प्रधानमंत्री नरेन्द्र मोदी ह आज वीडियो कान्फ्रेंसिंग ले पच्यासी हजार करोड़ रूपिया ले ज्यादा के लागत के करीबन छह हजार रेल परियोजना के सिलान्यास अउ लोकार्पण करीन। कारीकरम म बोलत प्रधानमंत्री ह किहीन कि देस ल समृद्धि अउ औद्योगिक रूप ले विकसित करे म रेल के बहुते बड़े भूमिका हवय। ओमन किहीन कि पाछु दस बछर म गति शक्ति विश्वविद्यालय के स्थापना आधुनिक तकनीक म लोकोमोटिव इंजन बनाय ले लेके नवा पटरी बिछाय, स्टेसन के आधुनिकीकरण जइसन कतकोन काम देस म होय हे। देस म सौर ऊर्जा ले चलइया स्टेसन बनाय जात हे। संगेसंग स्टेसन म जन-औषधि केन्द्र खुलत हे। स्थानीय कारीगर, शिल्पकार अउ स्व-सहायता समूह के माईलोगिन मन कोति ले बनाय गे कलाकृति शिल्प ल स्टेसन म बेचे खातिर स्टॉल खोले जात हे।
ए मउका म प्रधानमंत्री ह छत्तीसगढ़ म करीबन दू सौ उनचास करोड़ रूपिया के तिरालीस रेल परियोजना के लोकार्पण अउ सिलान्यास करीन। एमा वन स्टेशन-वन प्रोडक्ट योजना म रईपुर रेलमंडल के रईपुर, मांढर, मंदिरहसौद, तिल्दा-नेवरा, सरोना अउ उरकुरा रेलवे स्टेसन समेत राज्य के अट्ठारह स्टेसन म चौंतीस ठिन स्टॉल के लोकार्पण सामिल हे। उहें, जांजगीर-नैला अउ पेण्ड्रा रेलवे स्टेसन म जनऔषधि केन्द्र, दुरूग कोचिंग डिपो म पीटलाइन के बढ़वार अउ बिलासपुर म रेल कोच रेस्टोरेंट के लोकार्पण घलो करे गीस। श्री मोदी ह बिलासपुर म वंदे भारत मेटनेंस डिपो, भिलाई म मेमू कार शेड विस्तार अउ अंबिकापुर म नवा पीटलाइन बनाय बर सिलान्यास करीन।
प्रधानमंत्री रेल परियोजना-02
रेल परियोजना के सुभारंभ मउका म रईपुर रेलवे स्टेसन म राखे गे कारीकरम म राज्यपाल विश्वभूषण हरिचंदन अउ मुख्यमंत्री विष्णुदेव साय सामिल होइन। ए मउका म राज्यपाल ह किहीन कि रेलवे के विकास के सोझे परभाव देस के विकास म होथे। ओमन किहीन कि परमुख स्टेसन म इहां के उत्पाद बर स्टॉल, रेल कोच रेस्टोरेंट अउ जन औषधि केन्द्र खोल के कुशल अउ अकुशल श्रमिक मन बर रोजगार के मउका हवय। ए केन्द्र मन ले वोकल फॉर लोकल ल बढ़ावा मिलत हे।
उहें, मुख्यमंत्री ह किहीन कि छत्तीसगढ़ म रेल सुभीता के बढ़वार ले इहां के लोगन बर रोजगार के मउका बाढ़ही। ओमन भरोसा जतईन कि प्रधानमंत्री के अगुवई म बिकास के नवा सोपान गढ़े जाही।
सीआईएसएफ-स्थापना दिवस
केन्द्रीय औद्योगिक सुरक्षा बल सी.आई.एस.एफ. के पचपनवां स्थापना दिवस के मउका म आज दुरूग जिला के उतई के सी.आई.एस.एफ. क्षेत्रीय प्रशिक्षण केन्द्र म समारोह के आयोजन करे गीस। समारोह के मुख्य अतिथि के रूप म केन्द्रीय गृह राज्यमंत्री नित्यानंद राय सामिल होइन। ए मउका म ओमन किहीन कि सी.आई.एस.एफ. राष्ट्र के गौरव ही नइ, भलूक विरासत के चिन्हारी हे। कारीकरम म श्री राय ह बलिदानी स्मारक पहुंच के सूरवीर मन ल फूलमाला चढ़ाके सुरता करीन। समारोह म श्री राय ह परेड के सलामी लीन अउ विशिष्ट राष्ट्रपति पदक मिले ग्यारह झिन अधिकारी अउ कर्मचारी मन ल मेडल दीन।
