प्रधानमंत्री नरेंद्र मोदी ह आज छत्तीसगढ़ सरकार के महतारी वंदन योजना के वर्चुअल सुभारंभ करिन। प्रधानमंत्री ह योजना के पहिली चरण के तहत 70 लाख 12 हजार ले जादा विवाहित माईलोगिन मनके बैंक खाता म 655 करोड़ 57 लाख रूपिया के पहिली किस्त ऑनलाइन जारी करिन। कारीकरम ल संबोधित करत प्रधानमंत्री ह छत्तीसगढ़ के माईलोगिन मन ल भरोसा देवात किहीन कि महतारी वंदन योजना के सहायता रासि हर महिना बगर कोनो परेसानी के उंखर खाता म आवत रइही। ओमन किहीन कि मुद्रा योजना के तहत 65 प्रतिसत ले जादा कर्जा माईलोगिन मन लेइन हें। पाछू दस बछर म केंद्र सरकार ह स्व-सहायता समूह के माध्यम ले दस करोड़ ले जादा माईलोगिन मनके जिनगी म बदलाव लाने हे। श्री मोदी ह किहीन कि उंखर सरकार ह देस के तीन करोड़ माईलोगिन मन ल लखपति दीदी बनाय के संकल्प लेय हे। अब तक एक करोड़ ले जादा माईलोगिन मन ल लखपति दीदी बनाय जा चुके हे। एखर ले माईलोगिन मन आर्थिक रूप ले मजबूत होइन हें। ओमन किहीन कि नमो ड्रोन दीदी योजना के तहत भाजपा सरकार माईलोगिन मन ल न सिरिफ ड्रोन दिही, भलुक ओमन ल ड्रोन चलाय के प्रसिक्षण घलो दे जाही। एखर ले खेत-खार तो आधुनिक होहीच, संगे माईलोगिन मन ल घलो उपराहा कमई के साधन मिलही।
श्री मोदी ह किहीन कि भाजपा के डबल इंजन सरकार के प्राथमिकता माईलोगिन मनके कल्याण करना हे। एखर सेति जादातर केंद्रीय योजना मनके फायदा सोज्झे माईलोगिन मन ल दे जावत हे। छत्तीसगढ़ सरकार के महतारी वंदन योजना के तहत करीबन 70 लाख माईलोगिन मन ल हर महिना एक हजार रूपिया दे जाही।
महतारी वंदन योजना-02
महतारी वंदन योजना के सुभारंभ कारीकरम आज प्रदेस के 146 विकासखंड मुख्यालय म आयोजित करे गिस, जिहां अब्बड़ संख्या म माईलोगिन मन कारीकरम म जुरे रिहीन। राजधानी रइपुर म आयोजित राज्य स्तरीय कारीकरम म मुख्यमंत्री विष्णुदेव साय अउ आने मंत्री मौजूद रिहीन। ए मउका म मुख्यमंत्री ह किहीन कि महतारी वंदन योजना महिला ससक्तिकरण बर उठाय गेय मजबूत कदम हे, जउन छत्तीसगढ़ के आधा आबादी के सपना ल पुरोय के दिसा म बड़े छलांग हे। श्री साय ह किहीन कि प्रधानमंत्री ह विकसित भारत निर्माण के लक्ष्य देस के आगू राखिन हें, एखर बर विकसित छत्तीसगढ़ के निर्माण बहुते जरूरी हे। माईलोगिन मन जतेक मजबूत होहीं, हमर देस अउ प्रदेस घलो ओतकेच मजबूत होही।
उहें, प्रदेस के महिला अउ बाल विकास मंत्री लक्ष्मी राजवाड़े ह किहीन कि महतारी वंदन योजना माईलोगिन मन के आर्थिक मजबूती, स्वास्थ्य अउ पोषण म सुधार बर उपयोगी होही। एखर ले महिला ससक्तिकरण म मदद मिलही। ए योजना बरोबर मउका अउ सामाजिक न्याव ल बढ़ाय के प्रतीक हे।
ए मउका म मुख्यमंत्री ह जनसंपर्क विभाग डहार ले तइयार करे गे कॉफी टेबल पिक्टोरियल बुक ‘मंय महतारी हंव‘ के विमोचन करिन। ए कॉफी टेबल किताब म छत्तीस कहानी सामिल हें। ए दउरान ए मुख्यमंत्री ह बाल विवाह मुक्त छत्तीसगढ़ बनाय के घलो सपथ देवाइन। सम्मेलन के पहिली मुख्यमंत्री ह महिला स्व-सहायता समूह के डहार ले लगाय गे प्रदर्सनी के निरीक्षण करिन।
विजय शर्मा-बीजापुर
प्रदेस के उप मुख्यमंत्री विजय शर्मा ह भाजपा नेता मनके हत्या के निंदा करत किहीन कि सरकार माओवादी मन ले वार्ता बर हमेसा तइयार हे। आज बीजापुर के जांगला म मीडिया ले गोठबात म ओमन किहीन कि माओवादी वीडियो कॉन्फ्रेंसिंग के जरिया ले घलो गोठबात कर सकथें। श्री शर्मा ह किहीन कि राज्य सरकार ह गांव-गांव तक बिकास अउ मूलभूत सुबिधा उपलब्ध कराय बर प्रतिबध्द हे, ताकि युवा मन ल मुख्यधारा ले जोड़े जा सकय।
एखर पहिली उप मुख्यमंत्री, भाजपा प्रदेस अध्यक्ष किरण देव, वन मंत्री केदार कश्यप अउ संगठन मंत्री पवन साय ह- भाजपा नेता तिरूपति कटला अउ कैलाश नाग के घर जाके ओमन ल श्रध्दांजलि देइन। ए मउका म ओमन परिजन मन ले हर संभव मदद देय के गोठ किहीन।
