निर्वाचन आयोग काली लोकसभा चुनई कारीकरम के घोसना करही। नई दिल्ली के विज्ञान भवन म काली मंझनिया चुनई तारीख मनके घोसना करे जाही। लोकसभा चुनई के संघरा कुछेक राज्य मन म विधानसभा चुनई कारीकरम घलो घोसित करे जाही।
वर्तमाना लोकसभा के कार्यकाल ए बछर सोलह जून के सिरावत हे। बछर दू हजार उन्नीस म लोकसभा चुनई कारीकरम के घोसना दस मार्च के करे गे रिहीस अउ चुनाव अप्रैल अउ मई म सात चरण म संपन्न होय रिहीस।
चुनाव आयुक्त कार्यभार
नवनियुक्त चुनाव आयुक्त- ज्ञानेश कुमार अउ सुखबीर िंसंह संधू ह आज कार्यभार संभाल लेहे। निर्वाचन आयोग ह सोसल मीडिया पोस्ट म कहिस कि मुख्य चुनाव आयुक्त राजीव कुमार ह दूनों नवा चुनाव आयुक्त मनके स्वागत करीन। मुख्य चुनाव आयुक्त ह किहीन कि अइसना बेरा म ए मनके आयोग म सामिल होना महत्वपूर्ण हे जब निर्वाचन आयोग ए साल विश्व के सबले बड़का लोकतंत्र म लोकसभा चुनाव संचालन बर तियार हे। प्रधानमंत्री नरेंद्र मोदी के अध्यक्षता वाले चयन समिति ह श्री कुमार अउ श्री संधू ल काली चुनाव आयुक्त नियुक्त करे रिहीस।
मुख्यमंत्री पत्रकारवार्ता
राज्य सरकार ह प्रदेस के कर्मचारी मनके महंगाई भत्ता चार प्रतिसत बढ़ाय के निर्णय लेहे। मुख्यमंत्री विष्णुदेव साय ह आज संझा मुख्यमंत्री निवास म आयोजित एक पत्रकारवार्ता म बतइन कि राज्य सासन के कर्मचारी मनके महंगाई भत्ता अब बियालीस ले बाड़के छियालीस प्रतिसत हो जही।
उहें, राज्य के पेंसनर मनके महंगाई राहत म घलो चार प्रतिसत के बढ़ोत्तरी करे गेहे। ए बढ़ोत्तरी ए साल एक मार्च ले लागू हो जही। एखर अलावा राज्य के कर्मचारी मन ल सातवां वेतन मान के एरियर्स के आखिरी किस्त के भुगतान घलो करे जाही। मुख्यमंत्री ह बतइन कि कर्मचारी मनके समस्या के समीक्षा बर प्रमुख सचिव पंचायत अउ ग्रामीण विकास निहारिका बारिक के अध्यक्षता म एक ठिन समिति बनाय गेहे। ए समिति समस्या के निराकरण के बारे म अपन सुझाव सासन ल दीही। एखर अलावा ग्राम पंचायत सचिव डहार ले करे गे पचपन दिन के हड़ताल अवधि ल अर्जित अवकाश म समायोजित करत ओमन ल ए अवधि के वेतन के भुगतान करे जाही।
पेट्रोल/डीजल-कीमत
देस म पेट्रोल अउ डीजल दू रूपिया प्रति लीटर सस्ता होगे हे। नवा दर आज बिहनिया छै बजे ले लागू हो गेहे। पेट्रोलियम अउ प्राकृतिक गैस मंत्रालय ह किहीन हे कि एखर ले उपभोक्ता मनके व्यय क्षमता बाढ़ही अउ डीजल ले चलइया अंठावन लाख भारी वाहन, छै करोड़ कार अउ सत्ताइस करोड़ दू पहिया वाहन मनके परिचालन व्यय कम होही।
स्वास्थ्यकर्मी-वेतन
