प्रधानमंत्री ह खेल, साहित्य, फिलिम उद्योग अउ सोसल मीडिया समेत देस के प्रभावसाली लोगन ले ए अभियान म जुरे के आग्रह करिन। श्री मोदी ह किहिन कि देस म लोकसभा चुनई के माहौल हे। ओमन मार्च म आचार संहिता लागू होय के संभावना जताइन हें। श्री मोदी ह किहिन कि ‘मन की बात‘ कारीकरम जनता के, जनता बर अउ जनता डहार ले तइयार करे कारीकरम हे। ओमन किहिन कि आचार संहिता के सेति ‘मन की बात‘ कारीकरम अवइया तीन महिना तक प्रसारित नइ होही। एखर बाद कारीकरम के एक सौ ग्यारहवीं कड़ी म श्रोता मन ले फेर गोठबात होही। ओमन श्रोता मन ले ‘मन की बात‘ के पाछू कड़ी मन ले नान्हे-नान्हे वीडियो साझा करे के घलो आग्रह करिन हें।
आठ मार्च के अंतर्राष्ट्रीय महिला दिवस ल सोरियावत श्री मोदी ह किहिन के ए बिसेस दिन, देस के बिकास यात्रा म महिला सक्ति के योगदान ल नमन करे के मउका हे।
मन की बात-02
प्रधानमंत्री ह प्राकृतिक कृषि क्षेत्र के घलो गोठ करिन, जिहां माईलोगिन मन अपन अगुवई क्षमता के चिनहारी कराइन हें। श्री मोदी ह भारत के विविधता के घलो गोठ करत मातृभाषा के उपयोग उपर जोर देइन। श्री मोदी ह घोसना करिन कि कंटेंट क्रिएटर के प्रतिभा ल सम्मान देय बर देस म नेशनल क्रिएटर अवॉर्ड सुरू करे गे हे। लोगन ले घलो आग्रह करिन कि ओमन नेशनल क्रिएटर अवॉर्ड बर अपन पसंदीदा कंटेंट क्रिएटर ल नामांकित करंय।
प्रधानमंत्री-नशामुक्ति
प्रधानमंत्री नरेंद्र मोदी ह युवा मन ल नशा जिनिस के लत ले बचाय बर जोर दिन हें। ओमन किहिन कि ए बुरई के अंत करे बर परिवार के सहयोग जरूरी हे। गायत्री परिवार के अश्वमेध यज्ञ ल वीडियो संदेस ले संबोधित करत श्री मोदी ह किहिन कि नशा मुक्त भारत बर हर परिवार के एक संस्था के रूप म मजबूत होना जरूरी हे। श्री मोदी ह किहिन कि अश्वमेध यज्ञ युवा मन ल नशा जइसन गतिविधि ले दुरिहा राखे अउ राष्ट्र निर्माण डहार उंखर धियान लगाय बर बड़का अभियान बन चुके हे।
निर्वाचन आयोग-तबादला
भारत निर्वाचन आयोग ह लोकसभा चुनई ले पहिली अधिकारी मनके दबादला बर नवा दिसा-निरदेस जारी करे हे। अपन निरदेस म आयोग ह राज्य सरकार ले केहे हे कि दू संसदीय निर्वाचन क्षेत्र वाले राज्य अउ केंद्र सासित प्रदेस के छोड़ सब्बो राज्य सुनिश्चित करंय कि, जेन अधिकारी मनके तबादला जिला ले बाहिर करे गे हे, ओमन ल उही संसदीय क्षेत्र के कोनो आने जिला म नियुक्त नइ करे जाय। आयोग ह किहिस कि ओखर तबादला नीति के पालन करे जाय। आयोग ह उन सबो अधिकारी मन के तबादला करे के निरदेस दे हे, जउन या तो अपन गृह जिला म तैनात रिहिन या फेर एक्के जघा तीन बछर पूरा कर चुके हें। एमा वो सब्बो अधिकारी सामिल हें, जउन चुनई कारज म सोज्झे या फेर पर्यवेक्षक के भूमिका म जुरे रिहिन। आयोग ह सबो राज्य मन ल अब तक होय तबादला के समीक्षा करे के निरदेस देय हे।
शिक्षा मंत्रालय-प्रवेश
केंद्रीय शिक्षा मंत्रालय ह सबो राज्य अउ केंद्र शासित प्रदेस मन ल ए सुनिश्चित करे बर केहे हे कि दू हजार चौबीस-पच्चीस के सत्र ले पहिली कक्षा म प्रवेस बर लइका मन के उमर छै बछर ले जादा होवय। ए बेवस्था राष्ट्रीय शिक्षा नीति-दू हजार बीस, निसुल्क अउ अनिवार्य बाल शिक्षा अधिकार अधिनियम-दू हजार नौ के अनुरूप करे गे हे। शिक्षा मंत्रालय ह ए महिना के पंद्रह तारीख के स्कूल शिक्षा अउ साक्षरता विभाग ल एखर बारे म पाती पठोय हे अउ सत्र-दू हजार चौबीस-पच्चीस ले ग्रेड-एक म प्रवेस बर ए नियम लागू करे बर किहिस हे।
राशनकार्ड नवीनीकरण
