भाजपा के बड़का नेता अउ रक्षा मंत्री राजनाथ सिंह ह किहीन कि मोदी सरकार ह सब्बों वादा ल पूरा करे हे। ओमन किहीन कि मोदी सरकार ह देस के पच्चीस करोड़ गरीब मनखे मन ल गरीबी रेखा ले उपर लाय हे। रईपुर म किसान महा-सम्मेलन म बोलत हुए श्री सिंह ह आस्वासन दीन कि केंद्र सरकार ह देस म बीज अउ खाद्य के कीमत ल स्थिर रखे के परयास करही। कारीकरम के आयोजन भाजपा किसान मोर्चा के राज्य ईकाई डहार ले करे गे रिहीस।
ए कारीकरम म मुख्यमंत्री विष्णुदेव साय ह किहीन कि बीजेपी किसनहा मनके पार्टी हवय। ओमन किहीन कि भाजपा सरकार ह देस के किसान मन बर अब्बड़ अकन योजना सुरू करे हे अउ उंखर सरकार ह मोदी के गारंटी म करे गे सब वादा ल पूरा करही।
किसान महा-सम्मेलन ल भाजपा किसान मोर्चा के राष्ट्रीय अध्यक्ष अउ सांसद राजकुमार चाहर, उप मुख्यमंत्री अरूण साव, विजय शर्मा के संगेसंग कृषि मंत्री रामविचार नेताम अउ भाजपा प्रदेस अध्यक्ष किरण सिंह देव ह घलो संबोधित करीन। ए सम्मेलन म छत्तीसगढ़ के सबो जिला ले बड़ संख्या म किसनहा मन जुरे रिहीन।
महतारी वंदन सम्मेलन
प्रदेस म महतारी वंदन योजना के चलत काली दस मार्च के हितग्राही मन के बैंक खाता म डीबीटी के माध्यम ले पहिली पइत पइसा भेजे जाही। एखर ले हरेक महिना पात्र माईलोगिन मनके बैंक खाता म एक हजार रूपिया जमा होही। ए योजना ले बड़ संख्या म राज्य के महिला मन ल फायदा मिलही। ए मउका म राजधानी रईपुर समेत सबो जिला मुख्यालय, ब्लॉक मुख्यालय अउ नगर-निकाय क्षेत्र म महतारी वंदन सम्मेलन राखे जाही। प्रधानमंत्री नरेंद्र मोदी ए सम्मेलन ले ऑनलाइन जुड़के मनखे मन ल संबोधित करही। उहें, मुख्यमंत्री विष्णुदेव साय ह रईपुर म होवइया मुख्य कारीकरम म उपस्थित रइही।
ए मउका म छत्तीसगढ़ ल बाल विवाह मुक्त करे बर एक अभियान घलो सुरू करे जाही। जिला स्तर के ए कारीकरम म छत्तीसगढ़ ल बाल विवाह मुक्त करे के संकल्प देवाय जाही।
सम्मेलन म विभागीय काम-काज के उपर सांस्कृतिक कारीकरम के संगेसंग महिला स्व-सहायता समूह कोति ले बनाय गे समान के स्टाल घलो लगाय जाही।
कांग्रेस-उम्मीदवार
अवईया लोकसभा चुनई बर कांग्रेस ह अपन प्रत्यासी मन के पहिली सूची जारी कर देहे। पहिली सूची म छत्तीसगढ़ के छै ठिन संसदीय क्षेत्र बर प्रत्यासी मनके नांव घोसित करे गेहे। पूर्व मुख्यमंत्री भूपेश बघेल ल राजनांदगांव सीट ले उम्मीदवार बनाय गेहे। उहें, सासंद ज्योत्सना महंत ल कोरबा ले उम्मीदवार घोसित करे गेहे। पाछू सरकार म मंत्री रहय डॉक्टर शिव कुमार डहरिया ल जांजगीर-चांपा सीट ले अउ पूर्व मंत्री ताम्रध्वज साहू ल महासमुंद सीट ले प्रत्यासी बनाय गेहे। रईपुर लोकसभा सीट म पूर्व विधायक विकास उपाध्याय ल मउका दे गेहे। फेर दुरूग लोकसभा सीट ले राजेन्द्र साहू ह कांग्रेस के उम्मीदवार होही। छत्तीसगढ़ के बांचे पांच ठन संसदीय क्षेत्र बर कांग्रेस के प्रत्यासी के घोसना बांकी हे।
सुनइया मन ल बतादन कि भारतीय जनता पार्टी कोति ले राज्य के सबो ग्यारा ठन लोकसभा सीट बर पहिली ले प्रत्यासी मन के घोसना होगे हे।
आर्टिकल-370 टैक्स फ्री
हिंदी फिलिम ‘‘आर्टिकल तीन सौ सत्तर‘‘ ल छत्तीसगढ़ म टैक्स फ्री कर दे गेहे। रईपुर के एक ठिन टॉकिज म ए पिक्चर ल देखे बर पहुंचे मुख्यमंत्री विष्णुदेव साय ह ए घोसना करीन। मुख्यमंत्री ह किहीन कि ‘‘आर्टिकल तीन सौ सत्तर‘‘ ह बढ़िया फिलिम हे, अउ एला सबो झन ल देखना चाही। ओमन किहीन कि धारा तीन सौ सत्तर ल हटाय ले कश्मीर म सांति बने हे।
