प्रधानमंत्री नरेन्द्र मोदी ह ‘‘शक्ति वंदन अभियान‘‘ के तहत काली छह मार्च के देशभर के महिला स्व-सहायता समूह अउ एनजीओ मनके संग गोठबात करही। एमा छत्तीसगढ़ के माईलोगिन मन ह घलो सामिल होही। प्रधानमंत्री ह ऑनलाइन के माध्यम ले जुड़ही। ए कारीकरम ल लेके जांजगीर-चांपा जिला म बिसेस रूप ले तियारी करे जात हे।
श्री रामलला दर्शन योजना
श्री रामलला दर्शन योजना के तहत आज रईपुर रेलवे स्टेसन ले अयोध्या जवइया विशेष रेलगाड़ी ल मुख्यमंत्री विष्णुदेव साय ह हरियर झंडा देखाके रवाना करीन। ए रेलगाड़ी म रईपुर संभाग के जम्मों पांचों ठन जिला के आठ सौ पचास झन श्रद्धालु मन ह सामिल हे। ए मउका म उप मुख्यमंत्री विजय शर्मा, कृषि मंत्री रामविचार नेताम और खाद्य मंत्री दयालदास बघेल ह मौजूद रिहीन।
ए मउका म मुख्यमंत्री ह किहीन कि रईपुर के अलावा बिलासपुर अउ रायगढ़ ले घलो अइसन रेलगाड़ी अयोध्या बर चलाय जाही। ए बिसेस रेलगाड़ी ल छत्तीसगढ़ के भगत मन बर हफ्ता म एक घांव चलाय जाही। ओमन यहू किहीन कि अवइया समय म अयोध्या के संगेसंग अउ दिगर धार्मिक जघा मनके यात्रा घलो कराय जाही।
दीक्षांत समारोह
जगदलपुर म आज शहीद महेन्द्र कर्मा विश्वविद्यालय के चौथइया दीक्षांत समारोह के कारीकरम करे गीस। कारीकरम म राज्यपाल विश्वभूषण हरिचंदन ह तिरानबे झन विद्यार्थी मन ल स्वर्ण पदक, तिरालीस झन विद्यार्थी मन ल पीएचडी अउ एक झन ल मानद उपाधि दीन। ए मउका म राज्यपाल ह किहीन कि उच्च शिक्षा ह युवा मनके विकास म महत्वपूर्ण भूमिका निभाथे। ओमन ए बात उपर खुसी जतईन कि विश्वविद्यालय ल केन्द्रीय परियोजना ‘‘मेरू‘‘ के तहत सौ करोड़ रूपिया के अनुदान रासि दे गेहे, जेखर ले ए विश्वविद्यालय म सुविधा मन ल अउ बने बढ़ाय जाही। ए दीक्षांत समारोह म मुख्यमंत्री विष्णुदेव साय घलो सामिल होइन।
ए दउरान राज्यपाल ह जगदलपुर के कुम्हरा वंड म सहीद गुंडाधूर कृषि महाविद्यालय अउ अनुसंधान केन्द्र म नवाचार मेला के सुभारंभ करीन।
हाईकोर्ट-निर्देश
छत्तीसगढ़ उच्च न्यायालय के न्यायमूर्ति एन.के. व्यास ह पुलिस महानिदेशक ल राज्य के जम्मों पुलिस थाना मन म सी.सी.टी.वी. कैमरा लगाय के निरदेस दीन। एखर अलावा हाईकोर्ट ह यहू किहीन कि जिला के पुलिस अधीक्षक मन ह ए सी.सी.टी.वी. कैमरा के मॉनिटरिंग करही।
खबर के मुताबिक रायगढ़ के एक झिन माईलोगिन ह हाईकोर्ट म याचिका दायर करके कोतरा रोड पुलिस उपर उंखर गोसइया ल पुलिस थाना म बुलाके मारपीट अउ प्रताड़ित करे के आरोप लगाय रिहीस। आज हाईकोर्ट के सिंगल पीठ ह ए याचिका उपर सुनवाई करीन अउ नाराजगी जतावत आदेस जारी करीन।
छत्तीसगढ़ क्लाइमेट चेंज कॉन्क्लेव
राजधानी रईपुर म आज ले छत्तीसगढ़ क्लाइमेट चेंज कॉन्क्लेव के कारीकरम करे जात हे। एखर सुरूवात मुख्यमंत्री विष्णुदेव साय ह करीन। ए मउका म ओमन ह किहीन कि जलवायु परिवर्तन ह पूरा दुनिया बर एक ठन बहुत बड़े समस्या हरय। एखर ले निपटारा करे खातिर हमन ल बढ़िया काम करे बर पड़ही। ओमन यहू किहीन कि जलवायु परिवर्तन के समस्या ले निपटे बर राज्य के भूमिका अउ भविष्य के कार्ययोजना बर ए कार्यशाला ह बहुत बड़े काम करही।
दू दिन के ए कारीकरम म देसभर ले आय बिसेसज्ञ अउ पर्यावरण के ज्ञाता मन ह अपन-अपन विचार राखीन।
माओवादी-गिरफ्तार
बीजापुर जिला के तोड़का-सावनार क्षेत्र ले सुरक्षा बल के टीम डहार ले चार झन माओवादी मन ल गिरफ्तार करे गीस। गिरफ्तार करे गे माओवादी मनके तीर ले गोला-बारूद अउ माओवादी पर्चा बरामद करे गेहे। मिले जानकारी के मुताबिक गंगालूर थाना क्षेत्र के सावनार नदिया के तीर माओवादी मनके रेहे के सूचना मिले रिहीस हे, जेला आधार मानके डीआरजी और जिला पुलिस बल के संयुक्त टीम ह सर्चिंग के दउरान ए माओवादी मन ल गिरफ्तार करीन।
