प्रधानमंत्री नरेंद्र मोदी ह काली बीस फरवरी के दुरूग जिला के भिलाई स्थित आईआईटी अउ प्रधानमंत्री उच्चतर शिक्षा अभियान पीएम उषा के वर्चुअल लोकार्पण करही। भिलाई म होवइया उद्घाटन समारोह म मुख्यमंत्री विष्णुदेव साय सामिल होही उहें, प्रधानमंत्री उच्चतर शिक्षा अभियान-पीएम उषा के लोकार्पण मउका उपर जगदलपुर स्थित सहीद महेन्द्र कर्मा विश्वविद्यालय परिसर म कारीकरम राखे गेहे। ए मउका म छात्र-छात्रा मन ह प्रधानमंत्री के ऑनलाइन संबोधन ल सुनही।
उहें, प्रधानमंत्री ह कबीरधाम जिला के महराजपुर स्थित नवीन केंद्रीय विद्यालय भवन के घलो वर्चुअल लोकार्पण करही। कबीरधाम म होवइया कारीकरम म उप मुख्यमंत्री विजय शर्मा अउ सांसद संतोष पांडेय ह विसेस रूप ले सामिल होही।
जानबा के मुताबिक केंद्रीय विद्यालय भवन बनाय के आधारसिला बछर दू हजार सत्रह म राखे गे रिहीस। ए बेरा केंद्रीय विद्यालय कक्षा ग्यारहवीं तक चलत हे, जेमा चार सौ छियासी छात्र मन पढ़ई करत हे। केंद्रीय विद्यालय ह ए बेरा आउटडोर स्टेडियम परिसर म चलत हवय।
पीएम श्री योजना
छत्तीसगढ़ म प्रधानमंत्री स्कूल फॉर राइजिंग इंडिया-पीएम श्री योजना के सुभारंभ अब ले थोरिक देर बाद होही। रईपुर के पंडित दीन दयाल उपाध्याय ऑडिटोरियम म होवइया ए कारीकरम म केंद्रीय शिक्षा मंत्री धर्मेन्द्र प्रधान ह मुख्य अतिथि होही त उहें, मुख्यमंत्री विष्णुदेव साय ह कारीकरम के अध्यक्षता करही। कारीकरम म अति विसिष्ट अतिथि के रूप म स्कूल शिक्षा मंत्री बृजमोहन अग्रवाल सामिल होही।
जानबा के मुताबिक केंद्र सरकार डहार ले राष्ट्रीय शिक्षा नीति दू हजार बीस के तहत देस भर के साढ़े चौदह हजार सरकारी स्कूल मन ल पीएम श्री योजना म अपग्रेड करे जात हे। ए योजना के तहत प्रदेस के दू सौ ग्यारा स्कूल मनके चयन पहिली चरण म करे गेहे। ए स्कूल के छात्र मन ल व्यवसायिक शिक्षा अउ इंहा के उद्योग मनके संग इंटर्नसिप अउ उद्यमिता के मउका ले जोड़े जाही।
खरीदी रोक
राज्य सासन ह विभागीय खरीदी उपर रोक लगा दे हे। ए बारे म वित्त विभाग ह जम्मों विभाग मन ल निरदेस जारी करके केहे हे कि अवइया उनतीस फरवरी के बाद कोनो भी प्रकार के खरीदी नइ करे जाय, फेर कोनो-कोनो खरीदी ल एखर ले अलग राखे गेहे। जारी निरदेस म केहे गे हे कि वित्तीय बछर के आखिरी महिना म कतकोन विभाग डहार ले जल्दबाजी म सिरिफ बजट के उपयोग करे बर जिनिश मनके खरीदे करे जाथे, एखर ले सासन के उपर फालतू खर्चा बाढ़ जथे।
