इक्यासी लाख रूपिया ले जादा के अवैध सराब अउ आने मादक पदार्थ के संग करीबन बावन लाख रूपिया के कीमत आभूषण घलो बरामद करे गेहे। एखर संगेसंग इक्कीस लाख इकहत्तर हजार रूपिया ले जादा के आने सामान जब्त करे गेहे।
मतदाता जागरूकता कार्यक्रम
लोकसभा चुनाव म शत-प्रतिशत मतदान ल लेके राजनांदगांव जिला के सबो विकसखंड मन म स्वीप मतदाता जागरूकता कार्यक्रम के आयोजन करे जात हे। जिला पंचायत के मुख्य कार्यपालन अधिकारी सुरूचि सिंह ह बतईन कि डोंगरगांव विकासखंड म आयोजित स्वीप मतदाता जागरूकता कार्यक्रम म मितानिन मन ल अनिर्वाय मतदान बर सपथ दिलाय गीस अउ ओमन ल जरूरी मार्गदर्शन घलो दे गीस।
भाजपा-बैठक
लोकसभा चुनाव के तैयारी ल लेके भारतीय जनता पार्टी के आने-आने समिति अउ विभाग के बइठका काली रईपुर स्थित पार्टी के प्रदेस मुख्यालय म होइस। बइठका म पार्टी के प्रदेस सह प्रभारी नितिन नबीन ह सबो पदाधिकारी अउ कार्यकर्ता ले प्रदेस के सबो ग्यारह सीट म भाजपा के जीत सुनिश्चित करे बर रणनीति बनाके काम करे म जोर दीन। ओमन ह पार्टी डहार ले अब तक करे गे संगठनात्मक काम के समीक्षा करे के संगेसंग अवइया कार्यक्रम के रूप रेखा घलो बनईन। ए मउका म भाजपा के प्रदेस अध्यक्ष किरण सिंह देव घलो मौजूद रिहीन।
सचिन पायलट-नितिन नबीन
लोकसभा चुनाव ल लेके आने-आने पार्टी ह अपन प्रचार अभियान सुरू कर देहे। इही कड़ी म कांग्रेस के छत्तीसगढ़ प्रभारी सचिन पायलट अपन दू दिन के दउरा म काली रईपुर पहुंचीस। ओमन काली जांजगीर म राखे गे लोकसभा स्तरीय कार्यकर्ता सम्मेलन म भाग लीहीं। उहें, बाईस मार्च के ओमन रईपुर म स्थानीय कार्यक्रम अउ कार्यकर्ता के बइठका म हिस्सा लीही। एखर बाद ओमन संझा नई दिल्ली बर रवाना हो जही।
ओति, भाजपा के छत्तीसगढ़ सह-प्रभारी नितिन नबीन घलो काली जांजगीर के दउरा करही। ए दउरान ओमन लोकसभा स्तरीय बइठका घलो लीहीं।
माओवादी-आत्मसमर्पण
छत्तीसगढ़-तेलंगाना के सीमावर्ती क्षेत्र म सक्रिय आठ लाख रूपिया के इनामी माओवादी ह आज सुकमा पुलिस के आगू आत्मसमर्पण कर देहे। ए माओवादी ह सुकमा पुलिस डहार ले चलाय जात ‘‘पूना नर्कोम अभियान‘‘ ‘नई सुबह-नई शुरूआत‘ ले प्रभावित होके पुलिस अधीक्षक किरण चव्हाण सहित सुरक्षा बल मनके वरिष्ठ अधिकारी मनके तीर बिना हथियार के आत्मसमर्पण करीन। आत्मसमर्पित माओवादी ल राज्य शासन के पुनर्वास नीति के तहत प्रोत्साहन राशि अउ आने सुविधा दे गीस।
अग्निवीर भर्ती रैली-आवेदन
