ऐति, छत्तीसगढ़ के रायपुर जिला के आरंग स्थित केंद्रीय रिजर्व पुलिस बल कैंप म रोजगार मेला राखे गीस। कारीकरम म केंद्रीय वाणिज्य अउ उद्योग राज्यमंत्री अनुप्रिया पटेल सामिल होइन। ए मउका म ओमन आने-आने केंद्रीय सशस्त्र बल अउ आने-आने विभाग मन म चुने गे पच्हत्तर अभ्यर्थी मन ल नियुक्ति पत्र दे गीस।
जानबा के मुताबिक रोजगार मेला देस भर म सैंतालीस ठिन जघा मन म चलत हे। नवा कर्मचारी मनके भर्ती केंद्र सरकार अउ राज्य सरकार कोति ले करे जात हे। केंद्र शासित प्रदेस ह घलो एमा मदद करत हे। नव-नियुक्त कर्मचारी मन ल सरकार के आने-आने मंत्रालय अउ विभाग मन तैनात करे जाही।
भाजपा-राज्यसभा प्रत्याशी
भारतीय जनता पार्टी ह राज्यसभा चुनई बर अपन चौदह प्रत्यासी मनके घोसना कर देहे। पार्टी ह छत्तीसगढ़ ले अनुसूचित जनजाति वर्ग के गोड़ राजा देवेन्द्र प्रताप सिंह ल उम्मीदवार बनाय हे। एमन लैलूंगा जिला पंचायत सदस्य म ए बेरा रेलवे हिंदी सलाहकार समिति म सदस्य हवय। एखर पहिली श्री सिंह ह बछर दू हजार पांच ले दू हजार ग्यारा तक अनुसूचित जनजाति मोर्चा म जिला ले लेके राष्ट्रीय कार्यकारिणी म आने-आने काम-काज संभाल चुके हे। देवेन्द्र प्रताप सिंह ह रायगढ़ के महाराजा चक्रधर सिंह के प्रपौत्र हरय। राज्य म ओखरे नाव ले चक्रधर समारोह हर बछर होथे।
मुख्यमंत्री-गोड़ महासभा कार्यक्रम
मुख्यमंत्री विष्णुदेव साय ह किहीन हे कि केंद्र कोति ले ओमन ल मुख्यमंत्री के जिम्मेवारी देके आदिवासी समाज के मान बढ़ाय हे। मुख्यमंत्री ह काली दुरूग म केंद्रीय गोड़ महासभा धमधागढ़ डहार ले राखेगे सम्मान समारोह ल संबोधित करत रिहीन। ओमन किहीन कि राज्य सरकार ह प्रधानमंत्री के गारंटी ल पूरा करे म जुटे हे। गारंटी मन म सामिल राज्य के अठ्ठारा लाख ले जादा पात्र परिवार मन ल प्रधानमंत्री आवास के मंजूरी देके संगेसंग किसान मन ल दू साल के बांचे बोनस के पइसा दे दे गेहे। ओमन बताइन कि महतारी वंदन योजना के सुरूआत एक मार्च ले करे जाही।
कारीकरम म मुख्यमंत्री ह आदिवासी लोकनायक बिरसामुंडा के मूर्ति लगाय बर पच्चीस लाख रूपिया के संगेसंग दुरूग म बने गोंडवाना भवन म उपराहा कमरा बनाय बर पचास लाख रूपिया देके घोसना करीन।
शक्ति वंदन अभियान
शिक्षा मंत्री बृजमोहन अग्रवाल ह काली रायपुर म महिला स्व-सहायता समूह सशक्तिकरण के तहत सक्ति वदंन अभियान कारीकरम म सामिल होइन। ए मउका म ओमन किहीन कि प्रधानमंत्री ह माईलोगिन मनके हित म कतकोन योजना सुरू करे हे। ए योजना मन ले माईलोगिन मन के जिनगी म सुधार आय हे। माईलोगिन मन अब आर्थिक रूप ले स्वतंत्र होवत हे। ए जम्मों योजना मन ल अउ जादा लोगन मन तक पहुंचाय जाय। कारीकरम म श्री अग्रवाल ह आने-आने योजना मनके लाभार्थी मन ल चेक बांटिन।
ग्राम परिक्रमा यात्रा
भाजपा किसान मोर्चा डहार ले आज राष्ट्रीय स्तर म ग्राम परिक्रमा यात्रा के सुरूआत करे गीस। एखर सुभारंभ उत्तर प्रदेस के मुख्यमंत्री योगी आदित्य नाथ ह करीन। प्रदेस म रायपुर जिला के रायखेड़ा म राखेगे कारीकरम म किसान मोर्चा के राष्ट्रीय कोषाध्यक्ष अउ छत्तीसगढ़ प्रभारी रामपाल यादव ह ऑनलाइन जुड़ के ए कारीकरम के सुभारंभ करीन। कारीकरम म किसान मन ल सम्मान घलो करे गीस। ए मउका म किसान मोर्चा के पूर्व प्रदेस अध्यक्ष संदीप शर्मा, प्रदेस मंत्री अजय साहू के संगेसंग बड़ संख्या म कार्यकर्ता अउ गांव के लोगन मन आय रिहीन।
सड़क सुरक्षा अवलोकन