छत्तीसगढ़ म सार्वजनिक वितरण प्रणाली के तहत अब पंद्रह मार्च तक राशन कारट मनके ऑनलाइन नवीनीकरण करे जा सकही। मुख्यमंत्री विष्णुदेव साय ह आम जनता के सुविधा ल चेत म राखत रासन कारट नवीनीकरण के तारीख ल बढ़ाय के निरदेस दे रिहिन। पहिली ऑनलाइन नवीनीकरण के आखिरी तारीख पच्चीस फरवरी निर्धारित करे गे रिहिस। फेर एखर संबंध म खाद्य विभाग के संचालक जितेन्द्र शुक्ला ह सब्बो जिला कलेक्टर मन ल दिसा-निरदेस जारी कर देय हें।
ईओडब्ल्यू-छापा
छत्तीसगढ़ के चर्चित सराब घोटाला म एसीबी अउ ईओडब्ल्यू ह बड़का कार्रवाई करत आज रइपुर अउ बिलासपुर म चौदह लोगन के ठिकाना म छापामार कार्रवाई करिस। एमा पूर्व मुख्य सचिव विवेक ढांढ, पूर्व आईएएस अनिल टुटेजा, सरकारी सराब कंपनी के पूर्व एमडी अरूणपति त्रिपाठी, आबकारी अधिकारी सौरभ बख्शी, अशोक सिंह, अरविंद सिंह, सिध्दार्थ सिंघानिया अउ अनवर ढेबर के नांव सामिल हें। संगे छत्तीसगढ़ के तीन सराब कारोबार ले जुड़े -केडिया, वेलकम अउ भाटिया ग्रुप के ठिकाना म घलो दबिस देय गिस।
बतादन कि सराब अउ कोयला घोटाला म ईडी ह दू झन पूर्व मंत्री अउ विधायक समेत करीबन सौ लोगन के खिलाफ नामजद एफआईआर दर्ज कराय रिहिस, जेमा पूर्व आबकारी मंत्री कवासी लखमा, खाद्य मंत्री अमरजीत भगत, पूर्व विधायक यू.डी. मिंज, गुलाब कमरो अउ शिशुपाल सोरी के नांव सामिल हें। एखर अलावा दू आईएएस, सेवानिवृत्त आईएएस समेत कांग्रेस कोसाध्यक्ष रामगोपाल अग्रवाल अउ आने नेता मनके नांव घलो सामिल हें।
राजिम कुंभ कल्प/सिरपुर महोत्सव
महानदी, पैरी अउ सोंढूर नदी के त्रिवेणी संगम स्थित राजिम म काली कुंभ कल्प के सुभारंभ होइस। ए दारी ‘राजिम कुंभ कल्प‘ रामोत्सव के रूप म मनाय जावत हे। सुभारंभ के मउका म संस्कृति अउ धर्मस्व मंत्री बृजमोहन अग्रवाल, मंत्री रामविचार नेताम के संगेसंग कतकोन विधायक मौजूद रिहिन।
ए मउका म संस्कृति मंत्री श्री अग्रवाल ह किहीन कि माघी पुन्नी मेला हमर देस के हजारों-लाखों बछर जुन्ना हे, इतिहास ल समृध्द बनाना हमर जिम्मेदारी हे। एखर सेति राज्य सरकार ह संत महात्मा मन के सुझाव ले एखर संग कल्प सब्द ल जोड़िस अउ अब राजिम कुंभ कल्प के रूप म आयोजन करे जावत हे। श्री अग्रवाल ह किहीन कि महासिवरात्रि के सुभ मउका म कुंभ कल्प के समापन होही।
राजिम कुंभ कल्प म साध्वी प्रज्ञा भारती के संग ग्यारा झन पंडित मन मंत्रोच्चार करके महानदी के महाआरती करिन। उहें, परसिध्द गायिका अनुराधा पौडवाल ह भजन के सुघ्घर प्रस्तुति दीस। एखर संगेसंग नृत्य नाटिका ‘‘गीतक दर्शन‘‘ ल घलो दर्सक मन बहुते संहराइन।
उहें, गंगा आरती अउ दीपदान के संग काली ले सिरपुर महोत्सव घलो सुरू होगे हे। ऐतिहासिक नगरी म ए महोत्सव तीन दिन तक चलही। सिरपुर महोत्सव म पहिली घांव गंधेश्वर महादेव मंदिर ट्रस्ट समिति अउ जिला प्रशासन के सहयोग ले गंगा आरती करे गिस। महोत्सव म रोज्जे संझा चार बजे ले रतिहा दस बजे तक सांस्कृतिक कारीकरम होही। कारीकरम स्थल म सरकारी विभाग डहार ले दस ठन प्रदर्सनीय लगाय गेय हें, जिहां केंद्र अउ राज्य सरकार के आने-आने योजना मनके जानकारी लोगन तक पहुंचाय जावत हे। जिला प्रशासन डहार ले पहिली घांव पुण्य स्नान बर महानदी के तट म कुंड घलो बनाय गेय हे।
शाकम्भरी महोत्सव
रइपुर जिला के अभनपुर के खोरपा म काली शाकम्भरी महोत्सव मनाय गिस। महोत्सव म धर्मस्व मंत्री बृजमोहन अग्रवाल सामिल होइन। जिहां ओमन कोसरिया मरार पटेल समाज के भवन बर जमीन अउ दस लाख रूपिया देय के घोसना करिन। ए मउका म मुफ्त म साग-भाजी घलो बांटे गिस। संगेसंग समाज के होनहार युवा मन ल आने-आने क्षेत्र म बढ़िया प्रदर्सन करे के सेति सम्मानित करे गिस। कारीकरम के आयोजन छत्तीसगढ़ कोसरिया मरार पटेल समाज के डहार ले करे गेय रिहिस।