प्रदेस म तीन ले पांच मार्च तक पल्स पोलियो अभियान चलाए जाही। अभियान के पहिली दिन जघा-जघा बूथ बनाय गेहे तिहां, पोलिया के खुराक दे जाही। दूसर अउ तीसर दिन घर-घर जाके शून्य ले पांच बछर तक के लइका मन ल पोलियो के दवई दे जाही। राज्य टीकाकरण अधिकारी डॉक्टर वी.आर. भगत ह बतइन कि अभियान बर वैक्सीन अउ आने जरूरी जिनिस जिला म देवाय गेहे। प्रदेस म एसो चौदह हजार ले जादा बूथ ले छत्तीस लाख तेरह हजार ले जादा लइका मन ल पोलियो के खुराक दे जाही। अभियान के बेरा रेलवे स्टेसन, बस स्टेसन, मेला के जघा हाट बाजार अउ ईटा भठ्ठा म बिसेस रूप ले धियान दे जाही।
राजिम कुंभ संत समागम
राजिम कुंभ कल्प मेला म काली ले संत समागम सुरू होही। एमा देसभर के आने-आने मठ अउ मंदिर के साधू संत, महा मंडलेश्वर अउ आचार्य सामिल होही। सबो के रेहे के व्यवस्था बर मेला परिसर म कॉर्टेज कुटिया अउ यज्ञ साला बनाय गेहे। संत समागम के दउरान आने-आने संत महात्मा के प्रवचन होही, उहें काली संझा मुख्य मंच ले ‘‘गाथा श्रीराम मंदिर‘‘ प्रस्तुत करे जाही। ए कारीकरम म राम जन्मभूमि मंदिर के जुन्ना इतिहास ल लेके अभी होय प्रभु श्री रामलला के प्राण प्रतिष्ठा तक के कथा के प्रदर्सन सुघ्घर ढंग ले करे जाही। पर्यटन अउ धर्मस्व मंत्री बृजमोहन अग्रवाल ह बतइन कि राजिम कुंभ कल्प मेला म मुख्य मंच ले लाइव म्यूजिकल बैंड संग प्रभू श्री राम मंदिर के गाथा देखाय जाही। ओमन यहू बतइन कि ए कारीकरम ले श्री राम अउ अयोध्या ले जुड़े हरेक घटना के जानकारी होही। संगेसंग राजा विक्रमादित्य अउ मां आहिल्या बाई होल्कर कोति ले मंदिर के जीर्णोध्दार बैरागी साधू मनके संघर्ष, गर्भगृह म रामलला के प्रकट होना, कार सेवक, कोठारी बंधू मनके बलिदान ल लेके अभी बने श्री रामलला के भव्य मंदिर अउ ओखर सुघरई के चित्रण करे जाही।
आगू राजिम कुंभ कल्प मेला म आज जुना अग्नि अउ अखाड़ा के नागा संत सन्यासी मन ह भगवान दत्त्ात्रेय के आह्वान करत अगुवई करीन। पेसवाई नगर के आने-ओन रद्दा ले होत मेला के जघा पहुंचिन, जिहां विधि-विधान ले पूजा-पाठ करके भगवान दत्तात्रेय के प्रतिमा के स्थापना करे गीस। ए दउरान आने-आने अखाड़ा के नागा साधू अउ सन्यासी मन ह अपन पारंपरिक वेसभूषा संग अस्त्र-सस्त्र के प्रदर्सन करीन।
उहें, ऐतिहासिक नगरी रतनपुर म राखेगे सात दिन के माघी पुन्नी आदिवासी विकास मेला आज सिरागे। समापन कारीकरम म उप मुख्यमंत्री अरूण साव सामिल होइन। ए बेरा म ओमन केंद्र अउ राज्य सरकार के आने-आने योजना के जानकारी दीन।
भाजपा-बैठक
भारतीय जनता पार्टी के संयुक्त मोर्चा के बइठका चार मार्च के रईपुर प्रदेस कार्यालय म बिहनिया ग्यारा बजे होही। बइठका म सबो मोर्चा के प्रदेस अध्यक्ष राष्ट्रीय प्रभारी, पदाधिकारी, कार्यसमिति सदस्य अउ जिला अध्यक्ष सामिल होही। भाजपा प्रदेस महामंत्री अउ सबो मोर्चा के प्रभारी भरतलाल वर्मा ह बतइन कि ए दउरान सबो पदाधिकारी ल आने-आने जिम्मेवारी सौंपे जाही।
जिले की चिट्ठी
प्रादेसिक समाचार एकांश आकाशवाणी रईपुर केति ले प्रस्तुत कारीकरम ‘‘जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र एक संघरा रिले करही। ए बखत के अंक म गरियाबंद जिला के गतिविधि के संबंध म जानकारी दे जाही।
मुख्यमंत्री-घोषणा
प्रदेस के किसान मन ल अवइया बारह मार्च के धान के अंतर रासि के भुगतान करे जाही। मुख्यमंत्री विष्णुदेव साय ह आज जशपुर जिला के तामामुंडा म राखे गे कारीकरम म ए घोसना करत बतइन कि ए दिन करीबन तेरह हजार करोड़ रूपिया के भुगतान किसान मन ल करे जाही। ए मउका म मुख्यमंत्री ह पत्थल गांव म लिंक कोर्ट सुरू करे के घोसना करीन। संगेसंग ओमन गिरि गोवर्धन पर्वत के सुविधा जनक रद्दा बनाय बर बत्तीस लाख रूपिया समेत आने-आने विकास काम बर रकम देके ऐलान करीन। ओमन बतइन कि अवईया पंद्रह दिन म राज्य म समर्थन कीमत म तेंदू पत्ता के खरीदी सुरू हो जही। संगेसंग तेंदू पत्ता सकलइया मन बर चरण पादूका अउ उंखर लइका मन बर छात्रवृत्ति योजना सुरू करे जाही।