प्रदेस के स्वास्थ्य विभाग के बर्खास्त पांच हजार कर्मी मन ल बहाल कर दे गेहे। उहें, लगभग पच्चीस हजार कर्मी मनके रूके वेतन घलो जारी कर दे गेहे।
बतादन कि स्वास्थ्य विभाग के अधिकारी कर्मचारी इक्कीस अगस्त दू हजार तेइस ले बारह सितंबर दू हजार तेइस तक अपन मांग ल लेके हड़ताल म रिहीन। हड़ताल के दउरान कार्यालय म अनुपस्थित रहे के सेति ओमन ल बर्खास्त करके वेतन रोक दे गे रिहीस। छत्तीसगढ़ स्वास्थ्य फेडरेसन ह स्वास्थ्य मंत्री श्याम बिहारी जायसवाल ले भेंट करके बर्खास्त कर्मी मन ल बहाल करे अउ रोकेगे वेतन ल जारी करे के आग्रह करे रिहीन।
स्वास्थ्य मंत्री श्री जायसवाल ह ए संबंध म अधिकारी मन ल समस्या के निराकरण करे के निरदेस दे रिहीन, जेखर बाद पांच हजार कर्मचारी मन ल वापस सेवा म ले लेगे हे। संघरा पच्चीस हजार कर्मचारी मनके आंदोलन के दउरान रूके वेतन घलो स्वीकृत कर दे गेहे। तभो ले आंदोलन के दउरान चिकित्सा शिक्षा विभाग के दू हजार कर्मचारी मनके रूके वेतन ल देय के आदेस जारी नइ करे गेहे। फेडरेसन पदाधिकारी मन ए कर्मी मनके वेतन घलो जारी करे के आग्रह स्वास्थ्य मंत्री ले करीन हे।
राज्यपाल-दीक्षांत समारोह
राज्यपाल विश्व भूषण हरिचंदन ह विद्यार्थी मनले किहीन हे कि समाज अउ मानवता के लाभ बर अपन ज्ञान ल बउरय। ए बात ओमन पंडित दीनदयाल उपाध्याय ऑडिटोरियम म राखेगे एमिटी विश्व विद्यालय के दूसरइया दीक्षांत समारोह म कहिन। ओमन किहीन कि समाज के गरीब अउ वंचित लोगन मन बर विद्यार्थी मन ल काम करना चाही।
समारोह म राज्यपाल ह बाईस मेघावी विद्यार्थी मन ल स्वर्ण पदक, सोलह झन ल रजत अउ पांच झन ल कांस्य पदक दीन। ए दउरान बछर दू हजार तेइस बैच के छै सौ इक्यासी विद्यार्थी मन ल स्नातक अउ स्नातकोत्तर के उपाधि बांटे गीस। विश्व विद्यालय डहार ले डीएआरई के सचिव अउ कृषि अनुसंधान अउ शिक्षा विभाग नई दिल्ली के महानिदेसक डॉक्टर हिमांशु पाठक ल डॉक्टरेट के मानद उपाधि प्रदान करे गीस। कार्यक्रम के अध्यक्षता उप मुख्यमंत्री अरूण साव ह करीन।
सैनिक विश्राम गृह-उद्घाटन
मुख्यमंत्री विष्णुदेव साय ह काली राजधानी रईपुर के शास्त्री चौक करा नवा बने सैनिक विश्राम गृह-भवन के उद्घाटन करीन। ए भवन के निर्माण एक करोड़ चार लाख रूपिया के लागत ले करे गेहे। भवन म सैनिक परिवार मन बर विश्राम कक्ष, सामुदायिक हाल के संघरा दूसर जरूरी सुविधा मौजूद हे।
ए दउरान मुख्यमंत्री ह किहीन कि भारतीय सेना के अदम्य साहस, रणनीतिक कुसलता अउ देस प्रेम के सेति कोनो दुस्मन भारत कोति आंख उठा के नइ देख सकय। यदि भारत आज महासक्ति हे, त एखर बड़का कारण भारतीय सेना हरय।
