छत्तीसगढ़ म प्रधानमंत्री स्कूल फॉर राइजिंग इंडिया-पीएम श्री योजना के सुभारंभ काली 19 फरवरी के होही। रईपुर के पंडित दीनदयाल उपाध्याय ऑडिटोरियम म आयोजित होवइया ए कारीकरम म केंद्रीय शिक्षा मंत्री धर्मेन्द्र प्रधान मुख्य अतिथि होही। उहें, मुख्यमंत्री विष्णुदेव साय कारीकरम के अध्यक्षता करही। कारीकरम म अति विशिष्ट अतिथि के रूप म स्कूल शिक्षा मंत्री बृजमोहन अग्रवाल सामिल होही।
खबर के मुताबिक केंद्र सरकार डहार ले राष्ट्रीय शिक्षा नीति दू हजार बीस के चलत देसभर के साढ़े 14 हजार सरकारी स्कूल मन ल पीएमश्री योजना म अपग्रेड करे जावत हे। ए योजना के चलत छत्तीसगढ़ के दू सौ ग्यारा स्कूल मन के चयन पहिली चरण म करे गे हवय। एमा एलीमेन्ट्री स्तर म 193 अउ सेकेंडरी स्तर म 18 स्कूल सामिल हे। ए स्कूल मन के पढ़इया लइका मन ल व्यावसायिक शिक्षा अउ स्थानीय उद्योग के संगेसंग इंटर्नसिप अउ उद्यमिता ले जुडे़ के मउका घलो दे जाही।
प्रधानमंत्री-केंद्रीय विद्यालय लोकार्पण
प्रधानमंत्री नरेंद्र मोदी ह 20 फरवरी के कबीरधाम जिला के नवीन केंद्रीय विद्यालय भवन, महराजपुर के वर्चुअल लोकर्पण करही। ए समारोह म प्रदेस के उप मुख्यमंत्री विजय शर्मा अउ सांसद संतोष पांडेय ल विसेस रूप ले आमंत्रित करे गे हवय। ए संबंध म जिला कलेक्टर जनमेजय महोबे ह चलत तियारी ल देखिन।
जानबा के मुताबिक केंद्रीय विद्यालय भवन निर्माण कार्य के आधारसिला बछर दू हजार सत्रह म राखे गे रिहीस। अभी के बेरा म केंद्रीय विद्यालय कक्षा ग्यारहवीं तक संचालित हवय, जेमा 486 पढ़इया लइका मन पढ़त हवय। केंद्रीय विद्यालय वर्तमान म आउटडोर स्टेडियम परिसर म संचालित होवत हे।
निर्वाचन आयोग-चुनावी बॉण्ड
मुख्य निर्वाचन आयुक्त राजीव कुमार ह किहीन हे कि निर्वाचन आयोग, सर्वोच्च न्यायालय के आदेसानुसार चुनावी बॉण्ड के चंदा लेवई-देवई मनखे मन के जम्मों विवरण तय करे गे बेरा के भीतर प्रकासित करही। सर्वोच्च न्यायालय ह ए सेति, 13 मार्च के समय सीमा राखे हे। श्री कुमार ह किहीन हे कि आयोग ह चुनई म ई.वी.एम. या मतपत्र के जरिया ले मतदान कराय खातिर जउन सर्वोच्च न्यायालय के आदेस होही उसनेच कामबूता करही। सर्वोच्च न्यायालय मतपत्र के जरिया ले मतदान कराय के मांग ले जुड़े बहुत अकन याचिका मन ल सुनवाई करत हवय।
ग्लोबल समिट-उद्योग मंत्री
प्रदेस के वाणिज्य, उद्योग अउ श्रम मंत्री लखनलाल देवांगन ह किहीन हे कि राज्य के नवा औद्योगिक नीति कृषि अउ वन उपर होही, जेखर ले प्रदेस के किसान मन ल अउ आदिवासी अंचल म रहइया लोगन मन ल एखर सीधा लाभ मिल सकय। नई दिल्ली म आयोजित वार्षिक ग्लोबल समिट म ओमन किहीन कि नवा औद्योगिक नीति ले कृषि उत्पादक के मूल्य संवर्धन म बढ़त हो सकही।
माओवादी समाचार
बीजापुर जिला म माओवादी मन डहार ले छत्तीसगढ़ सशस्त्र बल के कंपनी कमांडर के हत्या करे जाय के मामला आगू आय हे। जानबा के मुताबिकसी.ए.एफ. के कंपनी कमांडर तेजऊ राम भुआर्य अउ प्रधान आरक्षक श्याम बिहारी अपन कुछू स्टाफ के संग सब्जी खरीदे बर निकले रिहीन। इही दौरान दू झन अज्ञात माओवादी मन ह कंपनी कमांडर ल कुलहाड़ी मारके उंखर हत्या कर दीन। एखर बाद म अतिरिक्त बल पहुंचे ले दूनों झिन माओवादी मन भाग गीन। मृतक ह कांकेर जिला के भानूप्रतापपुर के रहइया रिहीस अउ अभी के बेरा म ओह कुटरू थाना क्षेत्र के जैगूर सिविर म पदस्थ रिहीस।
उहें, राज्य सरकार डहार ले चलाय जावत माओवादी उन्मूलन अभियान ले प्रभावित होके 8 झिन माओवादी मन ह आज बीजापुर पुलिस के आगू आत्मसमर्पण कर दीन हे। ए जम्मों माओवादी मन ल राज्य सरकार के पुर्णवास नीति के चलत 25-25 हजार रूपिया के प्रोत्साहन रासि प्रदान करे गे हवय।
