राज्य सरकार ह किसान मनके हित म अवइया खरीफ मौसम ले ‘‘कृषक उन्नति योजना‘‘ लागू करे के फइसला लेहे। मुख्यमंत्री विष्णुदेव साय के अगुवई म काली संझा होय राज्य परिसद के बइठका म मोदी के गारंटी ल पूरा करे बर ए फइसला ले गीस। किसान मनके आमदनी अउ फसल उत्पादन ल बढ़ाय खातिर ए योजना लागू करे गेहे। एमा धान खरीदी के आधार म किसान मन ल एकड़ पाछू उन्नीस हजार दू सौ संतावन रूपिया के आदान सहायता रासि दे जाही। मंत्रिपरिसद ह प्रदेस म आतंकवाद, नक्सलवाद अउ वामपंथी उग्रवाद समेत आने बिसेस मामला के तुरते जांच अउ अभियोजन बर स्टेट इन्वेस्टिगेसन ऐजेंसी-एसआईए के गठन करे के निर्णय लेहे। ए एजेंसी राष्ट्रीय जांच एजेंसी एन. आई. ए. संग जुरमिल के राज्य के नोडल एजेंसी के रूप म काम करही। एखर बर ए पुलिस अधीक्षक समेत चौहत्तर नवा पद बनाय गेहे।
मंत्रि परिसद के एक आने फइसला म मीसाबंदी ल मिलइया सम्मान निधि ल फेर ले सुरू करे जाही। एमा पाछू पांच बछर के बकाया रकम देके मंजूरी दे गेहे। बकाया रासि के भुगतान अवइया एक नवंबर के होही। मंत्रिपरिसद ह आने-आने जनकल्याणकारी नीति ल बने ढंग ले लागू करे अउ लोगन के समस्या के तुरते समाधान खातिर सुसासन अउ अभिसरण विभाग के गठन के फइसला लेहे। विभाग कोति ले राज्य म सुसासन के क्षेत्र म नवा पहल करत सुसासन फेलोसिप अउ लोकप्रसासन म उत्कृष्टता पुरस्कार दे जाही।
मंत्री परिषद निर्णय -02
अटल बिहार वाजपेयी सुसासन नीति विश्लेषण शिक्षण संस्थान अउ छत्तीसगढ़ राज्य नवाचार आयोग के संचालन इही विभाग म करे जाही। एमा राजीव नगर आवास योजना के सरत ल वइसने राखत ए योजना के नांव अटल बिहार योजना करे के फइसला बइठका म ले गीस।
कैबिनेट ह सार्वजनिक वितरण प्रणाली म अंत्योदय अउ प्राथमिक रासन कारडधारी मन ल अवइया अप्रैल महिना ले अवइया बछर मार्च तक सक्कर देवाय बर राज्य के सहकारी कारखाना ले खरीदी करे बर मंजूरी देहे।
अइसने अनुकंपा नियुक्ति के अर्जी देवइया मन बर जिला के कोनो भी कार्यालय म खाली पद नइ होय म उंखर अर्जी ल संभागीय आयुक्त कार्यालय म भेजे जाही। छत्तीसगढ़ सर्वे विभागीय संविदा कर्मचारी महासंघ अउ छत्तीसगढ़ मनरेगा कर्मचारी महासंघ कोति ले करे गे मांग ल धियान म राखत संविदा कर्मचारी मन ल अब अट्ठारा के जघा तीस दिन के आकस्मिक अवकास दे जाही।
कैबिनेट ह उच्च शिक्षा विभाग म राष्ट्रीय शिक्षा नीति ल लागू करे बर अपन मंजूरी दे देहे। एमा पढ़इया लइका मन ल एक ले जादा पाठ्यक्रम म प्रवेस के सुविधा के संगेसंग जरूरत के मुताबिक उच्च शिक्षा लेके विकल्प मिल सकही। राज्यमंत्रि परिसद ह राज्य योजना आयोग के नांव बदल के राज्य नीति आयोग करे के संग छत्तीसगढ़ आर्थिक सलाहकार परिसद के गठन ल मंजूरी देहे। मंत्रिपरिसद के बइठका म छत्तीसगढ़ मोटरयान कराधान अधिनियम के संसोधन प्रारूप के अनुमोदन घलो करे गीस।
