छत्तीसगढ़ माध्यमिक शिक्षा मंडल कोति ले होवइया बोर्ड परीक्षा आज ले सुरू हो गेहे। आज कक्षा बारहवीं के हिन्दी बिषय के पेपर रिहीस। काली ले कक्षा दसवीं के परीक्षा सुरू होही। ए सबो परीक्षा बिहनिया नौ बजे ले सवा बारह बजे तक आयोजित करे जात हे। छत्तीसगढ़ माध्यमिक शिक्षा मंडल के सचिव वी.के. गोयल ह बतइन कि एसो बोर्ड परीक्षा बर दू हजार चार सौ पचहत्तर केंद्र बनाय गेहे। एमा एक सौ अस्सी संवेदनसील परीक्षा केंद्र हवय। ओमन बतइन कि कक्षा बारहवीं म करीबन दू लाख इकसठ हजार अउ कक्षा दसवीं म करीबन तीन लाख पैंतालीस हजार परीक्षार्थी सामिल होवत हे।
इही बीच, मुख्यमंत्री विष्णुदेव साय ह कक्षा दसवीं अउ बारहवीं बोर्ड के परीक्षा म सामिल होवत विद्यार्थी मन ल अपन सुभकामना देत किहीन कि सबो लइका डर अउ तनाव मुक्त होके परीक्षा म सामिल होवय अउ अपन बने प्रदर्सन करय। परीक्षा जिनगी के सफलता के आखिरी पड़ाव नो हे, पढ़ई जिनगी म आगू बढ़े के रद्दा देखाथे।
ईडी-छापा
छत्तीसगढ़ के कतकोन जघा म आज प्रवर्तन निदेसालय-ईडी के टीम ह छापामार कार्रवाई करीन। ईडी के टीम ह कोरबा, बिलासपुर, जांजगीर, सूरजपुर, बलरामपुर, बैकुंठपुर, बालोद अउ जशपुर के कुछेक नेता अउ अधिकारी मनके ठिकाना म दबिस दीन। बताय जात हे कि खनिज संस्थान न्यास-डीएमएफ के रकम म गड़बड़ी ल लेके ए कार्रवाई करे जात हे। आज बालोद जिला के दौण्डी म पूर्व मंत्री अनिला भेड़िया के प्रतिनिधि पीयूष सोनी के घर ईडी के टीम ह छापा मारिस। उहें, जशपुर जिला के मनोरा जनपद सीईओ के सरकारी अउ निजी निवास म घलो ईडी ह दबिस दीन। अइसने कोरबा अउ कोरिया म ईडी टीम ह छापामार कार्रवाई करीस। बैकुंठपुर म ईडी के टीम ह जनपद सीईओ राधेश्याम मिर्झा के घर छापा मारिन। एखर संग ईडी ह सरगुजा संभाग के अंबिकापुर म ठेकेदार अशोक अग्रवाल के ठिकाना म छापा मारिन।
सूर्य घर मुफ्त बिजली योजना-सर्वे
केंद्र सरकार के प्रधानमंत्री सूर्य घर मुफ्त बिजली योजना म घर म सोलर पैनल लगाय बर सर्वे करे जात हे। सर्वे के काम भारतीय डाक विभाग कोति ले आठ मार्च तक करे जाही। नागरिक मन कोति ले जानकारी अउ मंजूरी दे के बाद उंहा के डाकिया ह प्रधानमंत्री सूर्य घर योजना बर तय मोबाइल ऐप म या वेबसाइट म जानकारी ल दे जाही। जानकारी होय के बाद सरकार कोति ले तय करे गे वेंडर घर म जाके सोलर पैनल लगाही।
भारतीय डाक विभाग कोति ले सर्वे के काम मुफत म करे जात हे। खबर के मुताबिक ए योजना म एक किलो वाट क्षमता के सोलर पैनल लगवाय बर पचास हजार रूपिया के लागत आही, जेमा तीस हजार रूपिया के छूट दे जाही। अइसने आने-आने क्षमता के सोलर पैनल बर सरकार कोति ले छूट मिलही। योजना म तीन सौ यूनिट तक के बिजली मुफत म मिलही।
अरूण साव-जल जीवन मिशन
उप मुख्यमंत्री अउ लोक स्वास्थ्य यांत्रिकी मंत्री अरूण साव ह आज विभागीय अधिकारी मनके बइठका लेके राज्य म जल-जीवन मिसन के काम जल्दी पूरा करे के निरदेस दीन। ओमन आज रायपुर म राखेगे बइठका म अधिकारी मन ल काम के निर्मित निगरानी राखे अउ ओला जल्दी पूरा कराय बर किहीन। श्री साव ह गर्मी म सबो जिला म पिये के पानी के व्यवस्था तय करे के निरदेस दीन। ओमन पिये के पानी आपूर्ति खातिर हैण्डपंप अउ नल-जल योजना म खराबी आय म तुरते मरम्मत अउ रखरखाव के बने व्यवस्था करे बर किहीन।
राजिम कुंभ कल्प
