आज दिनभर के खबर ल अपन गुरतुर छत्तीसगढ़ी भाखा म पढ़व

उच्चतम न्यायालय-सीएए

उच्चतम न्यायालय ह नागरिकता संशोधन अधिनियम-सीएए ल लागू करे उपर रोक लगाय ले मना कर देहे। न्यायालय ह पाछु हफ्ता लागू होय ए कानून ल चुनौती देवइया दू सौ सैंतीस याचिका मनके जवाब दे बर केन्द्र सरकार ल तीन हफ्ता के समय देहे।
मुख्य न्यायाधीश डी.वाई. चन्द्रचूड़, न्यायाधीश जे.बी. पारदीवाला अउ न्यायाधीश मनोज मिश्रा ह मामला के सुनवाई करीन। इंडियन यूनियन मुस्लिम लीग, कांग्रेस के जयराम नरेश अउ तृणमूल कांग्रेस के महुआ मोइत्रा संग कतकोन लोगन ह ए मामला म याचिका दायर करे हे। मामला के अगला सुनवाई नौ अप्रैल के होही।

लोकसभा चुनाव-नामांकन

बस्तर लोकसभा क्षेत्र म पहिली चरण के मतदान बर काली बीस मार्च के अधिसूचना जारी होही। एखरे संग नामांकन पत्र भरे के सिलसिला सुरू हो जही। सत्ताईस मार्च तक नामांकन भरे जा सकही। अट्ठाईस मार्च के नामांकन पत्र के जांच होही। उम्मीदवार तीस मार्च तक नाम वापस ले सकही। बस्तर लोकसभा क्षेत्र म पहिली चरण म उन्नीस अप्रैल के मतदान होही। जानबा के मुताबिक छत्तीसगढ़ के ग्यारह लोकसभा सीट म तीन चरण म मतदान होही।

राजनीतिक दल-प्रतिनिधि बैठक

मुख्य निर्वाचन पदाधिकारी रीना बाबासाहेब कंगाले ह प्रदेस के मान्यता प्राप्त राजनीतिक दल के प्रतिनिधि मनके बइठका लीन। बइठका म ओमन ह राजनीतिक दल के प्रतिनिधि मन ल आदर्श आचार संहिता अउ निर्वाचन व्यय अनुवीक्षण के संबंध म विस्तार ले जानकारी दीन। मुख्य निर्वाचन पदाधिकारी कार्यालय म आयोजित बइठका म लोकसभा चुनई बर उम्मीदवार डहार ले नामांकन पत्र दाखिल करे के प्रक्रिया के बारे म जानकारी दे गीस। बइठका म बताय गीस कि राज्य म मतदाता सूची के आखिरी प्रकासन के बाद घलो मतदाता मनके नाम जोड़े के काम चलत हे। उहें, लोकसभा चुनई बर घलो मतदान केन्द्र मन म मतदाता सहायता केन्द्र बनाय जाही। ए केन्द्र मन म बुजुर्ग अउ दिव्यांग मतदाता मनके सहायता बर मतदाता मित्र घलो उपस्थित रइही। भारत निर्वाचन आयोग के अनुसार पच्यासी बछर ले जादा उमर वाले बुजुर्ग अउ चालीस प्रतिसत या एखर ले जादा दिव्यांग मतदाता डाक मतपत्र ले वोटिंग कर सकही।

मतदाता जागरूकता कार्यक्रम

लोकसभा चुनई के मद्देनजर प्रदेसभर म मतदाता जागरूकता कार्यक्रम के तहत आने-आने गतिविधि आयोजित करे जात हे। इही कड़ी म बिलासपुर जिला के बिल्हा विकासखंड स्थित भैंसबोड़ गांव के प्रेरणादायिनी संकुल संगठन अउ गारमेंट फैक्ट्री के दीदी मन घलो स्वीप कार्यक्रम म सामिल होइन। ए माईलोगिन मन मतदाता सपथ लेके स्थानीय लोगन मन ल घलो मतदान बर जागरूक करत हे।
ओति, मतदाता जागरूकता अभियान स्वीप के तहत कोंडागांव जिला म घलो आने-आने कार्यक्रम के आयोजन करे जात हे। गांव-गांव म मतदाता मन ल जागरूक करके ओमन ल अपन मतदान करे बर प्रेरित करे जात हे। बिहान स्व-सहायता समूह के माईलोगिन मन ह गांव म सबो चउक-चउराहा अउ सार्वजनिक जघा म मतदान के तारीख के संग समय लिखके लोगन मन तक मतदान के संदेस पहुंचावत हे। स्व-सहायता समूह के दीदी मन घर-घर जाके लोगन मन ल जागरूक घलो करत हे।

भूपेश बघेल/संतोष पांडेय

पूर्व मुख्यमंत्री अउ राजनांदगांव लोकसभा क्षेत्र के कांग्रेस प्रत्याशी भूपेश बघेल ह भारतीय जनता पार्टी उपर सत्ता के दुरूपयोग के दबाव के राजनीति करे के आरोप लगाय हे। ए बात श्री बघेल ह राजनांदगांव दउरा के दउरान ब्लॉक स्तरीय कार्यकर्ता सम्मेलन म किहीन। ओमन ह पार्टी कार्यकर्ता के आह्वान करीन कि ओमन महंगाई, बेरोजगारी अउ किसान के समस्या ल लेके जनता के बीच म पहुंचे।
दूसर कोति, सांसद अउ राजनांदगांव लोकसभा क्षेत्र के भाजपा प्रत्याशी संतोष पांडेय ह पूर्व मुख्यमंत्री भूपेश बघेल उपर राज्य के मुखिया राहत हुए जनता के संग धोखा करे के आरोप लगाय हे। महादेव सट्टा ऐप मामला म श्री पांडेय ह कहिन कि श्री बघेल के खिलाफ कानून के तहत कार्रवाई करे जावत हे। राजनांदगांव म एक पत्रकारवार्ता ल संबोधित करत हुए ओमन ह कहिन कि ए घोटाला म जुड़े आने आरोपी मनके नाव घलो धीरे-धीरे सामने आवत हे।

