केंद्रीय गृह मंत्री अमित शाह ह आज वीडियो कॉन्फ्रेंस के माध्यम ले नवा रईपुर म राष्ट्रीय जांच एजेंसी-एनआईए के आवासीय परिसर के उद्घाटन करीन। ए अवासीय परिसर नवा रईपुर के सेक्टर-तीस म बनाय गेहे। ए मउका श्री शाह ह आपराधिक कानून मन उपर मार्गदर्सन बर बनाय गे मोबाइल ऐप ‘‘संकलन‘‘ के लोकार्पण घलो करीन। ए कारीकरम म एनआईए के छत्तीसगढ़ म पदस्थ अधिकारी मनके संग छत्तीसगढ़ के गृह विभाग के अधिकारी मन घलो मौजूद रिहीन।
केंद्रीय गृहमंत्री-सीएए
केंद्रीय गृहमंत्री अमित शाह ह दोहराइन हे कि नागरिकता संसोधन अधिनियम-सीएए नागरिकता के अधिकार देय के कानून हे। ओमन स्पष्ट करीन हे कि ए कानून ले कोनो भी मनखे मनके नागरिकता नइ छीनावय। ओमन ए घलो स्पष्ट करीन हे कि राष्ट्रीय नागरिकता रजिस्टर-एनआरसी के सीएए ले कोनो संबंध नइ हे।
एक समाचार एजेंसी म देगे साक्षात्कार म श्री शाह ह किहीन कि नागरिकता संसोधन कानून के जरिया ले अफगानिस्तान, बांग्लादेस अउ पाकिस्तान ले आय हिंदू, सिक्ख, बौध्द, जैन, ईसाई अउ पारसी शरणार्थि मनके अधिकार अउ नागरिकता उपलब्ध कराय जाही। ओमन किहीन कि ए कानून के प्रावधान के तहत नागरिकता मिलइया जम्मों मनखे मनके एके समान अधिकार होही, काबर की सीएए के माध्यम ले पंजीयन होय के बाद देस म रहवइया जम्मों शरणार्थी मन घलो अब भारत के नागरिक बन जाही। केंद्रीय गृह मंत्री ह किहीन कि सीएए लागू होय ले कोनो भी शरणार्थी बर रद्दा बंद नइ होवय। एखर तहत शरणार्थी मनके रूप म आने देस ले मुसलमान मन ल घलो नागरिकता बर आवेदन करे के अधिकार हे। ओमन किहीन कि जउन मनखे मन के तीर अपन पहचान ले संबंधित दस्तावेज नइ हे, उंखर समाधान के रद्दा अवइया चरण म तय करे जाही।
खेल अलंकरण समारोह
मुख्यमंत्री विष्णुदेव साय ह आज रईपुर के दीनदयाल उपाध्याय ऑडिटोरियम म प्रदेस के करीबन साढ़े पांच सौ उत्कृष्ट खिलाड़ी मन ल राज्य खेल अलंकरण ले सम्मानित करीन। ए पुरस्कर बछर दू हजार उन्नीस-बीस अउ बीस-इक्कीस बर दे गीस। एमा सहीद राजीव पाण्डेय पुरस्कार बर सत्रह अउ सहीद कौशल यादव पुरस्कार बर नौ खिलाड़ी मन ल चुने गीस। उहें, तीन खिलाड़ी ल वीर हनुमान सिंह पुरस्कार दे गीस। अइसने, शहीद पंकज विक्रम सम्मान बर तिरालीस, सहीद विनोद चौबे सम्मान बर दस अउ मुख्यमंत्री ट्रॉफी बर इंक्यावन खिलाड़ी मन ल चुने गीस। कारीकरम के अध्यक्षता छत्तीसगढ़ विधानसभा के अध्यक्ष डॉक्टर रमन सिंह ह करीन।
ए मउका म मुख्यमंत्री ह किहीन कि प्रदेस म खेल के वातावरण बनाय के दिसा म सरलग परयास करे जातव हे। प्रदेस के खिलाड़ी मनके राष्ट्रीय स्तर म सफलता घलो ए बात के प्रमाण हे।
सहकारी समिति-सम्मान
प्रदेस म सहकारिता के क्षेत्र म सुघ्घर काम करइया पांच सहकारी समिति मन ल आने-आने वरग म राष्ट्रीय सहकारी विकास निगम डहार ले पुरस्कार ले सम्मानित करे गीस। राजधानी रईपुर म राखेगे समारोह म प्रदेस के सहकारिता मंत्री केदार कश्यप अउ राष्ट्रीय सहकारी विकास निगम के क्षेत्रीय निदेसक कैलाश कुमार कौशिक ह सुघ्घर समिति मन ल ए पुरस्कार दीन। सबले सुघ्घर बने प्राथमिक कृषि साख सहकारी समिति के श्रेणी म दुरूग जिला के उतई समिति ल पहिली पुरस्कार दे गीस। उहें, बालोद जिला के नवागांव के आदिम जाति सेवा सहकारी समिति ल दूसरइया पुरस्कार दे गीस। अइसने सर्वश्रेष्ठ विपणन सहकारी समिति के वर्ग म गौरेला-पेण्ड्रा-मरवाही जिला के गौरेला समिति ल पहिली अउ मुंगेली जिला के सरगांव के समिति ल दूसरइया पुरस्कार प्रदान करे गीस। उहें, सर्वश्रेष्ठ बीज सहकारी समिति के वरग म रईपुर के समिति ल सम्मानित करे गेहे। ए मउका म सहकारिता मंत्री ह किहीन कि सहकारिता के माध्यम ले प्रदेस म कोदो, कुटकी अउ अमली जइसन उत्पाद के प्रसंस्करण इकाई मन ल प्रोत्साहित करे के जरूरत हे। एखर माध्यम ले ग्रामीण क्षेत्र मन म लोगन मन ल रोजगार समेत आर्थिक आत्मनिर्भर बर एक बने माध्यम उपलब्ध कराय जा सकत हे।
