केंद्रीय गृह मंत्री अउ भाजपा के बड़का नेता अमित शाह ह किहीन हे कि ए बखत के लोकसभा के चुनाव देस के भविष्य तय करने वाला चुनाव के संगेसंग भारत ल पूर्ण विकसित देस अउ विश्व गुरू बनइया चुनाव आय। आज जांजगीर म ‘‘विजय संकल्प शंखनाद रैली‘‘ ल संबोधित करत श्री शाह ह किहीन हे कि प्रधानमंत्री नरेंद्र मोदी के अगुवई म पाछू दस बछर के दौरान एनडीए सरकार ह देस ल विकास के रद्दा म तेजी ले आगू बढ़ाय हे। श्री शाह ह किहीन हे कि हालेच म होय विधानसभा चुनाव म मुख्यमंत्री विष्णुदेव साय के अगुवई म डबल इंजन के सरकार बनाय बर भाजपा ल पूर्ण बहुमत के आसिरवाद दे हे।
ओमन राज्य म कांग्रेस के पाछू सरकार उपर करोडो़ रूपिया के घोटाला करे के संगेसंग जनता के संग अन्याय करे के आरोप लगइन। ओमन राज्य सरकार के सराहना करत किहीन हे कि दू महिना के कार्यकाल म इंहा, मोदी के गारंटी ल पूरा करे बर कतकोन कदम उठाय गेहे।
श्री शाह ह किहीन हे कि राज्य म नक्सल समस्या के समाधान बर घलो भाजपा सरकार प्रभावी कदम उठावत हे। संगेसंग छत्तीसगढ़ के संस्कृति ल दुनियाभर म पहिचान दिवाय बर घलो ए सरकार ह ठोस कदम उठावत हे।
एखर पहिली, मुख्यमंत्री विष्णुदेव साय ह उम्मीद जतइन हे कि अवइया लोकसभा चुनाव म प्रदेस के जम्मों ग्यारा सीट मन म भाजपा ल मतदाता मनके समर्थन मिलही अउ जीत हासिल करही। कारीकरम म भाजपा के प्रदेस प्रभारी ओम माथुर, सह प्रभारी नितिन नवीन, प्रदेस भाजपा अध्यक्ष किरण सिंह देव, उप मुख्यमंत्री अरूण साव अउ विजय शर्मा, वित्त मंत्री ओ.पी. चौधरी मौजूद रिहीन।
अमित शाह-कोंडागांव बैठक
एखर पहिली, केंद्रीय गृहमंत्री अउ भाजपा के बड़का नेता अमित शाह ह कोंडागांव म पार्टी के लोकसभा चुनाव प्रबंधन समिति के बइठका लीन। बइठका म ओमन संगठन के पदाधिकारी अउ कार्यकर्ता मन ले अवइया लोकसभा चुनाव उपर चर्चा करीन। श्री शाह ह बस्तर, कांकेर अउ महासमुंद लोकसभा क्षेत्र के कार्यकर्ता मनले पार्टी ल प्रभावी जीत देवाय के संकल्प लीन।
बैठक में मुख्यमंत्री विष्णुदेव साय के संग, पार्टी के प्रदेस सहप्रभारी नितिन नबीन, प्रदेस भाजपा अध्यक्ष किरण सिंह देव, वन मंत्री केदार कश्यप, पूर्व मंत्री अजय चंद्राकर, भाजपा के राष्ट्रीय उपाध्यक्ष अउ कांडागांव विधायक लता उसेंडी सहित आने-आने पदाधिकारी मौजूद रिहीन।
राष्ट्रीय पुरस्कार
जैव ईंधन अउ जैव ऊर्जा के क्षेत्र म सुघ्घर काम बर छत्तीसगढ़ ल राष्ट्रीय पुरस्कार ले सम्मानित करे गेहे। प्रदेस म जैव ईंधन के क्षेत्र म काम करइया संस्था छत्तीसगढ़ बायोफ्यूल विकास प्राधिकरण ल नई दिल्ली म काली होय समारोह म ‘‘इंडिया ग्रीन एनर्जी अवार्ड‘‘ दे गीस।
