प्रधानमंत्री विकसित भारत संकल्प यात्रा-01
प्रधानमंत्री नरेंद्र मोदी ह किहीन हे कि केंद्र सरकार देस के अन्नदाता मन ल ऊर्जादाता घलो बनाना चाहथे। एखर बर उनला खेत मन के बंजर जमीन उपर छोटे-छोटे सोलर प्लांट लगाय बर सरकार मदद देवत हे। प्रधानमंत्री ह आज वर्चुअल माध्यम ले छत्तीसगढ़ म करीब पैंतीस हजार करोड़ रूपिया के दस ठन परियोजना मनके उद्घाटन, लोकार्पण अउ सिलान्यास करीन। कार्यक्रम ल संबोधित करत हुए प्रधानमंत्री ह किहीन कि केंद्र सरकार के लक्ष्य सौर ऊर्जा के माध्यम ले देस के लोगन मनके बिजली के जरूरत ल पूरा करे के संगेसंग उंखर बिजली बिल ल सून्य करना आय। एखर बर पीएम सूर्य घर योजना सुरू करे गेहे, जेखर तहत हर घर ल सूर्य घर बनाय जाही। एखर ले लोगन मन घर म बिजली बनाके न सिर्फ अपन जरूरत ल पूरा कर सकही, बल्कि बिजली बेच के उनला कमाई के एक ठन जरिया घलो मिल सकथे। एखर ले हर परिवार ल हर बछर हजारों रूपिया के आमदनी होही।
प्रधानमंत्री ह आज छत्तीसगढ़ म जेन परियोजना मन के उद्घाटन लोकार्पण अउ सिलान्यास वर्चुअल माध्यम ले करीन, ओमा राष्ट्रीय ताप विद्युत निगम- एनटीपीसी के रायगढ़ म स्थित पॉवर प्लांट, राजनांदगांव जिला म करीब चार सौ पचास एकड़ म निर्मित सौर ऊर्जा प्रोजेक्ट, तीन ठन कोल हैण्डलिंग परियोजना, रेलवे के सोलर पॉवर प्लांट अउ फ्लाईओवर के संगेसंग दू ठन सड़क मार्ग घलो सामिल हे।
प्रधानमंत्री विकसित भारत संकल्प यात्रा-02
आज जेन परियोजना मनके लोकार्पण उद्घाटन अउ सिलान्यास होय हे, ओहा प्रत्यक्ष अउ परोक्ष रूप ले बड़ संख्या म रोजगार के अवसर पैदा करे म घलो महत्वपूर्ण भूमिका निभाही। प्रधानमंत्री ह ए अवसर म विकसित भारत- विकसित छत्तीसगढ़ अभियान के तहत प्रदेस के नब्बे ले जादा जघा मन म मौजूद करीब पांच लाख लाभार्थी मन ले वर्चुअल गोठबात करीन।
कार्यक्रम म मुख्यमंत्री विष्णुदेव साय ह राज्य सरकार डहार ले करे जात काम मन के जानकारी देवत हुए किहीन कि मोदी के गारंटी के अनुरूप छत्तीसगढ़ ल संवारे के काम तेजी ले होवत हे। ओमन किहीन कि प्रधानमंत्री ह विकसित भारत के निर्माण के लक्ष्य देस के आगू म रखे हे, ए लक्ष्य ल हासिल करे बर छत्तीसगढ़ ह घलो अपन भागीदारी देबर तैयार हे। ‘‘विकसित भारत‘‘ के निर्माण के लक्ष्य ल हासिल करे बर राज्य सरकार ह ‘‘विकसित छत्तीसगढ़‘‘ के निर्माण के लक्ष्य राखे हे।
रामलला दर्शन योजना-विशेष ट्रेन
श्री रामलला दर्शन योजना बर छत्तीसगढ़ ले अयोध्या तक चलाय जात विसेस ट्रेन हर सप्ताह चलही। बारह कोच वाले ए ट्रेन म एक घांव म करीब आठ सौ पचास श्रध्दालु श्री रामलला के दर्शन बर अयोध्या जा सकही। ए बिसेस ट्रेन के संचालन अवइया पांच मार्च ले सुरू होही। ए योजना के तहत छत्तीसगढ़ पर्यटन मंडल अउ आईआरसीटीसी के बीच विसेस ट्रेन चलाय अउ जरूरी व्यवस्था बर काली एमओयू होइस।
पर्यटन मंत्री बृजमोहन अग्रवाल ह बतइन कि श्री रामलला दर्शन योजना के तहत श्रध्दालु मन बर छत्तीसगढ़ ले अयोध्या जाय, उंहा रेहे, मंदिर दर्सन, नास्ता अउ खाय के व्यवस्था रइही। ओमन बतइन कि अवइया समय म अयोध्या के संगेसंग काशी म भगवान विश्वनाथ अउ प्रयागराज म तीरथ स्थान के दर्सन के व्यवस्था घलो करे जाही।
मुख्यमंत्री-दामाखेड़ा
बलौदाबाजार-भाटापारा जिला के दामाखेड़ा ल अब कबीर धर्म नगर दामाखेड़ा के नाम ले जाने जाही। मुख्यमंत्री विष्णुदेव साय ह दामाखेड़ा म माघी पून्नी के अवसर म आयोजित सतगुरू कबीर संत समागम समारोह म ए घोसना करीन। ए अवसर म मुख्यमंत्री ह किहीन कि दामाखेड़ा के दस किलोमीटर के परिधि म कोई भी नवा औद्योगिक प्रतिष्ठान सुरू नइ करे जाय। ए दौरान श्री साय ह दामाखेड़ा म स्वीकृत बाईस करोड़ रूपिया ले जादा के लागत ले बनइया कबीर सागर के निर्माण कार्य म तेजी लाय के निरदेस दीन। समारोह म मुख्यमंत्री ह धर्मगुरू पंथश्री प्रकाश मुनि नाम साहेब ले छत्तीसगढ़ के तरक्की अउ खुसहाली बर आशीर्वाद लीन। ए मउका म प्रकाश मुनि नाम साहेब ह मुख्यमंत्री के रूप म दामाखेड़ा आगमन बर श्री साय के कबीर पंथी समाज डहार ले आत्मीय स्वागत करीन।