महतारी वंदन योजना
प्रदेस म महतारी वंदन योजना म करीबन सत्तर लाख माई लोगन मन अर्जी जमा करे हे। महिला अउ बाल विभाग कोति ले चलाय जात ए योजना म सबो पात्र महिला मन ल हर महिना एक हजार रूपिया उंखर बैंक खाता म जमा कराय जाही। ए योजना ल बने ढंग ले लागू करे बर राजधानी स्थित विभाग के मुख्यालय के संगेसंग सबो जिला म नियंत्रण कक्ष बनाके हेल्प लाइन नंबर जारी करे गेहे।
जलवायु परिवर्तन सम्मेलन
छत्तीसगढ़ म जलवायु परिवर्तन के निगरानी बर ए उच्च स्तरीय समिति बनाय गेहे। काली राजधानी रईपुर म होय ‘‘छत्तीसगढ़ क्लाइमेटचेंज कॉन्क्लेव‘‘ के बेरा ए घोसना करे गीस। सम्मेलन म मुख्यमंत्री विष्णुदेव साय ह किहीन कि प्रदेस के जंगल म कीसम-कीसम के औषधी पउधा पाय जाथे, उंखर सुरक्षा बर वन क्षेत्र म रहवइया बिसेस पिछड़ी जनजाति के जानकार मनके सुझाव ल मानेे जाही।
उद्योग मंत्री निर्देश
प्रदेस के उद्योग मंत्री लखनलाल देवांगन ह जमीन लेके बाद उद्योग नइ लगइया उद्योगपति मन ल तीन दिन के भीतरी नोटिस जारी करे के निरदेस देहे। आज रईपुर म प्रदेस के सबो जिला के उद्योग अउ व्यापार केंद्र के प्रबंधक मनके बइठका म श्री देवांगन ह किहीन कि उद्योग लगाय के नांव म लेगे भुईया के उपयोग नइ करे जाय म एखर आबंटन निरस्त करे जाही।
राज्यपाल अंतर्राष्ट्रीय महिला दिवस
राज्यपाल विश्वभूषण हरिचंदन ह आज रईपुर के छत्तीसगढ़ महाविद्यालय म छत्तीसगढ़ मानवधिकार आयोग के मदद ले अंतर्राष्ट्रीय महिला दिवस के मउका म राखे गे कारीकरम म संघरीन। ए बेरा म ओमन किहीन कि राष्ट्र निर्माण म माईलोगिन के महत्ता के भूमिका हवय अउ भारत ल दूनिया के पांचवा सबले बड़े अर्थव्यवस्था बनाय म माई लोगन के बिसेस योगदान हवय।
ए मउका म राखेगे आने-आने प्रतियोगिता म जितइया मन ल राज्यपाल ह पुरस्कार बांटिन।
राज्यपाल एट होम
छत्तीसगढ़ अउ मध्यप्रदेस के एन.सी.सी. कैडेट मन बर ‘‘एट होम‘‘ कारीकरम राखे गीस। राजभवन म राखे गे ए कारीकरम म राज्यपाल विश्व भूषण हरिचंदन ह एन.सी.सी. कैडेट मनके आह्वान करत किहीन कि ओमन देस हित म समर्पण के संग काम करय। ए कारीकरम म प्रदेस के ओ एनसीसी कैडेट मन घलो भाग लीन, जउन मन ल पाछू दिन नई दिल्ली के गणतंत्र दिवस परेड म सामिल होय के मउका मिले रिहीस। ए कैडेट मन ल देस म छटवां स्थान मिले म राज्यपाल ह बधई अउ सुभकामना दीन हे। ओमन सांस्कृतिक कारीकरम प्रस्तुत करइया मन ल ईनाम दीन।
