प्रधानमंत्री नरेंद्र मोदी छत्तीसगढ़ म काली चैबीस फरवरी के वीडियो कॉन्फ्रेंसिंग के जरिया ‘‘विकसित भारत विकसित छत्तीसगढ‘‘़ कारीकरम ल संबोधित करही। ए दौरान प्रधानमंत्री चैंतीस हजार चार सौ करोड़ रूपिया ले जादा के कई ठिन विकास परियोजना मनके उद्घाटन करही। ए परियोजना सड़क, रेलवे, कोयला, बिजली अउ सौर ऊर्जा समेत बहुत अकन महत्वपूर्ण क्षेत्र ले जुड़े हे।
श्री मोदी छत्तीसगढ़ के रायगढ़ म एनटीपीसी के सोलह सौ मेगावाट के
लारा सुपर थर्मल पॉवर प्रोजेक्ट के पहिली चरण ल राष्ट्र ल समर्पित करही ।एखरे संग प्रोजेक्ट के दूसरा चरण के आधार सिला घलो रखही। बतादन कि स्टेसन के पहिली चरण के लागत लगभग पंद्रह हजार आठ सौ करोड़ रूपिया हरय।
कारीकरम के दौरान प्रधानमंत्री साउथ ईस्टर्न कोलफील्ड्स लिमिटेड के तीन प्रमुख फस्र्ट माइल कनेक्टिविटी एफ.एम.सी. परियोजना के घलो उद्घाटन करही। जेखर कुल लागत छै सौ करोड़ रूपिया ले जादा हरय।
अइसने श्री मोदी बिलासपुर-उसलापुर फ्लाईओवर के घलो लोकार्पण करही। ए फ्लाईओवर के निर्माण लगभग तीन सौ करोड़ रूपिया के लागत ले करे गेहे। एखरे संग प्रधानमंत्री राष्ट्रीय राजमार्ग क्रमांक-उनचास अउ एक सौ तीस के टू-लेन सड़क मनके उन्नयन कार्य के लोकार्पण अउ सुभारंभ करही।
प्रधानमंत्री राजनांदगांव म लगभग नौ सौ करोड़ रूपिया के लागत ले बने सौर पीवी परियोजना के उद्घाटन करही। ए योजना ले हर साल दू सौ तैंतालीस मिलियन यूनिट ले जादा बिजली के उत्पादन होही। एखरे संग प्रधानमंत्री दुरूग जिला के भिलाई म पचास मेगावॉट के सौर ऊर्जा संयंत्र ल घलो राष्ट्र ल समर्पित करही।
ओति, प्रधानमंत्री के संवाद कारीकरम दंतेवाड़ा जिला के जावंगा-गीदम ऑडिटोरियम म राखे जाही। ए दौरान श्री मोदी हितग्राही मन करा वर्चुअल गोठबात करही।
प्रधानमंत्री अनाज भंडारण योजना शुभारंभ
प्रधानमंत्री नरेंद्र मोदी काली चैबीस फरवरी के बिहनिया नई दिल्ली म सहकारी क्षेत्र बर कई ठिन प्रमुख पहल के उद्घाटन अउ सिलान्यास करही एखर तहत प्रधानमंत्री सहकारी क्षेत्र म विश्व के सबले बड़का अनाज भंडारण योजना के पायलट परियोजना के उद्घाटन करही, जेला ग्यारा राज्य के ग्यारा प्राथमिक कृषि ऋण समिति म संचालित करे जात हे।
ए पहल के तहत प्रधानमंत्री गोदाम अउ कृषि ले जुड़े दूसर बुनियादी सुविधा मनके निर्माण बर देसभर म अतिरिक्त पांच सौ प्राथमिक कृषि ऋण समिति पी.ए.सी.एस. के आधारसिला घलो रखहीं। ए पहल के उद्देस्य पी.ए.सी.एस. गोदाम ल खाद्यान्न आपूर्ति श्रृंखला के संग निर्बाध रूप ले एकीकृत करना, खाद्य सुरक्षा ल मजबूत बनाना अउ आर्थिक विकास ल बढ़ावा देना हरय।
उहें, प्रधानमंत्री देसभर म अट्ठारा हजार पी.ए.सी.एस. म कम्प्यूटरीकरण बर परियोजना के घलो उद्घाटन करही। एखर उद्देस्य सहकारी क्षेत्र ल नवा ऊर्जा देना अउ छोटे अउ सीमांत किसान मन ल ससक्त बनाना हरय। ए परियोजना बर दू हजार पांच सौ करोड़ रूपिया ले जादा के वित्तीय परिव्यय के संग मंजूरी दे गेहे।
राजिम कुंभ कल्प
राजिम के त्रिवेणी संगम म माघी पुन्नी के मउका म काली चैबीस फरवरी ले राजिम कुंभ कल्प मेला के आयोजन करे जाही। ए बछर राजिम कुंभ मेला ल रामोत्सव के रूप म मनाय जाही। ए दौरान तीन दिन बिसेस कारीकरम होही। एखर तहत चैबीस फरवरी, चार मार्च अउ आठ मार्च के राजिम त्रिवेणी संगम म पुण्य स्नान के आयोजन करे जाही। राजिम कुंभ मेला के दौरान पंद्रह दिन तक आने-आने सांस्कृतिक अउ धार्मिक कारीकरम होही। ए मेला म देसभर ले साधू संत अउ श्रध्दालू सामिल होही।
