केंद्रीय पंचायत राज्य मंत्री कपील मोरेश्वर पाटिल ह आज रईपुर म राखे गे राज्य स्तरीय महा-पंचायत म सामिल होइन। ए मउका म ओमन किहीन कि सरपंच ह गांव के विकास के चाबी हरय। गांव के लोगन मन ह विस्वास करके विकास के चाबी ल सरपंच ल दे हे। ओमन किहीन कि प्रधानमंत्री के बछर दू हजार सैंतालीस तक भारत ल विकसित राष्ट्र बनाय के संकलप म गांव के विकास ह पाछू नइ रहय। प्रधानमंत्री के पूरा धियान गांव के विकास म हवय। आज कतकोन ग्राम पंचायत मन अपन काम ल ऑनलाइन करत हे। सम्मेलन ल उप मुख्यमंत्री विजय शर्मा ह घलो संबोधित करीन। ए मउका म ओमन प्रधानमंत्री अवास योजना ग्रामीण के पंद्रह हजार ले जादा हितग्राही मनके खाता म घर बनाय बर उनचास करोड़ इक्कीस लाख रूपिया के पइसा दीन, उहें, केंद्र सरकार के महत्वाकांक्षी योजना राष्ट्रीय ग्राम स्वराज अभियान के तहत बस्तर अउ सरगुजा संभाग के अनुसूचित जघा के छै सौ पंचायत मन म कम्प्यूटर बर तीन करोड़ रूपिया जारी करीन। अइसने राज्य के आठ सौ तैंतीस ग्राम पंचायत मन म ज्ञानोदय वाचनालाय के स्थापना बर पच्चीस करोड़ रूपिया जारी करे गीस।
सम्मेलन म सतत विकास लक्ष्य मन के स्थानीयकरन के बढ़िया काम करइया ग्राम पंचायत मन ल नौ ठिन थीम उपर सम्मानित करे गीस, जेमा आजीविका उन्नत ग्राम पंचायत बर ग्राम पंचायत नागम, स्वस्थ ग्राम पंचायत बर सांकरा, बाल हितैसी ग्राम पंचायत बर निलजा, जल के प्रचुरता बर ग्राम पंचायत बाघ नदी, स्वच्छ अउ हरित ग्राम पंचायत बर जोंकबाला, आत्मनिर्भर बुनियादी ढांचा ग्राम पंचायत के अजवाल, सामाजिक रूप ले सुरक्षित ग्राम पंचायत बर पिकरीपारा, सुसासन ग्राम पंचायत बर खडगवांकला अउ महिला हितैषी ग्राम पंचायत बर ग्राम पंचायत कुथरेल ल सम्मानित करे गीस।
महा-पंचायत सम्मेलन-02
उहें, माओवाद प्रभावित गांव मन तक बुनियादी सुविधा अउ कल्याणकारी परियोजना मनके लाभ बर नियद नेल्लानार योजना सुरू करे गेहे। ए योजना ल बने ढंग ले बनाय के सेति सुकमा जिला के कोंटा जनपद पंचायत के तहत ग्राम पंचायत मन ल सम्मानित करे गीस, जेमा ग्राम पंचायत बगड़ेगुड़ा, दुलेड़, एल्मागुड़ा, चिमलीपेटा, पोटकपल्ली अउ ग्राम पंचायत सिलगेर के सरपंच मन ल सम्मानित करे गीस।
प्रधानमंत्री-रेल परियोजना
प्रधानमंत्री नरेंद्र मोदी ह काली वीडियो कॉन्फ्रेंसिंग के माध्यम ले पचयासी हजार करोड़ रूपिया ले जादा के उनसठ सौ ले जादा रेलवे बुनियादी ढांचा परियोजना मनके आधारसिला राखही अउ संगेसंग दस ठिन नवा वंदेभारत एक्सप्रेस रेल गाड़ी ल हरा झंडी दिखाके रवाना करही।
उहें, श्री मोदी ह देस म पचास ठिन प्रधानमंत्री जन-औषधि केंद्र के लोकार्पण घलो करही, जेमा दक्षिण पूर्व मध्य रेलवे के जांजगीर-नैला, पेण्ड्रा रोड, नागभीड़ अउ नैनपुर केंद्र घलो सामिल हे। एखर संगेसंग बिलासपुर रेलवे स्टेसन परिसर म रेल कोच रेस्टॉरेंट के लोकार्पण करही। संगेसंग दक्षिण पूर्व मध्य रेलवे म वन स्टेसन-वन प्रोडक्ट योजना के तहत पचास ठिन स्टॉल मन के लोकार्पण करही अउ बिलासपुर म इलेक्ट्रिक लोको सेड के लोकार्पण घलो करे जाही।
पीएम-सशक्त नारी-विकसित भारत
प्रधानमंत्री ह किहीन कि कोनो भी देस ह माईलोगिन मनके बने ढंग ले सन्मान करके आगू बढ़ सकथे। प्रधानमंत्री ह नई दिल्ली म आज ससक्त नारी विकसित भारत कारीकरम ल संबोधित करत ए बात किहीन, कारीकरम के दउरान प्रधानमंत्री ह एक हजार नमो ड्रोन दीदी मन ल ड्रोन सौंपिन। ओमन किहीन कि सरकार के आने-आने योजना के सेति एक करोड़ ले जादा माईलोगिन मन लखपति दीदी बन चुके हे। ए मउका म प्रधानमंत्री ह दीनदयाल अंत्योदय योजना -राष्ट्रीय ग्रामीण आजीविका मिसन के समर्थन ले सफलता हासिल करइया लखपति दीदी मन ल घलो सम्मानित करीन। कारीकरम म छत्तीसगढ़ के लखपति दीदी मन घलो वर्चुअल सामिल होइन।
