मुख्यमंत्री विष्णु देव साय ह किहीन कि प्रदेस म अपराध, नसाखोरी, अउ अवैध गतिविधि उपर राज्य सरकार के जीरो टॉलरेंस के नीति हवय। अपराध उपर नियंत्रण नई होइस त संबंधित जिला के पुलिस अधीक्षक के संग थाना स्तर के पुलिस अधिकारी मन उपर घलो कड़ा कार्रवाई करे जाही। मुख्यमंत्री ह आज नवा रायपुर स्थित पुलिस मुख्यालय म राखेगे पुलिस महानिरीक्षक अउ पुलिस अधीक्षक मनके सम्मेलन म बोलत हुवे ए बात किहीन। ओमन यहू किहीन कि पुलिस ल लेके अपराधी के मन म डर अउ आमलोगन के मन म सम्मान के भाव होना चाही। सराब, जुवा, सट्टा जइसन सामाजिक बुराई ह समाज ल भीतर ले खोखला कर देथे। जब जवान लइका मन एखर ले परभावित होथे तो ए ह सबले जादा चिंता जनक हे।
मुख्यमंत्री ह किहीन कि प्रदेस के माओवाद परभावित क्षेत्र म हमर जवान मन कठिन परिस्थिति म माओवादी मनसे मुकाबला करत हे। राज्य सरकार हर मोर्चा म पुलिस कर्मी मन संग खड़े हवय अउ ओमन के सुविधा म कोनो कमी नइ होवन दे जाही। ए बइठका म उप मुख्यमंत्री विजय शर्मा अउ पुलिस महानिदेसक अशोक जुनेजा ह घलो बइठे रिहीन।
केंद्रीय गृहमंत्री-सीएए
भारतीय जनता पार्टी के नेता अउ केंद्रीय गृहमंत्री अमित शाह ह किहीन हे कि अवइया लोकसभा चुनाव ले पहिली नागरिकता संसोधन कानून ल अधिसूचित करके लागू कर दे जाही। आज ईटी नाउ वैश्विक व्यापार सम्मेलन म ओमन किहीन कि ए कानून ह नागरिकता देहे बर हे अउ एखर ले कोनो के नागरिकता नइ जाही।
गृहमंत्री ह किहीन कि देस के इतिहास म पहिली बार ए बछर के आम चुनाव ह दू हजार सैंतालीस तक भारत ल विकसित राष्ट्र बनाय बर लड़े जाही। ओमन किहीन कि विकसित भारत बर अधिकतर काम के सुरूआत प्रधानमंत्री नरेंद्र मोदी के तीसरइया कार्यकाल म होही।
मंत्रिपरिषद निर्णय
प्रदेस के आदिवासी बाहुल्य बस्तर अंचल के दूरिहा क्षेत्र म घलो प्राथमिकता के संग सड़क, स्वास्थ्य, शिक्षा, पेयजल अउ बिजली जइसन जरूरी सुविधा पहुंचाय जावत हे। सुकमा जिला के इत्तेपारा गांव म एक बछर के बाद लोगन मन ल फेर बिजली मिले लगे हे। पूरा गांव ह बिजली के अंजोर ले जगमगावत हे। बिजली के सुविधा मिले ले गांव के मन ह मुख्यमंत्री विष्णुदेव साय अउ उपमुख्यमंत्री विजय शर्मा के आभार व्यक्त करे हे। सुनइया मन ल बतादन कि उपमुख्यमंत्री विजय शर्मा ह पाछु तीन फरवरी के सुकमा जिला के प्रवास म इत्तेपारा गांव के भ्रमण करके उंहा के मनखे मनसे भेंट करे रिहीन।
महतारी वंदन योजना
प्रदेस म महिला सशक्तिकरण ल बढ़ावा दे बर सुरू करे गे महतारी वंदन योजना के आवेदन जमा करे के काम चालू हो गेहे। ए योजना के तहत प्रदेस म अभी तक करीबन साढ़े पैंतीस लाख आवेदन मिल चुके हे। सुनइया मन ल बतादन कि ए योजना के तहत पात्र माइलोगिन मन ल हर बछर बारा हजार रूपिया के सहायता रासि दे जाही।
क्रेडा निर्देश
क्रेडा के मुख्य कार्यपालन अधिकारी राजेश सिंह राणा ह बताइन कि क्रेडा कोति ले संचालित योजना मनके मॉनिटरिंग अउ उपभोक्ता मनसे मिले शिकायत के निराकरण बर प्रभावी बेवस्था लागू कर दे गेहे। एमा, सब्बो संयंत्र के सरलग अउ सुघ्घर संचालन ल पक्का करे बर क्रेडा संचालन अउ संधारण शाखा के अधिकारी मनके टीम तियार कर जिम्मेदारी देवत हुवे दिशा-निरदेस जारी करे गेहे।
क्रेडा के पहिली ले स्थापित अउ अभी बनत हुवे संयंत्र के गुणवत्ता के मॉनिटरिंग बर गुणवत्ता सेल के गठन करे गेहे। संगेसंग प्रधान कार्यालय लेबल म इलेक्ट्रॉनिक गजट, वेब पोर्टल अउ टोलफ्री नम्बर ले बंद संयंत्र ले जुड़े सिकायत दर्ज कराय अउ ओखर निराकरण के निरदेस घलो जारी करे गेहे।
बेमेतरा-न्यायालय भवन