ए मउका म सी.आई.एस.एफ. के महानिदेशक नीना सिंह घलो मौजूद रिहीन।
कृषक उन्नति योजना-राशि अंतरण
मुख्यमंत्री विष्णुदेव साय ह आज बालोद म राखे गे कारीकरम म कृषक उन्नति योजना म प्रदेस के चौबीस लाख बहत्तर हजार ले जादा किसान मनके बैंक खाता म तेरह हजार तीन सौ बीस करोड़ रूपिया के आदान सहायता रासि भेजीन। कार्यक्रम म मध्यप्रदेश के मुख्यमंत्री मोहन यादव अउ छत्तीसगढ़ विधानसभा के अध्यक्ष डॉक्टर रमन सिंह वर्चुअल माध्यम ले संघरीन। ए मउका म श्री यादव ह किहीन कि प्रधानमंत्री नरेन्द्र मोदी के अगुवई म देस चहुंमुखी विकास करत हे। ओमन यहू किहीन कि छत्तीसगढ़ म सिरिफ तीन महीना पहिली बने भाजपा सरकार अपन वादा के मुताबिक काम करत हे।
बालोद के सरयू प्रसाद अग्रवाल स्टेडियम म राखे गे ए कारीकरम म मुख्यमंत्री श्री साय ह जिला म अट्ठाईस करोड़ रूपिया ले जादा के लागत के पैंसठ ठिन विकास काम के लोकार्पण अउ भूमिपूजन करीन।
हवाई सेवा-शुभारंभ
मुख्यमंत्री विष्णुदेव साय ह आज वीडियो कॉन्फ्रेसिंग ले बिलासपुर ले नई दिल्ली अउ कोलकाता बर सोझे हवाई सेवा के हरियर झंडी देखाके सुभारंभ करीन। बिलासपुर के बिलासा देवी केंवट विमानतल म राखे गे ए कारीकरम म उप मुख्यमंत्री अरूण साव समेत कतकोन जनप्रतिनिधि मौजूद रिहीन। आज कोलकाता ले पहिली उड़ान भरके बिहनिया आठ बजके पचपन मिनट म बिलासपुर पहुंचीस। उहें, ए विमान नौ बजके चालीस मिनट म कोलकाता बर रवाना होइस। अइसने, दिल्ली ले दूसर विमान साढ़े नौ बजे बिलासपुर पहुंचीस, जउन दस बजके दस मिनट म दिल्ली बर रवाना होइस।
कारीकरम म बोलत मुख्यमंत्री ह किहीन कि आज बिलासपुर के लोगन के अरसा ले करे जात मांग पूरा होगे। ए हवाई सेवा के फायदा बिलासपुर समेत पूरा छत्तीसगढ़ ल मिलही। ओमन किहीन कि बिलासपुर हवाई अड्डा ल अपग्रेड करे के काम चलत हे। जल्दीच इहां नाईट लैंडिंग के सुभीता सुरू होही।
उप मुख्यमंत्री ह भरोसा देवईन कि विमान सेवा ल नियमित रूप ले चले म राज्य सरकार कोति ले सहयोग करे जाही। ओमन उम्मीद जतईन कि जल्दीच बिलासपुर ले हैदराबाद बर विमान सेवा सुरू करे जाही।
अइसने, जगदलपुर ले घलो नई दिल्ली बर आज ले विमान सेवा सुरू होगे हे। एलायन्स एयर के फ्लाइट दिल्ली ले रवाना होके जबलपुर होवत बिहनिया साढ़े ग्यारह बजे जगदलपुर पहुंचीस। ए मउका म मां दंतेश्वरी एयरपोर्ट म विमान के वाटर केनन ले सुवागत करे गीस। ए विमान जगदलपुर ले हफ्ता म दू दिन सम्मार अउ सुक्रवार के उड़ान भरही।