विद्यासागर महाराज-ब्रम्हलीन
प्रसिध्द जैन मुनि आचार्य विद्यासागर महाराज आज पंचतत्व म विलीन हो गीन। राजनांदगांव जिला के डोंगरगढ़ के चंद्रगिरि म पूजन के बाद उंखर अंतिम संस्कार करे गीस। अंतिम संस्कार कारीकरम म देस अउ प्रदेस के आने-आने जघा ले आखिरी दर्सन करे खातिर लोगन मन पहुंचिन।
प्रधानमंत्री नरेंद्र मोदी ह विद्यासागर महाराज के निधन म शोक जताइन हे। अपन ट्वीट संदेस के जरिया ओमन किहीन कि ओखर संवेदना महाराज के असंख्य श्रध्दालू मन संग हवय।
छत्तीसगढ़ के राज्यपाल विश्व भूषण हरिचंदन ह अपन शोक संदेस म किहीन कि विश्व कल्याण खातिर आचार्य विद्यासागर महाराज के समर्पण अविस्मरणीय हवय।
उहें, मुख्यमंत्री विष्णुदेव साय ह किहीन हे कि विद्यासागर महाराज के करे गे देस अउ समाज खातिर योगदान ल हमेसा याद राखे जाही।
इही बीच, राज्य सरकार ह आचार्य विद्यासागर महाराज के निधन म आधा दिन बर राजकीय शोक घोसित करीस हवय।
जानबा के मुताबिक आचार्य विद्यासागर महाराज ह पाछू रतिहा चंद्रगिरी तीर्थ म अपन शरीर ल त्याग दे रिहीस। ओमन बड़ दिन ले बीमार रिहीन अउ पाछू 3 दिन ले अन्नजल के त्याग करके उपवास करत रिहीन। आचार्य विद्यासागर महाराज के जनम 10 अक्टूबर सन् 1946 म कर्नाटक के बेलगांव जिला के सलगा गांव म होय रिहीस। ओमन बहुत लंबा बेरा ले डोंगरगढ़ के चंद्रगिरि तीर्थ म विराजमान रिहीन।
दुर्घटना
इही बीच, आचार्य विद्यासागर महाराज के अंतिम दर्सन खातिर आवत 3 झिन लोगन मनके सड़क हादसा म मउत होगिस। उहें, 3 झिन आने लोगन मन घायल होगिन। पुलिस ले मिले जानबा के मुताबिक 6 झिन मनखे मन एक ठिन गाड़ी म संवार होके आचार्य विद्यासागर महाराज के अंतिम दर्सन करे खातिर मध्यप्रदेस के सतना जिला ले डोंगरगढ़ बर निकले रिहीन। इही बीच, गोंदिया जिला के सालेकसा तहसील के पनगांव तीर, उंखर गाड़ी अनियंत्रित होके पुजारीटोला नहर म जा गिरिस, जेखर ले पानी म डूबके 3 झिन लोगन मनके मउत होगिस।
ऐति, दुर्ग के बोरसी चौक म पाछू संझा होय सड़क दुर्घटना म एक झिन पढ़इया नोनी के मउत होगिस।
सुकमा हेड क्वार्टर-तिरंगा
सुकमा जिले के पूवर्ती गंाव म सुरक्षा बल के परयास ले पहिली बार तिरंगा लहराय हवय। ए दौरान सुरक्षा बल के जवान मन ह माओवादी कमांडर हिड़मा के मां ले घलो भेंट करीन अउ उनला सबो जरूरी सुविधा देवाय के बात घलो कहिन। जानबा के मुताबिक पूवर्ती गांव म माओवादी मन ह अपन मुख्यालय बनाके राखे रिहीस, जेखर सेति गांव वाला मन गांव छोड़के जंगल डहार चले गे रिहीन। सुरक्षाबल ह जम्मों लोगन मनले अपन गांव वापस लहूटे बर अपील करीन हवय।
सिरपुर महोत्सव
छत्तीसगढ़ के ऐतिहासिक, धार्मिक अउ पुरातात्विक नगरी सिरपुर म 3 दिवसीय सिरपुर महोत्सव के आयोजन 24 फरवरी ले करे जाही। ए बेरा महोत्सव के तियारी बड़ जोर ले चलत हवय। महोत्सव म ए दरी लेजर शो अउ इंडियन आइडल फेम के प्रस्तुति मुख्य आर्कषण होही। ए महोत्सव के दौरान पहिली बार महानदी आरती के आयोजन घलो करे जाही। संगेसंग रोजेच संझा 4 ले 6 बजे के बीच स्थानीय लोक कलाकार मन अपन-अपन प्रस्तुति दिहीं। महोत्सव के समापन 26 फरवरी के होही।
प्रेस क्लब-चुनाव
राजधानी रईपुर के मोतीबाग के प्रेस क्लब म काली होय चुनई म प्रफुल्ल ठाकुर अध्यक्ष निर्वाचित होइस। छै ठिन पद बर 27 झिन प्रत्यासी मन मैदान म रहिन। प्रत्यासी मनके बीच जबरदस्त मुकाबला म संकल्प अउ संगवारी पैनल ह अपन कब्जा जमाइन। संकल्प पैनल ले उपाध्यक्ष पद म संदीप शुक्ला, कोषाध्यक्ष रमन हलवाई अउ संयुक्त सचिव पद बर बमलेश्वर सोनवानी ह जीत दर्ज करीन। उहें, संगवारी पैनल ले महासचिव पद बर वैभव शिव पांडेय अउ संयुक्त सचिव बर तृप्ति सोनी ह जीत हासिल करीन।