उहें, जांजगीर म एक प्रेस वार्ता म विधायक राजेश मूणत ह बतइन कि एखर बर भाजपा के पूरा तियारी हे। चुनावी संखनाद करे बर केंद्रीय गृह मंत्री अमित शाह छत्तीसगढ़ आवत हे।
पीएम उषा शुभारंभ
प्रधानमंत्री नरेंद्र मोदी ह काली प्रधानमंत्री उच्चत्तर शिक्षा अभियान-पीएम उषा के सुभारंभ करीन। छत्तीसगढ़ के उच्च शिक्ष मंत्री बृजमोहन अग्रवाल रईपुर म वर्चुअल माध्यम ले ए कारीकरम म संघरीन। ए बेरा म ओमन बतइन कि ए अभियान म बस्तर विश्वविद्यालय ल सौ करोड़ रूपिया, रईपुर के पंडित रविशंकर शुक्ल विश्वविद्यालय अउ बिलासपुर के अटल बिहारी वाजपेयी विश्वविद्यालय ल बीस-बीस करोड़ रूपिया के संग दू ठन कॉलेज ल पांच-पांच करोड़ रूपिया दे हे। ओमन किहीन कि विकसित भारत दू हजार सैंतालीस के लक्ष्य पाय खातिर उच्चशिक्षा ल विश्वस्तरीय बनाना जरूरी हे। एखर सेति शिक्षा नीति दू हजार बीस ल लाय गेहे।
बिरनपुर सीबीआई जंाच
बेमेतरा जिला के बिरनपुर हत्याकांड के सीबीआई जांच करे जाही। विधानसभा म गृह मंत्री विजय शर्मा ह साजा विधायक ईश्वर साहू के ध्यानाकर्षण प्रस्ताव म चर्चा के बेरा दीन जानकारी। विधायक ईश्वर साहू ह सदन म किहीन कि ओमन मृतक युवक के पिता हवय अउ सदन ले जानना चाहत हे कि न्याय मिलही या नई अउ मिलही त कब तक मिलही। श्री साहू ह सवाल करीन कि ए मामला म छत्तीस झिन के नांव दे गे रिहीस, जेमा ले सिरिफ बारा झिन आरोपी मन के गिरफ्तारी होय हे। जुवाब म गृहमंत्री ह किहीन कि ए मामला म विवेचना जारी हे, जिखर खिलाफ प्रमाण मिले हे। ओमन जेल म हे, आगू घलो कार्रवाई जारी रइही।
उप मुख्यमंत्री अनुदान मांग
विधानसभा म काली उप मुख्यमंत्री विजय शर्मा के आने-आने विभाग ले जुड़े अनुदान मांग पारित कर दे गीस। अनुदान मांग उपर जुवाब म ओमन प्रदेस भर बर डायल एक सौ बारा के सेवा सुरू करे, प्रदेस के ग्यारा हजार ले जादा पंचायत म महिला सदन अउ अमृत सरोवर बनाय के घोसना करीन। ओमन बालोद जिला के गांव चीचा के मृतक तोरण साहू के परिवार वाले मन ल पांच लाख रूपिया देके संगेसंग बिलासपुर म नवा फायर स्टेसन बनाय के घोसना करीन। ओमन किहीन कि राज्य सरकार ह बजट म अइसन प्रावधान करे हे कि जेल सिरिफ बंदी गृह नइ भलूक सुधार गृह के रूप म आगू बढ़य। एखर सेति कैदी मन उंखर सउक के मुताबिक आने-आने क्षेत्र म कौसल उन्नयन कराय जात हे।
मुख्यमंत्री-रेत
प्रधानमंत्री आवास योजना के हितग्राही अब लीज वाले जघा ले छोटे गाड़ी म अपन मकान बनाय बर रेती ले जा सकही। मुख्यमंत्री विष्णुदेव साय ह ए घोसना करत किहीन कि हितग्राही मन ल रेती ले जाय म कोनो किसम के रायल्टी देबर नइ पड़य। काली विधानसभा म वित्त मंत्री ओ.पी. चौधरी ह मुख्यमंत्री के ए फइसला के जानकारी दीन। ओमन किहीन कि राज्य म पाछू पांच बछर म प्रधानमंत्री आवास योजना के आवास नइ बने हे। अभी अट्ठारा लाख घर बनत हे। हितग्राही अपन मकान के काम जल्दी पूरा करा सकय एखर बर ओमन ल ए छूट दे गेहे।
मुख्यमंत्री जन्मदिन
छत्तीसगढ़ के मुख्यमंत्री विष्णुदेव साय आज अपन साठवां जनमदिन मनावत हे। छत्तीसगढ़ के संगेसंग देसभर के राजनीतिज्ञ मन ह ओमन ल जनमदिन के बधई अउ सुभकामना दीन हे। प्रधानमंत्री नरेंद्र मोदी, केंद्रीय गृहमंत्री अमित शाह, केंद्रीय मंत्री अर्जुन मुंडा, उत्तर प्रदेस के मुख्यमंत्री योगी आदित्य नाथ, उत्तराखंड के मुख्यमंत्री पुष्कर धामी, मध्यप्रदेस के मुख्यमंत्री डॉक्टर मोहन यादव समेत छत्तीसगढ़ के राज्यपाल विश्वभूषण हरिचंदन, मंत्री मंडल के सहयोगी जनप्रतिनिधि अउ अधिकारी मन ह जनमदिन के बधई अउ सुभकामना दीन हे।
