प्रदेस म अब स्कूल म पढ़ईया लइका मन बर बोर्ड परीक्षा ल साल म दू घांव करे जाही। राज्य सरकार ह एक शैक्षणिक सत्र म दू घांव परीक्षा लेके फैसला लेहे। छत्तीसगढ़ माध्यमिक शिक्षा मंडल डहार ले पहिली परीक्षा ल मार्च महिना म अउ दूसरइया परीक्षा ल जून-जुलाई महिना म ले जाही। ए संबंध म स्कूल शिक्षा विभाग डहार ले आदेस जारी कर दे गेहे। जारी आदेस के मुताबिक दूसरइया परीक्षा म पूरक अउ जम्मों बिसय मन म फैल होवइया छात्र मन ह सामिल हो सकही। दूनों ठन परीक्षा म पास होवइया छात्र मन के प्राप्तांक के आधार म परीक्षा परिणाम तैयार करे जाही। पहिली परीक्षा म पंजीकृत विद्यार्थी मन ह दूसरइया परीक्षा म सामिल होय के पात्र होही। फेर एमा विषय ल परिवर्तन नइ करे जाय सकय। पहिली परीक्षा के बाद दूसरइया परीक्षा म सामिल होय बर विद्यार्थी मन ल फिर से आवेदन करे बर पड़ही।
निर्वाचन आयोग-निर्देश
निर्वाचन आयोग ह सूचना अउ प्रसारण मंत्रालय ल अवइया लोकसभा चुनई बर मतदाता मन ल जागरूक करे के निरदेस दीन हे। निर्वाचन आयोग डहार ले मंत्रालय ल केहे गेहे कि देस भर म फिलिम मन ल देखाय के पहिली हरेक फिलिम के थोरकून अंतराल म जम्मों सिनेमा मालिक मन ल निरदेस देवय कि मतदाता जागरूकता फिलिम ‘‘मेरा मत-मेरा कर्तव्य‘‘ दिखाय जाय। आयोग ह यहू किहीन कि मतदाता जागरूकता के सीएफसी प्रमाणित फिलिम हिंदी अउ अंग्रेजी के संगेसंग प्रादेसिक भाषा मन म राज्य अउ केंद्रशासित प्रदेस मनके मुख्य निर्वाचन अधिकारी ह उपलब्ध कराही।
अनुराग सिंह-मतदाता अपील
सूचना अउ प्रसारण मंत्री अनुराग सिंह ठाकुर ह हरेक नागरिक मन ले ‘‘मेरा पहला वोट देस के लिए‘‘ अभियान ले जुड़े अउ युवा मतदाता मन ले अवइया लोकसभा चुनई म अपन लोकतांत्रिक अधिकार के प्रयोग करे के आग्रह करीन। एक ठन सोसल मीडिया म पोस्ट होय म प्रधानमंत्री नरेंद्र मोदी के आह्वान के बात करत श्री ठाकुर ह अभियान म गीत साझा करीन अउ हरेक मनखे ल अपन-अपन अनुसार ए अभियान म आगू आय के अनुरोध करीन।
मीसाबंदी-सम्माननिधि
राज्य म मीसाबंदी मनके सम्मान निधि ल फिर से सुरू करे जाही। एखर घोसना मुख्यमंत्री विष्णुदेव साय ह करीन। छत्तीसगढ़ विधानसभा म काली मुख्यमंत्री ले संबध्द विभाग मनके आठ हजार चार सौ इक्काईस करोड़ ले जादा के अनुदान मांग उपर चर्चा करे के बाद ध्वनिमत ले पारित कर दे गीस। अनुदान मांग उपर होय चर्चा के जुवाब देबत मुख्यमंत्री ह किहीन कि मोदी के गांरटी म देस के जम्मों लोगन मन ल भरोसा हे। ओमन जउन वादा करे हे, ओला पूरा घलो करे हे। ए मउका म मुख्यमंत्री विष्णुदेव साय ह किहीन कि दुरूग संभाग म एन्टीकरप्सन ब्यूरो के क्षेत्रीय कार्यालय खोले जाही।
राजभवन-स्थापना दिवस
राजभवन म आज मिजोरम अउ अरूणाचल प्रदेस के स्थापना दिवस मनाय गीस। ए मउका म राज्यपाल विश्वभूषण हरिचंदन ह किहीन हे कि ए कारीकरम ल प्रधानमंत्री नरेंद्र मोदी के पहल म करे गेहे। ओकर उद्देस्य हे कि राज्य अउ केंद्र सासित प्रदेस मन म रहइया लोगन मनके बीच म आपसी समझ अउ सहयोग ल बढ़ावा देके के संगेसंग परंपरा अउ प्रथा मन ल साझा करे के अवसर प्रदान करना हे।
लोक निर्माण विभाग- कार्रवाई
लोक निर्माण विभाग डहार ले खराब सड़क बनाय के मामला म चार झिन अधिकारी मन उपर कार्रवाई करे गीस। एमा कटघोरा के अनुविभागीय अधिकारी एस.पी. साहू अउ उप अभियंता राकेश वर्मा ल निलंबित कर दे गेहे। उहें, कोरबा के तत्कालीन कार्यपालन अभियंता अउ उप अनुविभागीय अधिकारी ल कारण बताओ नोटिस जारी कर दे गेहे।
खबर के मुताबिक कोरबा जिला के चोटिया-चिरमिरी रद्दा ल दस किलोमीटर बनाय गे रिहीस हे। निरीक्षण के बाद खराब गुणवत्ता के सेति ए अधिकारी मन ल दोषी पाय गेहे।
