छत्तीसगढ़ के एकमात्र सीट समेत पंद्रह राज्य के छप्पन राज्य सभा सीट बर सत्ताइस फरवरी के वोट डारे जाही। छत्तीसगढ़ ले रायगढ़ के भाजपा नेता देवेन्द्र प्रताप सिंह ह आज विधानसभा परिसर पहुंचके अपन नामांकन पत्र दाखिल करीन। ओमन मुख्यमंत्री विष्णुदेव साय, उप मुख्यमंत्री विजय शर्मा अउ भाजपा के प्रदेस अध्यक्ष किरण सिंह देव के मौजूदगी म निर्वाचन अधिकारी दिनेश शर्मा ल नामांकन पत्र सौंपिन। राज्य सभा सीट बर नामांकन पत्र भरे के आखिरी तारीख काली पंद्रह फरवरी हे।
उहें, नामंाकन पत्र के जांच सोलह फरवरी के होही। खबर के मुताबिक केंद्रीय निर्वाचन आयोग ह छत्तीसगढ़ के एक सीट समेत पंद्रह राज्य के छप्पन राज्यसभा सीट बर उनतीस जनवरी के चुनाव कारीकरम के घोसना करे रिहीन।
रामलला दर्शन स्पेशल ट्रेन
मुख्यमंत्री विष्णुदेव साय ह आज रईपुर रेलवे स्टेसन ले अयोध्या स्पेसल ट्रेन ल हरियर झण्डी दिखाके के रवाना करीन। ए आस्था ट्रेन ले छत्तीसगढ़ के करीबन साढ़े तेरह सौ श्रध्दालू रामलला के दर्सन पाय बर गीन। ए मउका म मुख्यमंत्री ह किहीन कि राज्य मंत्री मंडल के सदस्य विधानसभा सत्र के बाद मार्च महिना म रामलला के दर्सन करे बर अयोध्या जाही। ए बेरा म सांसद सुनील सोनी, विधायक धरमलाल कौशिक, राजेश मूणत, खुशवंत साहेब अउ अनूज शर्मा मौजूद रिहीन।
विस राजीव युवा मितान क्लब
खेल मंत्री टंकराम वर्मा ह राजीव युवा मितान क्लब ल भंग करे के घोसना करीन हे। ओमन ए क्लब म करे गे अभि तक के खरज के जांच कराय के बात किहीन। विधानसभा म आज प्रश्नकाल के बेरा कांग्रेस सदस्य सावित्री मंडावी के सवाल के जुवाब म खेल मंत्री ह बताइन कि प्रदेस म एक लाख राजीव युवा मितान क्लब के गठन करे गेहे। एखर ले खिलाड़ी मन ल प्रसिक्षण अउ रामायण महोत्सव जइसन कारीकरम करवाय जाथे। ओमन बताइन कि क्लब बर एक सौ बत्तीस करोड़ रूपिया के प्रावधान करे गे रिहीस, जेमा ले करीबन चालीस करोड़ रूपिया बकाया हे। गोठबात म भाग लेवत पूर्व मंत्री अजय चंद्राकर, धर्मजीत ंिसंह अउ भाजपा विधायक राजेश मूणत ह राजीव युवा मितान क्लब बनाय के औचित्य ल लेके सवाल उठाइन। श्री मूणत ह क्लब ले युवा कांग्रेस उपर खरच के आरोप लगाइन। उहें, कांग्रेस सदस्य सावित्री मंडावी, संगीता सिन्हा अउ कुंवर ंिसंह निषाद ह एखर विरोध करत किहीन कि एखर ले स्थानीय अउ पारंपरिक खेल ल बढ़ावा दे गीस। एमा राजेश मूणत ह क्लब ल भंग करे अउ अजय चंद्राकर क्लब ले करे गे खरज के जांच कराय के मांग करीन। एमा खेल मंत्री ह राजीव युवा मितान क्लब ल भंग करे अउ ओखर माध्यम ले करे गे खरज के जांच कराय के घोसना करीन।
ग्रामोद्योग विकास योजना