प्रधानमंत्री ह सोसल मीडिया प्लेटफार्म एक्स म अपन पोस्ट म लिखिन कि श्री साय छत्तीसगढ़ के जनता के सोच ल पूरा करे खातिर बने काम करत हे। गरीब अउ वंचित समुदाय बर गजब संसो करथे। मुख्यमंत्री ह अपन जनमदिन के सुभकामना बर प्रधानमंत्री के आभार जतइन हे।
इही बीच, मुख्यमंत्री विष्णुदेव साय ह जशपुर के बगिया के बालक आश्रम साला म लइका मन संग केक काट के अपन जनमदिन मनाइन अउ लइका मन ल भेंट दीन।
ड्रोन हेल्थ सर्विस
छत्तीसगढ़ के हेल्थ सर्विस डिलीवरी म ड्रोन बउरे जात हे। पायलेट प्रोजेक्ट के रूप म अंबिकापुर मेडिकल कॉलेज ल चुने गेहे। एमा काली सामुदायिक स्वास्थ्य केंद्र उदयपुर ले ब्लड सेंपल अउ ओटी कल्चर के जांच बर ड्रोन ले बने ढंग ले अंबिकापुर मेडिकल कॉलेज अमराय गीस। ड्रोन चलाय के प्रसिक्षण खातिर दू स्व-सहायता समूह के ड्रोन दीदी मन ल दिल्ली भेजे गे रिहीस। ए प्रोजेक्ट के सफल होय म राज्य के जम्मों जिला म एला लागू करे जाही।
खबर के मुताबिक केंद्र सरकार के पायलेट प्रोजेक्ट ‘‘यूज ऑफ ड्रोन टेक्नॉलाजी इन हेल्थ सर्विस डिलीवरी‘‘ ले देस के दूर-दराज के क्षेत्र म लोगन तक स्वास्थ सुविधा के पहुंच बढ़ाय खातिर ए परयोग करे जात हे। एखर बर स्वास्थ्य केंद्र चुने गेहे। ए पायलेट प्रोजेक्ट म राजमाता देवेन्द्र कुमारी सिंहदेव मेडिकल कॉलेज अंबिकापुर ल घलो चुने गेहे।
सरस मेला
रईपुर के साईंस कॉलेज मैदान म चलत क्षेत्रीय सरस मेला लोगन के आकर्षण के केंद्र बने हवय। ए मेला म छत्तीसगढ़ के एक सौ तैंतीस महिला स्व-सहायता समूह अपन उत्पाद ल लेके पहुंचे हे। उहें, मेला म असम, उत्तराखंड, मध्यप्रदेस, झारखंड अउ बिहार ले घलो महिला स्व-सहायता समूह ह अपन स्टाल लगाय हे। मुख्यमंत्री विष्णुदेव साय ह काली मेला के सुभारंभ करीन। ए बेरा म मुख्यमंत्री ह किहीन कि ए किसम के आयोजन ले लोगन ल रोजगार मिलथे। मेला अट्ठाइस फरवरी तक लगे रिही। ए मउका म मुख्यमंत्री ह भारत सरकार के योजना म कमती दर म लोगन ल भारत दाल अउ भारत आटा देवाय बर दू ठिन गाड़ी ल हरियर झंडी दिखाके रवाना करीन।
नगर निगम बजट
रईपुर के महापौर एजाज ढेबर ह आज नगर-निगम म एक हजार नौ सौ एक करोड़ ले जादा के बजट पेस करीन। एमा रईपुर म वर्ल्ड स्कील सेंटर खोले जाही, जेमा युवा मन ल कौशल प्रसिक्षण मिलही। उहें, छै करोड़ रूपिया के लागत ले तीन मिनी स्टेडियम बनाय के घोसना हवय। सहर म मेट्रो लाइट ट्रेन के बेवस्था करे जाही अउ सौ ठिन नवा इलेक्ट्रिक बस चलाय के जानकारी दे गेहे।
फैक्ट्री हादसा
रईपुर जिला के धरसींवा क्षेत्र के फैक्टीª म विस्फोट होय ले एक मजदूर के मउत होगे। उहें, दू आने मजदूर घायल होगे हे। ए घटना आज मंझनिया के हरय। मामला के जानकारी मिलतेच धरसींवा पुलिस अउ दमकल के गाड़ी मउका म पहुंचिन अउ राहत काम सुरू कर दीन। पुलिस ह घायल तीनों करमचारी ल उपचार बर अस्पताल भेजिन जिहां डॉक्टर मन एक मजदूर ल मृत घोषित कर दीन। पुलिस मामला के जांच करत हे।
भारत विकास डायरी
आकाशवाणी केंद रईपुर के प्रादेसिक समाचार एकांश कोति ले ‘‘भारत विकास डायरी‘‘ नांव ले आज ले एक नवा कारीकरम सुरू होवत हे। एमा छत्तीसगढ़ के आने-आने संसदीय क्षेत्र के संबंध म जानकारी दे जाही। आज एखर पहिली कड़ी के प्रसारण रतिहा आठ बजे ले करे जाही। एला छत्तीसगढ़ स्थित आकाशवाणी के सबो केंद्र एक संघरा प्रसारित करही। ए कारीकरम ल मीडियम वेव अउ एफएम दूनों चैनल म सुने जा सकत हे।