पोलिया उन्मूलन कारीकरम म आज ले प्रदेस म राष्ट्रीय सघन पल्स पोलियो अभियान चालू होगे हे। मुख्यमंत्री विष्णुदेव साय ह जशपुर जिला के बगिया म लइका मन ल पोलिया के दवई पिला के ए अभियान के सुभारंभ करीन। ए मउका म मुख्यमंत्री ह दाई-ददा मनसे आह्वान करीन कि ओमन अपन लइका ल पोलियो के दवई खच्चित पिलाय, जेखर ले कोनो लइका नइ छुटही।
राज्य टीकाकरण अधिकारी डॉक्टर वी.आर. भगत ह बतइन कि पांच मार्च तक चलने वाले ए अभियान म नवजात ले पांच बछर तक के सबो लइका मन ल पोलियो के खुराक पिलाय जाही। ओमन बतइन कि प्रदेस म सहरी अउ गांव-गवई ल मिलाके ए बछर चौदह हजार ले जादा बूथ के माध्यम ले छत्तीस लाख तेरह हजार ले जादा लइका मन ल पोलियो के दवई पिलाय जाही। ए अभियान म टीकाकरण दल के सदस्य मन ह रेलवे स्टेसन, बस स्टैंड, मेला, हाट बाजार, ईंट भट्ठा, झुग्गी-झोफड़ी अउ भवन निर्माण स्थल म जाके घलो लइका मन ल पोलिया के खुराक पिलाही।
मुख्यमंत्री-कार्यक्रम
मुख्यमंत्री विष्णुदेव साय ह आज जशपुर जिला के लोगन मन ल सहज सुविधा देबर तीन कारीकरम के सुरूआत करीन। जिला प्रसासन अउ यूनीसेफ के पहल ले चलाय जाने वाले ए कारीकरम म ‘‘स्वास्थ्य मितान हेल्प लाइन, स्वस्थ महतारी सबकी जिम्मेदारी‘‘ अउ सियान मन बर निसुल्क वार्षिक स्वास्थ्य जांच सामिल हे।
उहें, मुख्यमंत्री ह अपन गृह ग्राम बगिया ले आज श्रम वैन ल हरियर झंडी दिखाके रवाना करीन। ए श्रम वैन जिला के आने-आने ग्राम पंचायत म जाके मजदूर मनके पंजीयन करही।
एखर अलावा मुख्यमंत्री ह नोनी रक्षा रथ ल घलो हरियर झंडी दिखाइन। जशपुर पुलिस प्रसासन कोति ले सुरक्षित महिला-सुरक्षित समाज के उद्देस्य ले ए रथ ल चलाय जात हे।
ए सबले पहिली मुख्यमंत्री ह जशपुर जिला म दू थाना चौकी के उद्घाटन घलो करीन।
भाजपा-लाभार्थी संपर्क अभियान
भारतीय जनता पार्टी के प्रदेस महामंत्री अउ लाभार्थी संपर्क अभियान के प्रदेस संयोजक रामजी भारती ह किहीन हे कि छत्तीसगढ़ म पार्टी के लाभार्थी संपर्क अभियान के सकारात्मक परिणाम देखे बर मिलत हे। ओमन किहीन कि ए अभियान म पार्टी के एक लाख ले जादा कार्यकर्ता मन लाभार्थी के घर जाके प्रधानमंत्री नरेंद्र मोदी के चिट्ठी, स्टीकर अउ केंद्र सरकार के योजना पत्रक पहुंचाही।
आज रईपुर म पत्रकारवार्ता म बोलत हुए श्री भारती ह किहीन कि पाछू दस बछर म केंद्र सरकार के योजना के फायदा गांव-गरीब तक पहुंचे हे, जेमा छत्तीसगढ़ म चालीस लाख लाभार्थी हे, जेखर मन से संपर्क अभियान जारी हे।
ईडी-आवेदन खारिज
प्रवर्तन निदेशालय-ईडी के अधिकारी मन उपर पूछताछ के बीच मारपीट अउ प्रताड़ित करे जाय के सिकायत ल ईडी के बिसेस अदालत ह खारिज कर दे हे। सुनइया मन ल बतादन कि बिसेस अदालत म अधिकारी मन उपर मारपीट अउ प्रताड़ना के आरोप लगात हुए अपराधिक मामला दर्ज करे के मांग करे गे रिहीस। जेखर सुनवाई काली बिसेस अदालत म होइस। जेमा एक सिकायत करता ह अपन आवेदन वापस ले लीस, उहें, दू सिकायतकर्ता मन कोर्ट म आबे नइ करीन। जेखर कारण बिसेस अदालत ह आवेदन ल खारिज कर दीन।
ईडी-कार्रवाई
प्रवर्तन निदेशालय-ईडी के टीम ह महादेव सट्टा ऐप मामला म कोलकाता ले सूरज चोखानी अउ भोपाल ले गिरीश तलरेजा ल गिरफ्तार करके रईपुर के सीजेएम कोर्ट म पेस करीन। ईडी ह कोर्ट म आवेदन देके दूनों आरोपी ल रिमांड म देके मांग करे हे।
सुनइया मन ल बतादन कि आरोपी सूरज चोखानी उपर महादेव सट्टा एप के पइसा ल सेयर बाजार म लगाय अउ दूसर आरोपी गिरीश तलरेजा उपर सट्टाबाजी के कमाई ल एप के प्रमोटर शुभम सोनी संग मिलके कई ठिन बैंक खाता के जरिया बगराय के आरोप हे।
माओवादी मुठभेड़-जवान शहीद