संस्कृति अउ धर्मस्व मंत्री बृजमोहन अग्रवाल ह काली मेला स्थल के निरीक्षण करीन। ओमन अधिकारी मनके बइठका लेके जम्मों तियारी जल्दी पूरा करे के निरदेस दीन। माघी पूर्णिमा के दिन ले सुरू होवइया ए मेला आठ मार्च महाशिवरात्रि तक चलही।
श्री रामलला दर्शन योजना
राज्य सरकार के श्री रामलला दर्सन योजना के क्रियान्वयन के प्रक्रिया सुरू हो गेहे। ए संबंध म पर्यटन विभाग ह जम्मों जिला कलेक्टर मन ल दिसा निरदेस जारी कर देहे, जारी निरदेस म कहे गे हे कि यात्रा बर पहिली स्पेसल ट्रेन जल्दी सुरू होही, एखर बर यात्री मनके चयन करके सूचि अउ प्रतीक्षा सूची तुरते भेजे बर कहे गे हे। ए योजना के तहत यात्रा बर हितग्राही मनके चयन कलेक्टर के अध्यक्षता म गठित जिला स्तरीय समिति डहार ले करे जाही। योजना के तहत हितग्राही के न्यूनतम उमर अट्ठारा साल अउ अधिकतम उमर पचहत्तर साल हरय। पहिली चरण म पचपन साल या ओखर ले जादा उमर के मनखे मन ल प्राथमिकता दे जाही। यात्रा बर पच्चीस प्रतिसत हितग्राही सहरी क्षेत्र अउ पचहत्तर प्रतिसत हितग्राही ग्रमीण क्षेत्र के होही। हरेक यात्रा म यात्री मनके कुल संख्या आठ सौ पचास निर्धारित हे, जेला एक हजार बढ़ाय जाय सकत हे। कोटा के पच्चीस प्रतिसत अतिक्ति मनखे मनके प्रतिक्षा सूची घलो बनाय जाही। चयनित यात्री के यात्रा म नइ जाय के स्थिति म प्रतीक्षा सूची म सम्मिलित मनखे मन ल यात्रा म भेजे जा सकही।
यात्रा बर निर्धारित प्रारूप म आवेदन पत्र ग्राम पंचायत या सहरी क्षेत्र म नगरीय निकाय म देना होही। आवेदन के संग फोटो, पहचान अउ निवास के साक्ष्य बर रासनकार्ड, ड्राइविंग लाइसेंस, मतदाता पहचान पत्र या आधार कार्ड या कोनो दूसर दस्तावेज देना होही।
एम्स-लैब उन्नत
अखिल भारतीय आयुर्विज्ञान संस्थान- एम्स रईपुर के वायरस रिसर्च एंड डायग्नोस्टिक-वीआरडी लैब ल इंफेक्शियस डिजिज रिसर्च एंड डायग्नोस्टिक आई.डी.आर.डी. लैब के रूप म उन्नत करे जाही। लैब के उन्नत होय के बाद इंहा, वायरल, बैक्टेरियल,फंगल अउ पैरसिटिक एटियोलॉजी के जांच म सुविधा मिलही।
बतदन कि केंद्रीय स्वास्थ्य अउ परिवार कल्याण मंत्रालय के अंर्तगत आईसीएमआर अउ चिकित्सा सिक्षा विभाग डहार ले देसभर म एक सौ संतावन वीआरडी लैब म ले आठ ठिन ल आईडीआरडी लैब म बदले के निर्णय ले गेहे। एमा एम्स के वीआरडी लैब ल घलो सामिल करे गेहे।
माओवादी-ग्रामीण हत्या
सुकमा जिला म माओवादी मन दू झिन ग्रामीण के हत्या कर देहे। घटना चिंतागुफा थाना क्षेत्र के ग्राम दूल्लेड़ के हरय। पुलिस के अनुसार माओवादी मन मुखबिरी के आरोप लगावत सोड़ी हूंगा अउ माड़वी नंदा के हत्या कर दीन। पुलिस मामला के जांच करत हे।
जीएसटी छापा
छत्तीसगढ़ जीएसटी विभाग के प्रवर्तक विंग ह रईपुर के तीन ठिन आयरन स्टील उत्पाद निर्माता मनके ठिकाना उपर छापामार कार्रवाई करीस। टीम ह उरला सिलतरा स्थित श्याम स्टील इंडस्ट्रीज, ईश्वर इस्पात अउ ईश्वर टीएम टी के फैक्ट्री मन म जांच करीन। प्रारंभिक जांच म ए कंपनी मन डहार ले करीबन छै करोड़ पचहत्तर लाख रूपिया के जीएसटी चोरी करे के बात आगू आय हे। जीएसटी चोरी के मामला के खुलासा होय म ए फर्म डहार ले मउकच म अधिकारी मन के आगू चार करोड़ पचहत्तर लाख रूपिया जीएसटी के रूप म जमा करे गीस। जीएसटी के प्रवर्तक विंग ल ए फर्म कोति ले कच्चा स्क्रैप बिसाके सरिया बनाय अउ जीएसटी के चोरी करे के सूचना मिले रिहीस, जेखर आधार म ए छापामार कार्रवाई करे गीस।