माओवादी-मुठभेड़

दंतेवाड़ा जिला के किरंदुल थाना क्षेत्र म सुरक्षा बल मनके संग होय मुठभेड़ म एक माओवादी मारे गेहे। घटनास्थल ले हथियार अउ विस्फोटक सामग्री बरामद करे गेहे। जानबा के मुताबिक दंतेवाड़ा-बीजापुर जिला के सीमावर्ती इलाका ले लगे पुरंगेल-गमपुर के जंगल म माओवादी मनके इकट्ठा होय के सूचना मिले रिहीस, जेखर बाद डीआरजी, बस्तर फाइटर्स अउ सी.आर.पी.एफ. के संयुक्त टीम रवाना करे गीस। ए दउरान सुरक्षा बल अउ माओवादी मनके बीच मुठभेड़ होइस, जेमा एक माओवादी मारे गीस, जेखर सव बरामद कर ले गेहे। सुरक्षा बल मन ह दावा करे हे कि ए मुठभेड़ म कतकोन दूसर माओवादी घायल होय हे।
ओति, छत्तीसगढ़-महाराष्ट्र के सीमावर्ती इलाका म सुरक्षा बल मनके संग होय मुठभेड़ म चार माओवादी मारे गेहे। ए माओवादी मन उपर छत्तीस लाख रूपिया के इनाम घोसित रिहीस। जानबा के मुताबिक छत्तीसगढ़ के सीमा ले लगे महाराष्ट्र के गढ़चिरौली जिला के कोलामारका के जंगल म आज बिहनिया सी-सिक्सटी कमांडो अउ माओवादी मनके बीच ए मुठभेड़ होइस। मुठभेड़ म डी.वी.सी. सदस्य वर्गीस, डी.वी.सी. मंगतू अउ प्लाटून सदस्य कुरसम राजू के संग वेंकटेश के मउत होगे। मउका म सुरक्षा बल मन ह एके-फोर्टी सेवन, एक कारवाइन अउ दू देसी हथियार बरामद करे हे।

हादसा

दुरूग के गंज पारा म आज बिहनिया कपड़ा सुखावत समय करेंट के चपेट म आय ले दू लोगन के मउत होगे। बताय जात हे कि ए माईलोगिन कपड़ सुखावत रिहीस। इही समय ओ ह करेंट के चपेट म आ गीस। ओला बचाय के कोसिस म माईलोगिन के ससुर ल घलो करेंट लग गीस, जेखर ले दूनों के मउका म ही मउत होगे।
उहें, रायगढ़ जिला के तमनार थाना क्षेत्र म काली संझा ट्रैक्टर पलटे ले एखर नीचे दबके दू लोगन के मउत होगे। ए घटना रेगांव-सलिहाभांठा रोड तीर खेत म जोताई के दउरान होइस।
अइसने, जांजगीर-चांपा जिला के बलौदा क्षेत्र स्थित हरदीबाजार रोड म अज्ञात ट्रेलर ह मोटर साइकिल सवार तीन मनखे ल टक्कर मार दीस। ए हादसा म एक मनखे के मउत होगे। फेर, दू आने मनखे गंभीर रूप ले घायल होगे हे।

फागुन मेला-खोर खुंदनी

दंतेवाड़ा के प्रसिद्ध ऐतिहासिक फागुन मेला मड़ई म आज चौथइया दिन ‘‘नाच मांडनी‘‘ के रस्म अदा करे गीस। एखर पहिली, काली तीसरइया दिन माईजी के तीसरइया पालकी निकाले गीस। संगेसंग ‘‘खोर खुंदनी‘‘ के रस्म अदा करत हुए तेलगा, कुम्हार अउ सेठिया जाति के लोगन मन ह ‘‘बाजा मोहरी‘‘ के गूंज म परंपरागत नृत्य करीन।

अउ अब पेस हे मौसम के हाल..

मौसम विभाग ह अवइया चौबीस घंटा के दउरान प्रदेस के कतकोन जघा म आकाशीय बिजली अउ ओला गिरे के संग बारिस होय के चेतावनी देहे। ए दउरान राज्य के उत्तरी इलाका के कतकोन जिला म तेज अंधड़ चल सकत हे। उहें, बिलासपुर, कोरबा, रायगढ़, गरियाबंद अउ महासमुंद जिला म घलो मध्यम ले जादा बारिस होय के संभावना हे।
इही बीच, पाछु दू दिन ले राज्य के कतकोन इलाका म तेज ले मध्यम बारिस होय के समाचार मिले हे। ए दउरान कतकोन जघा म अंधड़ चले के संग ओला घलो गिरे हे। काली अउ आज राजधानी रईपुर म घलो तेज हवा के संग बारिस होय हे। मौसम विभाग के मुताबिक इक्कीस मार्च ले राज्य के अधिकतम तापमान म एक घांव फेर बढ़ोतरी होय के संभावना हे।

अउ अब थोरकुन समाचार सार म –

– भारतीय जनता पार्टी के प्रदेस सह-प्रभारी नितिन नबीन आज रईपुर दउरा म हे। ओमन ह ए समय कुभाभाऊ ठाकरे परिसर म चुनई प्रबंधन समिति के बइठका लेवत हे।