मुख्यमंत्री लोकार्पण
मुख्यमंत्री विष्णुदेव साय ह काली कबीरधाम जिला के कुरूवा गांव म राखे गे साहू समाज के सम्मेलन म पहुंचे रिहीन। ए मउका म ओमन लगभग एक सौ अट्ठारा करोड़ रूपिया के लागत ले होवइया आने-आने काम के लोकार्पण अउ सिलन्यास करीन। संगेसंग मुख्यमंत्री ह मछरी पालन अउ उद्यान विभाग के हितग्राही मूलक योजना के तहत समान बांटिन अउ हितग्राही मन ल रासन कार्ड अउ आयुष्मान कार्ड घलो दीन।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली के निरदेस म प्रदेस म आज राष्ट्रीय लोक अदालत के आयोजन करे गीस। एमा राज्य विधिक सेवा प्राधिकरण बेलासपुर कोति ले सबो जिला न्यायालय अउ व्यवहार न्यायालय म घलो लोक अदालत लगाय गीस, जेमा पक्षकार मनके आपसी सहमति ले बेंक, बीमा, फाइनेंस, बीएसएनएल, बिजली विभाग समेत नगर निगम अउ आने-आने राजीनामा के लायक प्रकरण मनके निराकरण करे गीस।
राजिम कुंभ कल्प-समापन
राजिम के त्रिवेणी संगम म चौबीस फरवरी ले सुरू होय राजिम कुंभ कल्प के काली समापन होगे। समापन समारोह म मुख्य पहुना के रूप म राज्यपाल विश्वभूषण हरिचंदन ह आय रिहीन। कारीकरम के अध्यक्षता उप मुख्यमंत्री विजय शर्मा ह करीन। ए बछर राजिम कुंभ कल्प ह रामोत्सव के रूप म मनाय गीस, जेमा देसभर ले साधू संत अउ महामंडलेश्वर मन घलो जुरे रिहीन। समापन के मउका म राज्यपाल अउ सबो पहुना मन भगवान राजिव लोचन के पूजा-पाठ करके प्रदेस के खुसहाली के कामना करीन।
इही बीच, राजिम कुंभ कल्प मेला म डॉक्टर प्रियंका बिस्सा व्यास के टीम, नेहरू युवा केंद्र, सामुदायिक स्वास्थ्य केंद्र मगरलोड अउ छत्तीसगढ़ नर्सिंग कॉलेज के पढ़ईया लइका मन कोति ले निसुल्क रक्त परीक्षण सिविर, स्वास्थ्य शिक्षा अउ जागरूकता अभियान के आयोजन करे गीस।
चुन्नीलाल साहू-इस्तीफा
कांग्रेस के पूर्व विधायक चुन्नीलाल साहू अउ पूर्व जिला अध्यक्ष चौलेश्वर चंद्राकर ह आज भारतीय जनता पार्टी म सामिल होगे। भाजपा के प्रदेस अध्यक्ष किरण सिंह देव, उप मुख्यमंत्री अरूण साव अउ विजय शर्मा ह पार्टी के गमछा पहिराके दूनों झन ल भाजपा के सदस्यता देवाइन।
हल्बी/गोण्डी-समाचार बुलेटिन
काली ईतवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनों बुलेटिन आकाशवाणी केंद्र, जगदलपुर ले प्रसारित होही। जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे अउ गोण्डी म समाचार बुलेटिन संझा साढ़े छै बजे प्रसारित करे जाही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के सब्बो आकाशवाणी केंद्र एके संघरा रिले करही। ए दारी के अंक म ‘‘बस्तर‘‘ जिला के काम-काज के बारे म जानकारी दे जाही।
– नगरीय प्रसासन अउ विकास विभाग ह राज्य के बाईस ठन नगरीय निकाय बर चौदहवां अउ पंद्रहवां वित्त आयोग के तहत लगभग चालीस करोड़ सैंतालीस लाख रूपिया मंजूर करे हे।
– युवा कांग्रेस के प्रदेस अध्यक्ष आकाश शर्मा ह रईपुर म राखेगे पत्रकार वार्ता म बतइन कि संगठन के कार्यकर्ता मन ह ‘‘रोजगार दो न्याय दो‘‘ अभियान के तहत अवइया ग्यारा मार्च के राजधानी रईपुर म विरोध प्रदर्सन करही।
– राजनांदगांव जिला के बसंतपुर पुलिस ह सेयर बेचे अउ बिसाय के झांसा देके सड़सठ लाख रूपिया के ठगी के मामला म दू झिन आरोपी ल पकड़े हे।
अउ
– बिलासपुर जिला के सरकंडा पुलिस ह मोपका बाईपास रोड तीर बिरकोना हाईवे कोति जात एक गाड़ी ले करीब उनचास किलो गांजा पकड़े हे। जेखर कीमत लगभग पंद्रह लाख रूपिया बताय जात हे।