कांकेर जिला म आज सुरक्षा बल अउ माओवादी मनके बीच होय मुठभेड़ म बस्तर फाइटर्स के एक जवान सहीद होगे। उहें, एक माओवादी घलो मारे गेहे। जिला के वरिष्ठ पुलिस अधीक्षक आई.के. एलेसेला ह घटना के पुष्टि करत हुए बतइन कि छोटेबेठिया थाना क्षेत्र ले डिस्ट्रिक्ट रिजर्व गार्ड याने डीआरजी के टीम ह तलासी अभियान बर निकले रिहीस। इही बीच, हिदूर के जंगल म पहिली ले घात लगाय माओवादी मन ह टीम उपर फायरिंग सुरू कर दीन। सुरक्षा बल ह ए हमला उपर जवाबी कार्रवाई करीन। जेमा बस्तर फाइटर्स के जवान रमेश कुरेठी ह सहीद होगे।
ए मुठभेड़ म एक माओवादी घलो मारे गिस, जेखर शव मिल गेहे। उही ठउर ले एक ठिन एके-सैंतालीस रायफल घलो बरामद होय हे।
आईटीबीपी नया कैम्प
नारायणपुर जिला के अबूझमाड़ म माओवादी मन के गढ़ माने जाने वाले कस्तूरमेटा गांव म भारत-तिब्बत सीमा पुलिस याने आईटीबीपी के तिरपनवां वाहिनी के नवा कैम्प स्थापित करे गेहे। डीआरजी, जिला पुलिस बल अउ आईटीबीपी के सहयोग ले बनाय गे ए नवा कैम्प ले माओवादी मनके खिलाफ स्थायी अभियान चलाय के संगेसंग क्षेत्र के लोगन मन ल सड़क, पूल-पुलिया, बिजली, रासन, आंगनबाड़ी केंद्र, शिक्षा अउ दूसर जरूरी सुविधा उपलब्ध कराय के प्रयास करे जाही।
आईटीबीपी के आईजी संजीव रैना ह बतइन कि कस्तूरमेटा गांव म आईटीबीपी के कैम्प खुले ले ए गंवई के मनखे मन ल माओवादी आतंक ले मुक्ति मिलही, अउ सासन के विकास अउ कल्याणकारी योजना के फायदा ओमन तक पहुंच पाही।
राष्ट्रीय स्वास्थ्य मिशन-समीक्षा
राष्ट्रीय स्वास्थ्य मिसन के संचालक डॉक्टर जगदीश सोनकर ह काली राजधानी रईपुर म अधिकारी मनके समीक्षा बइठका लीन। ए मउका म डॉक्टर सोनकर ह किहीन कि छत्तीसगढ़ म स्वास्थ्य सेवा ल राज्य के आखिरी मनखे बिसेसकर कमजोर जनजाति समूह तक पहुंचाय जाय। ओमन ह जननी सुरक्षा समेत आने-आने योजना के तहत दे जाने वाले प्रोत्साहन रासि के भुगतान जल्दी करे बर किहीन। डॉक्टर सोनकर ह एनएचएम के अंतर्गत होवत भर्ती प्रक्रिया म तेजी लाय के निरदेस दीन अउ अस्पताल मन म निसुल्क चिकित्सा परामर्स, जांच, ईलाज अउ दवई के उपलब्धता उपर बिसेस धियान देबर किहीन।
जीएसटी-छापा
राज्य जीएसटी के टीम ह दुरूग जिला के चंदखुरी म चलत अवैध गुटखा फैक्टरी म छापामार कार्रवाई करे हे। एमा बड़ संख्या म जाने-माने गुटखा कंपनी के रैपर अउ गुटखा के कच्चा माल बरामद करे गेहे। एखर अलावा फैक्टरी म गुटखा बनाय के मिक्चर मसीन घलो मिले हे। ए फैक्टरी ह कोमल फूड्स के नाम ले चलत रिहीस। जीएसटी विभाग ले मिले जानकारी अनुसार इही फैक्टरी के राजनांदगांव स्थित कारखाना ल घलो जांच के घेरा म ले गेहे। उंहा घलो गुटखा बनाय के साक्ष्य मिले हे।
सुनइया मन ल बतादन कि विभाग कोति ले इही हफ्ता म तीन अउ फैक्टरी के जांच करके लगभग आठ करोड़ रूपिया के टेक्स जमा कराय गेहे।
निःशुल्क कोचिंग सहायता योजना
कोरिया जिला म छत्तीसगढ़ भवन अउ आने सन्निर्माण कर्मकार कल्याण मंडल के पंजीकृत हितग्राही मनके लइका मन बर निसुल्क कोचिंग सहायता योजना सुरू करे गेहे। ए योजना म लइका मन के योग्यता अनुसार लोक सेवा आयोग, छत्तीसगढ़ व्यावसायिक परीक्षा मंडल व्यापम, कर्मचारी चयन आयोग, बैंकिंग, रेलवे, पुलिस भर्ती अउ आने-आने प्रतियोगी परीक्षा के तियारी बर चार ले दस महिना तक के निसुल्क कोचिंग सुविधा दे जाही। एखर बर हितग्राही मन ह ऑनलाइन आवेदन कर सकथे।
विश्व वन्यजीव दिवस
आज विश्व वन्यजीव दिवस हवय। जैव विविधता के संरक्षण खातिर जागरूकता फैलाय बर हर बछर तीन मार्च के ए दिवस मनाय जाथे। ए बछर वन्यजीव दिवस के बिसय के-लोगों और ग्रह को जोड़ना-वन्य जीव संरक्षण में डिजिटल नवाचार की खोज।