एखरे सेति, चालू सत्र के बजट म प्रावधान करे गेहे कि खरीदी उपर उनतीस फरवरी के बाद रोक लगाय जाय। निरदेस म कोनो-कोनो काम काज ल ए आदेस के दायरा ले बाहर राखे गेहे, जेमा केंद्रीय क्षेत्रीय योजना, केंद्र प्रवर्तित योजना, विदेसी सहायता प्राप्त परयोजना, केंद्रीय वित्त आयोग के अनुसंसा ले मिले अनुदान, नाबार्ड पोषित योजना, सिडबी, राष्ट्रीय आवास बैंक अउ विसेस केंद्रीय सहायता पोषित परियोजना के काम-काज बर खरीदी करे जाय जिनिस सामिल हे। एखर अलावा जेल, अस्पताल, छात्रावास अउ आश्रम म भोजन, कपड़ा, दवई मन के खरीदी अउ पोषण आहार बर आंगन बाड़ी केंद्र मन म दे जाय खाद्यान्न के खरीदी बर दे जाय जिनिस घलो ए दायरा ले अलग राखे गेहे।
महतारी वंदन योजना
प्रदेस म महतारी वंदन योजना के फायदा पवइया मन बर अर्जी करे के काली आखिरी तारीख हरय। अर्जी भरे के काम पाछू पांच फरवरी ले चलत हे। प्रदेस म अब तक उनहत्तर लाख उनचालीस हजार ले जादा अर्जी मिल चुके हे। राज्य सासन डहार ले ए योजना बर ऑनलाइन अउ ऑफलाइन दोनो माध्यम ले अर्जी ले जात हे।
जानबा के मुताबिक राज्य म महिला सशक्तिकरण ल बढ़ावा देबर छत्तीसगढ़ सरकार डहार ले महतारी वंदन योजना लागू करे गेहे। ए योजना के फायदा पवइया पात्र माई लोगिन मन ल मार्च महिना ले पइसा मिले बर सुरू हो जही। महतारी वंदन योजना म राज्य सरकार कोति ले हर साल माई लोगिन मन ल बारह हजार रूपिया के सहायता रासि दे जाही।
समीक्षा निर्देश
प्रदेस के जम्मों नगरीय निकाय मनके निगम आयुक्त अउ मुख्य नगर कार्यपालिका अधिकारी मन हफ्ता म तीन दिन वार्ड मनके निरीक्षण करही। ए बारे म नगरीय प्रशासन विभाग ह दिसा-निरदेस जारी कर देहे। निरदेस म केहे गेहे कि नगर के साफ-सफई, काम-काज के गुणवत्ता अउ चलत काम ल बेरा म पूरा करे, अतिक्रमण रोके, राजस्व वसूली, प्रधानमंत्री आवास निर्माण, पेयजल अउ विद्युुत व्यवस्था के सुविधा लोगन मन तक बने ढंग ले पहुंचावय।
जानबा के मुताबिक उप मुख्यमंत्री अउ नगरीय प्रशासन मंत्री अरूण साव ह प्रदेस के जम्मों नगरी निकाय मन के काम-काज के समीक्षा के बाद अधिकारी मन ल ए जरूरी निरदेस देहे।
राशनकार्ड-नवीनीकरण
प्रदेस म सार्वजनिक वितरण प्रणाली के तहत ए बेरा चलत जम्मों ससत्तर लाख रासनकार्ड मनके नवीनीकरण के काम चलत हे। अब तक बैंसठ लाख उनहत्तर हजार ले जादा रासनकार्ड मनके नवीनीकरण बर अर्जी मिले हे। रासनकार्ड मनके नवीनीकरण बर खाद्य विभाग डहार ले ऑनलाइन सुविधा दे गेहे अउ संगेसंग रासनकार्ड धारी मन खुदे अपन मोबाइल ले खाद्य विभाग के ऐप के माध्यम ले रासनकार्ड के नवीनीकरण बर अर्जी भेज सकथे।
जानबा के मुताबिक रासनकार्ड नवीनीकरण के काम पच्चीस फरवरी तक करे जाही।
भाजपा-सहायाता केंद्र
