राष्ट्रीय रोजगार मेला के आयोजन काली बारह फरवरी के देसभर के छियालिस ठिन जघा मन म करे जाही। ए दौरान प्रधानमंत्री नरेंद्र मोदी वर्चुअल कारीकरम म नव-नियुक्त केंद्रीय कर्मी मन ल नियुक्ती पत्र बांटही संगे ओमन ल संबोधित घलो करही। ए आयोजन म केंद्रीय मंत्री घलो मौजूद रइही।
छत्तीसगढ़ म केंद्रीय रिजर्व पुलिस बल के आरंग स्थित उप महानिरीक्षक के ग्रुप कार्यालय म बिहनिया साढ़े नौ बजे ए मेला राखे जाही। एखर पहिली तीस नवंबर के रोजगार मेला राखे गे रिहीस, जेमा इंक्यावन हजार जवान लइका मन ल प्रधानमंत्री ह एपांइटमेंट लेटर दे रिहीन।
अमित शाह-सीएए
केंद्रीय गृहमंत्री अमित शाह ह किहीन हे कि अवइया लोकसभा चुनाव ले पहिली नागरिकता संशोधन कानून सीएए ल अधिसूचित कर दे जाही। एक ठिन कारीकरम म ओमन किहीन कि ए कानून ह नागरिकता देबर हरय अउ ए कानून ले कोनो के नागरिकता नइ जाही। इंहा ए बतादन कि नागरिकता संशोधन कानून ह दिसंबर दू हजार उन्नीस म संसद म पास होय रिहीस।
मुख्यमंत्री कैंप कार्यालय
मुख्यमंत्री विष्णुदेव साय ह आज जशपुर स्थित अपन गृहग्राम बगिया म मुख्यमंत्री कैंप कार्यालय के सुभारंभ करीन। ए मउका म मुख्यमंत्री ह किहीन कि ए कार्यालय ल खोले के उद्देस्य मुख्यमंत्री के जनता ले निकटता अउ सरलग संपर्क बनाय रखना हे, जेखर ले जनता आसानी ले अपन बात मुख्यमंत्री तक पठो सकत हे। ओमन किहीन कि जनता अउ परशासन म सही काम म रहे। उहे, जनता के विचार ल सुने ले समस्या के समाधान म आसानी होथे। ए मउका म श्री साय ह पूर्व प्रधानमंत्री अटल बिहारी वाजपेयी के मूर्ति के अनावरण घलो करीन।
केंद्रीय सशस्त्र बल परीक्षा
केंद्रीय सशस्त्र पुलिस बल म सिपाही मन के भर्ती परीक्षा अब हिन्दी अउ अंग्रेजी के संगे तेरह ठिन आने भाखा मन म घलो होही। ए निर्णय केंद्रीय सशस्त्र पुलिस बल मन म स्थानीय जवान लइका मन के भागीदारी अउ क्षेत्रीय भाखा मन ल बढ़ावा देके उद्देस्य ले गेहे। ए बछर बीस फरवरी ले सात मार्च तक देस के एक सौ अठ्ठाइस ठिन सहर मन म कांस्टेबल भर्ती परीक्षा होना हे, एमा अभ्यर्थी मन हिंदी अउ अंग्रेजी के संगे असमिया, बंगाली, गुजराती, मराठी, मलयाजम, कन्नड़, तमिल, तेलगु, उड़िया, उर्दू, पंजाबी, मणिपुरी अउ कोंकणी भाखा म घलो परीक्षा दे सकही।
संस्कृति मंत्री-अरपा महोत्सव
प्रदेस के संस्कृति मंत्री बृजमोहन अग्रवाल ह किहीन हे कि राज्य सरकार के लक्ष्य विकास के रोसनी ल हर घर तक पठोना हे। ओमन किहीन कि गरीब मनखे, किसान, जवान लइका अउ माईलोगिन ल प्राथमिकता म राखके सरकार ह नवा-नवा योजना सुरू करत हे। श्री अग्रवाल ह गौरेला-पेण्ड्र-मरवाही जिला के गठन के चौथा वर्षगांठ म अरपा महोत्सव के सुभारंभ मउका म जनसभा म बोलत किहीन कि ए जिला ल पर्यटन जिला के रूप म चिन्हारी देवाय बर जम्मों कोसिस करे जाही। संगे विकास के आने सबो कार्य घलो होही। ए मउका म श्री अग्रवाल ह पेण्ड्रा बायपास के स्वीकृति एक महिना भीतर देवाय के अस्वासन दीन। संगे ओमन जिला के विकास बर करीबन छत्तीस करोड़ रूपिया के लागत वाले सत्तर ठिन विकास काम के लोकार्पण अउ भूमिपूजन करीन।
भाजपा-गांव चलो अभियान
भारतीय जनता पार्टी के प्रदेस इकाई डहार ले ए बेरा राज्य म गांव चलो अभियान चलाय जात हे। प्रदेस संगठन महामंत्री पवन साय ह कांकेर जिला के हाराडुला गांव अउ विधायक गोमती साय ह जशपुर जिला के मुंडाटोली गांव पहुंचिन। ए दौरान ओमन लोगन मनके समस्या सुनिन उहें, केंद्र अउ राज्य सरकार के जन-कल्याणकारी योजना बारे म जानकारी दीन।
मुख्यमंत्री घोषणा
मुख्यमंत्री विष्णुदेव साय ह छत्तीसगढ़ म चौदह फरवरी के माता-पिता पूजन दिवस मनाय के घोसना करीन। आज जशपुर जिला के कंडोरा गांव म राखेगे मातृ-पितृ पूजन करीकरम म ओमन किहीन कि माता-पिता याने दाई-ददा के सेवा ले बड़के कुछू नइ होय एखरे सेति हमन ल हर दिन अपन बाप-महतारी के गोड़ छूके आसिरवाद लेना चाही। मुख्यमंत्री ह पश्चिम सभ्यता ले दूरिहा रइही के अपन मां-बाप के सेवा अउ उंखर नाव उज्जर करे बात किहीन।
