आज दिनभर के खबर ल अपन गुरतुर छत्तीसगढ़ी भाखा म पढ़व

राज्य के ग्यारह ठन लोकसभा सीट म चार सीट-बस्तर, कांकेर, सरगुजा अउ रायगढ़ अनुसूचित जनजाति वर्ग बर आरक्षित हे। उहें, जांजगीर-चांपा लोकसभा सीट अनुसूचित जाति वर्ग बर आरक्षित हे। फेर, राजनांदगांव, महासमुंद, कोरबा, बिलासपुर, दुरूग अउ रईपुर लोकसभा सीट सामान्य हे। पाछू लोकसभा चुनाव म राज्य के ग्यारह ले नौ सीट म भारतीय जनता पार्टी ह जीत दर्ज करे रिहीस, उहें, दू ठन सीट म कांग्रेस ल जीत मिले रिहीस।
मुख्य निर्वाचन आयुक्त ह यहू बतइन कि राजनीतिक पार्टी म मन ल ए बताना होही कि ओमन ल गंभीर अपराधिक मामला वाले उम्मीदवार मन ल चुनाव म काबर उतारीन। श्री कुमार ह किहीन कि बाहूबल, धनबल, भ्रामक प्रचार अउ आदर्स आचार संहिता के उल्लंघन निर्वाचन आयोग के आगू बड़े चुनौती हवय। ओमन किहीन कि आयोग ह चुनौती ले निपटे बर सब्बों प्रकार के कदम उठाय हे। ओमन किहीन कि बाहूबल म निगरानी राखे बर मतदान के दिन ड्रोन के इस्तेमाल करे जाही।
मुख्य निर्वाचन आयुक्त राजीव कुमार ह आज दिल्ली म पत्रकारवार्ता ल संबोधित करत बतइन कि निर्वाचन आयोग ह लोकतंत्र के सबले बड़े परब बर पूरा तरीका ले तियार हे। ओमन बतइन कि देस म संतानबे करोड़ पंजीकृत मतदाता हे। मतदान बर साढ़े दस लाख मतदान केंद्र बनाय गे हवय, जिहां डेढ़ करोड़ चुनाव कर्मी मन ल तैनात करे जाही। ओमन बतइन कि ए चुनाव म पहिली घांव वोट देवइया एक करोड़ बियासी लाख मतदाता होही। श्री कुमार ह यहू बतइन कि आयोग ह पचासी बछर ले जादा उमर के लोगन ल अउ दिव्यांग मन ल घरेच ले मतदान करे के सुविधा देहे।

लोकसभा चुनाव -पुलिस प्रशिक्षण

अवइया लोकसभा चुनाव बर प्रदेस म प्रशासनिक तियारी जोरसोर ले करे जावत हे। इही कड़ी म काली रईपुर म पुलिस अधिकारी मन बर प्रसिक्षण कारीकरम के आयोजन करे गीस। ए मउका म अतिरिक्त मुख्य निर्वाचन पदाधिकारी नीलेश कुमार महादेव क्षीरसागर ह किहीन कि राज्य के सुरक्षा एजेंसी मन के भूमिका सुरक्षा बेवस्था बनाय राखे के हवय। संगेसंग आदर्स आचार संहिता के पालन कराय म घलो उंखर बड़े भूमिका होथे। ओमन किहीन कि निष्पक्ष अउ सांतिपूर्ण चुनाव कराय बर आने-आने निगरानी दल के संगेच पुलिस बल के समन्वय जरूरी हे। ओमन किहीन कि निर्वाचन व्यय म निगरानी राखे बर राष्ट्रीय अउ राज्य स्तर के आने-आने एजेंसी मन के संग तालमेल बनाना घलो जरूरी हे। ओमन ह संवेदनसील मतदान केंद्र मन म सांतिपूर्ण मतदान बर पुलिस बल ल दूसर एजेंसी मन के मदद ले बिसेस योजना बनाय बर किहीन। प्रसिक्षण कारीकरम म बाईस जिला के पुलिस अधीक्षक, ग्यारह अतिरिक्त पुलिस अधीक्षक अउ पैंसठ उप पुलिस अधीक्षक सामिल होइन।