चित्रकोट महोत्सव-शुभारंभ
बस्तर के चित्रकोट म आज ले तीन दिन तक चलइया चित्रकोट महोत्सव के सुरूवात करे गीस। मुख्यमंत्री विष्णुदेव साय ह ए महोत्सव के सुभारंभ करीन। ए मउका म मुख्यमंत्री ह बस्तर संभाग बर दू सौ आठ करोड़ रूपिया ले जादा के लागत वाले करीबन साढ़े छह सौ विकास काम के लोकार्पण अउ भूमिपूजन करीन। श्री साय ह मुख्यमंत्री कन्या विवाह समारोह म सामिल होइन अउ ओमन करीबन तीन सौ चालीस झन दुल्ही-दुल्हा मन ल आशीर्वाद दीन।
चित्रकोट महोत्सव म छत्तीसगढ़ के कलाकार के संगेसंग आने राज्य के कलाकार मन ह घलो अपन कलाकारी पेस करही।
मुख्यमंत्री-राजिम कुंभ
मुख्यमंत्री विष्णुदेव साय ह किहीन कि एसो राजिम कुंभ कल्प मेला के आयोजन ल पउर साल ले जादा बढ़िया करे जात हे। ओमन किहीन कि ए कार्यक्रम ले छत्तीसगढ़ के मान-सम्मान ह बाढ़े हे। मुख्यमंत्री ह काली राजिम कुंभ कल्प मेला म सामिल होइन। ए दउरान ओमन किहीन कि जल्दीचकुन कृषक उन्न्ति योजना के तहत राज्य के चौबीस लाख बहत्तर हजार ले जादा किसान मनके बैंक खाता म धान बिक्री के अंतर राशि के रूप म तेरह हजार करोड़ रूपिया डाले जाही। ओमन किहीन कि महतारी वंदन योजना के पहिली किश्त ल सात मार्च के पात्र माईलोगिन मनके बैंक खाता म डारे जाही।
वंदेभारत ट्रेन-डोंगरगढ़ ठहराव
वंदेभारत रेलगाड़ी के ठहराव ल अब डोंगरगढ़ स्टेसन म घलो करे जाही। काली ए रेलागाड़ी ल गोंदिया ले रवाना करे जाही अउ संझा चार बजके उनतीस मिनट म डोंगरगढ़ म रोके जाही। उहें, सात मार्च के बिलासपुर ले रवाना करे जाही अउ बिहनिया नौ बजके इक्कीस मिनट म डोंगरगढ़ म रोके जाही। नागपुर रेलमंडल डहार ले एखर समय-सारिणी ल जारी कर दे गेहे।
मुख्य न्यायाधीश-विमोचन
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली बिलासपुर म राखे गे एक ठिन कारीकरम म ‘‘इंडियन लॉ रिपोर्ट्स‘‘ छत्तीसगढ़ द्विभाषी के अंग्रेजी अउ हिन्दी संस्करण के विमोचन करीन। ए संस्करण के प्रकासन ल ऑल इंडिया रिर्पोटर, नागपुर के मदद ले इंडियन लॉ रिपोर्ट्स समिति छत्तीसगढ़ श्रृंखला ह करीन। ए मउका म मुख्य न्यायाधीश ह आसा जतईन हे कि ए संस्करण ल राज्य के विधिक समुदाय बर उपयोगी साबित होही अउ न्याय प्रणाली म सहायक होही।
भारत विकास डायरी
आकाशवाणी केंद्र, रईपुर के प्रादेशिक समाचार एकांश डहार ले ‘‘भारत विकास डायरी‘‘ कारीकरम के तहत आज जांजगीर-चांपा संसदीय क्षेत्र के बारे म जानकारी दे जाही। एखर प्रसारण ल आज रतिहा आठ बजे ले करे जाही, जेला छत्तीसगढ़ के जम्मों आकाशवाणी केंद्र ह एके संघरा प्रसारित करही। ए कारीकरम ल प्राईमरी चैनल अउ एफ.एम. दूनों चैनल म सुन सकत हव।
अउ अब थोरकुन समाचार सार म –
– दुरूग लोकसभा चुनाव बर वैशाली नगर विधानसभा क्षेत्र के सुपेला म भारतीय जनता पार्टी डहार ले मुख्य चुनाव कार्यालय के आज उद्घाटन करे गीस। ए लोकसभा क्षेत्र के भाजपा प्रत्याशी विजय बघेल ह ए कार्यालय के सुभारंभ करीन। ए मउका म भाजपा के पदाधिकारी अउ कार्यकर्ता मन ह मौजूद रिहीन।
अउ
– सक्ती के पुलिस टीम डहार ले जिला म यातायात व्यवस्था ल बने बनाय खातिर एक ठन अभियान चलाय जात हे। ए काम बर यातायात मित्र बनाय गेहे। अभियान के तहत राष्ट्रीय राजमार्ग मन म दुर्घटनाग्रस्त क्षेत्र के पहिचान करके इहां यातायात नियम के पालन कराय जाही।