बतादन कि पाछू दिन माओवादी मन दू झन भाजपा नेता तिरूपति कटला अउ कैलाश नाग के हत्या कर दे रिहीन।
राजभाषा आयोग-प्रशिक्षण
राजभासा आयोग डहार ले तीन दिनी छत्तीसगढ़ी भाखा म प्रसिक्षण कारीकरम के आयोजन करे जावत हे। ए प्रसिक्षण ग्यारा ले तेरह मार्च तक नवा रइपुर स्थित मंत्रालय म आयोजित करे जाही। ए दउरान मंत्रालय के कर्मचारी अउ अधिकारी मन ल छत्तीसगढ़ी भाखा म सरकारी काम-काज अउ एखर जादा ले जादा परयोग करे के प्रसिक्षण दे जाही। पहिली दिन काली मंत्रालय के संयुक्त सचिव, उप सचिव, अवर सचिव अउ विधि विभाग के अधिकारी – कर्मचारी मन ल प्रसिक्षण दे जाही। उहें, बारह मार्च के स्टेनो संवर्ग के अधिकारी, निज सचिव, निज सहायक, स्टेनोग्राफर, स्टेनो टाइपिस्ट, शीघ्रलेखक मन ल प्रसिक्षण दिहीं। उहें तेरह मार्च के वरिष्ठ सचिवालय सहायक मन ल राजभासा के प्रसिक्षण दे जाही।
दीपक बैज-केंद्रीय मंत्री पत्र
प्रदेस कांग्रेस अध्यक्ष दीपक बैज ह केंद्रीय नागरिक उड्डयन मंत्री ज्योतिरादित्य सिंधिया ल पाती पठोय के रइपुर ले दिल्ली बर हवई किराया कम करे के अनुरोध करिन हें। श्री बैज ह अपन पाती म किहीन हें कि जनता के परेसानी ल चेत म राखत एयरलाइंस कंपनी मन ल तुरतेच किराया कम करे बर दिसा- निरदेस जारी करे जाना चाही, ताकि मध्यमवर्गीय परिवार रइपुर ले दिल्ली तक हवई यात्रा आसानी ले कर सकंय।
युवा संगम कार्यक्रम
युवा संगम कारीकरम के चौथा चरण के तहत केरल राज्य के पढ़इया लइका मन बिलासपुर के सांस्कृतिक अउ पौरानिक धरोहर के भ्रमण करिन। संगेसंग लइका मन छत्तीसगढ़ के संस्कृति अउ पर्यावरण ल तिर ले जाने प्रयास करिन। भ्रमण दल म 50 झन पढ़इया लइका अउ पांच झन नोडल अधिकारी आय हें। पांच दिन के भ्रमण म आय युवा संगम दल ह काली तालागांव के देरानी-जेठानी मंदिर जघा के दउरा करिस। ए मउका म ओमन छत्तीसगढ़ के सांस्कृतिक, ऐतिहासिक विरासत अउ सामाजिक बेवस्था ल जानिन-समझिन, एखर संगेसंग प्राकृतिक छटा के घलो आनंद लीन।
बतादन कि प्रधानमंत्री नरेंद्र मोदी ह राष्ट्र ल एक सूत्र म पिरोय अउ युवा मन ल देस के समृध्द परंपरा ले चिनहारी कराय के लक्ष्य ल पाय बर युवा संगम कारीकरम के सुरूआत करिन हें।
मतदाता जागरूकता अभियान
अवइया लोकसभा चुनई के तइयारी जोर-सोर ले चलत हें। निर्वाचन आयोग डहार ले घलो प्रदेस म सरलग मतदाता जागरूकता अभियान चलाय जावत हे। इही कड़ी म राजनांदगांव म घलो जागरूकता अभियान चलाय जाही। जउन क्षेत्र म विधानसभा चुनई के बेरा मतदान कम होय रिहीस से उहां बिसेस रूप ले धियान दे जाही।
अबूझमाड़ मोबाइल टॉवर
नारायणपुर जिला के अबूझमाड़ के ढोंढरीबेड़ा गांव म नवा मोबाइल टॉवर लगाय ले दूरसंचार बेवस्था सुरू हो गेहे। एखर ले अब लोगन ल कनेक्टिविटी के संग इंटरनेट सेवा के घलो लाभ मिलही। संगे सरकारी योजना अउ देस-विदेस म होवइया घटना मनके जानकारी घलो आसानी ले मिलही।
बताय जाथे कि नारायणपुर जिला पुलिस के उदिम ले नवा मोबाइल टॉवर लग पाय हे।
बतादन कि माओवाद प्रभावित इलाका म माओवादी विरोधी अभियान चलाय जावत हें। एखर तहत सुरक्षा के संगेसंग निर्माण अउ बिकास कारज घलो करे जावत हे।
लकड़बग्घा-हमला
कोंडागांव जिला म आने-आने जघा म लकड़बग्घा के हमला म एक माईलोगिन समेत तीन लोगन घायल होगें। जानकारी ले माकड़ी ब्लॉक के हल्दा अउ उल्लेरा गांव म लकड़बग्घा ह तीनों झन उपर हमला कर दिस, जेमा तीनों झन गंभीर रूप ले घायल होगिन, जउन ल जिला अस्पताल म भर्ती कराय गेहे। ए घटना के बाद वन विभाग के डहार ले ग्रामीण मन ल रतिहा कुन घर ले बाहिर झन निकलंय अउ अंधियार जघा म नइ जाय के सलाह दीन हे।