मुख्यमंत्री विष्णु देव साय ह कर्वधा के साधराम हत्याकांड के एनआईए जांच कराय के घोसना करे हे। श्री साय ह किहीन कि कि कर्वधा म होय हत्याकांड के जतका भी निंदा करे जाय ओ कम हे, ओमन मृतक साधराम के परिजन ले भेंट के दउरान ओमन ल ए बात के भरोसा दिलईन कि ए घटना के उच्च स्तरीय जांच कराय जाही। श्री साय ह किहीन कि मृतक के परिजन ल समुचित न्याय दिलाए के उद्देश्य ले राज्य सरकार ह ए घटना के जांच एनआईए ले कराय के फइसला करे हे, ताकि ए घटना के दोषी मन ल कड़ा ले कड़ा सजा मिल सके।
शिक्षक मूल पदस्थापना
प्रदेस के आने-आने ऑफिस म गैर शैक्षणिक कार्य म संलग्न सिक्षक मन ल उंखर मूल पदस्थापना वाले स्कूल म भेजे बर तुरते कार्यमुक्त करे जाय के निरदेस जारी कर दे गेहे। स्कूल शिक्षा मंत्री बृजमोहन अग्रवाल ह जिला प्रशासन अउ जिला शिक्षा अधिकारी मन ले किहीन कि अपन क्षेत्र के सिक्षक मनके संलग्नीकरण समाप्त करे के प्रमाण पत्र लोक सिक्षण संचालक के कार्यालय म सात दिन के भीतर जरूरी रूप ले जमा करे जाय।
भाजपा बैठक
अवइया लोकसभा चुनाव ल देखत छत्तीसगढ़ म भाजपा ह अपन तैयारी तेज कर देहे। इही कड़ी म काली रईपुर स्थित प्रदेस भाजपा कार्यालय म पार्टी के आने-आने मोर्चा अउ प्रकोष्ठ समेत आने-आने इकाई के पदाधिकारी मनके बइठका होइस। बइठका म पार्टी के प्रदेस सह-प्रभारी नितिन नबीन ह आने-आने लोकसभा क्षेत्र बर बूथ कमेटी, मंडल अउ शक्ति केन्द्र के पदाधिकारी मन ल उंख दायित्व के बारे म बतईन। बइठका म मुख्यमंत्री विष्णुदेव साय, पार्टी के प्रदेस अध्यक्ष किरण सिंह देव के संगेसंग उप मुख्यमंत्री अरूण साव अउ विजय शर्मा समेत जम्मों मोर्चा अउ प्रकोष्ठ के पदाधिकारी सामिल होइन।
भाजपा-संकल्प सुझाव अभियान
देसभर के करीबन पांच सौ लोकसभा क्षेत्र मन म आम लोगन मन ले सीधा संपर्क करे बर भारतीय जनता पार्टी ह विकसित भारत संकल्प सुझाव अभियान सुरू करे हे। छत्तीसगढ़ म घलो काली ले ए अभियान सुरू हो गेहे। मुख्यमंत्री विष्णु देव साय ह प्रदेस भाजपा कार्यालय ले पार्टी के प्रचार वाहन ल झंडा दिखाके ए अभियान के सुरूआत करीन। ए मउका म पार्टी के प्रदेस सह प्रभारी नितिन नबीन अउ प्रदेस भाजपा अध्यक्ष किरण सिंह देव के संगेसंग उपमुख्यमंत्री अरूव साव अउ विजय शर्मा समेत पार्टी के आने-आने पदाधिकारी अउ कार्यकर्ता उपस्थित रिहीन। ए मउका म मुख्यमंत्री ह कार्यकर्ता मन ले किहीन कि प्रधानमंत्री नरेन्द्र मोदी ह बछर दू हजार सैंतालीस तक भारत ल विकसित राष्ट्र बनाय के लक्ष्य राखे हे। ओमन किहीन कि प्रधानमंत्री श्री मोदी के अगुवई म पाछु दू आम चुनाव म भाजपा ल स्पष्ठ बहुमत मिले रिहीस। अउ तीसर बखत घलो भाजपा के सरकार बनाय बर कार्यकर्ता मन ल एकजूट होके कोसिस करना हे। श्री साय ह किहीन कि भाजपा, सबका साथ सबका विकास, सबका विश्वास अउ सबका प्रयास-ए ध्येय के संग काम करत हे।
