विस-शराब
मुख्यमंत्री विष्णुदेव साय ह कहिन कि प्रदेस म सराब बार के देर रतिहा तक खुले अउ नियम के उल्लंघन म कड़ा कार्रवाई करे जाही। ओमन किहीन कि नियम के सख्ती ले पालन कराय बर निरदेस जारी कर दे गेहे।
विधानसभा म आज प्रश्नकाल म भाजपा के वरिष्ठ विधायक धरमलाल कौशिक ह प्रदेस के बीरय-बार म नियम के उल्लंघन ल लेके प्रश्न करीन। श्री कौशिक ह सराब दुकान ले मिलइया राजस्व के मामला घलो उठईन। ओमन कहिन कि बछर दू हजार इक्कीस-बाईस म बावन करोड़ सत्ताईस लाख अउ बछर दू हजार बाईस-तेईस म मात्र चौबीस लाख ऑनलाइन सराब बिक्री ले राजस्व मिले हे। ओमन पूछीन कि का राजस्व म अंतर ल लेके जांच कराही। जवाब म मुख्यमंत्री ह कहिन कि ए मामला के जांच कराय जाही।
भाजपा-सहयोग केन्द्र
भरतीय जनता पार्टी के ‘‘सहयोग केन्द्र‘‘ के आज ले सुरूवात होगे हे। प्रदेस भाजपा कार्यालय कुशाभाऊ ठाकरे परिसर म आयोजित सहयोग केन्द्र म पहिली दिन महिला अउ बाल विकास मंत्री लक्ष्मी राजवाड़े उपस्थिति रिहीन। ए दउरान श्रीमती राजवाड़े आम जनता अउ पार्टी कार्यकर्ता मनके समस्या ल जानीन अउ ओमन ल सही समाधान के आश्वासन दीन।
खबर के मुताबिक भाजपा के ए सहयोग केन्द्र म हफ्ता म पांच दिन अलग-अलग मंत्री बइठ के आम जनता अउ कार्यकर्ता मनके समस्या ल सुनही। काली चौदह फरवरी के खाद्य मंत्री दयालदास बघेल उपस्थित रइही।
रामलला दर्शन-स्पेशल ट्रेन
अयोध्या म रामलला दर्शन बर छत्तीसगढ़ ले आस्थ स्पेशल ट्रेन काली रईपुर ले रवाना होही। ए ट्रेन ल मुख्यमंत्री विष्णुदेव साय हरा झंडा देखाके रवाना करही। ए मउका म संस्कृति मंत्री बृजमोहन अग्रवाल संग आने मंत्री अउ भाजपा पदाधिकारी संग कार्यकर्ता उपस्थित रइही।
भारत जोड़ो न्याय यात्रा
कांग्रेस के पूर्व अध्यक्ष राहुल गांधी ह कहिन कि देस म इंडिया गठबंधन के सरकार बने म किसान मन ल उंखर फसल म स्वामीनाथन आयोग के अनुसार न्यूनतम समर्थन मूल्य के कानूनी गारंटी देके फैसला करे हे। एखर ले देस के पन्द्रह करोड़ किसान मन ल लाभ मिलही। श्री गांधी आज भारत जोड़ो न्याय यात्रा के दउरान अंबिकापुर म राखे गे सभा ल संबोधित करत रिहीन। ओमन केन्द्र सरकार उपर निसाना साधत कहिन कि आज महंगाई आसमान छूवत हे। श्री गांधी ह देस म चीनी सामान ल बेचे जाय म आपत्ति जतईन।
उहें, पार्टी के राष्ट्रीय अध्यक्ष मल्लिकार्जुन खड़गे ह किहीन कि भाजपा के कथनी अउ करनी म अंतर स्पष्ट दिखत हे। पाछु दस साल म मोदी सरकार ह देस के किसान मन ले करे गे वादा ल पूरा नइ कर पाय हे। ओमन छत्तीसगढ़ सरकार उपर कटाक्ष करत कहिन कि सत्ता म आवत ही सरकार ह हसदेव के जंगल मन म पन्द्रह हजार पेड़ काटे के अनुमति दीन। ओमन कहिन कि हसदेव बचाव आंदोलन ल कांग्रेस ह समर्थन देहे।
इही बीच, राहुल गांधी के बलरामपुर म होवइया भारत जोड़ो न्याय यात्रा स्थगित होगे हे।
अग्निवीर भर्ती
भारतीय थल सेना म अग्निवीर भर्ती बर ऑनलाइन आवेदन के प्रक्रिया आज ले सुरू होगे हे, जउन बाईस मार्च तक चलही। अग्निवीर के भर्ती जनरल, तकनीकी, क्लर्क, ट्रेडमैन, महिला सैन्य पुलिस अउ रेगुलर कैडर भर्ती धर्मगुरू, नर्सिंग सहयोगी अउ हवलदार एस.ए.सी. के पद म होही। ऑनलाइन परीक्षा बाईस अप्रैल के बाद होय के संभावना हे। ए बछर बस्तर संभाग बर जगदलपुर म ऑनलाइन परीक्षा केन्द्र बनाय जाही।
व्याख्यता ऑनलाइन कॉउंसिलिंग