माओवादी-स्मारक ध्वस्त

कांकेर जिला म सुरक्षा बल अउ माओवादी मनके बीच होय मुठभेड़ म एक झन माओवादी मारे गीस, जेखर शव ल बरामद कर ले गेहे। जिला के वरिष्ठ पुलिस अधीक्षक आई.के. एलेसेला ह बतइन कि कोयलीबेड़ा थाना क्षेत्र म जिला पुलिस बल अउ बीएसएफ के संयुक्त टीम ह सर्चिंग म निकले रिहीस। ए दौरान ग्राम चिलपरस तीर सुरक्षा बल अउ माओवादी मनके बीच मुठभेड़ होगिस। मुठभेड़ के बाद मउका के तलासी म एक झन माओवादी के शव ल बरामद करे गीस।  संगेसंग बड़े मात्रा म माओवादी जिनिश घलो बरामद करे गीस।
नारायणपुर जिला म माओवादी मन संग होय मुठभेड़ के बाद सुरक्षा बल ह तीन माओवादी स्मारक ल ध्वस्त कर देहे। उहें, एक ठिन आईईडी घलो बरामद करे गेहे। मिले जानकारी के अनुसार डीआरजी, बस्तर फाइटर अउ एसटीएफ के संयुक्त टीम ओरछा थाना क्षेत्र के आदेर, एड़जुम, बड़ेटोण्डाबेड़ा, गुदाड़ी डहार रवाना होय रिहीस। इही दौरान सुरक्षा बल ह ग्राम गुदाड़ी के जंगल म माओवादी मन डहार ले लगाय गे एक ठन आईईडी बरामद करीन, जेला मउकच म निष्क्रिय कर दे गीस। एखर बाद माओवादी मन ह सुरक्षा बल उपर फायरिंग सुरू कर दीन। जवान मन ह घलो जवाबी कार्रवाई करीन, जेखर बाद माओवादी मन ह जंगल के फायदा उठा के भाग गीन।

प्रसार-भारती अध्यक्ष

नवनीत कुमार सहगल ह प्रसार भारती नवा अध्यक्ष बने हवय। श्री सहगल ह भारतीय प्रशासनिक सेवा के उत्तर प्रदेस संवर्ग के उन्नीस सौ अट्ठासी बैच के सेवा निवृत्त अधिकारी हवय। ओमन ह प्रसार भारती के पूर्व अध्यक्ष ए सूर्यप्रकाश के जघा लिही, जिखर कार्यकाल दू हजार बीस म सिरागे रिहीस। श्री सहगल ह मीडिया ले किहीन कि दूरदर्सन अउ आकाशवाणी के पहुंच दूर-दराज के क्षेत्र तक हवय अउ एमन ह सूचना के भरोसेमंद स्त्रोत हवय। ओमन किहीन कि आमलोगन तक निष्पक्ष खबर पहुंचाना प्रसार भारती के कर्तव्य हे।
उप राष्ट्रपति जगदीप धनखड़ के अगुवई वाले चयन समिति के मंजूरी के बाद राष्ट्रपति द्रौपदी मुर्मू ह नवनीत कुमार सहगल के नियुक्ति प्रसार भारती के अध्यक्ष के पद म करीन हे।

हल्बी/गोण्डी-समाचार बुलेटिन

आकाशवाणी ह काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे प्रसारित करे जाही।

जमीन फर्जीवाड़ा-आरोपी गिरफ्तार

राजनांदगांव जिला के घुमका पुलिस ह फर्जी अनुबंध पत्र अउ दस्तावेज बनाके साठ एकड़ जमीन ल बेचे बर ग्राहक के तलास करत पुलिस आरक्षक संघरा दू झन आरोपी मन ल गिरफ्तार करीन हे। पुलिस के मुताबिक ए आरोपी मन ह पटेवा, मासूल, रेंगाकठेरा, इरइखुर्द गांव के साठ एकड़ जमीन के फर्जी दस्तावेज बनाके इकरारनामा तियार करे रिहीस। प्रार्थी के सिकायत के बाद पुलिस ह मामला के जांच करके ए आरोपी मन ल गिरफ्तार करीन। आरोपी मन के तीर ले फर्जी दस्तावेज, स्टाम्प अउ चार पहिया गाड़ी बरामद करे गेहे।

जिले की चिट्ठी

आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके  दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र मन ह एके संघरा रिले करही। ए बखत के अंक म ‘‘नारायणपुर‘‘ जिला के काम-काज के बारे म जानकारी दे जाही।