माओवादी मुठभेड़
बीजापुर जिला म आज सुरक्षा बल के टीम अउ माओवादी मनके बीच होय मुठभेड़ म चार झन माओवादी के मारे जाय के समाचार मिले हे। जिला के पुलिस अधीक्षक जितेन्द्र यादव ह बतइन हे कि जांगला थाना क्षेत्र के बड़े तुंगाली अउ छोटे तुंगाली के जंगल म माओवादी मनके मौजूद होय के सूचना मिले रिहीस। एखर बाद सीआरपीएफ, डीआरजी अउ बस्तर फाइटर के संयुक्त टीम ल सर्चिंग बर रवाना करे गीस। ए दौरान माओवादी मन ह सुरक्षा बल के टीम उपर गोली-बारी सुरू कर दीन। जवान मन डहार ले करे गे जवाबी फाइरिंग ल देखत माओवादी मन ह जंगल कोति भाग गे। खबर के मुताबिक सुरक्षा बल डहार ले इलाका म सर्चिंग अभियान ल तेज कर दे गेहे।
हादसा
दंतेवाड़ा जिला के किरंदुल म स्थित एनएमडीसी के एसपी थ्री म बनाय गे रिटेनिंग वॉल के धसे ले दू झन मजदूर के मउत होगे। उहें, दू झन मजदूर मनके पता नइ चल पाय हे। जिला कलेक्टर मयंक चतुर्वेदी ह बतइन कि हादसा के दौरान रिटेनिंग वॉल के तीर-तखार म करीबन चौदह झन मजदूर मन ह काम करत रिहीन।
कोंडागांव-सिविक एक्शन कार्यक्रम
कोंडागांव जिला के फरसगांव म भारत-तिब्बत सीमा पुलिस बल-आईटीबीपी डहार ले सिविक एक्सन कार्यक्रम राखे गीस। ए कारीकरम म मुंडपाल, बेडमाकोट, गोगला, फरसगांव अउ मंडोकी के संगेसंग तीर-तखार गांव मनके करीबन दू सौ मनखे मन ह सामिल होइन। ए दौरान गांव वाले मनके डॉक्टरी जांच करके ओमन ल मुफत म दवई बांटिन। संगेसंग गांव वाले मन ल खेती किसानी ले जुड़े मसीन घलो बांटे गीस। कारीकरम म ओनतीसवां वाहिनी के सहायक सेनानी ज्ञान प्रकाश ह किहीन हे कि आईटीबीपी ह, गांव वाले मनके सेवा अउ सुरक्षा बर काम करत हे। ओमन बतइन कि सुरक्षा बल डहार ले, सेना भर्ती म सामिल होवइया जवान लइका मन ल मुफत म कोचिंग दे जात हे।
राजिम कुंभ
महानदी, पैरी अउ सोंढूर नदिया के त्रिवेणी संगम म स्थित राजिम म ए समय राजिम कुंभ कल्प मेला के आयोजन करे जावत हे। कुंभ मेला परिसर म भगवान श्रीराम के जीवन चरित्र अउ ओखर छत्तीसगढ़ वनवास उपर आधारित झांकी के प्रदर्सन करे गेहे। संगेसंग मेला स्थल ल रामोत्सव थीम उपर सजाय गेहे। मेला स्थल म संत-समागम के तैयारी घलो करे जावत हे, जेमा देसभर के साधु-संत मन ह सामिल होही। उहें, स्थानीय लोक कलाकार मन ह श्रीराम के जीवन चरित्र उपर आधारित भजन मनके प्रस्तुति देवत हे। आज संझा मुख्य मंच म स्थानीय कलाकार गोपा सान्याल अउ उर्वशी साहू ह अपन कलाकारी पेस करही।
राजिम मेला स्थल म पहुंचे बर प्रशासन डहार ले रायपुर, धमतरी, महासमुंद अउ गरियाबंद जिला के आने-आने जघा मन ले बस सुविधा उपलब्ध कराय गे हे। उहें, मेला म आय श्रध्दालू मन बर भोजन अउ पानी के व्यवस्था घलो करे गेहे।
प्रशिक्षण-शिविर
राष्ट्रीय सांख्यकीय कार्यालय के उप क्षेत्रीय कार्यालय दुर्ग डहार ले आज राजनांदगांव म प्रसिक्षण सिविर राखे गीस। ए सिविर म वार्षिक सर्वेक्षण के विवरण मन ल भरे के बारे म जानकारी दे गीस। कार्यक्रम म सांख्यकीय कार्यालय रायपुर के उप महानिदेसक रोशन लाल साहू ह आर्थिक सर्वेक्षण के महत्तम अउ नियम के बारे म जानकारी दीन। ए प्रसिक्षण सिविर म दुरूग संभाग के कइ ठन इकाई मनके प्रतिनिधि मन ह भाग लीन।
अउ अब थोरकुन समाचार सार म –
– मुख्यमंत्री विष्णुदेव साय ले आज पहूना म रायपुर प्रेस क्लब के नव-निर्वाचित पदाधिकारी मन ह भेंट करीन अउ सपथ ग्रहण समारोह म सामिल होय बर नेवता दीन।
अउ
– रायपुर नगर-निगम के अध्यक्ष अउ कांग्रेसी नेता प्रमोद दुबे ह अपराधिक गतिविधि अउ डीजे म प्रतिबंध लगाय के मांग करत रायपुर जिला के वरिष्ठ पुलिस अधीक्षक संतोष सिंह ल ज्ञापन सौंपिन।