मुख्य निर्वाचन पदाधिकारी बैठक
अवइया लोकसभा चुनाव म स्वतंत्र अउ साफगोई तरीका ले मतदान कराय बर राज्य के मुख्य निर्वाचन पदाधिकारी रीना बाबा साहेब कंगाले ह आने-आने जांच अउ प्रवर्तन एजेंसी के बइठका लीन। ओमन आदर्स आचार संहिता लागू होय के दउरान नसीला अउ कीमती जिनिस के संगेसंग नगद रासि के परिवहन म कड़ाई ले निगरानी राखे के निरदेस दीन। संगेसंग अंतर्राज्यीय सीमा के सबो चौकी म कैमरा लगाय बर किहीन। बइठका म अधिकारी मन ल चुनाव बर तियार करे गे मोबाइल ऐप अउ पोर्टल ल चलाय के प्रसिक्षण दे गीस।
राष्ट्रीय शिक्षा नीति विशेष कार्यबल
प्रदेस म राष्ट्रीय शिक्षा नीति लागू करे बर पंद्रह सदस्य के बिसेस कार्यबल बनाय जाही। ए संबंध म उच्च शिक्षामंत्री बृजमोहन अग्रवाल ह काली राजधानी रईपुर म राखे गे कार्यसाला के बेरा अधिकारी मन ल निरदेस दीन। वीडियों कॉन्फ्रेंसिंग ले कार्यसाला म बोलत श्री अग्रवाल ह किहीन कि राष्ट्रीय शिक्षा नीति ल बने ढंग ले लागू करे ले विद्यार्थी मन ल अनुसंधान अउ सोध काम बर प्रोत्साहन मिल सकही, जेखर ले उखर सर्वांगीन विकास होही।
बीजापुर कैलाश नाग हत्या
बीजापुर जिला के जांगला निवासी कैलाश नाग के काली माओवादी मन ह गोली मारके हत्या कर दीन। ओ बखत ओमन कोटमेटा क्षेत्र म तरिया बनवाय के काम करत रिहीन। इही दउरान माओवादी मन ह तरिया बनाय के काम म लगे गाड़ी म आगी लगा दीन। पुलिस ह घटना के जांच करत हे।
नगरीय निकाय अध्यक्ष
राज्य के नगरीय प्रशासन अउ विकास विभाग ह तीन नगरीय निकाय मन म अध्यक्ष के खिलाफ अविस्वास प्रस्ताव पारित होय के बादे कार्यवाहक अध्यक्ष के नियुक्ति करे हे। विभाग कोति ले जारी आने-आने आदेस के मुताबिक बिलासपुर जिला के तखतपुर नगर पालिका म वार्ड क्रमांक तेरह के पार्षद अमरीका कृष्ण कुमार साहू नगर पालिका के कार्यवाहक अध्यक्ष बनाय गेहे। अइसने बेमेतरा जिला के मारो नगर पंचायत म वार्ड क्रमांक पंद्रह के पार्षद धनलाल देसलहरे ल कार्यवाहक अध्यक्ष के जिम्मेवारी सौंपे गेहे। मुंगेली जिला के सरगांव नगर पंचायत म वार्ड क्रमांक पांच के पार्षद परमानंद साहू ल कार्यवाहक अध्यक्ष नियुक्त करे गेहे।
भारत विकास डायरी
आकाशवाणी केंद्र, रईपुर के प्रादेशिक समाचार एकांश कोति ले ‘‘भारत विकास डायरी‘‘ कारीकरम के तहत आज रईपुर संसदीय क्षेत्र के संबंध म जानकारी दे जाही। आज ए कड़ी के प्रसारण रतिहा आठ बजे ले होही, एला छत्तीसगढ़ स्थित आकाशवाणी के जम्मों केंद्र एक संघरा प्रसारित करही। ए कारीकरम ल मीडियामेव अउ एफ.एम. दूनों चैनल म सुन सकत हव।