ए मउका म मुख्यमंत्री ह देस बर अपन सर्वोच्च बलिदान देवइया तीन झन वीर शहीद हवलदार नवीन कुमार, नायक मोतीराम अउ सिपाही मनीष कुमार के परिजन मन ल राज्य सासन कोति ले अनुग्रह रासि के रूप म बीस-बीस लाख रूपिया के चेक दीन।
‘छत्तीसगढ़ विजन 2047‘-परिचर्चा
छत्तीसगढ़ पर्यावरण संरक्षण मंडल डहार ले आज रईपुर म छत्तीसगढ़ विजन दू हजार सैंतालीस बिसय उपर परिचर्चा के आयोजन करे गीस। एखर उद्घाटन आवास अउ पर्यावरण मंत्री ओ.पी.चौधरी ह करीन। पर्यावरण संरक्षण के संघरा विकास बर अवइया पच्चीस साल के रोड मेप के संबंध म चर्चा करत श्री चौधरी ह किहीन कि हमन ल बदलत समय ल समझत अवइया पीढ़ी बर खुद ल घलो बदलना चाही। ओमन किहीन कि छत्तीसगढ़ सरकार घलो विकसित भारत के संग विकसित छत्तीसगढ़ बर अमृतकाल विजन डाक्यूमेंट दू हजार सैंतालीस तियार करत हे, जेला छत्तीसगढ़ के स्थापना दिवस एक नवंबर के लॉंच करे जाही।
शारीरिक-शिक्षा
राज्य के स्कूल म अवइया सैक्षणिक सत्र ले शारीरिक शिक्षा ल वैकल्पिक बिसय के रूप म सामिल करे जाही। ए घोसना शिक्षा मंत्री बृजमोहन अग्रवाल ह काली रईपुर म राखेगे छत्तीसगढ़ शारीरिक शिक्षा शिक्षक संघ के महा सम्मेलन ल संबोधित करत किहीन। श्री अग्रवाल ह किहीन कि अवइया शिक्षा सत्र ले स्कूल म पहिली पीरियड योग, व्यायाम, नैतिक शिक्षा, के होही। उहें, हरेक शनिवार के आखिरी पीरियड खेल-कूद रइही।
त्रिनयन-ऐप
मुख्यमंत्री विष्णुदेव साय ह छत्तीसगढ़ पुलिस डहार ले बनाय गे दू ठिन ऐप ल लॉंच करीन। एमा आईओ मितान मोबाइल ऐप अउ दुर्ग पुलिस रेंज डहार ले तियार त्रिनयन ऐप सामिल हे। आईओ मितान मोबाइल ऐप माध्यम ले जिहां अधिकारी मन ल कोनो भी मामला के विवेचना म मदद मिलही। उहें, त्रिनयन ऐप के माध्यम ले सौ किलोमीटर तक के दायरा के जम्मों सीसीटीवी कैमरा के लोकेसन के पहिचान करे जा सकही। एखर ले अपराधी मन ल पकड़े म आसानी होही।
अग्निवीर भर्ती
भारतीय थल सेना म अग्निवीर भर्ती बर ऑनलाइन पंजीयन के प्रक्रिया जारी हे। ऑनलाइन आवेदन करे के आखिरी तारीख बाईस मार्च निर्धारित हे। एखर तहत साढ़े सत्रह ले इक्कीस बछर के आयु वर्ग के इच्छुक आवेदक अग्निवीर जनरल, तकनीकी, क्लर्क, ट्रेडमेन आदि पद मन म भर्ती बर ऑनलाइन आवेदन कर सकत हे।
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत रइपुर स्थित रीजनल साईंस सेंटर के उद्देस्य अउ महत्व उपर महानिदेशक एस.एस. बजाज ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली सोलह मार्च के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।