स्वास्थ्यकर्मी-वेतन वृध्दि
प्रदेस के स्वास्थ्य मंत्री श्याम बिहारी जायसवाल ह किहीन हे कि संविदा स्वास्थ्य कर्मचारी मन ल सत्ताईस प्रतिसत तनखा बढ़ाय के फायदा निश्चित रूप ले दे जाही। ओमन छत्तीसगढ़ राष्ट्रीय स्वास्थ्य मिसन कर्मचारी संघ के राष्ट्रीय स्वास्थ्य मिसन-एनएचएम के प्रबंध संचालक ल आने-आने राज्य मन म होय नियमतीकरण के अध्ययन करे के निरदेस घलो दीन हे।
खबर के मुताबिक स्वास्थ्य कर्मचारी संघ ह श्री जायसवाल ल सौंपे अट्ठारह सूत्रीय ज्ञापन म तनखा बढ़ाय के संगेसंग नियमतिकरण समेत आने-आने सुविधा लागू करे के मांग करे हे। पदाधिकारी मन ह स्वास्थ्य मंत्री ल बतइन कि तमिलनाडु अउ मणिपुर म एन.एच.एम. के तहत काम करत संविदा कर्मी मन ल नियमितीकरण कर दे गेहे। इही आधार म छत्तीसगढ़ म घलो नियमितीकरण के मांग करत हे।
ओटीटी प्लेटफॉर्म-प्रतिबंध
सूचना अउ प्रसारण मंत्रालय ह अश्लील सामग्री वाले अट्ठारह ओटीटी प्लेटफॉर्म बंद कर देहे। एमा ड्रीम्स फिल्म्स, हंटर्स, हॉट शॉट्स वीआईपी, प्राइम प्ले अउ अनकट अड्डा समेत आने प्लेटफॉर्म सामिल हे। ए ओटीटी मंच के संग जुड़े उन्नीस वेबसाइट, दस मोबाइल एप्लीकेसन अउ संतावन सोसल मीडिया खाता मन उपर घलो भारत म प्रतिबंध लगा दे गेहे। सूचना अउ प्रसारण मंत्री अनुराग सिंह ठाकुर ह बतइन कि ए निर्णय मीडिया अउ मनोरंजन जगत के संगेच बिसय-विसेषज्ञ अउ आने-आने मंत्रालय के सलाह के आधार म ले गेहे।
युवा संवाद कार्यक्रम
केन्द्रीय खेल अउ युवा कल्याण मंत्रालय अउ राज्य के उच्च शिक्षा विभाग डहार ले जांजगीर के टीसीएल कॉलेज म युवा संवाद कार्यक्रम के आयोजन करे गीस। कार्यक्रम म जांजगीर समेत आने-आने जघा के पांच महाविद्यालय के लइका मन ह बछर दू हजार सैंतालीस तक भारत ल विकसित राष्ट्र बनाय के बिसय म अपन विचार राखीन। संवाद कारीकरम म पहिली तीन स्थान म रहइया विद्यार्थी मन ल पुरस्कार ले सम्मानित करे गीस।
विश्व किडनी दिवस
आज विश्व किडनी दिवस आय। किडनी ले होवइया बीमारी ले लोगन मन ल जागरूक करे बर हर बछर मार्च महिना के दूसरइया गुरूवार के ए दिन ल मनाय जाथे। नई दिल्ली के एम्स अस्पताल म किडनी रोग विभाग के प्रमुख डॉक्टर दीपांकर भौमिक ह लोगन मन ल किडनी के बीमारी के जल्दी पता लगाय बर नियमित रूप ले अपन स्वास्थ्य के जांच कराय के सुझाव दीन हे।
बीएसपी-आगजनी
भिलाई इस्पात संयंत्र के कोक ओवन म लगे अमोनिया सि्ंट्रपिंग टॉवर म काली देर रतिहा आगी लगे ले संत्रंत्र के भीतरी अफरा-तफरी मच गे। घटना के सूचना मिलतेच संयंत्र के बड़का अधिकारी मकउा म पहुंच गे रिहीस। फायर बिग्रेड के गाड़ी तुरते आगी बुझाय के परयास करीस अउ करीबन डेढ़ घंटा बाद आगी म काबू पा ले गीस। अधिकारी मन बतईन कि आगी लगे ले संयंत्र के भीतर मसीन मन ल होय नुकसान के आंकन करे जावत हे।
अउ अब पेस हे मौसम के हाल…
प्रदेस के मौसम म अवइया दू-तीन दिन के दउरान बदलाव के आसार हे। पश्चिम बंगाल ले छत्तीसगढ़ तक बने द्रोणिका के सेति अवइया तीन ले चार दिन के दउरान प्रदेस म कुछेक जघा म हल्का बरसा होय के संभावना हे।
मौसम विभाग के अनुसार पश्चिम बंगाल ले तमिलनाडु तक बने द्रोणिका के प्रभाव ए बेरा छत्तीसगढ़ के उपर घलो बने हुए हे। एखर असर ले सोलह ल उन्नीस मार्च तक प्रदेस म कुछेक जघा म गरज-चमक के संग थोड़ बहुत पानी गिर सकत हे। उहें, सत्रह अउ अट्ठारह मार्च के हवा गरेर के संग गाज अउ करा गिरे के संभावना हे।