राजिम कुंभ कल्प मेला म तीन मार्च के एक संगीतमय बिसेस कारीकरम ‘‘गाथा श्रीराम मंदिर‘‘ प्रस्तुत करे जाही। एमा अयोध्या के श्री राम जन्मभूमि म मंदिर के पांच सौ साल के इतिहास ल लेके उंहा प्रभु श्री रामलला के प्राण प्रतिष्ठा तक के कथा के प्रदर्सन करे जाही। पर्यटन अउ धर्मस्व मंत्री बृजमोहन अग्रवाल ह बतइन कि राजिम कुंभ कल्प म मुख्य मंच ले लाइव म्यूजिकल बैंड संग प्रभू श्री राम मंदिर के गाथा देखाय जाही। ओमन बतइन कि ए कारीकरम ले श्री राम अउ अयोध्या ले जुड़े हरेक घटना के जानकारी होही। संगेसंग राजा विक्रमादित्य अउ मां आहिल्या बाई होल्कर कोति ले मंदिर के जीर्णोध्दार बैरागी साधू मनके संघर्ष, गर्भगृह म रामलला के प्रकट होना, कार सेवक, कोठारी बंधू मनके बलिदान ल लेके अभी बने भव्य मंदिर अउ ओखर सुघरई के चित्रण करे जाही।
एफपीओ-मेला
वित्त मंत्री ओपी चौधरी ह इंदिरागांधी कृषि विश्वविद्यालय म नाबार्ड कोति ले राखे गे तीन दिवसीय एफपीओ मेला के सुभारंभ करीन। ए मेला म प्रदेस भर के किसान अपन उत्पाद ल बेचे अउ विपणन ले जुड़े जानकारी ले सकही। संगेसंग नवा तकनीक के जानकारी घलो मिलही। एफपीओ मेला म राज्य भर के छियालिस एफपीओ अपन उत्पाद संग भाग लेवत हे।
कारीकरम म बोलत वित्त मंत्री ओपी चौधरी ह किहीन कि प्रधानमंत्री नरेंद्र मोदी ह बछर दू हजार सैंतालीस तक भारत ल विकसित राज्य बनाय के बात केहे हे, ए तभे हो सकत हे, जब छत्तीसगढ़ घलो विकाससील ले विकसित बनही। श्री चौधरी ह किहीन कि युवा कृषि के पढ़ई करत हे। एमन ल अवइया बेरा म नवा-नवा तकनीक ले जोड़के काम करना चाही, जेखर ले राज्य अउ देस के अर्थव्यवस्था बने होय के संगेसंग रोजगार के नवा मउका घलो मिलही। ओमन किहीन कि वैज्ञानिक मन ल अपन किसानी ले जुड़े ज्ञान ल खेत अउ किसान मन तक पहुंचाना चाही जेखर ले कृषि ल व्यवसायिक रूप दे म आसानी होही अउ किसान मन ल जादा ले जादा फायदा मिलही।
खबर के मुताबिक एफपीओ माने किसान उत्पादक संगठन छोटे जोत म आधारित कृषि ल एक व्यवहारिक कृषि व्यवसाय म बदले अउ बिसेस रूप ले छोटे अउ सीमांत किसान मनके आमदनी बढ़ाय बर ए परभावी हवय।
निर्वाचन आयोग प्रशिक्षण
अतिरिक्त मुख्य निर्वाचन पदाधिकारी निलेश कुमार महादेव क्षीरसागर ह किहीन हे कि हरेक स्तर के अधिकारी आचार संहिता के सबो पहलू ल जानय, तभे नियम के पालन हो सकही। ए बात श्री क्षीरसागर ह काली लोकसभा चुनाव के तियारी ल लेके आदर्स आचरण संहिता मीडिया प्रमाणन निगरानी अउ व्यय निगरानी समिति के जिला स्तरीय नोडल अधिकारी अउ मास्टर ट्रेनर्स के एक दिवसीय प्रसिक्षण म बोलत ए बात किहीन। ओमन बतइन कि निर्वाचन के बेरा आदर्स आचरण संहिता के पालन कराय म निर्वाचन क्षेत्र के अधिकारी मन के मुख्य भूमिका होथे। उप मुख्य निर्वाचन पदाधिकारी यू. एस. अग्रवाल ह बतइन कि भारत निर्वाचन आयोग कोति ले निर्वाचन के घोसना होते आदर्स आचरण संहिता लागू हो जथे। आचार संहिता के उल्लंघन करे म तुरते कार्रवाई करना प्रशासनिक अधिकारी के जिम्मेवारी हवय।
बातों-बातों-में
पल्स पोलियो अभियान
प्रदेस म तीन ले पांच मार्च तक पल्स पोलियो अभियान चलाए जाही। अभियान के पहिली दिन तीन तारीख के बूथ मन म, दूसर अउ तीसर दिन घर-घर जाके शून्य ले पांच बछर तक के लइका मन ला पोलियो के दवई पियाए जाही।
अउ अब जानन मौसम के हाल…
प्रदेस म अवइया चौबीस घंटा के दउरान एक-दू जघा म गरज-चमक संग गॉज गिरे अउ करा के संग अंधड़ चले के संभावना हवय। उहें, उत्तरी छत्तीसगढ़ के एक-दू जघा म छूटपुट बरसा हो सकत हे। मौसम विभाग ले मिले जानकारी के मुताबिक एक चक्रीय चक्रवातीय घेरा उत्तर पश्चिमी अफगानिस्तान अउ ओखर तीर-तखार म बने हे। उहें, एक द्रोणिका उत्तर पश्चिमी अरब सागर के उपर स्थित हे। जेखर परभाव ले काली दू मार्च के प्रदेस के एक-दू जघा म गरज-चमक संग छींटा बउछार होय के संभावना हे।