सूक्ष्म, लघु अउ मध्यम उद्यम मंत्रालय के अध्यक्ष मनोज कुमार ह आज बस्तर जिला के गांव छोटा देवड़ा म ग्रामोद्योग विकास योजना म साठ झिन् कारीगर ल प्रसिक्षण के बाद प्रमाण-पत्र दीन। संगेसंग ओमन कारीगर मन ल साढ़े छै सौ ले जादा आधुनिक मसीन अउ टूलकीट घलो बांटिन कारीकरम म बोलत श्री कुमार ह किहीन कि बस्तर अपन परंपरागत कला अउ कौशल बर परसिध्द हे। इंहा के कारीगर अपन ए कला ल पीढ़ी-दर-पीढ़ी सकेतल आवत हे।
वित्त मंत्री-बजट चर्चा
वित्त मंत्री ओ.पी. चौधरी ह किहीन हे कि राज्य सरकार किसान मन बर समर्पित हवय। ए बात ल ओमन विधानसभा म बजट ल लेके होय चर्चा म भाग लेबर पक्ष अउ विपक्ष के सदस्य मनके आभार जतात किहीन ओमन राज्य सरकार बस्तर अउ सरगुजा के विकास म धियान दिही। सरगुजा अउ बस्तर ल इकोटूरिज्म म नेचूरोपैथी डेस्टिनेसन के रूप म विकसित करे के परयास करे जाही। उहें, बस्तर क्षेत्र म लघु वनोपज के प्रसंस्करण खातिर उद्योग लगाय जाही। संगेसंग राज्य सरकार गोण्डी भाषा ल आगू बढ़ाय बर घलो प्रतिबध्द हवय। वित्त मंत्री ह किहीन कि नवा रईपुर ल आईटी सेक्टर बनाय के संगेसंग टेक्नालॉजी ल बने ढंग ले बउरे जाही। एखर ले प्रदेस म बड़े बदलावा आही।
भाजपा-बैठक
अवइया लोकसभा चुनाव ल देखत भारतीय जनता पार्टी के प्रदेस इकाई कोति ले आज रईपुर के पार्टी प्रदेस कार्यालय कुशाभाऊ ठाकरे परिसर म सबो मोर्चा के प्रदेस अध्यक्ष महामंत्री अउ प्रकोष्ठ के प्रदेस संयोजक सह-संयोजक के बइठका राखे गीस। बइठका म पार्टी के क्षेत्रीय संगठन महामंत्री अजय जामवाल अउ प्रदेस संगठन महामंत्री पवन साय ह लोकसभा चुनाव ल लेके पार्टी कोति ले चलत आने-आने कारीकरम के बढ़वार के समीक्षा करीन। संगेसंग अवइया कार्य योजना ल लेके मार्गदर्सन देवत प्रदेस के सबो ग्यारा लोकसभा सीट म भाजपा के जीत तय करे खातिर मोर्चा प्रकोष्ठ के पदाधिकारी मन ल प्रेरित करे गीस।
भाजपा लाभार्थी-सम्मेलन
भाजपा के प्रदेस कार्यालय कुशाभाऊ ठाकरे परिसर म राज्य स्तरीय लाभार्थी सम्मेलन के आयोजन करे गीस। सम्मेलन म राज्य सभा सांसद अउ कारीकरम के छत्तीसगढ़ प्रभारी बाबूराम निषाद ह किहीन कि केंद्र सरकार कोति ले जउन कारीकरम तय करे गेहे ओला हम सबो मिलके पूरा करबो। ओमन किहीन कि लाभार्थी सम्मेलन ले केंद्र अउ राज्य सरकार के योजना के फायदा लेवइया हितग्राही मन ले मिलके उंखर ले योजना के संबंध म जानकारी लेबो। संगेसंग लोगन ल सरकार कोति ले चलाय जात योजना के जानकारी दे जाही। सम्मेलन म बोलत प्रदेस भाजपा अध्यक्ष किरण सिंह देव हे किहीन कि पहिली बीस अउ इक्कीस फरवरी के लोकसभा स्तर म अउ ओखर बाद बाईस अउ तेइस फरवरी के मंडल स्तर म सम्मेलन राखे जाही। एखर ले भाजपा के करीबन एक लाख चवालीस हजार कार्यकर्ता प्रदेस भर के करीब चालीस लाख लाभार्थी मन ले गोठबात करके प्रधानमंत्री आवास योजना समेत जम्मों जन-कल्याणकारी योजना के संबंध म जानकारी लिही।