आईटी कंपनी-आवंटन
मुख्यमंत्री विष्णुदेव साय अउ आवास पर्यावरण मंत्री ओ.पी. चौधरी ह हैदराबाद अउ हरियाणा के दू ठिन आईटी कंपनी ल नवा रईपुर के सेंट्रल बिजनेस डिस्ट्रिक्ट म नब्बे हजार वर्गफीट के आवंटन आदेस सौंपीन। ए कंपनी आईटी इकाई के स्थापना अउ संचालन करही। एखर ले करीबन बाईस सौ लोगन ल रोजगार मिलही।
ए बेरा म मुख्यमंत्री ह किहीन कि नवा रईपुर ल इनोवेशन हब के रूप म स्थापित करे जात हे। ओमन किहीन कि स्टार्टअप ल बढ़ावा दे बर नवा रईपुर म इन्क्यूबेसन सेंटर के स्थापना करे जाही। श्री साय ह बतईन कि राज्य सरकार हैदराबाद अउ बेंगलूरू असन नवा रईपुर म आईटी अउ आईटी ले जुड़े आने उद्योग ल बढ़ावा दे बर काम करही।
उहें, आवास अउ पर्यावरण मंत्री श्री चौधरी ह किहीन कि राज्य सरकार प्रदेस के अर्थव्यवस्था म सर्विस सेक्टर के योगदान ल अउ बढ़ाही, जेखर ले राज्य के अर्थव्यवस्था अउ लोगन के आमदनी बाढ़ही।
मांडविया-जन औषधि ऋण कार्यक्रम
केन्द्रीय स्वास्थ्य मंत्री डॉक्टर मनसुख मांडविया ह आज छोटे उद्यमी मन बर प्रधानमंत्री भारतीय जनऔषधि केन्द्र स्थापित करे बर ऋण कार्यक्रम के सुभारंभ करीन। ए कारीकरम म भारतीय लघु उद्योग विकास बैंक-सिडबी बिना कोनों गारंटी उद्यमी मन ल कमती ब्याज म करजा दीही। नई दिल्ली म जनसभा म बोलत डॉक्टर मांडविया ह किहीन कि ए कारीकरम छोटे स्तर के उद्यमी मन ल अपन जनऔषधि केन्द्र के बढ़वार करे अउ ओला उन्नत बनाय म सहायक होही। ओमन किहीन कि ए कार्यक्रम म चार लाख रूपिया के करजा दे जाही।
सीएए-मुख्यमंत्री
देस म नागरिकता संशोधन अधिनियम-सीएए लागू होगे हे। मुख्यमंत्री विष्णुदेव साय ह सी.ए.ए. लागू करे खातिर प्रधानमंत्री नरेन्द्र मोदी अउ केन्द्रीय गृह मंत्री अमित शाह ल सुभकामना दीन हे। ओमन किहीन कि ए कानून के लागू होय ले तीन पड़ोसी देस – अफगानिस्तान, पाकिस्तान अउ बांग्लादेश के अल्पसंख्यक मन ल भारत के नागरिकता मिल सकही।
रमज़ान
रमजान के पवित्र महीना आज ले शुरू होगे हे। रमज़ान के तीस रोजा पूरा होय के बादे ईद मनाय जाथे। प्रधानमंत्री नरेंद्र मोदी अउ मुख्यमंत्री विष्णुदेव साय ह रमजान के लोगन मन ल बधाई अउ सुभकामना दीन हे।
खेल अलंकरण समारोह
खेल प्रतिभा ल बढ़ावा दे खातिर चौदह मार्च के राज्य खेल अलंकरण समारोह राखे जाही। एखर बर छत्तीसगढ़ म मंजूर इकतीस खेलो इंडिया लघु केन्द्र, खेलो इंडिया सेंटर, राज्य के सबो खेल अकादमी अउ विभाग के महत्वपूर्ण योजना के एक सौ बीस सेकेंड अवधि के वीडियो स्पॉट एचडी फार्मेंट म बनाके आज बारह मार्च तक खेल अउ युवा कल्याण विभाग ल दे बर केहे गेहे।