छत्तीसगढ़ उच्च न्यायलय के मुख्य न्यायाधीश रमेश कुमार सिन्हा ह जिला मुख्यालय बेमेतरा म अधिवक्ता अउ पक्षकार मनके बेहतर सुविधा अउ न्याय प्रणाली म तेजी लाय बर नवा भवन के वर्चुअल भूमिपूजन करीन। ए नवा भवन, कलेक्ट्रट के तीर बनही। भवन बर करीबन सात एकड़ भूमि आवंटित करे गेहे। भूमिपूजन कारीकरम म छत्तीसगढ़ उच्च न्यायलय के न्यायाधीश गौतम भादुड़ी, विशिष्ट अतिथि के रूप म सामिल होइन। ए मउका म श्री भादुड़ी ह किहीन कि नवा भवन बने ले अधिकारी-करमचारी के कार्यक्षमता घलो बाड़ही।
लोक निर्माण विभाग के अधिकारी निर्मल सिंह ह बतईन कि ए नवा जिला मुख्यालय भवन करीबन बारा करोड़ रूपिया के लागत ले बनही। भवन म अधिवक्ता कक्ष अउ शासकीय अभिभाषक कार्यालय के निर्माण करे जाही।
माओवादी-आत्मसमर्पण
बीजापुर जिला म राज्य शासन के आत्समर्पण अउ पुनर्वास नीति ले परभावित होके पांच लाख रूपिया के एक ईनामी माओवादी समेत अउ तीन माओवादी मन पुलिस के आघू आत्मसर्पण करे हे। आत्मसमर्पण करइया माओवादी मन के उपर आने-आने थाना म मामला दर्ज हे अउ कतकोन हिंसक घटना म सामिल होय के घलो आरोप हे। ए चार माओवादी मन ल आत्मसर्पण अउ पुनर्वास नीति के तहत पच्चीस-पच्चीस हजार रूपिया के प्रोत्साहन रासि नगद दे गेहे।
आरक्षक मौत
सारनाथ एक्सप्रेस म आज बिहनिया आरपीएफ के एक आरक्षक के बंदूक ले अलकरहा गोली चले ले उंखर मउत होगे। अउ एक आने यात्री ह गंभीर रूप ले घायल होगे। रेलवे ले मिले जानकारी अनुसार छपड़ा ले दुरूग जावत सारनाथ एक्सप्रेस म उसलापुर स्टेसन ले रईपुर स्टेसन बर आरपीएफ के टीम ह गस्त करत रिहीन। रईपुर स्टेसन म एसटू कोच ले उतरत बेरा म एक आरक्षरक के बंदूक ले अलकरहा गोली चलगे। जउन ह उही आरक्षक ल लगीस अउ गोली ह ओखर शरीर ले निकल के उपर के बर्थ म सुतत एक झन यात्री ल घलो लग गे। ए घटना म ओ आरक्षक के मउत होगे अउ घायल यात्री ल रईपुर के एक निजी अस्पलाल म भर्ती कराय गेहे।
उंहे, रईपुर के गंज थाना क्षेत्र म पाछु रतिहा सशस्त्र बल के आरक्षक रोहित सलामें ह खाद्यमंत्री के बंगला के गार्ड रूम म अपन सर्विस रिवाल्वर ले खुद ल गोली मारके आत्महत्या कर लीस। पुलिस ह आत्महत्या के कारण के जांच करत हे।
गुंडाधूर-भूमकाल दिवस
आज भूमकाल स्मृति दिवस हे। ए मउका म मुख्यमंत्री विष्णुदेव साय ह आदिवासी जननायक अमर सहीद गुंडाधुर ल नमन करीन। श्री साय ह किहीन कि आदिवासी मन के जल, जंगल अउ जमीन बर अंग्रेज सरकार के खिलाफ विद्रोह ल सुरू करइया नायक गुंडाधुर के बलिदान ऐतिहास म हमेसा अमर रइही।
उहें, जिला मुख्यालय नारायणपुर म घलो भूमकाल स्मृति दिवस मनाय गीस। ए मउका म कलेक्ट्रेट परिसर म लगे सहीद वीर गुंडाधुर के मूर्ति म माला अउ फूल चढ़ाय गीस। एखरे संग गोड़वाना भवन बखरूपारा म होय सभा म आदिवासी जन-नायक मनके योगदान ल सुरता करे गीस।
सुनइया मन ल बतादन कि अमर सहीद गुंडाधुर के अगुवई म सन् 1910 म बस्तर म होय भूमकाल आंदोलन म आदिवासी मन ह अंग्रेज सरकार के खिलाफ संघर्ष करे रिहीन। गुंडाधुर ह बस्तर के मूल निवासी मनके अधिकार बर अपन सहादत दे रिहीन। उंखर सुरता म भूमकाल स्मृति दिवस मनाय जाथे।
’’टॉक-टू-रायपुर’’ कार्यक्रम
रईपुर कलेक्टर डॉ. गौरव कुमार सिंह अउ वरिष्ठ पुलिस अधीक्षक संतोष कुमार सिंह ह परन दिन बारा फरवरी के रइपुर के सहीद स्मारक ऑडिटोरियम म होवइया ’’टॉक-टू-रायपुर’’ कारीकरम म जिला म काम करत स्वंयसेवी संगठन के पदाधिकारी मन संग गोठबात करहीं। एमा, सोशल मीडिया इंफ्लूएंसर, यूट्यूबर अउ ब्लॉगर मन घलो जुरही। इही बीच, नगर विकास ले जुड़े आने-आने काम म स्वंयसेवी अउ सामाजिक संगठन के सकारात्मक भूमिका अउ नवाचार उपर घलो गोठबात होही।