शिक्षक सीधी भर्ती बछर-दू हजार तेईस म व्याख्यता पद बर अभ्यर्थी मनके चौथा चरण के ऑनलाइन काउसिलिंग अवइया सोलह फरवरी ले उन्नीस फरवरी तक स्कूल सिक्षा विभाग के वेबसाइट के माध्यम ले सुरू करे जाही। ए काउंसिलिंग म व्यापमं के परीक्षा परिणाम के अनुसार व्याख्यता पद बर एक सौ चार अभ्यर्थी मनके कटऑफ रैंक के विस्तृत जानकारी विभाग के पोर्टल म देखे जा सकत हे। काउंसिलिंग के बाद दस्तावेज सत्यापन लोक सिक्षण संचालनालय नवा रईपुर म करे जाही।
जेईई मेन्स परिणाम
संयुक्त प्रवेस परीक्षा – जे.ई.ई. मेन्स – दो हजार चौबीस के परिणाम जारी कर दे गेहे। एखर पहिली सत्र म भाग लेवइया परीक्षार्थी अपन परिणाम आधिकारिक वेबसाइट म देख सकत हे। आकाशवाणी ले बातचीत म एन.टी.ए. के निदेसक सुबोध कुमार सिंह ह बतईन कि एक सौ परसेटाइल हासिल करइया छात्र मन म सात तेलांगाना ले, तीन-तीन आंध्रप्रदेश, राजस्थान अउ महाराष्ट्र ले, दिल्ली ले दू अउ गुजरात, कर्नाटक संग तमिलनाडु ले एक-एक छात्र हे।
विश्व रेडियो दिवस
आज विश्व रेडियो दिवस हरय। एखर उद्देश्य रेडिया के महत्व के बारे म लोगन म जागरूकता बढ़ाना अउ रेडियो के माध्यम ले सूचना के प्रसार ल बढ़ावा देना हरय। ए बछर के बिसय हे – ‘‘रेडियो एक सदी की सूचना, मनोरंजन और शिक्षा‘‘।
ओति, चेन्न्ई सामुदायिक रेडियो सम्मेलन ल संबोधित करत केन्द्रीय सूचना अउ प्रसारण मंत्री अनुराग सिंह ठाकुर ह कहिन कि 2014 के बाद सरकार ह सामुदायिक रेडियो केन्द्र ल बढ़ावा देके निर्णय के तहत सामुदायिक रेडियो बर सात लाख पचास हजार रूपिया के सहायता प्रदान करे के संगेसंग अतिरिक्त कोष जारी करीन। ओमन किहीन कि स्थानीय भासा म सामुदायिक रेडियो के काम करना ‘‘सबका साथ-सबका विकास‘‘ बर महत्वपूर्ण हे। ओमन कहिन कि प्रधानमंत्री नरेन्द्र मोदी ह दिखईन कि साधारण जन-समुदाय तक संचार के पहुंच बहुत महत्वपूर्ण होथे। श्री ठाकुर ह कहिन कि देस म कहूं भी रहइया आखिरी मनखे तक सूचना पहुंचाय के रेडियो ह बढ़िया माध्यम हरय।
ऐति, छत्तीसगढ़ म घलो विश्व रेडियो दिवस के मउका म आने-आने कारीकरम करे जात हे। राजधानी रईपुर म ओल्ड लिसनर्स ग्रुप ऑफ छत्तीसगढ़ के तत्वावधान म कार्यक्रम के आयोजन करे गीस। कार्यक्रम म आकाशवाणी केन्द्र रायपुर के सहायक निदेशक-कार्यक्रम लखनलाल भौर्य सामिल होइन। ए मउका म वक्ता मन ह वर्तमान परिवेश म रेडियो के महत्ता ल रेखांकित करत किहीन कि रेडियो के प्रासंगिकता सदैव बरकरार रइही।
साक्षरता मिशन
राज्य शैक्षणिक अनुसंधान अउ प्रशिक्षण संस्थान-एस.सी.ई.आर.टी. अउ राज्य साक्षरता मिशन प्राधिकरण के संचालक राजेन्द्र कुमार कटारा ह किहीन कि नीति आयोग डहार ले निर्धारित आकांक्षी जिला अउ प्रदेस म कम साक्षरता दर वाले पिछड़ा जिला ल सत-प्रतिशत साक्षर बनाय के दिसा म काम करय। एखर बर केन्द्र सरकार के उल्लास ऐप म सर्वें के काम तुरते सुरू करे जाय। श्री कटारा काली राज्य स्तरीय बैठक ल संबोधित करत रिहीन। बइठका म प्रदेस के सबो जिला के जिला सिक्षा अधिकारी, डाइट के प्राचार्य अउ जिला साक्षरता मिशन के जिला परियोजना अधिकारी मौजूद रिहीन।
बसंत पंचमी
काली बसंत पंचमी हरय। ए बछर प्रदेस म बसंत पंचमी ल सरस्वती पजा अउ मातृ-पितृ दिवस के रूप म मनाए जाही। ए दिन स्कूल मन म सरस्वती पूजा के संगेसंग मातृ-पितृ पूजन घलो कर जाही। स्कूल सिक्षा विभाग ह ए संबंध म आदेस जारी कर देहे।
खबर के मुताबिक मुख्यमंत्री विष्णुदेव साय ह अभी कुछ दिन पहिली जशपुर प्रवास के दउरान ग्राम कंडोरा म आयोजित कारीकरम म छत्तीसगढ़ म चउदा फरवरी के मातृ-पितृ पूजन दिवस मनाए के घोषणा करे रिहीन।