इंडियन फेडरेसन ऑफ ग्रीन एनर्जी डहार ले राखेगे करीकरम म केंद्रीय सड़क, परिवहन अउ राजमार्ग मंत्री नितिन गड़करी ह प्राधिकरण के सीईओ सुमित सरकार ल ए पुरस्कार दीन। कारीकरम म केंद्रीय पेट्रोलियम अउ प्राकृतिक गैस राज्यमंत्री रामेश्वर तेली घलो मौजूद रिहीन। उहें, मुख्यमंत्री विष्णुदेव साय ह छत्तीसगढ़ ल मिले ए उपलब्धि बर बायोफ्यूल विकास प्राधिकरण के अधिकारी अउ विशेषज्ञ मन ल बधाई दीन हे।
खबर के मुताबिक छत्तीसगढ़ बायोफ्यूल विकास प्राधिकरण डहार पाछू दस बछर ले घलो जादा बेरा ले जैव ईंधन अउ जैव ऊर्जा के क्षेत्र म किसान ूअउ हितग्राही मन ल जोड़के सुघ्घर काम करे ग रिहीस। प्राधिकरण डहार ले बायोडीजल, बायो-एथेनॉल, बायोजेट एवीयेशन फ्यूल अउ जैव-सीएनजी के उत्पादन के संगेच बायोगैस ले बिजली उत्पादन घलो करे जावत हे।
सरगुजा/कबीरधाम-हत्या मामला
राज्य सरकार ह सरगुजा जिला के मणिपुर थाना क्षेत्र म दू बछर पहिली होय एक किशोरी के हत्या के मामला म पुलिस महानिरीक्षक मनके दल डहार ले जांच कराय जाय के घोसना करे हे। आज विधानसभा म गृह मंत्री के अनुपस्थिति म स्वास्थ्य मंत्री श्याम बिहारी जायसवाल ह सदन ल बतइन हे कि अभी सरगुजा रेंज के आईजी पुलिस डहार ले गठित विसेस टीम ह ए घटना के जांच करत हे।
आज प्रश्नकाल म सीतापुर ले भाजपा विधायक रामकुमार टोप्पो ह ए मामला उपर सवाल करे रिहीस। ओमन ह घटना के गंभीरता ल देखत ए मामला के सीबीआई ले जांच कराय जाय के मांग करीन। एमा गृह मंत्री कोति ले स्वास्थ्य मंत्री ह किहीन हे कि ए घटना पूरा समाज अउ सरकार बर एक चिंता के बिषय हे। एखर सेति आईजी स्तर के अधिकारी मन के विसेस दल डहार ले ए घटना के जांच कराय जाही अउ कोनो भी स्थिति म दोषी मन ल बख्से नइ जाय।
खबर के मुताबिक इक्कीस मई दू हजार बाईस के गाढ़ाघाट ले मजदूरी करके घर लहूटत बेरा रतिहा हो गे रिहीस हे। इही दौरान मणिपुर चौकी के तीर आरोपी मन ह किशोरी ल छेकके ओखर संग दुराचार के घटना ल अंजाम दे रिहीस। एखर बाद ओढ़नी ले गला घोटके ओखर हत्या कर दे रिहीस।
आज सदन म कबीरधाम जिला ले संबंधित साधराम हत्याकांड ल लेके घलो विपक्ष ह सरकार ले जवाब मांगिन। एखर उपर उप मुख्यमंत्री अउ गृह मंत्री विजय शर्मा ह किहीन कि ए बिरनपुर हत्याकांड ले अलग तरह के घटना आय। ओमन किहीन हे कि साधराम यादव के हत्या सिरिफ ले नही, बल्कि विचार ले करे गेहे। एखरे संग आरोपी मन के कश्मीर ले घलो जुड़े होय के संकेत मिले हे। एखर जांच चलत हे। ए आधार म जरूरत पड़े म जउन एजेंसी ले जांच कराना होही, उहां ले जांच कराय जाही।