सुप्रीम कोर्ट कमेटी ऑन सेफ्टी के अध्यक्ष न्यायमूर्ति अभय मनोहर सप्रे ह काली दुरूग ले रायपुर सड़क रद्दा के बीच राष्ट्रीय राजमार्ग प्राधिकरण अउ लोक निर्माण विभाग डहार ले करे जात सड़क सुरक्षा उपाय के निरीक्षण करीन। ए दौरान ओमन हाइवे पेट्रोल वाहन, एबुलेंस, स्पीड रडार गन, इंटरसेप्टर व्हीकल, अउ ब्लैक स्पॉट के निरीक्षण करके जरूरी निरदेस दीन।
अमरजीत भगत-आईटी
आयकर विभाग ह दावा करे हे कि पूर्व मंत्री अमरजीत भगत ह अपन करीबी सहयोगी मनके माध्यम ले तेरह करोड़ रूपिया के कथित अवैध कमई ले जमीन मनके खरीदी म निवेस करे हे। आयकर विभाग कोति ले जारी बयान म बताय गेहे कि रईपुर, सरगुजा, सीतापुर अउ रायगढ़ के पच्चीस ले जादा जघा म पाछु दिन छापा के कार्रवाई करे गीस। जेमा, पता चलीस कि पूर्व मंत्री श्री भगत ह अपन करीबी मनके माध्यम ले नगद तेरह करोड़ रूपिया के अवैध कमई करे हे।
माओवादी अपहरण
सुकमा जिला के जगरगुंडा इलाका ले माओवादी मन ह चार झिन मजूर मनके अपहरण कर लेहे। हमर संवाददाता ले मिले जानबा के मुताबिक जिला के टेकलगुड़ा-जोन्नागुड़ा जघा म जल जीवन मिसन के काम चलत हे। इही काम म इंहे के मजूर मन लगे रिहीन तभेच माओवादी मन ह इंहा पहुंच के जेसीबी मसीन के संग चार झिन मजूर मन ल अपन संग जंगल कोति लेगे। घटना के जानबा मिलतेच परिवार वाले मन ह माओवादी मन ले मजूर मन ल छोड़े के अपील करे हे।
धरना-प्रदर्शन
जांजगीर-चांपा जिला म स्थित के.एस.के. महानदी पावर प्लांट के खिलाफ भू-विस्थापित किसान मनके प्रदर्सन आज दूसर दिन घलो चलत हे। ए किसान मन तेइस सूत्रीय मांग ल लेके प्रदर्सन करत हे। संयंत्र प्रबंधन अउ किसान मनके बीच गोठबात बने ढंग ले नइ होय के बाद नाराज किसान मन ह संयंत्र के तीनों गेट ल बंद कर देहे मउका म प्रशासन के अधिकारी अउ पुलिस बल तैनात हवय।
स्कूल-उद्घाटन
बीजापुर जिला के माओवाद प्रभावित ग्राम बेचरम म प्राथमिक शाला भवन के उद्घाटन गांव के महिला बुधरी बाई ह करीन। ए मउका म जिला कलेक्टर अनुराग पांडेय ह किहीन कि ज्ञान के दीया ले आतंक के घुप्प अंधियारा ह दूर भागही। ओमन गांव के लोगन मन ल शिक्षा के महत्ता बतावत किहीन कि पढ़ई – लिखई अइसन माध्यम हरय जेखर ले परेसानी के बेरा म घलो जीत मिल सकथे।
विश्व रेडियो दिवस
काली विश्व रेडियो दिवस हरय। ए मउका म ओल्ड लिसनर्स ग्रुप आफ छत्तीसगढ़ जोन कोति ले रायपुर के वृंदावन हाल म कारीकरम राखे गेहे, जेमा प्रदेस के रेडियो सुनइया मन ह ए कारीकरम म सामिल होही। कारीकरम म कतकोन बड़का कलाकार मन के प्रस्तुति के संगेसंग साहित्यकार मन ह घलो अपन रचना ल पढ़ही।
मुख्यमंत्री विष्णुदेव साय ह विश्व रेडियो दिवस के बधाई देवत किहीन कि रेडियो ह संचार के बड़का माध्यम हरय। संगेसंग शिक्षा के प्रसार म घलो रेडियो के महत्ता ल समझाए के उद्देस्य ले विश्व रेडियो दिवस मनाय जात हे।
प्रदेस म एक घांव फेर मौसम बदल गेहे। पाछू चौबीस घंटा के दौरान रायपुर, बेमेतरा, कवर्धा बलौदाबाजार अउ बसना के संगेसंग सरगुजा संभाग के मैनपाट म जोरदरहा बरसा होय हे। बरसा के संगेसंग कतकोन जघा म करा घलो गिरे हे। हुरहा होय बरसा ले रवि फसल के संगेसंग साग-भाजी के फसल मन ल घलो नकसान होय के संभावना हे। मौसम विभाग के मुताबिक नवा पश्चिमी विक्षोभ के परभाव ले मौसम म बदलाव होय हे। अवइया चौबीस घंटा के दौरान रायपुर, बिलासपुर अउ सरगुजा संभाग के कतकोन जिला म गरज-चमक के संग बरसा होय के संभावना बताय गेहे।