भारतीय जनता पार्टी ह लोगन मनके समस्या के निपटारा बर रईपुर के कुशाभाऊ ठाकरे परिसर स्थित प्रदेस भाजपा कार्यालय म ‘‘सहायता केंद्र‘‘ सुरू करे हे। आज वन मंत्री केदार कश्यप ह आम लोगन अउ पार्टी कार्यकर्ता मनके समस्या ल सुनिन अउ उंखर निपटारा करे के आस्वासन दीन।
जानबा के मुताबिक सहायता केंद्र म हफ्ता म पांच दिन आने-आने मंत्री अउ भाजपा पदाधिकारी मन बइठ के आम लोगन अउ कार्यकर्ता मनके समस्या ल सुनही। एखर बर मंझनिया दू बजे ले संझा पांच बजे तक बेरा तय करे गेहे।
कांग्रेस-प्रदर्शन
आयकर विभाग डहार ले कांग्रेस के बैंक खाता फ्रीज करे के विरोध म पार्टी के पदाधिकारी अउ कार्यकर्ता मन ह आज प्रदेस के जम्मों जिला मुख्यालय मन म धरना प्रदर्सन करीन। राजधानी रईपुर म पूर्व विधायक धनेन्द्र साहू, अनिता शर्मा , महापौर एजाज ढेबर अउ सहर कांग्रेस अध्यक्ष गिरिश दुबे के संगेसंग बड़ संख्या म पदाधिकारी अउ कार्यकर्ता मन सामिल होइन। धरना प्रदर्सन के बाद आयकर आयुक्त ल ज्ञापन सौंपे गीस
ड्रोन सर्वे
बीजापुर जिला म स्वामित्व योजना के तहत एक सौ उनहत्तर ग्राम पंचायत मनके ड्रोन सर्वे करे जाही। जिला कलेक्टर अनुराग पांडेय ह बतइन कि ए काम केंद्र सरकार डहार ले गांव-गंवतरी वाले जघा म भूईया मनके राजस्व रिकार्ड ल अउ बने ढंग ले प्रमाणित करे के उद्देस्य ले कराय जाही। ओमन बतइन कि अभी तक राजस्व रिकार्ड म जतका गांव के जमीन होथे ओह एक या दो खसरा म समेट दे जाथे अउ व्यक्तिगत जघा के चिन्हांकन नइ हो पाय। जेखर सेति, एखर कोनो राजस्व रिकार्ड नइ बने हे। फेर अब केंद्र सरकार के योजना ले गांव के लोगन मन ल जमीन कि खुदे के पट्टा दे जाही अउ पट्टा के एवज म ओमन कर्जा घलो ले सकही।
अउ अब थोरकुन समाचार सार म –
– केंद्रीय माध्यमिक शिक्षा बोर्ड सीबीएसई के दसवीं अउ बारहवीं के मुख्य परीक्षा आज ले सुरू होगे। आज कक्षा दसवीं के संस्कृत अउ बारहवीं के हिन्दी बिषय के परीक्षा होइस।
– पंडित रविशंकर शुक्ल विश्वविद्यालय के सत्ताईसवां दीक्षांत समारोह काली होही। ए मउका म पचहत्तर छात्र मन ल एक सौ संतावन ठिन स्वर्ण पदक दे जाही।
– महासमंुद जिला के सिंघोडा अउ कोमाखंान पुलिस ह तीन ठिन आने-आने मामला म उनसठ लाख चालीस हजार रूपिया ले जादा के गांजा के जब्ती करे हे। ए मामला म पांच झिन आरोपी मन ल गिरफ्तार करे हे।
– कोंडागांव पुलिस ह जुन्ना सिक्का के बदला तिरपन लाख रूपिया के लालच देके नौ लाख रूपिया के ठगी करइया आरोपी ल राजस्थान अउ हरियाणा के सीमा ले गिरफ्तार करे गेहे।
अउ
– दंतेवाड़ा जिला के मालेवाही थाना क्षेत्र के घोंटिया मोड़ उपर आज एक ठिन शव बरामद करे गेहे। शव के तीर माओवादी मनके पर्चा मिले हे। पुलिस ह मामला दरज करके जांच सुरू कर देहे।