बृजमोहन अग्रवाल-टीईटी परीक्षा
प्रदेश म तैंतीस हजार सिक्षक मनके भर्ती के तियारी तेज होगे हे। स्कूल सिक्षा मंत्री बृजमोहन अग्रवाल ह राज्य शैक्षिक अनुसंधान और प्रसिक्षण परिषद-एससीईआरटी ल जल्दीच टीईटी परीक्षा कराए के निरदेस दीन हे। ए परीक्षा एससीईआरटी के निरदेस म व्यावसायिक परीक्षा मंडल डहार कोती ले जाही।
प्रधानमंत्री-अमृत भारत स्टेशन योजना
प्रधानमंत्री नरेन्द्र मोदी अमृत भारत स्टेशन योजना के तहत देसभर के पांच सौ चउवन स्टेशन मनके पुनर्विकास कार्य के अवइया छब्बीस फरवरी के सिलान्यास करही। ए मउका म ओमन एक हजार पांच सौ रेल ओव्हर ब्रिज अउ अंडर ब्रिज के लोकार्पण अउ सिलान्यास घलो वीडियो कॉन्फ्रेसिंग के माध्यम ले करहीं।
ए संबंध म रेलवे कोती ले लइका मन बर प्रतियोगिता के आयोजन करे जात हे। दू हजार सैंतालीस के विकसित भारत के विकसित रेल थीम म होय ए प्रतियोगता मन ल रायपुर रेलमंडल के दायरा म अवइया पचहत्तर स्कूल मन म आयोजित करे गीस। एमा चार हजार ले जादा लइका मन उछाह के संग भाग लीन।
गन्ना-समुचित लाभकारी मूल्य
केंद्र सरकार ह गन्ना के बराबर कीमत म आठ प्रतिसत के बढ़ोत्तरी कर दे हे। पाछू बछर गन्ना के समुचित मूल्य तीन सौ पंद्रह रूपिया प्रति कुंटल रिहीस हे, जउन बढ़ाके तीन सौ चालीस रूपिया हरेक कुंटल कर दे गेहे। संशोधित मूल्य अवइया एक अक्टूबर ले लागू होही।
ए फैसला ल ऐतिहासिक बतावत प्रधानमंत्री नरेंद्र मोदी ह किहीन हे कि सरकार, देसभर के किसान मन के हित म अपन संकल्प ल पूरा करे बर प्रतिबध्द हे। ओमन किहीन कि ए कदम ले देस के करोड़ गन्ना उत्पादक किसान मन ल फायदा होही।
राशनकार्ड नवीनीकरण
प्रदेस म सार्वजनिक वितरण प्रणाली के तहत पंजीकृत ससत्तर लाख रासनकार्ड मनके नवीनीकरण करे जावत हे। अभी तक चौसठ लाख बाईस हजार ले जादा रासनकार्ड धारक मन ह अर्जी जमा कर दे हे। एखर बर ऑनलाइन प्रक्रिया के संगेसंग खाद्य विभाग डहार ले तियार करे गे मोबाइल ऐप के मदद ले घलो ले जावत हे। विभाग डहार नवीनीकरण के आवेदन पच्चीस फरवरी तक मंजूर करे जाही।
किसान मेला
रायपुर के इंदिरा गांधी कृषि विश्वविद्यालय म काली ले ‘‘किसान मेला अउ कृषि प्रदर्शनी‘‘ के आयोजन करे जाही। कृषि मंत्री रामविचार नेताम ए मेला के उद्घाटन करही। उहें, कृषि विश्वविद्यालय के कुलपति डॉक्टर गिरिश चंदेल कारीकरम के पगरइती करही। रायपुर ग्रामीण क्षेत्र के विधायक मोतीलाल साहू अउ धरसींवा के विधायक अनुज शर्मा उद्घाटन समारोह के विशिष्ट अतिथि रइही। छब्बीस फरवरी के ए कृषि मेला अउ प्रदर्सनी के समापन होही।