अग्निवीर भर्ती रैली म आवेदन करे के आखिरी तारीख बाईस मार्च हे। प्रदेस ले अब तक लगभग अट्ठारह हजार उम्मीदवार मन ह ए रैली बर अपन पंजीयन कराय हे। इच्छुक उम्मीदवार भारतीय सेना के अधिकारिक वेबसाइट म जाके अपन पंजीयन करा सकत हे। ए संबंध म जादा जानकारी बर नवा रईपुर स्थित सेना भर्ती कार्यालय ले संपर्क करे जा सकत हे।
मदरसा बोर्ड परीक्षा
छत्तीसगढ़ मदरसा बोर्ड रायपुर डहार ले आयोजित हाईस्कूल, हायर सेकेंडरी, पत्राचार पाठ्यक्रम परीक्षा अउ उर्दू अदीब, उर्दू माहिर प्रमाण-पत्र परीक्षा अब चौदह मई ले सुरू होके सत्ताईस मई तक चलही। परीक्षा के बेरा बिहनिया नौ बजे ले मंझनिया बारह बजे तक निर्धारित हे। छत्तीसगढ़ मदरसा बोर्ड के प्रभारी सचिव पी.पी. द्विवेदी ह बतईन कि प्रदेस म होवइया लोकसभा चुनाव ल देखत परीक्षा के समय-सारिणी म बदलाव करे गेहे।
रेलवे सेमिनार
रायपुर रेलमंडल म ट्रेन मनके सुरक्षित परिचालन बर भाटापारा स्टेसन म संरक्षा संगोष्ठी के आयोजन करे गीस। एमा संरक्षा सलाहकार, सुपरवाइजर अउ फील्ड कर्मचारी ह हिस्सा लीन। संगोष्ठी म ट्रेन मनके सुरक्षित परिचालन ले संबंधित उपाय ल लेके प्रदर्सन करे गीस।
अउ अब पेस हे मौसम के हाल…
प्रदेस म पाछु दिन ले बरसा होय के सेती तापमान म कमी आय हे। फेर काली ले मौसम के सुष्क रेहे के संभावना हे। मौसम विभाग के अनुसार दक्षिण ले अवइया हवा के प्रभाव कम होय के सेती काली ले दिन के तापमान म दू ले चार डिग्री सेल्सियस के बढ़ोतरी होय के आसार हे।
इही बीच, राजधानी रईपुर, बिलासपुर, जांजगीर, राजनांदगांव, दुरूग संग प्रदेस के कतकोन जिला म काली बरसा होइस। उहें, चिल्फीघाटी म ओला घलो गिरीस। बरसा के सेती रायपुर म तापमान सामान्य ले करीबन छह डिग्री सेल्सियस नीचे गिर गेहे।
अउ अब थोरकुन समाचार सार म –
– संघ लोक सेवा आयोग-यूपीएससी के सिविल सेवा प्रारंभिक परीक्षा अब सोलह जून के ले जाही। आयोग ह लोकसभा चुनाव के सेती परीक्षा के तारीख म फेरबदल करे हे। पहिली ए परीक्षा छब्बीस मई के होवइया रिहीस।
– राज्यपाल विश्वभूषण हरिचंदन ह आज राजभवन म होय समारोह म नव नियुक्त राज्य सूचना आयुक्त नरेन्द्र कुमार शुक्ल अउ आलोक चंद्रवंशी ल पद अउ गोपनीयता के सपथ देवइन।
– सारंगगढ़-बिलाईगढ़ जिला के बरमकेला म छत्तीसगढ़ ओपन स्कूल बोर्ड परीक्षा म सामूहिक नकल के मामला म लोक शिक्षण विभाग ह केन्द्राध्यक्ष संग नौ झिन सिक्षक मन ल निलंबित करे के आदेस जारी कर देहे।
– सक्ती जिला के मुख्य न्यायिक मजिस्ट्रेट ह टोनही प्रताड़ना के मामला म तीन आरोपी मन ल एक-एक साल के सश्रम कारावास के सजा के संग एक-एक हजार रूपिया के अर्थदंड ले दंडित करे हे।