छत्तीसगढ़ विधानसभा के बजट सत्र ह आज अपन निर्धारित बेरा ले दू दिन पहिली ही खतम होगे। ए सत्र ह पांच फरवरी ले सुरू होय रिहीस, जेखर समापन एक मार्च के होना रिहीन। सत्र के बेरा म नौ फरवरी के मुख्यमंत्री विष्णुदेव साय सरकार के पहिली बजट वित्तमंत्री ओ.पी. चौधरी ह पेस करे रिहीन।
पीएससी-सुधार आयोग
छत्तीसगढ़ लोक सेवा आयोग-सीजीपीएससी के परीक्षा प्रक्रिया ल अउ अच्छा बनाय जाही। एखर बर राज्य सरकार ह सुधार आयोग के गठन करही। ए घोसना वित्तमंत्री ओ.पी. चौधरी ह आज विधानसभा म विनियोग विधेयक म चर्चा के जवाब देवत हुए करीन हे। श्री चौधरी ह कहिन हे कि छत्तीगसढ़ के युवा मनके खास ध्यान राखे जाही, ताकि ओमन ल यूपीएससी के तैयारी म फायदा मिल सकय। ओमन ह कहिन हे कि सीजीपीएससी म छत्तीसगढ़ी भाखा अउ संस्कृति उपर आधारित प्रश्न-पत्र ल सामिल करे जाही।
पीएससी परीक्षा-एफ.आई.आर.
छत्तीसगढ़ लोक सेवा आयोग-सीजी पीएससी के भर्ती परीक्षा म कथित गड़बड़ी और भ्रष्टाचार के आरोप म तत्कालीन चेयरमेन टामन सिंह सोनवानी, सचिव, परीक्षा नियंत्रक समेत अधिकारी अउ नेता मनके खिलाफ बालोद के अर्जुंदा थाना म मामला दरज करे गेहे। ए सबो आरोपी मनके खिलाफ पीएससी दू हजार इक्कीस म सामिल बालोद जिला के एक झिन अभ्यर्थी ह मामला दर्ज कराय रिहीस। एखर ले पहिली, एमा ईओडब्ल्यू ह घलो मामला दरज कर चुके हे। संगेसंग सरकार ह एखर जांच ल सीबीआई ले कराय के बात केहे हे।
मुख्यमंत्री सुरक्षा चूक-कर्मचारी निलंबित
मुख्यमंत्री विष्णुदेव साय के सुरक्षा म बड़े लापरवाही आगू हे। जानबा के अनुसार एक झिन मनखे ह बंदूक लेके मुख्यमंत्री के बंगला पहुंना म पहुंच गे रिहीस। फेर कुछु सुरक्षा कर्मी मन ह ओला देख डरीन अउ ओला मुख्यमंत्री के कमरा के बाहिर रोक के हिरासत म ले लीस। ए मउका म मुख्यमंत्री के सुरक्षा ले जुड़े आठ झिन अधिकारी अउ जवान मन ल निलंबित कर दे गेहे। संगेसंग घटना के जांच के आदेस दे गेहे।
विजय शर्मा-जनसमस्या
उप मुख्यमंत्री विजय शर्मा ह आज रायपुर के प्रदेस भाजपा कार्यालय म आम मनखे अउ कार्यकर्ता मन ले भेंट करीन। ए बेरा म ओमन ह लोगन मनके परेसानी ल सुनीन अउ ओला ठीक करे बर जरूरी निरदेस दीन। श्री शर्मा ह लगभग साढ़े छह सौ मामला के समीक्षा करीन, जेमा पेंसन, अनुकंपा नियुक्ति अउ स्थानांतरण जइसे प्रकरण सामिल रिहीन। ओमन ह करीबन चौंतीस ठिन मामला के मउका म ही निराकरण करीन।
लोक निर्माण विभाग-कार्रवाई
लोक निर्माण विभाग ह कोरबा जिला के चोटिया-चिरमिरी रद्दा बनाय के काम ल सही तरीका ले नइ करे के आरोप म ठेकेदार ल निलंबित कर देहे। संगेसंग दू बछर पर ओखर पंजीयन ल निरस्त कर देहे। लोक निर्माण विभाग के बिलासपुर परिक्षेत्र के मुख्य अभियंता कोति ले होय जांच म रद्दा निर्माण के काम म लापरवाही पाय गे रिहीस, जेमा दू अधिकारी मन ल पहिली ही निलंबित करे जा चुके हे। उहें, दू झिन आने अधिकारी मन ल कारण बताओ नोटिस दे गेहे।
एनटीए-परीक्षा
राष्ट्रीय परीक्षण एजेंसी-एनटीए पूरा देस अउ देस के बाहिर चौबीस ठिन सहर म ग्यारह ले अट्ठाईस मार्च तक कम्प्यूटर आधारित मोड म संयुक्त विश्वविद्यालय प्रवेश परीक्षा सीयूईटी पीजी परीक्षा आयोजित करही। एनटीए ह एक सौ संतावन विषय के परीक्षा ल आयोजित करे के कार्यक्रम जारी कर देहे। ए दरी ए परीक्षा तीन पाली म कराय जात हे।
अग्निवीर भर्ती रैली-परिणाम