ए मउका म प्रदेस के भाजपा अध्यक्ष किरण सिंह देव ह पत्रकारवार्ता म किहीन कि पाछु छब्बीस फरवरी के भाजपा के राष्ट्रीय अध्यक्ष जगत प्रकाश नड्डा ह ये देसव्यापी अभियान के सुरूआत करे रिहीन। एखर तहत एक करोड़ ले जादा लोगन मनके के सुझाव एकथ्था करे के लक्ष्य राखे गेहे। अभियान के अंतर्गत आठ ले दस मार्च तक घर-घर जनसंपर्क कारीकरम चलाय जाही। ए दउरान मतदाता मनके घर जाके पार्टी कार्यकर्ता उंखर मन से सुझाव मांगही। ओमन किहीन कि दउरान देस के जनता ले मिलने वाला सुझाव के आधार म लोकसभा चुनाव बर पार्टी के संकल्प पत्र तियार करे जाही। किरण सिंह देव ह बतइन कि डिजिटल माध्यम ले घलो लोगन मन ले सुझाव ले जाही। एखर बर नमो एप्प के अउ सोशल मीडिया के आने-आने मच के संगेच मिस कॉल के जरिया घलो आम लोगन ले सुझाव आमंत्रित करे जाही। ए अभियाल पंद्रह मार्च तक चलही।
भाजपा किसान मोर्चा-बैठक
भारतीय जनता पार्टी किसान मोर्चा के राष्ट्रीय कार्यसमिति के बइठका अवइया आठ मार्च के प्रदेस भाजपा कार्यालय म होही। एखर दूसर दिन राजधानी के साईंस कॉलेज मैदान म किसान महासम्मेलन के आयोजन करे जाही। किसान मोर्चा के प्रदेस अध्यक्ष तोखन साहू ह बतईन कि ए सम्मेलन म मोर्चा के राष्ट्रीय अध्यक्ष राजकुमार चाहर के संगेसंग जम्मों राष्ट्रीय पदाधिकारी सामिल होही।
श्रम मंत्री-पेंशन योजना
श्रम मंत्री लखनलाल देवांगन ह आज छत्तीसगढ़ भवन अउ अन्य सन्निर्माण कर्मकार कल्याण मंडल के अध्यक्ष के पदभार ग्रहण करीन। एखर बाद ओमन श्रमिक मनके सुघ्घर जीवनयापन बर पेंशन योजना के सुरूवात करीन। एखर तहत पात्र निर्माण श्रमिक मन ल पेंसन के रासि सीधा उंखर खाता म जमा कराय के पहल करे गेहे। मंडल डहार ले चलत ‘‘ मुख्यमंत्री निर्माण श्रमिक पेंसन सहायता योजना‘‘ के तहत साठ बछर के उमर पूरा करइया श्रमिक मन ल जीवन पर्यन्त डेढ़ हजार रूपिया हर महीना पेंसन दे जाही। पेंसनधारी श्रमिक के मउत होय के स्थिति म उंखर आश्रित ल साढ़े सात सौ रूपिया के मासिक पेसन दे जाय के प्रावधान हे।
अइसने, निर्माण श्रमिक मनके लइका मन बर ‘‘मुख्यमंत्री निःशुल्क कोचिंग सहायता योजना‘‘ घलो चलाय जात हे। एखर तहत पंजीकृत श्रमिक अउ उंखर आश्रित के लइका मन ल व्यापमं, पीएससी, रेलवे अउ एसएससी समेत आने-आने प्रतियोगी परीक्षा के तैयारी बर निःशुल्क कोचिंग के सुविधा दे जाथे।