महतारी वंदन योजना आधार सिडिंग
राज्य के महिला अउ बालविकास विभाग के सचिव सम्मी आबिदी ह महतारी वंदन योजना के लाभार्थी मनके खाता म आधार सिडिंग के काम ल झट किन करे बर किहीन हे। आज ओमन ए संबंध म वीडियो कॉन्फ्रेंसिंग ले बइठका लीन। बइठका म बतइन कि राज्य के सबो बैंक के साखा खाता ल आधार ले जोड़े म मदद करही। आधार सिडिंग के काम ल जल्दी करे खातिर ईतवार अउ आने छुट्टी के दिन म घलो बैंक खुला रइही। ओमन बैंक साखा ल सिविर लगाके बैंक मित्र ल बलाके लाभार्थी मनके खाता ल आधार ले जोड़े बर किहीन। ओमन यहू बतइन कि आधार सिडिंग बर रईपुर, बिलासपुर अउ दुरूग जिला म जल्दीच सिविर लगाय जाही।
न्योता भोज
उप मुख्यमंत्री अरूण साव, स्वास्थ्य मंत्री अउ गौरेला-पेण्ड्रा मरवाही जिला के प्रभारी मंत्री श्याम बिहारी जायसवाल काली पेण्ड्रा म स्कूल पढ़इया लइका मनके न्योता भोज म सामिल होइन। प्रधानमंत्री पोषण सक्ति योजना म स्वामी आत्मानंद उत्कृष्ट अंग्रेजी माध्यम विद्यालय पेण्ड्रा म गौरेला पेण्ड्रा मरवाही जिला प्रशासन कोति ले राखेगे न्योता भोज म ओमन लइका मन ल अपन हाथ ले भोजन परोसिन अउ उंखर संग बइठके भोजन करीन। ए बेरा म उप मुख्यमंत्री ह किहीन कि प्रधानमंत्री नरेंद्र मोदी कोति ले देस भर म न्योता भोज अभियान चलाय जात हे। न्योता भोज म स्वादिष्ट पुष्टई के गरमा-गरम भोजन मिले ले लइका मन मानसिक अउ शारीरिक रूप ले मजबूत होही।
बिलासपुर पुलिस कार्यशाला
आने-आने बेरा म भारतीय कानून म होवइया बदलाव ल देखत आज बिलासपुर पुलिस कोति ले एक कार्यसाला राखे गीस। एमा बेलतरा विधायक सुशांत शुक्ला, बिलासपुर रेंज के पुलिस महा निरीक्षक डॉक्टर संजीव शुक्ला समेत विधि विशेषज्ञ अउ पत्रकार सामिल होइन। पुलिस महा निरीक्षक ह भारतीय समाज के जरूरत अउ भावना के मुताबिक नवा कानून के महत्ता बतइन। ओमन बतइन कि नवा प्रावधान ल बउरे बर प्रसिक्षण कारीकरम अउ तकनीकी सुविधा देवाय जाही।
उहें, बिलासपुर के पुलिस अधीक्षक रजनेश सिंह ह ‘‘नवीन कानून दंड संहिता से न्याय संहिता की ओर‘‘ विषय म प्रस्तुति दीन।
माओवादी भाजपा नेता हत्या
बीजापुर जिला म माओवादी मन ह भाजपा नेता अउ जनपद सदस्य तिरूपति कटला के धारदार हथियार ले हत्या कर दीन। माओवादी मन ह ए हमला ओ बखत करीन जब श्री कटला एक ठिन बिहाव समारोह म सामिल होय के बाद तोयनार लहूटत रिहीन। घटना के सूचना मिलते पुलिस मउका म पहुचिन अउ गंभीर रूप ले घायल तिरूपति कटला ल बीजापुर अस्पताल पहुंचाइन, जिहां चिकित्सक मन ह ओमन ल मृत घोषित कर दीन।
शिक्षक निलंबन कार्रवाई
जशपुर जिला के कोदोपारा के पूर्व माध्यमिक शाला के दू झिन प्रधान पाठक शिक्षक एल.बी. अउ सहायक शिक्षक एल.बी. ल निलंबित कर दे गेहे। ए सबो उपर सराब पीके स्कूल आय अउ शिक्षण काम नइ करे के सिकइत मिले रिहीस। खंड शिक्षा अधिकारी के जांच म सिकइत सही पाय जाय के बादे उंखर खिलाफ निलंबन के कार्रवाई करे गेहे।
कांग्रेस प्रदर्सन
महंगाई के मुद्दा ल लेके प्रदेस कांग्रेस कमेटी ह आज सबो जिला म विरोध प्रदर्सन करीन। पार्टी के प्रदेस अध्यक्ष अउ सांसद दीपक बैज ह राजधानी रईपुर के शास्त्री बाजार म आम लोगन अउ सब्जी बेचइया मन संग मिलके महंगाई उपर गोठबात करीन। ओमन आरोप लगइन कि बाढ़त महंगाई ले लोगन के बजट बिगड़ गेहे। श्री बैज ह किहीन कि महंगाई के खिलाफ कांग्रेस के लड़ाई चलत रइही। आज के ए आंदोलन चरणबध्द तरीका ले आगू बढ़ही।