मुख्य निर्वाचन पदाधिकारी ह बतइन कि प्रदेस म होवइया आगामी लोकसभा चुनाव के ग्यारह ठन सीट बर चौबीस हजार दू सौ उनतीस मतदान केंद्र बनाय गेहे। प्रत्येक मतदान केंद्र म मतदाता सहायता केंद्र घलो बनाय गेहे। उहें, लोकसभा निर्वाचन क्षेत्र के प्रत्येक विधानसभा क्षेत्र के तहत दस ठन संगवारी मतदान केंद्र होही, जेन ह महिला मतदान दल डहार ले संचालित होही। श्रीमती कंगाले ह बतइन कि पांच ठन आदर्स मतदान केंद्र बनाय जाही। अइसने सबो विधानसभा म एक ठन दिव्यांग मतदान केंद्र अउ एक युवा संचालित मतदान केंद्र बनाय जाही। सबो मतदान केंद्र मन म बुजुर्ग अउ दिव्यांग मतदाता मन के सहायता बर मतदाता मित्र होही। ओमन बतइन कि एक मतदान केंद्र म अधिकतम पंद्रह सौ मतदाता अपन मताधिकार के प्रयोग कर सकही।
मुख्य निर्वाचन पदाधिकारी-पत्रकारवार्ता-02
मुख्य निर्वाचन पदाधिकारी ह बतइन कि राज्य के पचास प्रतिसत मतदान केंद्र मन म मतदान दिवस ल लाईव वेबकास्टिंग घलो कराय जाही। ओमन बतइन कि पचासी बछर ले जादा आयु वाले सियान अउ चालीस प्रतिसत ले जादा दिव्यांगता वाले मतदाता अउ कोविड के संदिग्ध या संक्रमित मतदाता मन डाक मतपत्र के माध्यम ले घर बइठे ही मतदान कर सकत हे। एखर बर उनला निर्धारित प्रारूप म आवेदन करना होही। चुनाव ड्यूटी म तैनात मतदाता मन ल घलो डाकमत पत्र ले वोट देके सुविधा मिलही। एखर अलावा निर्वाचन कर्मी जेन मन अपने लोकसभा म कार्यरत हे उनला निर्वाचन कर्तव्य प्रमाण पत्र जारी करे जाही। जेखर ले ओमन अपन लोकसभा के कोनो भी मतदान केंद्र म मतदान कर सकही।
ओमन बतइन कि मतदाता वोट डाले बर मतदाता पहचान पत्र के अलावा आधार काड,र् मनरेगा जॉब कार्ड, बैंक या डाकघर के पासबुक, ड्राईविंग लाइसेंस, पैन कार्ड, स्मार्ड कार्ड अउ भारतीय पासपोर्ट में से कोई एक ठन पहचान पत्र मतदान केंद्र म प्रस्तुत कर सकत हे।
बतादन कि छत्तीसगढ़ म पहलइया चरण उन्नीस अप्रैल के एक सीट बस्तर म वोट डाले जाही। एखर बाद छब्बीस अप्रैल के दूसरइया चरण म तीन सीट राजनांदगांव, महासमुंद अउ कांकेर म, उहें, सात मई के तीसरइया अउ अंतिम चरण म सात ठन सीट सरगुजा, रायगढ़, जांजगीर-चांपा, कोरबा, बिलासपुर, दुर्ग अउ रायपुर बर चुनाव संपन्न होही। एखर मतगणना चार जून के होही।
ईओडब्ल्यू-एफ.आई.आर.