मुख्यमंत्री -जशपुर
मुख्यमंत्री विष्णुदेव साय ह किहीन हे कि जशपुर ह सिकल सेल मुक्त जिला बनही। ओमन किहीन कि अवईया पीढ़ी ल ए रोग ले बचाय बर हर तरह ले परयास करे जाही। संगे यहू बताइन कि जिला प्रशासन के पहल पाय ले ए रोग ले पीड़ित मरीज मन के उपचार बर सबो जरूरी इंतजाम करे गेहे। श्री साय ह किहीन कि मरीज मनके भर्ती उपचार व्यवस्था के संगे जरूरत पड़े म खून के व्यवस्था घलो जिला अस्पताल म करे गेहे। ए मउका म जिला चिकित्सा अउ स्वास्थ्य अधिकारी ह बताइन कि जिला म सिकल सेल के वालेंटियर मन सिकल सेल ल लेके लोगन मन ल जागरूक करत हे।
मुख्यमंत्री ह अपन जशपुर दउरा बेरा गृहग्राम बगिया म स्व-सहायता समूह के नारी-प्राणी मन ले भेंट करके उंखर काम-काज बारे म जानबा लेवत उंखर मनके काम ल सहराइन घलो। ए मउका म श्री साय ह किहीन कि स्व-सहायता समूह म जादा ले जादा माईलोगिन मन ल जोड़े जाय जेखर ले ओमन ल रोजगार मिलय अउ ओमन आर्थिक रूप ले स्वलंबी हो सकय। ओमन यहू किहीन कि स्व-सहायता समूह मनके प्रोडक्ट ल मार्केट देवाय बर जिला प्रशासन के पहल ले जशपुर ब्राण्ड के नाव ले बिक्री बर परयास करत एखर नाव म अलग ले वेबसाइट घलो बनाय गेहे। अपन जशपुर दउरा बेरा मुख्यमंत्री ह एमर्जिंग जशपुर कारीकरम म घलो सामिल होइन।
भारत जोड़ो न्याय यात्रा
कांग्रेस नेता अउ सांसद राहूल गांधी के भारत जोड़ो न्याय यात्रा आज रायगढ़ जिला के दर्रामुंडा ले महात्मा गांधी मूर्ति जघा पहुंचिस। ए दौरान राहुल गांधी ह महात्मा गांधी के मूर्ति उपर हार-फूल चढ़ाइन। ए मउका म प्रदेस प्रभारी सचिन पायलट, नेताप्रतिपक्ष चरण दास महंत, प्रदेस कांग्रेस अध्यक्ष दीपक बैज अउ खरसिया विधायक उमेश पटेल मौजूद रिहीन।
तहां पाछू भारत जोड़ो न्याय यात्रा सक्ती पहुंचिस। ए दौरान कार्यकर्ता अउ पदाधिकारी मन यात्रा के जघा-जघा स्वागत करीन। ए मउका श्री गांधी ह जनता ल संबोधित घलो करीन। कारीकरम म पूर्व मुख्यमंत्री भूपेश बघेल घलो मौजूद रिहीन।
भारत जोड़ो न्याय यात्रा काली बारह फरवरी के कोरबा पहुंचही।
आईईडी विस्फोट-जवान घायल
बीजापुर जिला म आज माओवादी मन डहार ले लगाय गे विस्फोटक के चपेट म आय ले केंद्रीय सशस्त्र बल-सीएएफ के एक झिन जवान घायल होगे हे। मिले जानकारी मुताबिक सीएएफ के दल ह डूमरीपालनार कैंप ले एरिया डॉमिनेसन बर निकले रिहीस तभे तिमेनार तीर माओवादी मन डहार ले सुरक्षा बल मन ल नुकसान पहुंचाय के उद्देस्य ले माओवादी मन डहार ले लगाय विस्फोटक के चपेट म आय के सेति एक झिन जवान घायल होगे। घायल जवान मन ल प्राथमिक उपचार बर हेलीकॉप्टर ले रईपुर लाय गीस। उहें, सुरक्षा बल मन मउका जघा ले पांच-पांच किलो के तीन ठिन आईईडी बरामद करीन जेला बाद म निष्क्रिय करे गीस।
अउ अब थोरकुन समाचार सार म –
– एकात्म मानववाद के प्रणेता पंडित दीनदयाल उपाध्याय के आज पुण्यतिथि हरय। मुख्यमंत्री विष्णुदेव साय ह ए मउका म उनला सुरता करत माथ नवाइन। उंहा रईपुर के कई ठिन जघा म भाजपा कार्यकर्ता मन दीनदयाल उपाध्याय ेक पुण्यतिथि म अपन श्रध्दासुमन अर्पित करीन।
– राजनांदगांव जिला स्थित एक ठिन प्राइवेट बैंक म नकली सोना राखके अड़तालीस लाख रूपिया लोन लेके मामला आगू आय हे। ए मामला पुलिस ह बैंक ग्राहिक अउ अधिकृत सोना-चांदी वाले खिलाफ धोखाधड़ी के मामला दर्ज कर लेहे।
अउ
– कोंडागांव जिला म पढ़इया लइका मन ल परीक्षा के पहिली कइसे तनाव मुक्त रहय अउ परीक्षा ल एक ठिन परब के रूप म लेवय ए लक्ष्य खातिर नगर-पालिका ऑडिटोरियम म परीक्षा पर्व उपर वर्कशॉप राखे गे रिहीस।