उहें, प्रदेस संगठन महामंत्री पवन साय ह किहीन कि पार्टी के विचारधारा ल लाभार्थी सम्मेलन ले जन-जन तक पहुंचाय जाही। सम्मेलन म लोकसभा के संयोजक सह-संयोजक, कलस्टर प्रभारी समेत बड़ संख्या म कार्यकर्ता अउ प्रदेस पदाधिकारी मौजूद रिहीन।
ट्रेन परिचालन
दक्षिण पूर्व मध्य रेलवे के बिलासपुर मंडल के अनूपपुर-न्यू कटनी सेक्सन के घुनघुटी स्टेसन म तिसर लाइन कनेक्टीविटी के काम करे जाही। एखर सेति अठ्ठारा ले छब्बीस फरवरी तक ए रूठ म चलइया चौबीस ठिन ट्रेन के अवई-जवई रद्द कर देहे। एमा चिरमिरी-चंदिया रोड पैसेंजर, कटनी-चिरमिरी पैसेंजर स्पेसल, जबलपुर-अंबिकापुर एक्सप्रेस, बिलासपुर -इंदौर-नर्मदा एक्सप्रेस, बिलासपुर-भोपाल एक्सप्रेस अउ बिलासपुर-रींवा एक्सप्रेस सामिल हे। अइसने नागपुर सहडोल, चिरमिरी-अनूपपुर पैसेंजर स्पेसल, रींवा-चिरमिरी-एक्सप्रेस, लखनऊ-रईपुर-गरीब रथ एक्सप्रेस, सांतरागाछी-जबलपुर एक्सप्रेस अउ दुरूग-अजमेर एक्सप्रेस घलो रद्द रइही।
कराते सॉफ्ट बाल
बिलासपुर के दू झिन खिलाड़ी ल अंतर्राष्ट्रीय कराते प्रतियोगिता बर चुने गेहे। छत्तीसगढ़ कराते फेडरेसन के महासचिव खेत्रो महानंद ह खेल मंत्री टंकराम वर्मा ले भेंट करके ए जानकारी दीन। श्री महानंद ह बताइन कि सोला ले पच्चीस फरवरी तक संयुक्त अरब अमिरात म राखेगे ए प्रतियोगिता म बिलासपुर जिला के दू खिलाड़ी स्नेहा बंजारे, सिनीयर बालिका अड़सठ किलो ग्राम वर्ग म अउ देवाशीष यादव सब जूूनियर बालक पैंतीस किलो ग्राम वरग म भाग लिहीं।
उहें, कबीरधाम जिला म राखेगे अंडर फोर्टिन सॉफ्ट बाल स्कूल नेशनल गेम्स म छत्तीसगढ़ के टीम ह स्वर्ण पदक पाय रिहीस।
बसंत पंचमी
बसंत पंचमी अउ सरस्वती पूजा आज छत्तीसगढ़ समेत देस के आने-आने हिस्सा म श्रध्दा भक्ति अउ उछाह के संग मनाय जात हे। ए बेरा म ज्ञान अउ विद्या के देवी मां सरस्वती के पूजा-पाठ करत असीस ले गीस। राष्ट्रपति द्रौपदी मुर्मू अउ प्रधानमंत्री नरेंद्र मोदी ह लोगन ल बसंत पंचमी अउ सरस्वती पूजा के सुभकामना दीन हे।
ग्राम सड़क योजना-निरीक्षण
प्रधानमंत्री ग्राम सड़क योजना के राष्ट्रीय गुणवत्ता समीक्षक ए महिना सुकमा अउ बीजापुर जिला के दउरा करही। छत्तीसगढ़ ग्रामीण सड़क विकास अधिकरण के मुख्य कार्यपालन अधिकारी ह बताइन कि पंकज बकाया सुकमा अउ बीजापुर जिला म प्रधानमंत्री ग्राम सड़क योजना म बने रद्दा निर्माण काम के गुणवत्ता के जांच करही।