मुख्यमंत्री-मैनपाट महोत्सव
सरगुजा जिला के मैनपाट म तीन दिवसीय मैनपाट महोत्सव सुरू होगे हे। मुख्यमंत्री विष्णुदेस साय ह काली ए महोत्सव के सुभारंभ करीन। ए अवसर म श्री साय ह किहीन कि मैनपाट ल पर्यटन के दृष्टि ले विकसित करे जाही। राज्य सरकार प्रदेस के सब्बो वर्ग के समावेसी विकास के दिसा म काम करत हे। कार्यक्रम म मुख्यमंत्री ह नर्मदापुर म झंडा पार्क के स्थापना बर एक करोड़ रूपिया अउ मैनपाट महोत्सव के आयोजन बर हर बछर पचास लाख रूपिया देके घोसना करीन।
माओवादी मुठभेड़
सुकमा जिला म आज सुरक्षा बल मनके संग होय मुठभेड़ म एक झिन माओवादी मारे गेहे। मिले जानबा के अनुसार डीआरजी के जवान मन बुर्कलंका इलाका म तलासी अभियान म निकले रिहीन। इही दउरान माओवादी मन ह जवान मन उपर गोलीबारी सुरू कर दीन। जवान मन कोती ले करे गे जवाबी कार्रवाई के बाद माओवादी मन जंगल के फायदा उठाके उहां ले भाग गे। बाद में घटनास्थल के तलासी के दौरान सुरक्षा बल मन ह एक झिन माओवादी के सव बरामद करीन।
राशनकार्ड नवीनीकरण
प्रदेस म सार्वजनिक वितरण प्रणाली के तहत प्रचलित रासनकार्ड मनके नवीनीकरण कराय के काली पच्चीस फरवरी आखिरी तिथि आय। प्रदेस म अब तक छैंसठ लाख अड़सठ हजार ले जादा रासन कार्ड धारी मन ह नवीनीकरण बर आवेदन प्रस्तुत करे हे। रासनकार्ड मनके नवीनीकरण बर खाद्य विभाग डहार ले ऐप तैयार करे गेहे। उहें, हितग्राही मन उचित मूल्य के दुकान म घलो जाके ऑलाइनल आवेदन कर सकत हे।
वित्त मंत्री-अनुदान मांग
वित्त मंत्री ओपी चौधरी के विभाग मनले संबंधित अनुदान मांग मन ल काली विधानसभा म सर्व सम्मति ले पारित कर दे गीस। श्री चौधरी ह अनुदान मांग मन उपर होय चर्चा के जवाब देवत हुए किहीन कि प्रधानमंत्री नरेंद्र मोदी जेन रणनीति के तहत भारत के अर्थव्यवस्था ल मजबूत करे बर काम करत हे, ओइसने प्रयास छत्तीसगढ़ बर घलो करे जात हे। हम बछर दू हजार सैंतालीस तक भारत के संगेसंग छत्तीसगढ ल घलो विकसित राज्य बनाबोन। छत्तीसगढ़ ल दू हजार सैंतालीस तक विकसित राज्य बनाय बर विजन डाक्यूमेंट तैयार करे जाही, जेला छत्तीसगढ़ राज्य स्थापना दिवस एक नवंबर के जनता ल समर्पित करे जाही। एखर नाम ‘‘अमृत काल छत्तीसगढ़ विजन/दू हजार सैंतालीस‘‘ होही।
श्री चौधरी ह किहीन कि प्रदेस म शासकीय धन के आय-व्यय के दैनिक निगरानी बर एकीकृत वित्तीय प्रबंधन सूचना प्रणाली सुरू करे जाही। संगेसंग तकनीकी रिफार्म अउ इनोवेसन राज्य के अर्थव्यवस्था ल बढ़ाय के रणनीति ह मूल आधार होही। वित्त मंत्री ह किहीन कि दूर्ग संभाग म नवीन संभागीय वित्त अउ लेखा प्रसिक्षण संस्थान के स्थापना करे जाही। एखर अलावा राज्य के अर्थव्यवस्था के नीति मनके निर्धारण बर छत्तीसगढ़ एडवायजरी काउंसिल के गठन घलो करे जाही।
दिव्यांगजन-नए भवन
राजनांदगांव लोकसभा क्षेत्र के सांसद संतोष पांडेय ह ग्राम ठाकुरटोला म बत्तीस करोड़ रूपिया के लागत ले नव-निर्मित दिव्यांगजन कौशल विकास, पुनर्वास अउ ससक्तिकरण समेकित क्षेत्रीय केंद्र के नवा भवन के उद्धाटन करीन। ए मउका म केंद्रीय सामाजिक न्याय अउ अधिकारिता मंत्री डॉक्टर वीरेन्द्र कुमार, केंद्रीय राज्य मंत्री ए. नारायण स्वामी अउ छत्तीसगढ़ विधानसभा के अध्यक्ष डॉक्टर रमन सिंह वर्चुअल सामिल होइन।