भारतीय सेना ह अग्निवीर पुरूष भर्ती परीक्षा के परिणाम जारी कर देहे। छत्तीसगढ़ ले आठ सौ सत्तर झिन उम्मीदवार मन ल एमा सफलता मिले हे, जेमा अग्निवीर जीडी, तकनीकी अउ ट्रेडमैन के पद सामिल हे। अग्निवीर क्लर्क पद के परिणाम घलो जल्दी बताय जाही। ए परिणाम ल भारतीय सेना के वेबसाइट म घलो देखे जा सकत हे। चुने हुए सबो उम्मीदवार मन ल पांच मार्च के बिहनिया साढ़े सात बजे नवा रायपुर के भारतीय सेना के भर्ती कार्यालय म आय बर केहे हे। ए सबो उम्मीदवार मनके प्रसिक्षण एक मई ले आने-आने केन्द्र म सुरू होही। सेना भर्ती कार्यालय ले मिले जानबा के अनुसार जांजगीर-चांपा जिला म पाछु बछर दिसंबर महीना म होय ए भर्ती परीक्षा पांच हजार पांच सौ बत्तीस झिन प्रतिभागी मन ह हिस्सा ले रिहीन।
इही बीच, भारतीय सेना म अग्निवीर बर आवेदन के प्रक्रिया सुरू होगे हे। इच्छुक उम्मीदवार मन ह बाईस मार्च तक ऑनलाइन आवेदन कर सकत हे।
भाजपा-बैठक
लोकसभा चुनई के तैयारी ल लेके आज रईपुर म भारतीय जनता पार्टी के कतकोन बइठका होइस। प्रदेस कार्यालय म होय मोर्चा, कलस्टर, लोकसभा प्रभारी, लोकसभा संयोजक अउ सह-संयोजक मनके बइठका म प्रदेस सह-प्रभारी नितिन नबीन ह चुनई ल देखत हुए अभी तक काम के समीक्षा करत पदाधिकारी मन ल जरूरी निरदेस दीन। बइठका म प्रदेस भाजपा अध्यक्ष किरण सिंह देव, प्रदेस संगठन महामंत्री पवन साय समेत आने पदाधिकारी मौजूद रिहीन। ए बइठका म चुनई रणनीति के मार्गदर्शन बिन्दु उपर चर्चा होइस। जेखर बाद पार्टी के मंडल, शक्ति केन्द्र अउ बूथ कमेटी के पदाधिकारी अउ कार्यकर्ता मन ल जिम्मेदारी दे जाही।
आज संझा प्रदेस चुनई समिति के जरूरी बइठका प्रदेस सह-प्रभारी नितिन नबीन के उपस्थिति म सुरू होइस।
जाबना के अनुसार भाजपा ह लोकसभा चुनई ल लेके चुनाव प्रबंधन समिति बनाय हे। एखर कमान पार्टी के वरिष्ठ नेता शिवरतन शर्मा दे गेहे। ए समिति म भूपेन्द्र सवन्नी, सरला कोसरिया अउ सौरभ सिंह ल घलो सामिल करे गेहे।
राष्ट्रीय सम्मेलन
राष्ट्रीय जैविक स्ट्रैस प्रबंधन संस्थान अउ एमिटी यूनिवर्सिटी ह मिलके आज ले रईपुर म दू दिन के राष्ट्रीय सम्मेलन सुरू करे हे। एमा दू सौ ले जादा प्रतिष्ठित वैज्ञानिक, निवेसक अउ पढ़ईया लइका मन सामिल होवत हे। उद्घाटन सत्र ल कृषि वैज्ञानिक भर्ती बोर्ड के पूर्व अध्यक्ष डॉक्टर एस. अय्यपन ह संबोधित करीन।
भारत विकास डायरी
आकाशवाणी केंद्र रायपुर के प्रादेशिक समाचार एकांश डहार ले ‘‘भारत विकास डायरी‘‘ कारीकरम म आज राजनांदगांव संसदीय क्षेत्र के बारे म जानबा दे जाही। ए कड़ी के प्रसारण रतिहा आठ बजे ले करे जाही, जेला छत्तीसगढ़ स्थित आकाशवाणी के जम्मों केंद्र मन ह एके संघरा प्रसारित करही। ए कारीकरम ल मीडियम वेव अउ एफएम दूनों चैनल म सुने जा सकत हे।
अउ अब थोरकुन समाचार सार म –
– देशभर म आज राष्ट्रीय विज्ञान दिवस मनाय जावत हे। एसो के विज्ञान दिवस के बिसय हरय- ‘‘विकसित भारत के लिए स्वदेशी तकनीक‘‘।
– कैबिनेट मंत्री बृजमोहन अग्रवाल के मां पिस्ता देवी अग्रवाल के अंतिम संस्कार आज रायपुर म होइस। उंखर निधन म राज्यपाल विश्वभूषण हरिचंदन, विधानसभा अध्यक्ष डॉक्टर रमन सिंह अउ मुख्यमंत्री विष्णुदेव साय ह ओमन ल श्रद्धांजलि दीन।
अउ
– मुख्यमंत्री विष्णुदेव साय ले आज विधानसभा परिसर म सॉफ्ट बॉल खिलाड़ी साकेत बंजारे अउ चंद्रहास यादव ह भेंट करीन। साकेत ह पटना बिहार म आयोजित यूनियर सॉफ्ट बॉल प्रतियोगिता के बालक वर्ग म छत्तीसगढ़ के प्रतिनिधितत्व करे रिहीन, जेमा छत्तीसगढ़ के टीम ह उप विजेता रिहीस।