गौरेला-पेण्ड्रा-मरवाही जिला मुख्यालय म होय समारोह म जिला के लखपति दीदी मन ह प्रधानमंत्री ल लखपति बने के ‘‘मेरी-जुबानी मेरी कहानी‘‘ सुनाइन। ए दउरान केंद्र सरकार के आने-आने योजना उज्जवला, सुकन्या समृध्दि अउ बेटी बचाओं-बेटी पढ़ाओं के बारे म गोठबात करीन।
किसान धान-बोनस रासि
प्रदेस के किसान मन ल काली धान खरीदी के अंतर के रासि के भुगतान करे जाही। मुख्यमंत्री विष्णुदेव साय ह आज झारखंड दउरा म निकले के पहिली रईपुर म मीडिया के संग गोठबात करत किहीन कि काली के दिन किसान मन के दिन होही। चौबीस लाख बहत्तर हजार किसान मन ल काली धान के अंतर के पइसा दे जाही। मुख्यमंत्री ह किहीन कि दस मार्च के प्रदेस के सत्तर लाख ले जादा विवाहित माईलोगिन मनके बैंक खाता म एक हजार रूपिया पहुंच गेहे। अब हर महिना उंखर खाता म एक हजार रूपिया जमा हो जही।
भाजपा नेता-सुरक्षा
लोकसभा चुनई के पहिली बस्तर संभाग के तिरालीस झिन भाजपा नेता मनके सुरक्षा ल बढ़ा दे गेहे। एमा पार्षद ले लेके जिला अध्यक्ष, मंडल अध्यक्ष अउ सदस्य मन ल वाय प्लस, वाय अउ एक्स श्रेणी के सुरक्षा दे गेहे। पाछू विधानसभा चुनई के पहिली माओवादी मन ह भाजपा नेता मनके हत्या कर दे रिहीन। इही सब घटना ल देखत सुरक्षा के बेवस्था करे गेहे। जेमा सुकमा जिला के छै, बीजापुर के दस, दंतेवाड़ा के सत्रह, बस्तर के चार, कोंडागांव अउ नारायणपुर के एक-एक के संगेसंग कांकेर जिला के चार झिन भाजपा नेता सामिल हे।
बेमेतरा-अविश्वास प्रस्ताव पारित
बेमेतरा जिला के जनपद पंचायत बेरला के अध्यक्ष अउ उपाध्यक्ष के खिलाफ लाय गे अविश्वास प्रस्ताव पारित हो गेहे। पच्चीस सदस्य वाले ए जनपद पंचायत म बीस सदस्य मन ह अविश्वास प्रस्ताव के पक्ष म अउ चार झिन सदस्य मन ह विपक्ष म मतदान करीन। ए ठिन मत अवैध घोसित होगे। अविश्वास प्रस्ताव के बाद कांग्रेस समर्थित अध्यक्ष हीरा वर्मा अउ उपाध्यक्ष नवाज मुंशी खान ल अपन पद ले हटे बर पड़गे।
राजभाषा-प्रशिक्षण
छत्तीसगढ़ राजभाषा आयोग के तीन दिन तक चलइया छत्तीसगढ़ी भाषा म प्रसिक्षण कारीकरम आज ले नवा रईपुर म सुरू होगे। कारीकरम के उद्घाटन संस्कृति विभाग के सचिव अन्बलगन पी. ह करीन। प्रसिक्षण कारीकरम म संयुक्त सचिव, उप सचिव, अपर सचिव अउ विधि विभाग के अधिकारी अउ कर्मचारी मन सामिल होइन।
कांग्रेस धरना प्रदर्शन
प्रदेस युवा कांग्रेस के कार्यकर्ता मन ह आज राजधानी रईपुर म रोजगार के मांग ल लेके विरोध प्रदर्सन करीन। ए दउरान कार्यकर्ता मन ह धरना वाले जघा बूढ़ापारा ले मुख्यमंत्री निवास के घेराव करे बर निकलीन, फेर ओमन ल सप्रे स्कूल के तीर रोक दे गीस। विरोध प्रदर्सन म युवा कांग्रेस के प्रदेस अध्यक्ष आकाश
शर्मा के संगेसंग कतकेन पदाधिकारी अउ कार्यकर्ता मन सामिल होइन।
रामलला दर्शन योजना
श्री रामलला दर्सन योजना म अयोध्या धाम बर रायगढ़ जिला ले श्रध्दालु मन के पहिली टोली आज निकलीन। वित्त मंत्री ओ.पी. चौधरी ह बिलासपुर रेलवे स्टेसन ले ए भक्तजन मन ल अयोध्या धाम बर सुभकामना देवत रवाना करीन।
रायगढ़ जिला ले अयोध्या धाम दर्सन बर पहिली जत्था म एक सौ बारह झिन यात्री सामिल हे, जेमा चौरासी झिन गांव के अउ अट्ठाइस झिन सहरी जघा के भक्तजन हवय।
सी.आई.एस.एफ.-स्थापना दिवस
माओवादी ग्रामीण-हत्या
बीजापुर जिला के कुटरू थाना क्षेत्र के पाताकुटरू जघा म माओवादी मन ह एक झिन गांव के मनखे के हत्या कर दीन। मृतक गांव के मनखे ल माओवादी मन ह पाछू आठ मार्च के अपहरण कर ले रिहीन। मनखे के सव ल पाछू रतिहा रद्दा ले बरामद करे गीस। घटना के पुष्टि करत जिला के पुलिस अधीक्षक ह बतइन कि सव के तीर ले माओवादी मनके एक ठिन पर्चा बरामद करे गेहे, जेमा हत्या करे जाय के बात केहे गेहे।