राज्य आर्थिक अपराध अन्वेषण ब्यूरो- ईओडब्ल्यू ह महादेव सट्टा ऐप मामला म पूर्व मुख्यमंत्री भूपेश बघेल सहित उन्नीस झन के खिलाफ नामजद अउ दू झन अज्ञात लोगन के खिलाफ एफ.आई.आर. दर्ज करे हे। ईओडब्ल्यू ह प्रवर्तन निदेशालय- ईडी के दे आवेदन पत्र उपर पाछू चार मार्च के अपराध दर्ज करे हे।
एफ.आई.आर. के अनुसार महादेव ऐप के प्रमोटर डहार ले ऑनलाइन बैटिंग ले मिले अवैध रासि ल कई ठन कंपनी, सैल कंपनी अउ शेयर मार्केट म निवेश करे गेहे। प्रमोटर्स ह अपन अपराध ल छुपाय बर कई झन पुलिस अउ प्रशासन के अधिकारी मनके अलावा प्रभावसाली राजनैतिक व्यक्ति मनके संरक्षण प्राप्त करीन, एखर एवज म उनला नियमित तौर म प्रोटेक्सन मनी के रूप म भारी रासि दे गीस। ए रासि के व्यवस्था अउ वितरण बर हवाला आपरेटर्स मनके संगेसंग पुलिस अउ प्रशासनिक अधिकारी मनके घलो उपयोग करे गीस। ए संबंध म ईओडब्ल्यू ह पूर्व मुख्यमंत्री भूपेश बघेल, रवि उप्पल, शुभम सोनी, चंद्रभूषण वर्मा, असीम दास, सतीश चंद्राकर, सौरभ चंद्राकर समेत इक्कीस झन के खिलाफ धोखाधड़ी, अपराधिक साजिश, जालसाजी सहित भ्रष्टाचार निवारण अधिनियम के धारा म अपराध दर्ज करे गेहे।
माओवादी-मुठभेड़
अउ अब पेस हे मौसम के हाल…
प्रदेस के बस्तर, बिलासपुर, दुर्ग अउ रायपुर संभाग के कुछेक जघा म दिनभर बदली छाय रेहे के बाद आज रतिहा गरज-चमक के संग हल्का बरसा होय के संभावना हे। उहें, एक-दू जिला म हवा-गरेर चले गाज गिरे अउ करा गिरे के आसार हे।
उहें, काली अट्ठारा मार्च के कुछेक जघा म हल्का बरसा होय या गरज-चमक के संग छींटा पड़ सकत हे। जबकि सरगुजा अउ बिलासपुर संभाग के कुछेक जघा म हवा-गरेर चले, गाज गिरे अउ करा गिरे के आसार हे।
मौसम विभाग के अनुसार प्रदेस म बंगाल के खाड़ी ले आवत नमी के सेति मौसम के मिजाज बदल सकत हे, जेखर ले तापमान म गिरावट दर्ज करे जा सकत हे।
आदर्श आचार संहिता
भारत निर्वाचन आयोग डहार ले लोकसभा चुनाव के घोसना के संगेसंग प्रदेस म आदर्स आचार संहिता लागू होगे हे। एखर तहत प्रदेस के सब्बो जिला म कलेक्टर ह अवइया दू महिना बर धारा एक सौ चवालीस लागू कर देहे। एखरे संग बिना अनुमति के धरना, जुलूस, सभा या रैली के प्रदर्सन बर रोक लगा दे गेहे। एखर अलावा अधिकारी-कर्मचारी मनके अवकाश उपर घलो प्रतिबंध लगा दे गेहे। आदर्स आचार संहिता के दौरान लोकसभा प्रत्यासी मन डहार ले शासकीय संपत्ति के विरूपण उपर, उंखर खिलाफ कार्रवाई करे जाही। अवइया लोकसभा चुनाव निष्पक्ष अउ शांतिपूर्ण ढंग ले संपन होवय, एखर बर जिला निर्वाचन अधिकारी मन ह सीमित अवधि बर वैध आग्नेय शस्त्रधारी मन ल अपन हथियार अपन क्षेत्र के थाना म जमा करे बर केहे हे। ए निरदेस ले बैंक के सुरक्षा गार्ड, वित्तीय संस्था मनके सुरक्षा गार्ड, संवैधानिक पद म आसीन व्यक्ति, राष्ट्रीय राइफल संग अउ जिला राइफल संग मुक्त रइही।