राजिम कुंभ-संत समागम
राजिम कुंभ कल्प मेला म अवइया तीन मार्च के संत समागम सुरू होही। प्रदेस के धर्मस्व अउ धार्मिक न्याय मंत्री बृजमोहन अग्रवाल ह संत-समागम के व्यापक तैयारी के निरदेस दीन हे। एमा देस के आने-आने मठ अउ मंदिर मनके साधु-संत, महामंडलेश्वर अउ आचार्य सामिल होही।
उहें, राजिम कुंभ कल्प मेला म काली जैविक कृषि सम्मेलन के आयोजन करे गीस। एमा कृषि वैज्ञानिक मन ह कम लागत म जादा उत्पादन ले बर किसान मन ले जैविक खेती ल अपनाय के अनुरोध करीन।
लोक अदालत
प्रदेस म अवइया नौ मार्च के राष्ट्रीय लोक अदालत के आयोजन करे जाही। एखर तियारी के संबंध म छत्तीसगढ़ उच्च न्यायालय के मुख्य न्यायधिश रमेश सिन्हा ह वीडियो कांफ्रेंस के माध्यम के जरिया सबो जिला विधिक सेवा प्राधिकरण के अध्यक्ष अउ जिला न्यायाधीश मन के बइठका लीन। ओमन किहीन कि राष्ट्रीय लोक अदालत म जादा ले जादा लंबित प्रकरण मन के मउका म ही समाधान करे जाय।
अरूण कुमार शर्मा-निधन
देस के जाने-माने पुरातत्वविद अउ पद्मश्री ले सम्मानित डॉक्टर अरूण कुमार शर्मा के काली रतिहा निधन होगे। ओमन नब्बे बछर के रिहीन। मुख्यमंत्री विष्णुदेव साय ह डॉक्टर शर्मा के निधन म दुख प्रकट करे हे। अपन सोक संदेस म श्री साय ह किहीन कि अरूण कुमार शर्मा ह छत्तीसगढ़ सहित देस के आने-आने जघा म पुरातात्विक सर्वेक्षण अउ उत्खनन के माध्यम ले कतकोन ऐतिहासिक तथ्य मनके उजागर करीन। छत्तीसगढ़ म सिरपुर अउ राजिम म होय उत्खनन म घलो उंखर सुघ्घर योगदान रिहीस।
मुख्यमंत्री-बच्चे मुलाकात
मुख्यमंत्री विष्णुदेव साय ह सुकमा जिला के कोंटा क्षेत्र के सुदूर अंचल के स्कूली लइका मन ल रईपुर म भेंट के दउरान सोलर होमलाइट उपहार म दीन। एमा दू सौ वाट के एक सोलर पैनल लगाय गेहे। एमा लगाय गे बैटरी ले एलईडी लाइट, पंखा डीटीएच अउ मोबाइल चार्जर के इस्तेमाल करे जा सकथे। मुख्यमंत्री ह किहीन कि बस्तर के पूरा विकास करना राज्य सरकार के प्राथमिकता म सामिल हे। श्री साय ह किहीन कि बस्तर के विकास बर ‘‘नियद नेल्ला नार‘‘ यानि ‘‘आपका अच्छा गांव‘‘ योजना करे गेहे।
शाला प्रबंधन तथा विकास समिति
राज्य सरकार ह प्रदेस के सबो हायर सेकेंडरी अउ हाईस्कूल म शाला प्रबंधन अउ विकास समिति के नवा सिरा ले गठन करे के निरदेस जारी करे हे। स्कूल शिक्षा मंत्री बृजमोहन अग्रवाल ह विभागीय अधिकारी मन ले किहीन कि आने-आने जिला के प्रभारी मंत्री मनले अध्यक्ष मनोनीत कराय के बाद उंखर डहार ले अनुमोदित नाम के आधार म शाला प्रबंधन अउ विकास समिति के गठन के प्रक्रिया सुनिश्चित करे जाय।